E Dua na iVakarau Qaqa ni Veisusugi

Mai na kosipeli i Jisu Karisito kei na vakadidike veitokoni me baleta na veisusu, keirau sa raica rawa kina e tolu na ivakavuvuli veidusimaki me baleta na nona susugi cake vaka vakasama ka vakayalo e dua na gone. Nira kau vata mai, na veitikina veisemati oqo ni kena vakabibitaki e bulia e dua na ivakarau kaukauwa e rawa ni vukea na veimatavuvale e vuravura raraba.

Na ivakarau oqo e kaukauwa baleta ni semata vata na dina ni kosipeli kei na vakasama bibi eso mai na vakadidike ni veisusu kei na tubucake ni gone. Na vakasaqarai ni ivakatakila yadudua ena sala mo bulataka kina na ivakavuvuli ena ivakarau oqo ena rawa ni vukei iko mo tara cake na veivakacokotaki ni nomu matavuvale ka tauyavutaka e dua na vuvale e kena usutu o Jisu Karisito.

Na ivakavuvuli veidusimaki e tolu oqo sa ikoya na:

1. Tauyavutaka na veiwekani loloma vakamatavuvale

2. Susuga cake na vuli kei na tubu

3. Tara cake na duavata kei na veivaqaqacotaki ena veiqaravi

Na ivakarau oqo e vukei keda meda vakanamata ki na veika e bibi duadua. Na tiki yadua ni ivakarau oqo sa dua na gacagaca bibi e vaqaqacotaka na noda matavuvale. Nira cakacaka vata, era vakauqeta na veimaliwai kei na veika sotavi vinaka, vukea noda matavuvale me walia na dredre, ka tara cake na rawaka kei na bula ni veivakacokotaki.

Nida tubu tiko vakaitubutubu, na ivakarau oqo e rawa ni dua na ituvatuva veivuke ena kena kunei na sala vinaka duadua meda vakavulica ka susuga cake kina na gone yadua.

Sa koto e ra e dua na rairaraba lekaleka ni veitiki yadua ni ivakarau kei na ivakaraitaki mai na bula ni iVakabula me tuberi keda ena noda bulataka na ivakarau oqo. Sa vakarautaki tu na ikuri ni itukutuku vakaitubutubu, vakasama matau, kei na isau ni taro ni veitubutubu kilai levu ena family.ChurchofJesusChrist.org.

Na ivakavuvuli oqo e vakananumi keda meda vakaliuca na veimaliwai loloma kei na Tamada Vakalomalagi, na iVakabula, na watida, kei ira na luveda. Na veimaliwai vakamatavuvale oqo era sa ka bibi sara. Na nodra kilai kei na veimaliwai tawamudu na luveda e tubu mai na dina bibi ni “oi keda yadua eda luvena tagane se yalewa lomani vakayalo na noda itubutubu vakalomalagi, ka tu na keda dui ituvaki kei na icavacava vakalou.”¹

E rawa nida vakayaloqaqataki ira mera yaco me ra kila na Kalou kei Jisu Karisito ena vakabauta, masu, vuli ivolanikalou, kei na ivakatakila yadua mai vua na Yalo Tabu (raica na Joni 17:3). E rawa nida vakauqeta na vakabauta ena noda susuga cake na nodra “gagadre me ra vakadinata” na luveda (Alama 32:27) ka vukei ira mera vakila na loloma ni Kalou. Sa ka bibi vei ira na luveda mera kila ni Tamada Vakalomalagi kei na iVakabula erau kilai ira vakataucoko, lomani ira vakavinaka sara, ka vinakata me vukei ira me ra qaqa (raica na Roma 8:38–39).²

Vaka itubutubu, sa ka bibi me tauyavutaki e dua na veimaliwai ni veilomani e sinai ena yalololoma kei na veikauwaitaki vei ira yadua na gone. Na kilai matata ni nodra rai kei na rogoci ena vakarokoroko ni veika era dau kaya na luveda e bulia e dua na veimaliwai veimaroroi ka veilomani. Era gadreva me kila na luveda ni da taleitaki ira, kauwaitaka na veika era vakila, ka tu vakarau me vukei ira. Na noda veimaliwai veikauwaitaki vata kei ira na luveda e vukei ira mera taracake e dua na rai vinaka me baleti ira, kila na kedra yaga tawamudu, ka bulia na veiwekani nuitaki kei na Kalou kei Jisu Karisito.

