« ការបំផុសគំនិតនៅក្នុងព្រះវិហារបរិសុទ្ធ » លីអាហូណា ខែ កក្កដា ឆ្នាំ ២០២៣ ។
ការបំផុសគំនិតនៅក្នុង ព្រះវិហារបរិសុទ្ធ
ដំណាក់នៃព្រះអម្ចាស់គឺជាដំណាក់នៃវិវរណៈ ។ កាលយើងទៅព្រះវិហារបរិសុទ្ធកាន់តែញឹកញាប់ នោះយើងកាន់តែទទួលបានវិវរណៈ ។
រូបថតព្រះវិហារបរិសុទ្ធ ហ៊ូស្តុន តិចសាស ដោយ ស្ទីវ ស្កត់ ជេកសាន់
ដំណាក់របស់ព្រះអម្ចាស់មិនត្រឹមតែជាអគារដ៏ពិសិដ្ឋមួយ ដែលយើងធ្វើកិច្ចការនៃសេចក្ដីសង្គ្រោះប៉ុណ្ណោះទេ ប៉ុន្តែក៏ជាទីកន្លែងដើម្បីទទួលវិវរណៈ ដែលបណ្តាលឲ្យមានការបំផុសគំនិតទាំងធំ និងតូច ជាកន្លែងដែលស្នាមរបួសនៅលើព្រលឹងយើងអាចជាសះស្បើយ ហើយជាកន្លែងដែលព្រះអម្ចាស់អាចធ្វើឲ្យយើងរំជួលចិត្ត តាមរបៀបដែលនឹកស្មានមិនដល់ ។
ចំណាប់អារម្មណ៍ដ៏វិសេស
ពេលខ្ញុំកំពុងបម្រើជាអ្នកធ្វើពិធីបរិសុទ្ធម្នាក់នៅក្នុងព្រះវិហារបរិសុទ្ធ ហូស្តុន តិចសាស ក្រុមអ្នកជិះម៉ូតូមួយក្រុមបានបត់ចូលចំណតរថយន្តរបស់យើង ហើយសួរថា តើពួកគេអាចចូលទៅក្នុងព្រះវិហារបានដែរឬទេ ។ ប្រធានព្រះវិហារបរិសុទ្ធ រីឆាត សុតតុន បានពន្យល់ទៅក្រុមនេះអំពីគោលបំណងនៃព្រះវិហារបរិសុទ្ធ និងតម្រូវឲ្យមានប័ណ្ណចូលព្រះវិហារបរិសុទ្ធ ទើបអាចចូលទៅក្នុងអគារនេះបាន ។ មេក្រុម និងដៃគូរបស់គាត់រវាសរវៃជាខ្លាំង ។
គាត់បាននិយាយថា « ខ្ញុំមានអារម្មណ៍អ្វីមួយនៅពេលយើងឆ្លងកាត់អគាររបស់លោក » ។ « ខ្ញុំមិនអាចពន្យល់បានទេ ប៉ុន្តែវាជាចំណាប់អារម្មណ៍ដ៏វិសេស ដែលខ្ញុំចង់ស្វែងយល់អំពីអ្វីដែលបណ្តាលឲ្យមានអារម្មណ៍បែបនេះកើតឡើង » ។
ពួកគេទាំងពីរនាក់ចង់ដឹងបន្ថែមទៀត ដូច្នេះប្រធាន សុតតុន បានរៀបចំឲ្យពួកពួកអ្នកផ្សព្វផ្សាយសាសនាទៅជួបគាត់ ។
ជាងមួយឆ្នាំកន្លះក្រោយមក មានគេមកគោះទ្វារការិយាល័យក្នុងព្រះវិហារបរិសុទ្ធរបស់ប្រធានសុតតុន ។ « ប្រធានមិនស្គាល់ខ្ញុំទេ មួយរយៈមុនខ្ញុំបានជិះម៉ូតូឆ្លងកាត់ទីនេះ ជាមួយមិត្តសម្លាញ់របស់ខ្ញុំមួយក្រុម ។ កាលនោះ ខ្ញុំអាចមើលតែពីខាងក្រៅប៉ុណ្ណោះ » ។ គាត់បាននិយាយបន្ត ទាំងដៃកាន់ប័ណ្ណព្រះវិហារបរិសុទ្ធថា « ថ្ងៃនេះខ្ញុំនឹងមើលនៅខាងក្នុងហើយ » ។
ជាភាសាទីពីរ
