Kātaki ʻOua ʻE Tuku Hoʻomou Hivá

ʻĪmisi

colorful bus

Faitaaʻi ʻe Rob Crandall/Alamy Stock Photo

Ne mau toki mavahe mai ko ha kau faifekau ʻe toko fā mei he ʻapi ʻo ha ongo faifekau mali matuʻotuʻa, ʻi he taimi ne mau taʻofi ai ha pasi ke mau heka ʻo foki ai ki homau feituʻú.

Ne mau tuʻu feʻefiʻefihi pē ʻi heʻemau fuʻu tokolahí mo piki ki he pā ukameá ʻi ʻolunga homau ʻulú. Ne taimi siʻi pē ʻemau tuʻú, mo e faʻaki atu homau sinó ki he kau pāsese ne tangutú ke fakaʻatā ha potu maʻá e kau pāsese kehe ne heka haké.

Naʻe tangutu ha fefine taʻu fāngofulu tupu ʻi lalo ʻi hoku tafaʻakí, ʻo hili ʻi hono fungá ha ʻū kato fakatau mo ha ngaahi puha. Naʻe hā mei hono fofongá ʻokú ne helaʻia, pea talamai ʻe hono fofongá ʻa ʻene ongoʻi taʻefiemālie ʻi heʻene tangutu ʻi ha pasi tokolahi ʻi he lotolotonga ʻo e ʻea pikipiki mo vela ʻo Panamaá.

Naʻá ku kuikui, ʻo fakakaukauloto ʻoku ou lava ʻo namuʻi e meʻatokoni faka-Siaina naʻe teuteu ʻe heʻeku faʻeé mo hoku ngaahi tuofāfiné ki he maʻu meʻatokoni efiafi ʻo e Efiafi kimuʻa he Kilisimasí. Naʻá ku toe fakakaukauloto foki ʻoku ou lava ʻo fanongo ki he hiva Kilisimasi naʻe faʻa tā maʻu pē ʻe he Fineʻeikí. Ne ʻikai fuoloa kuo tafia atu ʻe he ngaahi fakakaukau fakafiemālie ko iá ʻa e vela mo e hauhau ʻo e ʻeá, pea kamata ke u ngūnguuʻi ha hiva Kilisimasi. Naʻe fiemālie e fofonga ʻo e fefine ʻi lalo ʻiate aú. Naʻá ku maʻu ha loto-toʻa pea kamata ke u hivaʻi ha himi Kilisimasi ʻi he lea faka-Sipeiní. Ne kau hake mo ʻEletā Keleisiā, peá ma toki fakalongolongo.

Naʻe pehē hake ʻe he fefiné, “Kātaki, ʻoua muʻa ʻe tuku hoʻomo hivá” mo ʻene fakatē loʻimatá.

ʻI heʻeku sio ki hoku ngaahi hoá, ne u toʻo hake ʻeku tohi himí.

Ne u ui atu ʻi he lolotonga longoaʻa ʻa e pasí, “ʻE Kāinga.” ʻI hono toʻo hake ʻe hoku ngaahi hoá ʻenau tohi himí, naʻá ku toe pehē ange, “ʻOku mau fie hivaʻi atu ha ngaahi hiva Kilisimasi ke vahevahe mo kimoutolu ʻa e laumālie ʻo e Kilisimasí—ko ha kiʻi pōpoaki siʻisiʻi mei he kau faifekau ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.”

Ne mau hivaʻi e foʻi himi Kilisimasi kotoa pē ʻi he tohi himi faka-Sipeiní. Naʻe ʻikai ko ha kuaea fakalangi kimautolu, ka naʻe ongo ki he lotó ʻa e mālohi ʻo e hivá mo e ngaahi lea fekauʻaki mo hono ʻaloʻi ʻo e Fakamoʻuí. Naʻe fakafonu ʻe he fiefia ʻo e ngāue ʻi he malaʻe ʻo e ngāue fakafaifekaú lolotonga e Kilisimasí ʻa kimautolu ko e kau faifekau ʻe toko fā ʻaki ha melino, fiefia mo e maama.

Ne mau hiva kae ʻoua kuo mau aʻu ki he tauʻanga pasí. Naʻe fiefia ʻa e fefine ʻi lalo ʻiate aú mo ne pehē mai, “Mālō, kau hiva Kilisimasi!”

Hili ʻemau hifo mei he pasí, naʻa mau taʻataʻalo fakamāvae ki he meʻalele pāsese tokolahí ni. Naʻe pasipasi e kau pāsesé ʻi he mavahe atu ʻa e pasí, pea mau kaka ʻi ha tafungofunga ʻi he pō ʻea māfana ko iá. ʻOku ou houngaʻia maʻu pē he pō ko iá koeʻuhí ko e fefine naʻá ne ʻomi ha faingamālie ke mau fakamoʻoni ai ki he Fakamoʻuí ʻo fakafou ʻi he hivá.