Me kena ikuri, sa rawa ni dua na veitokoni vakaitamera vakai ira na lewe ni matavuvale. E rawa ni da tara cake na veimaliwai vakamatavuvale nida soqoni vata me da sema, masu, veivakasalataki, ka veilasamaki.

iVakatakilakila

veivosaki tiko na itubutubu kei luvedrau yalewa

Susuga cake nodra tubu na luvemu ena nomu vakabibitaka na kedra ituvaki duatani, ka solia vei ira na loloma tawayavalati rawa, ka tokona na nodra sasaga. Vakaraica na vanua era tiko kina na luvemu ena nodra tubucake tiko ka moica na nomu veitokoni me veirauti kei na nodra gagadre vakatabakidua eso. Na nomu ivakaraitaki, veidusimaki, veituberi, kei na veivakayaloqaqataki sa ka bibi sara me susugi cake kina na nona rawaka kei na yalodei na luvemu. Dau lomatarotaro ka yalololoma nira sa dau vuli na luvemu ena veika era sotava.

Na itubutubu dauveisusu era sega talega ni dau veivakaogai sivia, yalorawarawa sivia, se veitokoni sivia. Na vakarautaki ni iyalayala e veiganiti, ivakarau tudei, kei na nanamaki e veirauti eso ena vakauqeta na tubu nei luvemu. Me vakataki Tamada Vakalomalagi, o ira na itubutubu e dodonu mera raicamatua cake na nodra tubucake na luvedra mai na nodra tiko vakacegu (raica na 2 Nifai 28:30; Vunau kei na Veiyalayalati 50:24, 40).

Liutaki, tuberi, ka lako vata kei ira na luvemu ni ra vulica tiko mera muri Jisu Karisito.³ Vakavulica vei ira na sala mera gole kina vua na iVakabula ka vakararavi ki na Nona Veisorovaki me vukea nodra tubu. Era na qai kunea vakamalua na luvemu mai na nomu ivakaraitaki kei na veika era sa sotava ni ra sa “rawata na ka kecega ena vukui Karisito,” o koya sa dau vosoti ka vaqaqacotaki ira (Filipai 4:13). Na tubu kei na veisau e rawa ni dredre ka taura e levu na vakatovotovo. O ira na itubutubu buladodonu vakainaki era segata mera vakavulici ira na luvedra sega walega ena ivakarau “me ra lako ena sala ni dina” (Mosaia 4:15) ia na vuna talega me ra cakava vakakina. Susuga cake nodra kila ka tokona na nodra vakayagataka vakadodonu na galala ni digidigi ena veikalawa yadua era taura.

iVakatakilakila

kau kakana tiko na matavuvale kina dua tale na matavuvale

A vakavulici iratou Nona tisaipeli o Jisu Karisito me ratou “veilomani; me vaka ka’u sa lomani kemudou” (Joni 13:34). Nio veivakacegui, veilaveti, ka veiqaravi vua e dua tale, o sa vakatetea tiko na loloma savasava i Karisito ka yaco tiko mo vakataki Koya vakalevu cake. E vakarautaka talega na Kalou e vuqa na madigi yaga vei ira na luvemu mera vuli ka tubu ena nodra lewena na Nona cakacaka ka vakayacora na nodra yalayala mera qaravi ira na tani (raica na Mosese 1:39; Mosaia 18:7–11). Na wasei ni loloma i Karisito kei na kena vakacilavi na Nona rarama e veisautaki ira kei ira era qarava.

