Sikovi Ira na Yalododonu e Poladi o Elder Ezra Taft Benson

iVakatakilakila

Elder Ezra Taft Benson e Warsaw, Poladi

iTaba iloloma ni Valenivola ni iTukutuku Makawa ni Lotu, Salt Lake City

Ena dua na yakavi ni Sigatabu batabata ena vulaikatakata ni 1946, erautou a draiva yani o Ezra Taft Benson kei na rua na itokani vakailakolako ena gaunisala vakanomodi e Zełwągi, Poladi. Na gaunisala voravora kei na uca bi e a vakararawataki iratou na lewe ni ilakolako ena siga taucoko, ia na draki ca e sa qai rarama mai ni ratou volekata yani na nodratou icavacava.

O Zełwągi a tiki tu kei Jamani ena dua na gauna ka kilai tu me o Selbongen. A mai veisau na iyalayala vakamatanitu ni oti na ivalu, ia, e dua na iwase levu e loma kei na tokalau kei Iurope e a vakarurugi tu ki na Soviet Union. Ena 1929, a tara na imatai ni valenilotu ni Yalododonu Edaidai e Jamani na Tabana bulabula e Selbongen. Ia ni oti e ono na yabaki ni ivalu, era voleka ni sega ni bula rawa na Yalododonu ena koro.¹

Na dina ni a tiko sara ga o Elder Benson e Poladi e vaka me dua na cakamana. Ni sega ni cakacaka tiko e dua na talevoni e Poladi, a sasaga vagumatua o koya kei ratou nona ilawalawa me veitaratara kei ira na vakailesilesi me veivuke ena rawati ni veika vakaivola ni curuvanua. Ena masumasu kei na veitaratara vagumatua ga vata kei na matanitu o Poladi a qai rawa kina vua na iapositolo me taura na ivolatara ni curuvanua e gadrevi.²

Ni toro volekata yani na valenilotu makawa e Zełwągi na lori, e vuqa vei ira na tamata ena veigaunisala era veiseyaki yani ka vuni. Eratou a vakelea na lori o Elder Benson kei iratou na nona itokani e mata ni valenilotu ka sobu yani. Eratou a vakaveikilaitaki iratou vua e dua na marama ka taroga se sa ikoya oya na valenilotu ni Yalododonu Edaidai. A tonawanawa na matana na marama ena wainimata ni vakacegu. “Eratou sa tu qo na veitacini!” a qolou o koya vaka‑Jamani.

Era a basika vakasauri mai na tamata mai na daku ni veikatuba, ena qoqolou ni marau kei na reki. Era a sega tu ni veitaratara kei ira na iliuliu raraba ni Lotu o ira na Yalododonu e Zełwągi me tolu na yabaki, ia ena mataka oya e vuqa vei ira era a lolo ka masulaka tiko me dua na veisiko mai vua e dua na daukaulotu se iliuliu ni Lotu. Ena loma ga ni vica na auwa, rauta ni dua na drau na Yalododonu era a soqoni vata mai me rogoca na vosa ni apositolo.

Ni vosa tiko o Elder Benson vei ira na Yalododonu, erau a curu yani i valenilotu e rua na sotia vakaiyaragi ni Poladi. Era a domodomoqa na ivavakoso ena rere, ia a yalovi rau na sotia na apositolo me rau dabe ena idabedabe volekata na mata ni rumu. Ena nona vosa, a vakamatatataka o koya na bibi ni bula galala. Erau a vakarorogo vagumatua na sotia, ka dabe toka ga ena nodrau idabedabe me yacova na sere ni suka, ka rau gole yani ka sega ni yaco e dua na ka. Ni oti o ya, a sotavi peresitedi ni tabana o Elder Benson ka biuta tu mai na kakana kei na ilavo vei ira na Yalododonu, ka vakadeitaka ni sa vakau tiko mai eso tale na veivuke.³

Ni oti ga vakalekaleka, a volavola sara o Elder Benson ki na Mataveiliutaki Taumada. A vakayaloqaqataki koya ni raica ni sa yacovi ira tiko yani na Yalododonu e Iurope na veivuke ni Lotu ia e leqataka na veika dredre era se sotava tikoga.

“De na rairai sega beka ni kilai na yaga ni parokaramu cecere ni welefea ni Lotu kivei ira oqo kei ira na noda Yalododonu tale eso e Iurope,” a vola o koya, “ia e vuqa na bula era sa vakabulai, ka sa vaqaqacotaki sara vakaukauwa na nodra vakabauta kei na yaloqaqa e vuqa na noda lewenilotu yalodina.”⁴

iVakatakilakila

era soqoni na tamata e taudaku ni dua na valenilotu