Na iVakarau me Levei kina na Vakilai ni Tao

Nida segata meda bulataka na kosipeli me vaka e dua na uabula sega ni vakawati, e rawa ni dredre meda kua ni vakanamata kina veitiki eso ni noda bula eda diva tu me duatani. Ena so na gauna e vaka nida tavutu ena dua na buca cecere ena noda itosotoso. Vei au, na vakilai oqori ni tao ena so na vanua e vaka me dau voka ka taladrodro, ka rawa ni tomani au tu me vica na siga, vula, ka vakamalua me vica na yabaki sara mada ga. E dau levu tu ga na vuna meu marau kina ka vakila na vinaka ni bula, ia ena dua na gauna, a tarai au vakabibi sara na vakilai ni tao oqo.

Ena gauna oya, a kerei au na vugoqu yabaki tinivakacaca me tiko mada vata kei au. A kila o koya na gadrevi ni lalawa eso ena nona bula ka mani kere ivakasala. Au a sega ni vakila ni’u tu ena dua na itutu dei me’u solia kina na lewa vuku cecere, ia au a vakarorogo. Au kila ni rawa ni’u “tagi yani” vua na Kalou me veivuke (raica na Alama 34:17–27) ka masulaka meu rawa ni kaya e dua na ka e vakaibalebale vua. Ena kena isau, au a nanuma sara na Luke 2:52: “A sa tubucake ko Jisu ena vuku kei na yagona talega, a sa vinakati koya vakalevu cake tikoga na Kalou kei ira talega na tamata.”

Ni’u saga meu vakanamata ga kina gagadre ni vugoqu mai na noqu vakai au, a tekivu me veisau mai vei au e dua na ka. Keirau a veivosakitaka kei na vugoqu na sala a tubu cake kina vakayalo, vakaveimaliwai, vakayago, kei na vakasama na Karisito. E dina ga ni duidui na gagadre ni vugoqu mai na noqu, na va na veiwase ni tubu oqo era a veiganiti sara ga vei keirau ruarua. Ni’u wasea tiko na ivolanikalou oqo, au qai kila ni a sauma tiko na noqu taro me baleta na sala meu galala kina mai na tao.

Ni’u segata meu tubu me vaka na iVakabula, a veisau na noqu vakanamata, ka kauta mai na ikuri ni veivakalougatataki na veisau oya. Me vaka a kaya o Peresitedi Russell M. Nelson: “Na reki eda vakila e vakatau vakalailai sara ena ituvaki ni noda dui bula ia sa baleta vakatabakidua na veika e vakanamata kina na noda bula.”¹ Na noqu sasaga meu tubu me vakataki Jisu Karisito vakalevu cake a vukea me dreta laivi na vakasama mai na veika a vesuka tu na noqu vakanamata ka vagoleya kina veivanua au rawa ni cakacakataka kina vakavinaka. Au a rawa ni toso mai na vakanananu e loma kina cakacaka e taudaku.

Au a vakasamataka vagumatua na ivakarau meu tubu kina ena veiwase yadua ka tukuni tiko ena Luke 2:52, mai na curumi wasoma ni valetabu ki na vakacavari ni dua na veitau basikeli balavu.

iVakatakilakila

Valetabu e Memphis Tennessee

iTaba ni Valetabu e Memphis Tennessee mai vei James Whitney Young

Ena veiwase yadua ni noqu lalawa, au a cakava kina eso na vakadidike:

1. Ni’u cakacakataka tiko e dua na lalawa, au dau vakila wasoma ni vaqaqacotaki au na Karisito vakayalo, vakaveimaliwai, vakayago, ka vaka vakasama ena loma ni lalawa e dua oya.

2. E vakavudua sara, kevaka sara mada ga, a yaco e dua na lalawa vakatikitiki mai na veiwase tale eso ni tubu—e vaka mera veisemati tu vakai ira. Na vakavinakataki cake ena dua na iwase e veimuataki kina vakavinakataki ena veiwase tale eso. Na vakawaleni ni dua na iwase e tarai ira vakakina na veiwase tale eso. Au sa qai kila ni sa ganita me kauwaitaki na veiwase yadua.

3. E voleka ni lalawa yadua a okati kina eso tale na tamata—se na vuli mai vei ira se wasei ni vakasama kei na veika sotavi vata kei ira—ka vakatitobutaka na noda veimaliwai.

E dau tu ga na madigi vei au meu raica ka vakauqeti mai na nodra tubu na tani, ka’u nuitaka ni’u na rawa ni cakava vakakina vei ira. Au a veivosaki wale tikoga oqo kei na dua na itokani sega ni vakawati ka nuiqawaqawa voli ena rarawa me baleta eso na ituvaki ni bula. Au a vakarorogo meu kila vinaka, ka’u qai wasea na veika au sotava e a vukei au ka dusia lesu talega na veiwase yadua ni tubu vua na iVakabula.

E dina nira sega ni veisau na veiwase kece ni bula ka a vakataotaki au tu ena veiyabaki sa oti, au sa veisau ni’u sa vulica meu vakanamata vakalevu cake vua na iVakabula ka segata meu tubu me vakataki Koya. Me vaka a wasea o Peresitedi Nelson, “E levu na ka eda rawa ni lewa. Eda virikotora na veika me vakaliuci ka lewa na ivakarau eda vakayagataka kina noda igu, gauna, kei na veika e tu vei keda. … Eda digia ita meda gole kina me baleta na dina kei na idusidusi.”² Se cava ga na keda ituvaki, na veiwase ni tubu ena Luke 2:52 e rawa ni vukei keda meda veisautaka na noda vakanamata ka kunea na ikuri ni reki kei na toso mai vua na Tamada Vakalomalagi kei na iVakabula.