“Tovolea Tale Mada,” Liaona, Sepi. 2022.
Domodra na Yalododonu Edaidai
Tovolea Tale Mada
Au a osooso ena caka vinaka, ia na noqu veiwekani kei na Turaga a leqa baleta niu a vakawalena e dua na ka bibi cake.
Niu vakacavara na noqu kaulotu ena Janueri 2019, au dei niu na tomana tikoga na noqu vulica na ivolanikalou e veisiga. Taumada, a dina oya. Ni oti na cakacaka, au na lako mai vale ka wilika na noqu ivolanikalou me vaka na cariba ni kaloko. Au a marau niu se dina tikoga ki na wili ivolanikalou kei na vulici ni iVakabula.
A veisau oya ena June ni 2019 ni lesu mai na noqu itau cauravou mai na nona kaulotu. Keirau sa tekivu veigadivi sara vakatotolo ka keirau veimusuki ni oti e ono na macawa.
Ena osooso ni kena tuvai e dua na soqo ni vakamau, cakacaka, gole ki na koliji, kei na gauna vata kei noqu itau, sa tekivu luluqa ki na vakavica ga ena dua na macawa na noqu vulica na ivolanikalou. Baleta niu a vakawelei ena veika vinaka, au a wele ka vakawalena na noqu veimaliwai kei na Turaga.
Keirau a vakamau kei na watiqu ena Noveba ni 2019. Ni oti na olodei, au saga meu tomika cake na vanua au a biubiu kina ena ivolanikalou. Ena vica na vula, keirau a vulica vata vakaveiwatini na ivolanikalou. Veimataka me vica na miniti keirau na wilika na ivolanikalou ka veitalanoataka e dua na lesoni ni Lako Mai, Mo Muri Au ni bera ni keirau cici yani ki katuba me laki cakacaka se ki koronivuli.
Sa qai tava na vula ni matedewa na COVID-19. Ni sa sega na ituvatuva vagauna ni vuli kei na cakacaka, sa yali na matau ni neirau vuli ivolanikalou ena mataka. Keirau vuli ga ena gauna eso, ka neirau veiwekani kei na Turaga e sa vakaleqai. Ni oti mada ga na laveti ni vakatatabu ka keirau lesu ki lotu, keirau se saga dredre tiko ga me keirau vuli.
E dau tiko na gauna vei ira na lewe ni Lotu ni ra dau saga dredre me ra dau wilika wasoma na nodra ivolanikalou. Sa osooso na noda bula, ka da sotava na dredre ena veisiga yadua. Ia e sega ni sa rui bera me da tekivu tale.
“E sega ni namaka na Turaga me da taucoko sara ena gauna oqo ena noda itosotoso ki na bula tawamudu,” a kaya o Peresitedi Russell M. Nelson: Ia, a tomana, “o keda kece eda rawa ni caka vinaka cake ka vinaka cake.”1
Keirau a qai yalayala vou wale tikoga oqo kei watiqu me keirau wilika na neirau ivolanikalou. Keirau se sega tikoga ni vinaka sara kina, ia keirau saga e veisiga me keirau vaqaqacotaka na neirau ivakadinadina. Au vakavinavinaka ena vuqa na madigi e solia vei keda na Turaga meda veivutuni, caka vinaka cake, ka vinaka cake.