Tīa’i i te mau ha’amaita’ira’a a te Fatu i parauhia

’Ua fānauhia Aulola Mateialona i roto i te ’Ēkālesia a Iesu Mesia i te Feiā Mo’a i te mau Mahana Hope’a nei. Fa’a’amuhia ’ōna nā tāna mau metua tupuna i Ha’alaufuli, Vava’u, Tonga ’e bāpetizohia i te va’ura’a o tōna matahiti. I muri iho, ’ua roa’a tāna parau tū’ite nō te ha’api’ira’a tuarua nō Liahona, fare ha’api’ira’a fatuhia e te ’Ekālesia.

I te 15ra’a o tōna matahiti, ’ua fāri’i ’oia i tāna ha’amaita’ira’a patereareha tei fafau ē, mai te mea e vai parauti’a noa ’oia i tāna mau fafaura’a e te Fatu, e fa’aipoipo ’oia i roto i te hiero. Tau matahiti ri’i noa i muri iho, ’a fa’aineine ai ’oia nō tāna misiōni i tō Aulola haro’aro’ara’a i te ’īra’a o te aura’a o te ha’amaita’ira’a i fafauhia. ’A haere ai ’ōna i te hiero nō Nuku’alofa Tonga nō te taime mātāmua roa, ’ua ’ī tōna hina’aro ’ia ho’i fa’ahou i te hō’ē mahana ma te ’āpe’ehia e tōna hoa here mure ’ore ’e ’ia tā’atihia iāna i te reira vāhi mo’a.

Te terera’a mau rā o te orara’a o Aulola, e ’ere roa atu ïa mai tei ’ōpuahia i roto i tōna māfatu. I muri mai rā i tāna misiōni, ’aita ïa te fa’aipoipora’a i te ’ohipa mātāmua nōna, ’e i te pae hope’a ’ua fa’ahina’aro ’oia i te hō’ē tāne e ’ere nō tāna fa’aro’o.

« E ta’ata maita’i ’ōna », te parau ra Aulola. « E fāri’i poupou ’ōna i te mau misiōnare [nō tā’u ’Ekālesia] i te fare nei ’e e fa’atāmā’a ia rātou, ’are’a rā ’aita i tae i te mana’o ’ia fa’aro’o atu i tā rātou parau poro’i ». E mau melo pūai tōna ’utuāfare nō tā rātou iho ha’apa’ora’a, ’e ’aita ’ōna e hina’aro ’ia ’ōfati i tā rātou hīro’a tumu. Nā teie ta’a ’ē ra’a ha’apa’ora’a fa’aro’o i fa’atea mai i te pe’ape’a i roto i tō rāua fa’aipoipora’a. ’Aita o Aulola e tae pinepine fa’ahou i te purera’a ’ōro’a mai tāna i mātau noa na, ’e ’aita ato’a ’ōna e ti’a ’ia ha’api’i i tāna mau tamari’i i roto i te ’Ekālesia mai tāna i ora mai nei. I te pae hope’a, ’ua rahi roa te pe’ape’a i roto i te ’utuāfare. 23 matahiti i muri iho, ’ua fa’ata’a ia rāua.

Ha’ape’ape’a roa o Aulola. ’Ua mau tāna fa’aipoipora’a ’e nā reira ato’a i tōna mau ti’aturira’a nō tōna ’utuāfare nō ’amuri atu, ’e teienei tē ma’ihia nei. I roto i tōna hepohepo ’e te māuiui, fāriu atu ’oia i tōna Metua i te ao ra nō te arata’ira’a. « ’Ua ha’apa’e vau i te mā’a ’e ’ua pure, ’e ’ua fafau vau i te Fatu ē mai te mea e fāri’i fa’ahou ’oia iā’u, e’ita vau fāriu ’ē fa’ahou iāna ».

’Ua arata’i tāna mau pure iāna i roto i tāna haʼamaitaʼiraʼa pātereāreha, tei fa’aho’i mai i tāmāhanahana ’e te hau i roto i tōna pe’ape’a. I te hō’ē rā mahana, tōna tai’o fa’ahoura’a atu i te fafaura’a ē, e nehenehe ’oia ’ia tā’atihia i roto i te hiero, tōna ’itera’a i te ’ohipa tāna e ti’a ’ia rave. « ’Ua ’itehia mai iā’u ē mai te peu ’aita vau e rave i tā’u tuha’a, ’aita ïa e ti’a teie parau ». I terā iho taime tōna fa’aoti fa’ahoura’a ’ia pe’e fa’ahou i te mau fa’auera’a a te Metua i te ao ra, ’e e ho’i fa’ahou iāna ra nā roto i te ho’ira’a i te fare pure, te pure tāmahana ’e te tuatāpapara’a pāpa’ira’a mo’a.

’Aita i maoro roa tū’ati fa’ahou Aulola ’e te hō’ē hoa nō tōna ’āpīra’a i Tonga : Te taea’e ra Semisi Mounga Mateialona, hō’ē tei mau i te autahu’ara’a ’e tei riro fa’ahou ato’a ’ei tāne ’ōtahi. ’Ua tū’ati tā rāua mau ’itera’a i fāri’i, ’e tō rāua here nō te ’evanelia a Iesu Mesia ’e ’ua pāpū ia Aulola ē teie te tāne e tano nāna. ’Ua fa’aipoipohia rāua i te hiero niuterani i te matahiti 2019 ’e i te hope’a nō ’āva’e Tetepa i te matahiti 2022, ’ua reva atu ra i te hiero nō Nuku’alofa Tonga nō te tā’ati ia rāua nō te tau ’e nō te tau ’amuri atu.

I te hō’ē rurura’a pae auahi nō ni’a i te hiero i te titi nō Papatoetoe Auckland, ’ua parauparau o Aulola nō ni’a i te mea o tāna e parau nei ē, te temeio. ’Ei tamahine ’āpī, ’ua ’ite ’oia i te mo’ara’a au maita’i o te hiero ’e tōna ’ite ato’a ra’a i te faufa’a rahi ’ia ha’amori i reira. ’E teienei, 23 matahiti i muri iho, ’aita ’ōna i ’iteri’i a’e ē e ti’a iāna ’ia ti’amā nō te mau ha’amaita’ira’a hiero tei fafauhia i ni’a iāna i roto i tāna haʼamaitaʼiraʼa pātereāreha […] ’aita rā ’ōna i fa’atopa i tōna morare.

Tītauhia te taime, te fa’a’oroma’i, te huru fa’aro’o tē taui i te orara’a, teienei rā, e au ē, ’ua ho’i mai o Aulola i tōna ’utuāfare. I te pae hope’a, tē ti’a nei iāna ’ia fa’a’ite pāpū atu : « ’Ia piri noa ’oe i te Atua, e ha’amaita’i noa ’oia ia ’oe mai tāna i fafau […] mai te peu e rave ’oe i tā ’oe iho tuha’a ».