MTM, ’oia ato’a ’ia mau i te hō’ē parau fa’ati’a mana nō te hiero

Mea faufa’a te rōtahira’a i ni’a i te Mesia ’e te rirora’a mai iāna nō tō tātou nu’ura’a pae vārua. Te ravera’a i te ’ōro’a mo’a ’e te haere-tāmau-ra’a i te hiero, ’o nā rāve’a e piti ïa nō te rōtahira’a i ni’a iāna. Te mau fafaura’a tā tātou e rave ’a rave ai tātou i te ’ōro’a mo’a ’e te mau fafaura’a tā tātou e rave i roto i te hiero, e mau rāve’a ana’e ïa nō te fa’a’ite i tō tātou here ’e te rōtahira’a i ni’a i te Fa’aora.

Tē hina’aro nei au ’ia fa’a’ite nō ni’a i te mo’ara’a ’e te mana o te hiero i roto i tō tātou orara’a. MTM, ’oia ho’i, Ma’iti i Te Maita’i, e ti’a ato’a ’ia parauhia i roto i te reo peretāne, ’ia mau i te hō’ē parau fa’ati’a mana nō te hiero [Current Temple Reccomend]. E anira’a manihini ia tātou pā’āto’a, mai te 11ra’a o te matahiti, ’ia mau i te hō’ē parau fa’ati’a mana nō te hiero.

Nō te aha e mea faufa’a ’ia mau i te hō’ē parau fa’ati’a mana nō te hiero ? E fa’a’itera’a i te Fatu ē, tei ni’a tātou i te ’ē’a nō te fafaura’a, ’e e fa’a’itera’a i te Fatu ē, tē fa’aea nei tātou i ni’a i te ’ē’a nō te fafaura’a.

Teie te parau a te peresideni Russell M. Nelson i te ’āmuira’a rahi nō ’Ātopa 2022 nō ni’a i te mau fafaura’a :

« Te tao’a hōro’a nō te fa’aturara’a i te mau fafaura’a i te Atua, o te mana ïa nō te ra’i—te mana e ha’apūai ia tātou nō te fa’aruru maita’i a’e i tō tātou mau tāmatara’a, mau fa’ahemara’a, ’e mau māuiui o te ’ā’au. E fa’a’ohie te reira mana i tō tātou haere’a. Te feiā e ha’apa’o i te mau ture teitei a’e a Iesu Mesia, e fāna’o rātou i te mana teitei a’e. Nō reira, e fāri’i te mau tīa’i fafaura’a i te hō’ē huru fa’afa’aeara’a ta’ā ’ē nō roto mai i tō rātou autā’atira’a o te fafaura’a ’e te Atua ».¹

Tē ani nei paha ’outou e aha taua mau fafaura’a. I roto i te buka arata’i rahi 27:2 i raro a’e i te upo’o parau, Te ’ōro’a hiero, tē fa’ahiti nei ē :

« I roto i te ’ōro’a hiero, tē anihia nei i te mau melo ’ia rave i te mau fafaura’a mo’a ’ia :

• « Ha’apa’o i te ture nō te fa’aro’o b ’e ’a tūtava ’ia ha’apa’o i te mau fa’auera’a a te Metua i te ao ra ;

• « Ha’apa’o i te ture nō te tusia, ’oia ho’i, te fa’atusiara’a nō te pāturu i te ’ohipa a te Fatu ’e te tātarahapara’a ma te ’ā’au tātarahapa ’e te vārua marū ;

• « Ha’apa’o i te ture o te ’evanelia a Iesu Mesia, ’oia ho’i te ture teitei a’e tāna i ha’api’i mai ’a ora ai ’oia i ni’a i te fenua nei ;

• « Ha’apa’o i te ture nō te vi’ivi’i ’ore, ’oia ho’i, te ta’otora’a te hō’ē melo i te ta’ata ana’e o tāna i fa’aipoipo i mua i te ture a te ta’ata ’e a te Atua ;

• « Ha’apa’o i te ture nō te ha’amo’ara’a, ’oia ho’i, te ha’amo’ara’a i tō rātou taime, te mau tārēni e te mau mea ato’a tā te Fatu i ha’amaita’i ia rātou ’ia patu i te ’Ēkālesia a Iesu Mesia i ni’a i te fenua nei. »²

E rave rahi mau ha’amaita’ira’a fa’ahiahia ’e te māere ē tīa’i nei ia rātou ’o tē tomo nei i roto i te fare mo’a o te Fatu.

