“Vakasaqarai ni Veidusimaki Vakayalo,” Liaona, Sepiteba 2022.
Nodra na iTubutubu
Vakasaqarai ni Veidusimaki Vakayalo
Kemuni na iTubutubu,
Ena ilavelave ni mekasini oqo, eratou wasea kina e tolu na Vakaitutu Raraba na ivakavuvuli kei na veika eratou sotava vaka tamata yadua ka vakamatavuvale ena ivakarau me vakasaqarai, kunei, ka muri kina na veidusimaki vakayalo.
Veivosakitaki ni Kosipeli
Vakararavi kina Noda iVakadinadina
Ena tabana e 4, e wasea kina o Elder Ronald A. Rasband e dua na italanoa mai na nona ivola ni kawa me vakavulica kina na ivakavuvuli ni na sega ni biuti keda na noda iVakabula. Wilika na nona itukutuku ka veivosakitaka na sala era a vakararavi kina na Yalododonu taumada ena nodra ivakadinadina baleti Jisu Karisito kei na ituvatuva ni veivakabulai i Tamada Vakalomalagi.
Veivakasalataki vata kei na Turaga
Ena tabana e 30, e vakamacalataka kina o Elder Patricio M. Giuffra na nona a saumaki mai vakacauravou ki na Lotu, ka lewa me laki kaulotu ka tomana na nona vuli torocake. Qai wasea o koya na nona isau ni taro, Na cava o cakava ni yaco me veisaqasaqa na ivakatakila ni tamata yadua kei na vakasama matau?
Ciqomi ni Veidusimaki mai vua na Yalotabu
E rawa vakacava nida vakalougatataki vakataucoko cake mai na isolisoli ni Yalo Tabu ena noda bula? E vakadikeva o Elder José A. Teixeira na ulutaga oqo ena tabana e 40. Wilika na nona itukutuku ka veivosakitaka na sala me rawa ni ciqomi vakalevu cake kina na veidusimaki vuabale mai vua na Yalotabu.
Lako Mai, Mo Muri Au Lasa ni Matavuvale
Tugana na Salatu
-
Biuta e dua na iyaloyalo ni iVakabula ena dua na yasa ni dua na vanua galala levu se rumu.
-
Laki tucake tu ena yasa kadua ni rumu. Veivukevuke ena vesuki ni matadra na lewe ni matavuvale vakayadudua, cowiritaki ira ena dua na iwirini, ka qai raica kevaka e rawa ni ra lakova yani na iyaloyalo kei Jisu Karisito ni sega ni ra vukei.
-
Wilika Na Vosa Vakaibalebale 4:26–27.
Veivosaki: Na mataqali veivuke cava soti sa soli vei keda ena bula oqo me maroroi keda tiko ena salatu e muataki keda kivei Jisu Karisito? Me baleta na ikuri ni veivosaki, wilika Na Vosa Vakaibalebale 3:5–6. Na ivalavala cava soti eda gadreva me da taura meda nuitaka kina na Turaga ena yaloda taucoko?