Na Totoka ni Yabaki Matua

iVakatakilakila

buna e mokoti makubuna yalewa

Au nanuma sara niu se gone niu raici buqu ni sa salulu na baluna. Na laini e sanuki ena tutu ni matana, kei na laini lailai e totoka ena tebenigusuna e cake. Au a tarogi koya se na rawa vakacava meu tarova na sanuki.

“Kua ni matadredredre,” a kaya mai. “Ka kakua ni tagi.”

Au a muria na nona ivakasala—me dua na siga. Oti au sa mani soro. Ena rawa vakacava vua e dua me bula ka sega ni matadredredre se tagi? Au sa qai nanuma ni na tiko vei au e dua na mata e vakaraitaka tiko na laini ni veidredrevaki kei na wainimata.

Ena iVola i Momani, a vakavulica o Liai vei luvena o Jekope ni da sa mai bula oqo meda reki (raica na 2 Nifai 2:25). Ia e vakavuvulitaka talega o koya me da kila na reki, e dodonu meda sotava na rarawa (raica na 2 Nifai 2:22–23). Au sa mai raica na ivakadinadina ni reki kei na yaluma, me vaka sa toka e matadra o ira era sa bula oti. E kauta voli na matadrau na italanoa ni nodra bula.

Au duavata kei koya a kaya, “Na tamata qase totoka era caka vakamatau.”¹ Eso na tamata era tara cake e dua na itovo ni bula ni ra sa qase toka ka ra dau vakasakiti kina. Me kena ivakaraitaki, au sa raica yani na matadra na metereni drauniulu vulavula, vakaisulu vulavula ni valetabu ka ra sa cilavi mai na rarama vakasakiti e cilava na matadra kei na iukuuku ena matadredredre.

Ia oqo niu sa mai marama qase cake tiko, au sa vulica tiko ni tiko eso na reki e dau yaco mai ni sa da qase mai. Me ivakaraitaki, sa yaco meu logaloga vinaka cake ena yagoqu. Au vakavinavinaka ga ni se cakacaka tikoga! Sa rawa beka niu sa lako vakamalua ka vosa vakamalua mai na veigauna eliu. Ena rairai voce vakalailai cake na sagaqu, ka malumu cake na ligaqu. Ia au vinakata meu nanuma ni noqu veitaratara e sa malumu cake sara.

Au kila ni rawa niu toso tikoga ka vuli tikoga, ni “ivakavuvuli cava ga ni vuku eda mai rawata ena bula oqo, ena tucake vata kei keda ni da sa tucake tale mai na mate” (Vunau kei na Veiyalayalati 130:18). O koya, au sa vakanamata kina lesoni au se rawa tikoga ni vulica. Me kena ikuri, au rawa ni vukei ira na tani—me vakataki ira na makubuqu—mera vuli mai na italanoa ni noqu bula au rawa ni wasea vei ira.

iVakatakilakila

erau dabe vata na veiwatini

iTaba vakarautaka o koya ka tabaki

Keirau sa mai veiciqomi vakalevu cake kei na watiqu ka kila ni o keirau talega, e rawa ni keirau vuli ka tubu vata. Sa vutuniyau sara na neirau vakawati ena vuku ni cava keirau sa vorata vata. Era sa tubu cake na luvei keirau me ra vakacerecerei keirau se me vaka lomaleqataki keirau, vakatau ena siga. Era kauta mai na makubui keirau na reki dina kei na marau.

Ia na veitabayabaki sa dau yaco mai kina na kila ni bula vakayago oqo e sega ni tawamudu. Oqo na gauna meu cakava kina na veika au a nakita voli meu cakava. Ke sega oqo, ninaica beka? “Raica na veisiga ena bula oqo me vakayacora kina na tamata na nona cakacaka kecega (Alama 34:32). Sa nuitaki tu, ni da sa mai kila oqo na gauna meda cavuta kina na vosa e sega ni cavuti, vakabula na veimaliwai, ka rawata na vo ni lalawa.

Niu sa qase cake, au vakasamataka na isolisoli au na biuta tu vei ira na noqu kawa. Au nuitaka ni na tiki ni gauna au sotava kina na reki kei na rarawa, au kunea na vuku. Ia ena vuku ni ka oqori, au kunea na totoka ni yabaki matua.