’Ua fa’a’ite mai Elder Dale G. Renlund nō te Pupu nō te Tino ’Ahuru ma Piti ’āpōsetolo te tahi o teie mau ha’amaita’ira’a māere mau tei fa’aineinehia nō tātou ’o tē tave nei i te ’ohipa fa’aorara’a i tō tātou mau tupuna:

• E tauturu rahi atu ā nō te tātā’i i te mau ’ā’au pe’ape’a ’e te ’oto ’e te hepohepo ;

• Te ’aravihi ’ia ’ore te mana’o ’ōtahi ;

• E rahi atu ā te here nō vetahi ’ē, te mau feti’i iho ā rā ē ora nei ’e tei pohe ;

• Te mana nō te haro’aro’a ;

• Fa’aurura’a rahi atu ā o te Vārua Maita’i nō te arata’ira’a i roto i tō ’outou orara’a ;

• Fa’arahi atu ā i te ’aravihi nō te tātarahapa ’e e pārurura’a i te fa’ahemara’a ;

• ’Ei ha’amaita’i atu ā ’e te ha’amo’a atu i tō te ta’ata ’ā’au ;

• E mau ha’amaita’ira’a rahi atu ā, noa atu ā te vaira’a o tō tātou ’utuāfare i teienei, i te mātāmua ra ’aore rā ananahi, ’e noa atu ā te mau mea huru ’ē i ni’a i tō tātou tumu rā’au ’utuāfare ;

• E fa’aro’o rahi atu ā, ’ia hōhonu atu ā ’e ’ia tāmau noa tō tātou fa’afāriura’a i te Fa’aora ’e e māramarama rahi atu ā nō tāna tusia tāra’ehara ;

• E ’oa’oa rahi atu ā nā roto i te ’aravihi rahi atu ā ’ia putapū i te here o te Fatu.³

I roto i te a’ora’a hope’a a te peresideni Nelson i te ’āmuira’a rahi nō ’Ātopa 2022 pi’ihia, « Fa’atumu i ni’a i te hiero ».⁴

Apokalupo pene 7 ’īrava 13-17 tai’ohia :

« ’Ua parau mai ra te hō’ē o te mau peresibutero ra iā’u, nā ’ō maira, o vai teie nei feiā e ’ahu i te ’ahu teatea nei ? ’E mai hea mai ā rātou ?

« ’Ua parau atu ra vau iāna, ’ua ’ite ’oe, e tā’u ra’atira. ’Ua parau maira ’oia iā’u, ’O te feiā i haere mai mai roto mai i te ’ati rahi, ra, ’e ’ua hōroi i tō rātou ’ahu, ’e ’ua teatea i te toto o te Arenio ra.

« I pārahi ai rātou i mua i te terono o te Atua ra, e i ha’amori ai rātou iāna i te ru’i ’e te ao i roto i tōna ra hiero : ’e na tei pārahi i ni’a iho i te terono ra e pārahi i roto ia rātou nei.

« E ’ore rātou e po’ia fa’ahou, e ’ore ho’i e po’ihā fa’ahou ; e ’ore ho’i rātou e ti’ari’a e te mahana ’e te ve’ave’a.

« Nā te ’Ārenio ho’i tei pārahi i rōpū i te terono ra e fa’a’amu ia rātou, ’e e arata’i ho’i ia rātou i te mau pape ora piha’a ra : ’e nā te Atua e horoi hua i tō rātou roimata’. »

Teie te parau a te peresideni Nelson : « ’Ia fa’afa’aea ’outou i te pūai, te pāpū ’ore, ’e te hepohepo o teie ao nā roto i te upo’oti’ara’a i ni’a i te ao nei nā roto i tā ’outou mau fafaura’a i te Atua. »⁵