Ena yaga talega kina nomu matavuvale ena nomudou lewena e dua na tabanalevu se tabana era na solia ka ciqoma kina na luvemuni na loloma kei na veitokoni. Na semati ni yalomudou “ena duavata kei na veilomani vakataki [kemudou]” (Mosaia 18:21) e talia e dua na mataveilawa ni veimaliwai veitokoni kei na veika sotavi vinaka e vaqaqacotaka na nomu matavuvale. Nio qaravi ira na tani ena loloma sa Vakarisito, ena rawa ni o veivuke me taraicake o Saioni ena nomu matavuvale kei na itikotiko raraba (raica na Mosese 7:18).

Vakavulica vei ira na gone ni veiqaravi e rawa ni dua na vakatovotovo e veisiga ka sega ni dua ga na cakacaka vakai koya. Na sasaga ni veiqaravi vakai ira ena vukei ira na gone kei na itabagone mera kunea na bula veivakasinaiti cake ni ra raibaleta yani na nodra gagadre ki na nodra na tani. E veivakurabuitaki ni kena taraicake o Saioni e taraicake kina e dua na matatamata e Saioni.

Na ivakavuvuli veidusimaki oqo e rawa ni vukea me vakanamata tiko na nomu veisusu ena veisiga. Me ivakaraitaki, nikua o na vakasamataka beka na sala o rawa ni bulia kina e dua na veimaliwai veilomani cake, susuga cake na vuli, se tarai ira cake na tani. Na vakayagataki ni ivakarau oqo ena rawa ni toroya cake na vulici ni kosipeli, vakabulabulataka na tubu ni luvemu, ka vakauqeta e dua na rai e taudaku ena laveta ka vakalougatataka na nomu matavuvale. Na bulataki ni veivakavuvuli oqo ena rawa talega ni vakavinakataka na nomu vakayagataka na ivurevure ni Lotu yavutaki‑e‑vale me vaka na Lako Mai, Mo Muri Au kei na parokaramu ni Gonelalai kei na iTabagone.

E vuqa tu na sala me vakayagataki kina na ivakavuvuli ni ivakarau oqo. Mo yalorawarawa ka vakasaqara na ivakatakila kina tamata yadua me moici ira kina gagadre ni nomu matavuvale. Na ivakarau ni “tauyavutaka, susuga cake, tara cake” e sega so ni bibi me vakayacori vakalevu cake. E dina ni tiko eso na ka o vakauqeti mo vakuria ki na veika o cakava tiko ena gauna oqo, na ivakarau oqo e kena inaki me vukei iko mo vakayagataka vakalevu sara na nomuni gauna vata.

Nio cakava e dua na ka mo bulia kina na veimaliwai loloma, susuga cake na vuli kei na tubu, se tara cake na duavata kei na kaukauwa ena veiqaravi, o sa tura tiko e dua na yavu tudei ni veika kece o cakava ena nomu vuvale.

Sa ka bibi mo nanuma tiko ni sega ni gadrevi mo vinaka sara mo dua na itubutubu vinaka. Ia, vakasaqara mo ivurevure nuitaki ni loloma kei na veitokoni vei ira na luvemu. Na vakaitavi ena veisala lalai eso kei na luvemu e rawa ni vakavuna na veisau levu.

Ni sa veivakayalolailaitaki na bula vakaitubutubu, nanuma tiko mo cegu vakalailai, ka qai tovolea tikoga. E rawa nio toso ki liu ena vakabauta nio kila ni kauwaitaki iko kei ira na luvemu vakatitobu na iVakabula ka na vakalevutaka na nomu sasaga yalodina kei na gagadre dodonu.

Nio segata mo tudei ena nomu cakava na veika kece o rawata mo lomana, susuga cake, ka vaqaqacotaka na gone yadua, vakayadudua, e rawa ni dou vakanuinui vakavuvale vei Karisito ena vuku ni Nona yalayala tawamudu vei kemudou: “Dou kakua ni rere, koi kemudou na gonelalai, ni dou sa noqu, au sa vakamalumalumutaki vuravura” (Vunau kei na Veiyalayalati 50:41).