នៅពេលដែល ឌីន និង បូនី ហីល បានហៅបម្រើការជាអ្នកផ្សាយសាសនារៀមច្បងនៅព្រះវិហារបរិសុទ្ធ កូចាបាមបា បូលីវី នោះបូនីមានការព្រួយបារម្ភយ៉ាងខ្លាំង ។ នាងមិនដែលបានសិក្សាភាសាអេស្ប៉ាញ និងមិនប្រាកដពីសមត្ថភាពរបស់នាងក្នុងការធ្វើពិធីបរិសុទ្ធដែលចាំបាច់ ឬទាក់ទងអ្នកដទៃជាភាសាដែលមិនសូវចេះនោះទេ ។ ការប្រសិទ្ធពរនៃបព្វជិតភាពបានសន្យានឹងនាងថា នាងអាចសន្ទនាទាំងខាងភាសានិយាយ និងខាងវិញ្ញាណជាភាសាអេស្ប៉ាញ ។
នាងនិយាយថា « ខ្ញុំពិតជាមិនអាចនិយាយភាសាអេស្ប៉ាញបានច្រើននៅក្រៅព្រះវិហារបរិសុទ្ធឡើយ » ។ « ប៉ុន្តែនៅក្នុងដំណាក់របស់ព្រះជាម្ចាស់វាហាក់ដូចជាងាយស្រួលសម្រាប់ខ្ញុំ » ។
ទោះបីជាបន្ទាប់ពីនាង និងស្វាមីរបស់នាងបានត្រឡប់មកផ្ទះវិញ ហើយចូលរួមវគ្គជាភាសាអេស្ប៉ាញ នៅក្នុងព្រះវិហារបរិសុទ្ធ អ័ហ្គឌិន រដ្ឋ យូថាហ៍ នោះអ្នកចូលរួមព្រះវិហារបរិសុទ្ធ បានស្ងប់ស្ងែងចំពោះការបញ្ចេញសំឡេងដ៏អស្ចារ្យរបស់នាង ។
ធ្វើអ្វីមួយដើម្បីទទួលបានបទពិសោធន៍នៃអំណរ
ប្រធាន រ័សុល អិម ណិលសុន បានមានប្រសាសន៍ថា « យើងអាចទទួលបានការបំផុសគំនិតពេញមួយថ្ងៃអំពីបទពិសោធន៍នៃព្រះវិហារបរិសុទ្ធ និងពង្សប្រវត្តិពីអ្នកដទៃ ។ ប៉ុន្តែយើងត្រូវតែធ្វើអ្វីមួយដើម្បីទទួលបានបទពិសោធន៍នៃអំណរនោះដោយខ្លួនយើងផ្ទាល់ » ។១
ទាំងអំណរ និងការបំផុសគំនិតក៏ដូចជាការជំរុញចិត្ត និងការធានាដែលរង់ចាំយើងនៅក្នុងព្រះវិហារបរិសុទ្ធផងដែរ ។ មានភាសាស្ថានសួគ៌មួយដែលបានប្រើប្រាស់ និងចំណេះដឹងដែលមិនអាចរកបាននៅកន្លែងផ្សេងទៀតនៅលើផែនដីនេះទេ ។ យើងអាចទទួលវិវរណៈដែលព្រះអម្ចាស់មានព្រះរាជបំណងប្រទានឲ្យយើងនៅក្នុងព្រះវិហារបរិសុទ្ធ យើងមិនត្រឹមតែចូលរួមព្រះវិហារសុទ្ធប៉ុណ្ណោះទេ តែក៏ទៅទីនោះដោយរំពឹងថា នឹងទទួលបានវិវរណៈផងដែរ ។ នេះជាឧទាហរណ៍មួយចំនួននៃការបំផុសគំនិតដែលបានទទួល ៖
-
ម៉ាទីន ហ្គូរី នៃខូត អ៊ីវ័រ បានស្វែងរកការណែនាំនៅក្នុងព្រះវិហារអំពីបញ្ហាជីវិតដ៏សំខាន់មួយ និងមានការបញ្ជាក់ដ៏អស្ចារ្យមួយថា គាត់បានទទួលចម្លើយពីការអធិស្ឋាននេះរួចទៅហើយ ។ នេះជាគោលការណ៍ដែលព្រះអម្ចាស់បានបង្រៀន អូលីវើរ ខៅឌើរី ថា ៖ « ចូរដាក់គំនិតទៅលើយប់ដែលអ្នកបានអំពាវនាវដល់យើងក្នុងដួងចិត្តរបស់អ្នក ។ … តើយើងពុំបាននិយាយដោយភាពសុខសាន្តដល់គំនិតរបស់អ្នក អំពីការណ៍នោះទេឬអី ? » ( គោលលទ្ធិ និង សេចក្តីសញ្ញា ៦:២២,២៣ ) ។
