Taura Yadudua na Veisiga

iVakatakilakila

cauravou

iTaba kei Josua e lolomataka na dauvolaivola

Ni sa vula 18 na luvei keirau tagane o Josua, keirau a raica na veika duatani ena nona itovo. E rawa ni cavuqaqataka o Josh na veivosa yadua ni sere yadua ena retio iyaloyalo e sarava, ia a bera ni vulica me vosa. Ena dua na siga a kaya o tinai watiqu ni a vakaraitaka o Josh na ivakatakilakila ni bera ni vakasama. Era tukuna vei keitou na kenadau na ka vata oqori.

Na watiqu o Elizabeth, a vulica vakai koya ena veika volai baleta na bera ni vakasama. A vakacuruyaca talega baleti Josh ena parokaramu me vukei koya. Sa nakita dei okoya ni na nei cauravou na tekitekivu vinaka duadua ena bula oqo keirau rawa ni solia vua.

Ena veisiga au dau lomaleqataka na veisiga ni mataka e dau vakamaravutaki au o Ilisapeci. E dau kaya vei au ni keirau gadreva me keirau taura yadudua na veisiga.

“E gadrevi me daru vakavinavinakataka na veika vou kece e vulica o Josh ka sega ni vakanamata ki na veika tawakilai kece ni veisiga ni mataka,” e kaya okoya.

Ni sa tubu cake tiko, a yaco me dau vakasausa o Josh ena lotu. Me tarova nona vakacaca ki na Lalai se vakamavoataki ira na gone, au dau tenei koya. A dau moqe okoya, veikadru, ka veibo kei au ena tolu kece na auwa ni lotu. Au dau suka wasoma ki vale niu dabuiloa ka wawale.

“Cava daru sega ni biuti koya tu ga kina i vale mai na lotu ka veivukevuke ni tiko vata kei koya?” Au vakatututaka.

“Kevaka daru sega ni kauti koya tikoga,” e sauma o Elizabeth, “ena vulica o koya ni kevaka e vukica, sa na biubiu mai na lotu.” Au kila ni dina o koya.

Ena dua na siga a tukuna vei au o tina ni dua tale na gone bera ni vakasama, “Ni sa yabaki walu o Josh ka taura na Yalo Tabu, ena talei cake mai o koya!”

Au a vakatitiqataka na nona vosa, ia ni sa yabaki walu, a ciqoma na Yalo Tabu ka qai talei cake—vakalailai.

Ni sa qase cake mai o Josh, a ciqoma na matabete. A vota yani na sakaramede, ka vulica na bibi ni veiqaravi. Era a vulica na lewe ni nona kuoramu ni matabete e dua na danisi ki na dua na vidio sereivakatagi ni ‘80s vata kei Josh ka meketaka ena dua na soqo ni tabanalevu.

E vakasakiti na neitou tabanalevu vei Josh. Era matadredredre na lewenilotu ni na veisoliyaka na sakaramede ni musuka tiko e vica na danisi ni ‘80.

Sa yabaki 17 tiko oqo o Josh. O koya e dua na dauvakatagi vakataledi ka dauvola sere. E dau taleitaka na vakatasuasua ka dau laurai wasoma e koronivuli kei na vale ni vakatasuasua ni itikotiko.

Keirau vakavinavinaka ni keirau itubutubu nei Josh ka wasei ena nona ilakolako. Keirau sega ni kila na veika sa tu ena veisiga ni mataka, ia keirau sa yalataka me keirau bula vakataucoko ena veisiga yadua vata kei koya.