Vakadinadinataka Ni O NI Veiwekani.

iVakatakilakila

iloilo ni vakalevutaki kei na ivola ni kawa

Na itokani marama kei na luvena tagane erau vakaitikotiko ena vica na valekabi mai na noqu matavuvale. Sa yaco me daulomani ko lewa vei keitou. Ni sa takali oti na luvena tagane, a tauvimate okoya ka davo toka ga ena nona idavodavo. Keitou a qaravi koya tiko me yacova ni sa mai takali yani ni oti e tolu na vula.

Ni oti na nodrau mate, au a vinakata me qaravi na cakacaka vakalotu ni valetabu me baleta na matavuvale oqo. Ia baleta ni keirau a sega ni veiwekani, oya e sega ni dua na digidigi. Ena dua na siga a votu mai vei au e dua na vakasama matata: “Vakadinadinataka ni o veiwekani, ka rawa ni o cakava na cakacaka ni valetabu me baleti rau.”¹ Au nanuma ni a kerea tiko na Turaga na ka e sega ni rawa, ia na vosa na vakadinadinataka e lako tikoga mai ki na noqu vakasama.

Era sa tekivu tokitaka tiko na taukeni ni nona valekabi nei lewa na wekana, ia e sega vei ira na ivolatukutuku me vakadinadinataka na nodra veiwekani, ni oti sara mada ga na neimami vakasaqara na akaivi ni matanitu.

E tukuna vei au na Yalo ni keimami calata tiko ena dua na ka. Ena veivakadonui mai vei ira na wekana oqo, au vakaraica na nona valekabi me baleta na ivolatukutuku eso. Ena dua na tutu ni valekabi au raica kina eso na taga sinai ena pepa makawa. Au vakila ni ra sa ka bibi na kato.

Au a rai curuma e rua na taga ka tekivu rai yani ki na kena ikatolu. Sa voleka sara meu yacova yani na boto ni kato niu a vakila na waqa ni dua na ivolalailai. Ena loma ni taga ni ivolalailai, au kunea kina e lima na sitivikiti bibi: na sitivikiti ni sucu nei tokani marama, na sitivikiti ni mate nei tinana kei na sitivikiti ni vakamau, sitivikiti ni mate nei buna, kei na sitivikiti ni veibulu nei tamana.

Ni keitou railesuva kei ira na wekai itokani marama na ivolatukutuku, a rua na vosa e votu mai vei au: “Tikina o Vagaysky,” ena ra kei Siberia. Vakasauri, au vakila ni dodonu meu raica na noqu vunikau ni matavuvale. Niu cakava, au raica ni a basika o Vagaysky ena tabanikau vakayawa ni vunikau ni matavuvale nei tamaqu. Niu kuria na vakadidike e vakaraitaka ni keirau veiwekani kei koya na itokani sa mate!

E sega ni lavaka mai vei au na Turaga na ka e sega ni rawa. Au sega ni vakamacalataka rawa na noqu marau niu kila ni sa tiki ni noqu matavuvale okoya na itokani. Na isema oqo ena vakatarai au meu raica me vakayacori na nona cakacaka vakalotu ni valetabu e muri.

Na Turaga e lomani ira na Luvena. A vakarautaka o Koya na ituvatuva ni veivakabulai me baleti keda kece, oka kina okoya na itokani kei na luvena tagane.