-
រ៉ានឌី ប្រោនសុន រស់នៅក្បែរព្រះវិហារសុទ្ធ ភេសុន រដ្ឋ យូថាហ៍ និងបានចំណាយពេលជាច្រើនឆ្នាំក្នុងការស្រាវជ្រាវពង្សប្រវត្តិ ។ « ប៉ុន្តែខ្ញុំមានកូនប្រុសដែលមិនសូវសកម្ម ហើយខ្ញុំមិនប្រាកដពីអ្វីដែលខ្ញុំអាចធ្វើសម្រាប់គាត់បានទេ ។ ដូច្នេះខ្ញុំមិនគ្រាន់តែដាក់ឈ្មោះរបស់គាត់ទៅក្នុងបញ្ជីឈ្មោះធ្វើការអធិស្ឋានប៉ុណ្ណោះ ប៉ុន្តែខ្ញុំអធិស្ឋានយ៉ាងស្មោះត្រង់នៅក្នុងព្រះវិហារបរិសុទ្ធ ដោយព្យាយាមស្វែងយល់ពីអ្វីដែលខ្ញុំអាចធ្វើសម្រាប់គាត់ ។ ខ្ញុំទទួលបានគំនិតបន្តិចបន្តួចអំពីអ្វីដែលខ្ញុំអាចនិយាយ ឬធ្វើសម្រាប់គាត់ » ។
-
ស្តេហ្វានី ហ្រករិលហីល បាននិយាយទៅកាន់អ្នកដែលមិនដែលស្គាល់គ្នាម្នាក់នៅ ព្រះវិហារបរិសុទ្ធ លូហ្គែន យូថាហ៍ « អ្នកជាម្តាយដ៏ល្អ » ។ អ្នកម្តាយវ័យក្មេងម្នាក់បានសួរដោយស្ទាក់ស្ទើរថា « តើបងស្រីដឹងដោយរបៀបណា ? » ស៊ីស្ទើរ ហីល បាននិយាយថា « ខ្ញុំបានឃើញ ប្អូនកាន់គំនូរកូនៗរបស់ប្អូន ហើយខ្ញុំក៏ធ្វើ តាមការបំផុសគំនិតពីព្រះវិញ្ញាដើម្បីប្រាប់ប្អូន » ។ ម្តាយវ័យក្មេងបានព្យាយាមលាក់ដៃរបស់នាង ។ ឥឡូវនេះនាងបានធូរស្បើយ ដោយមានអារម្មណ៍ទទួលយក ជាជាងចង់បានតែភាពលេចធ្លោ ។
ព្រះវិហារបរិសុទ្ធមិនត្រឹមតែជាកន្លែងសម្រាប់ជួយសង្គ្រោះបុព្វការីជនរបស់យើងប៉ុណ្ណោះទេ ប៉ុន្តែថែមទាំងជាកន្លែងដែលទទួលវិវរណៈ ដែលអាចណែនាំយើង និងអ្នកដទៃទៀតនៅលើផ្លូវនៃសេចក្ដីសញ្ញាផងដែរ ។ ប្រធាន ណិលសុន បានមានប្រសាសន៍ថា « យើងម្នាក់ៗត្រូវការកម្លាំង និងការបង្រៀនខាងវិញ្ញាណជានិច្ច ដែលវាអាចមាន តែ នៅក្នុងដំណាក់នៃព្រះអម្ចាស់ប៉ុណ្ណោះ » ។២ ការបំផុសគំនិត និងចំណាប់អារម្មណ៍ទាំងនេះដែលបានទទួលនៅក្នុងដំណាក់ដ៏បរិសុទ្ធរបស់ទ្រង់ បង្រៀនយើងឲ្យមើលឃើញដូចជាព្រះយេស៊ូវបានទតឃើញ ឮដូចទ្រង់បានឮ ហើយរស់នៅដូចទ្រង់បានរស់នៅ ។
អ្នកនិពន្ធរស់នៅ រដ្ឋ យូថាហ៍ ស.រ.អា. ។