« ការអញ្ជើញរបស់ព្រះអង្គសង្គ្រោះឲ្យចែកចាយពន្លឺរបស់ទ្រង់ » លីអាហូណា ខែ កក្កដា ឆ្នាំ ២០២៣ ។
សូមស្វាគមន៍មកកាន់ច្បាប់នេះ
ការអញ្ជើញរបស់ព្រះអង្គសង្គ្រោះឲ្យចែកចាយពន្លឺរបស់ទ្រង់
មុនពេលទ្រង់យាងទៅស្ថានសួគ៌វិញ ព្រះគ្រីស្ទដែលមានព្រះជន្មរស់ឡើងវិញបានអញ្ជើញពួកសាវករបស់ទ្រង់នៅក្នុងព្រះគម្ពីរសញ្ញាថ្មីឲ្យធ្វើជាសាក្សីអំពីទ្រង់ « រហូតដល់ចុងផែនដីបំផុតផង » ( កិច្ចការ ១:៨ ) ។ ដោយបានការបំផុសគំនិតពីការទទួលខុសត្រូវនេះ ពួកសាវកបានថ្លែងថា « អ្នកទាំងនោះចេះតែបង្រៀន ព្រមទាំងប្រាប់ដំណឹងល្អពីព្រះយេស៊ូវគ្រីស្ទ » ( កិច្ចការ ៥:៤២ ) ។
នៅក្នុងអត្ថបទរបស់លោកនៅក្នុងច្បាប់នេះ សាវកសម័យទំនើប អែលឌើរ ឃ្វីនថិន អិល ឃុក ពន្យល់ពីរបៀបដែលយើងអាចចែកចាយដំណឹងល្អរបស់ព្រះអង្គសង្គ្រោះ ទោះជាយើងគ្មានលក្ខណៈល្អគ្រប់គ្រាន់ក្តី ។ លោកសរសេរថា « នៅពេលយើងរស់នៅតាមដំណឹងល្អ ស្រឡាញ់ និងបម្រើអ្នកដទៃ ឈររឹងមាំប្រឈមនឹងការល្បួង និងការបៀតបៀន ហើយថ្លែងទីបន្ទាល់ទាំងពាក្យសម្ដី និងទង្វើ នោះយើងនឹងនាំអ្នកដទៃឲ្យខិតមកជិតព្រះយេស៊ូវគ្រីស្ទ » ( ទំព័រ ៤ ) ។
ដោយការខិតមកជិតព្រះអង្គសង្គ្រោះដោយខ្លួនយើង នោះយើងផ្សព្វផ្សាយតាមរយៈទីបន្ទាល់ និងគំរូ ។ ទ្រង់នឹងគង់នៅកណ្តាលយើង ដូចជាខ្ញុំបានពន្យល់នៅក្នុងអត្ថបទរបស់ខ្ញុំនៅក្នុងច្បាប់នេះ ប្រសិនបើយើងគោរពសេចក្តីសញ្ញារបស់យើង ហើយស្វែងរកព្រះឱវាទរបស់ទ្រង់តាមរយៈប្រសាសន៍របស់ព្យាការីទាំងឡាយ ( សូមមើល ទំព័រ ៤០ ) ។
នៅក្នុងការសិក្សារបស់យើងអំពីការបម្រើរបស់ពួកសាវកនៅក្នុង ចូរមកតាមខ្ញុំ នៅខែនេះ សូមយើងសញ្ជឹងគិតអំពីកាតព្វកិច្ចរបស់យើងផ្ទាល់ ហើយអំពាវនាវឲ្យចែកចាយពន្លឺរបស់ព្រះអង្គសង្គ្រោះជាមួយមនុស្សជុំវិញយើង ។ ព្រះគ្រីស្ទបានយាងឡើងទៅស្ថានសួគ៌ជាយូរមកហើយ ប៉ុន្តែនៅពេលយើងអង្វរសុំទ្រង់ឲ្យ « នៅជាមួយយើង » ( លូកា ២៤:២៩ ) នៅថ្ងៃនេះ នោះទ្រង់នឹងយាងដើរជាមួយយើងមួយជំហានម្ដងៗ ។
អែលឌើរ ផាតទ្រីស៊ីអូ អិម ជីហ្វហ្វ្រា
ក្នុងពួកចិតសិបនាក់