Noqu iSaunitaro ni iVola i Momani

iVakatakilakila

tina kei luvena yalewa

iTaba lolomataki mai vei dauvolaivola

Niu papitaiso oti ena June 2002, au a wasea vei tinaqu na noqu vakabauta. E dina ni dau lako vata kei au o Nau Wong ki lotu, e sega ni via vulica e levu tale na ka.

E yaco, ni oti e 10 na yabaki, a digitaka o Nau Wong me papitaiso. Au a malaude. E ka ni rarawa, ni oti e vica na yabaki, a sega ni vaqaqacotaka okoya na nona ivakadinadina ka vakaiulubaletaka nona sega ni laki lotu.

Au vakauqeti koya me lako mai ki lotu, ia a vakavuna ga na veileti. Kena itinitini, au sa biuta na biligi koya meu kakua ni vakacacana na neirau veimaliwai.

Ena koniferedi raraba ni Okotova 2019, a sureti ira na lewe ni Lotu o Peresitedi Russell M. Nelson me ra “tuvatuva [noda] ituvatuva” me vaqaqacotaka na noda ivakadinadina ni Veivakalesui mai.¹ Niu vakasamataka na nona veisureti, au vakila vakaukauwa ni dodonu meu cakava e dua na ka meu vakavinakataka cake kina ne veimaliwai vei Nau Wong kei au.

Ena noqu navunavuci ni Yabaki Vou, au a vakadeitaki au meu wilika na iVola i Momani vata kei Nau Wong. Ena veigauna e cavuta kina okoya na mosi ni matana, au kaya, “E rawa ni o vakarorogo ga.” Ni kaya o koya ni gadreva me sava iyaya, au a muri koya yani ki valenikuro ka wiliwili tikoga i cake.

E qai yaco ni a vakarorogo vakavoleka sara o Nau Wong ka nanuma tiko na veika au sa wilika. Ni toso na gauna, a digitaka me wilika ga vakai koya. E muri a qai tukuna vei au ni sega ni rawa vua e dua na tamata walega me vola na iVola i Momani. A sega ni vakatitiqataka ni sa vosa ni Kalou na ivola. Vei au, niu raica ni toso mai na sega ni kauwai ki na gadreva me wilika ka wasea na nona ivakadinadina ni iVola i Momani e dua na cakamana.

Ni sa papitaiso oti o Nau Wong, au lomaleqataka ni a lewena ga na Lotu ena vukuqu. Ia oqo sa tiko vua e dua na nona ivakadinadina vakaikoya. Ena veiyabaki au a tovolea meu “vakavinakataki” koya, ia na ka ga e gadreva o koya sai koya na vosa rawarawa ka kaukauwa ni Kalou.

Au vakavinavinaka baleta e dua na parofita bula ka dau dusimaki keda ena gauna taudonu. Kevaka eda cakacakataka na ka e vakavulica, ena muria mai na veivakalougatataki cecere. Na veika au sotava oqo e vakaraitaka vei au na levu ni nona vinakata na Turaga me vakalougatataki keda. Na ka ga au cakava au a wilika e vica na wase vei tinaqu mai na iVola i Momani. Sa qai taura mai kea na Turaga!