Ko e Pōpoaki ʻa e Fakamoʻuí Maʻakú

Kuó u fāinga mo e loto manavasiʻí ʻi he taʻu ʻeni ʻe fitu pea kuó u ongoʻi ʻoku ou feʻao mo hoku Fakamoʻuí ʻi he foʻi laka kotoa pē ʻi he fonongá. ʻOkú ne fakafiefiaʻi au ʻi heʻeku fakaakeaké, pea kei poupouʻi au ʻi hoku ngaahi ʻaho ʻoku ʻikai ke leleí. ʻOku ʻikai ke Ne tuku ke u loto mamahi, pea ʻoku ʻi ai ʻa e ngaahi aʻusia lahi ʻoku ou lava ʻo vahevahe ki he founga kuó u haʻu ke ofi ange ai kiate Iá.

Naʻe hoko ha aʻusia mahuʻinga lolotonga hoku taʻu ʻuluaki ʻi he seminelí. Naʻa mau ako ʻa e Tohi ʻa Molomoná pea naʻe fuʻu faingataʻa moʻoni ʻa e taʻú kiate au ʻi heʻeku fekuki mo e moʻui lelei fakaeʻatamaí. Ka naʻá ku kei feinga ke fakahoko ʻa e taumuʻa naʻe fakamatalaʻi ʻe heʻeku faiakó mo lau ʻa e Tohi ʻa Molomoná mei he kamataʻangá ki heʻene ʻosi (ʻi he fuofua taimí). Naʻe hangē hono lau iá ko ha maama ʻi he lotolotonga ʻo ha fakapoʻuli lahi ʻi he moveuveú, pea ʻi he pō ʻe taha naʻá ku lau ai ʻa e 3 Nīfai 13:31–34. Naʻe folofola ʻa Sīsū ki he kau Nīfaí, ʻo pehē:

“Ko ia ʻoua naʻa mou tokanga, ʻo pehē, Ko e hā ke tau kaí? pe, Ko e hā ke tau inú? pe, Ke tau kofu ʻaki ʻa e hā?

“He ʻoku ʻafioʻi ʻe hoʻomou Tamai fakalangí ʻoku ʻaonga kiate kimoutolu ʻa e ngaahi meʻá ni kotoa pē.

“Ka mou fuofua kumi ʻa e puleʻanga ʻo e ʻOtuá mo ʻene māʻoniʻoní, pea ʻe foaki ʻa e ngaahi meʻá ni kotoa pē kiate kimoutolu.

“Ko ia ke ʻoua naʻa mou tokanga ki he ʻapongipongí, koeʻuhí ʻe tokanga ʻa e ʻapongipongí ki heʻene ngaahi meʻa ʻaʻaná.”

Naʻe ongo mai ʻa e Laumālié ʻi he taimi naʻá ku lau ai ʻa e ngaahi veesi ko iá, ʻo fakamaamaʻi ʻa e fakamatalá ʻi heʻeku telefoní—ʻo fakamataʻāʻā, laineʻi, mo fakahā mai, ko e meʻa ʻeni maʻau ke ke fanongo ki ai—pea naʻá ku ongoʻi māfana, hangē naʻe foaki mai ha sipi kafú, ʻi heʻeku fanongo ki he ngaahi leá ʻo hangē ko e Fakamoʻuí Tonu naʻe folofola fakahangatonu mai kiate aú. Naʻá ku kei ongoʻi tuʻutuʻukina ʻi he taimi kotoa pē ne u lau ai ʻa e ngaahi veesi ko iá koeʻuhí ʻoku nau fuʻu mālohi fau ke fanongo ki ai.

Koeʻuhí ko e ngaahi potufolofola ko iá, ʻoku ou ʻilo ʻoku ʻafioʻi ʻe he Tamai Hēvaní ʻeku ngaahi manavasiʻí kotoa. Naʻá Ne ʻafioʻi ʻa e taimi naʻá ku faingataʻaʻia ai ʻi he ʻaho kotoa pē, peá Ne ʻafioʻi tonu ʻa e meʻa ne u fiemaʻu ke fanongo ki ai ke u ongoʻi fiemālié. Naʻe hangē ia ko ha konga fakaʻosi ʻo ha tafaʻaki ʻo ha pāsolo kuo fakafehokotaki, pea mei he momeniti ko iá, naʻá ku fili ke fekumi faivelenga ange ki he puleʻanga ʻo e Langí, ʻo hangē ko hono fakamatalaʻi ʻe Sīsū Kalaisí, ke fakakakato ʻa e toenga ʻo e fakatātaá. Naʻá ku fai ʻa e meʻa ne u lavá ke manatu maʻu ai pē kiate Ia, pea kuo tupulaki māmālie ʻeku fakamoʻoní talu mei ai.

Ke fakamahino, naʻe ʻikai ke mole ʻeku loto-hohaʻá. Naʻe ʻikai ke fakamoʻui leva au ʻi ha mana—ʻoku faingofua ange ʻeku fakaakeaké ʻi he taimí ni, ka ʻoku kei hokohoko pē. Ka ʻi hono haʻi au ki he Fakamoʻuí, naʻá Ne fakamaʻamaʻa ʻa e kavenga naʻá ku fuesiá. Naʻá ku moʻui. ʻOku ou moʻua ʻi he meʻa kotoa pē kia Sīsū Kalaisi pea ʻoku hokohoko atu ʻeku taumuʻa mo fāifeinga ki he puleʻanga ʻo e ʻOtuá. Naʻe hoko hono lau ʻo e ngaahi veesi ko iá ko ha meʻa ke liliu ai ʻeku moʻuí—naʻá ku tafoki kiate Ia peá u fekumi kiate Ia, ʻo ʻiloʻi ko e meʻa kotoa naʻá ku manavasiʻi aí ʻe mole atu ia ʻi ha ʻaho.