I totonu o le ono masina o le faatulagaina o le Ekalesia, na valaauina ai Oliva Kaotui ma Pita Uitimera le Itiiti, e talai atu le talalelei i tagata Initia Amerika (tagai i le MF&F 28:8; 30:5). E le’i leva ae valaauina Ziba Peterson ma Pale P. Palate e o faatasi ma i la’ua (tagai i le MF&F 32). A’o latou agai atu i tuaoi i sisifo o Misuri, sa latou malolo ai i Mentor, Ohaio, ma Katelani, Ohaio, lea na latou faasoa atu ai le savali o le talalelei toefuataiga i le uo a Elder Pratt ma o le sa avea ma se faifeau, o Sini Rikitone. E le’i leva ae papatisoina le silia ma le 100 o tagata, e aofia ai Sini Rikitone ma le toatele o tagata o lana aulotu. Na sili atu i le faaluaina o le aofaiga atoa o tagata o le Ekalesia.
Ina ua tuua e toeaina le eria o Katelani mo le faaauauina o le latou malaga, sa o atu Sini Rikitone ma se uo e igoa ia Eteuati Paterika i Feiete, Niu Ioka, e feiloai ma le Perofeta o Iosefa Samita. E lei umi ona taunuu atu, ae maua e Iosefa le faaaliga ua faamaumauina i le Mataupu Faavae ma Feagaiga 35. I lea faaaliga, na tuuina mai ai e le Alii ia Sini ni tiutetauave patino i totonu o le Ekalesia toefuataiina na faatoa faatuina.
Na fetalai mai le Alii ua Ia saunia Sini Rikitone mo se galuega tele
A o lei amataina le vasega, tusi le fesili lenei i luga o le laupapa: O le a se mea na tupu ia te oe ua fesoasoani e te iloa ai, o loo silafia oe e le Alii ma o loo i ai se fuafuaga mo lou olaga?
Ina ia amataina le lesona, valaaulia tagata o le vasega e faasoa mai ni tali i lenei fesili, pe afai latou te mananao i ai.
Faamalamalama atu e faapea, i le faaaliga ua faamaumauina nei i le Mataupu Faavae ma Feagaiga 35, sa fetalai ta’ua ai e le Alii se alii e igoa ia Sini Rikitone, o le sa le’i leva ona papatisoina ma faamauina. Na fetalai le Alii ia Sini e uiga i lana matafaioi i le fesoasoani i le Perofeta o Iosefa Samita. Uunaia tagata o le vasega e faaauau pea ona mafaufau i le fesili o loo i luga o le laupapa a o latou suesueina faatonuga a le Alii ia Sini.
Ina ia fesoasoani i tagata o le vasega ia malamalama i nisi o talaaga o Sini Rikitone, fai atu i se tagata o le vasega e faitau leotele le folasaga o le lesona lenei. Valaaulia se tagata o le vasega e faitau leotele le Mataupu Faavae ma Feagaiga 35:1–3. Fai atu i le vasega e mulimuli i le faitauga, ma vaavaai mo faamaoniga sa silafia e le Alii ia Sini Rikitone ma ana galuega.
O a ni faamaoniga na e maua na silafia e le Alii ia Sini Rikitone?
O le a le mea ua faailoa mai e nei fuaiupu e uiga i le tatou va ma le Alii? (A o tali mai tagata o le vasega, tusi le mataupu faavae lenei i luga o le laupapa: E silafia i tatou e le Alii ma ua i ai se galuega mo i tatou taitoatasi e fai.)
Aisea e taua ai lenei upumoni ia te oe?
Ina ia faamautuina e silafia e le Alii i tatou taitoatasi, valaaulia se tagata o le vasega e faitau leotele le faamatalaga lenei mai ia Elder Neal A. Maxwell o le Korama a Aposetolo e Toasefululua:
Ata
Elder Neal A. Maxwell
“Ou te tautino atu e silafia outou taitoatasi e le Atua … ua loa tausaga (tagai i le MF&F 93:23 Ua loa tausaga o alofa o Ia ia te oe. … Na te silafia foi o outou igoa ma mea uma tou te tiga ma olioli ai!” (“Ia Outou Manatua Le Finagalo Alofa o le Alii,” Ensign po o le Liahona, Me 2004, 46).
Ata
O Ioane le Papatiso o loo Papatisoina Iesu
Faaali atu se ata o Ioane le Papatiso o loo talai atu, po o Ioane o papatisoina le Faaola (tagai i le Ioane le Papatiso o loo Papatisoina Iesu, Tusi Ata o le Talalelei [2009], nu. 35; tagai foi i le LDS.org). Fai atu i tagata o le vasega e faailoa mai po o ai Ioane le Papatiso, ma pe sa faapefea ona ia saunia isi mo le afio mai o Iesu Keriso.
Valaaulia se tagata o le vasega e faitau leotele le Mataupu Faavae ma Feagaiga 35:4–6. Fai atu i le vasega e mulimuli i le faitauga, ma vaavaai pe na faapefea ona pei Sini Rikitone o Ioane le Papatiso.
E tusa ai ma le fuaiupu e 4, na faapefea ona pei Sini o Ioane le Papatiso? (Sa ia saunia isi e maua le atoatoaga o le talalelei.)
Na fetalai mai le Alii o le a faia e Sini se “galuega tele” nai lo le galuega ua uma ona ia faia (MF&F 35:3). E tusa ai ma le Mataupu Faavae ma Feagaiga 35:6, o le a le vaega o lenei “galuega tele”? (O le a ia fesoasoani i isi ia maua le papatisoga ma le meaalofa o le Agaga Paia e ala i le pule tatau.)
Valaaulia tagata o le vasega e mafaufau loloto pe o faapefea ona saunia i latou e aafiaga ma tulaga i o latou olaga i le taimi nei mo se “galuega tele” i le lumanai. Atonu e te manao e tuu atu ia te i latou ni nai minute e tusi e uiga i lenei mea i a latou api o le vasega po o api talaaga mo le suesueina o tusitusiga paia.
Faasino atu i le fuaitau “ma sa e le iloaina” i le Mataupu Faavae ma Feagaiga 35:4. Faamalamalama atu e faapea, a o lei iloa e Sini e uiga i le Ekalesia toefuataiina a Iesu Keriso, sa ia saunia o ia lava ma isi ia mauaina. Sa ia faia lena mea i le faaaogaina o le Tusi Paia e aoao ai tagata i lana lotu i Ohaio. Molimau atu e ui lava tatou te le iloa galuega patino o loo faapolopolo e le Alii mo i tatou, e mafai ona tatou talitonu o loo Ia silafia i tatou. Ao tatou taumafai e mulimuli ia te Ia, o le a Ia fesoasoani ia i tatou ia ausia le galuega ua Ia finagalo tatou te faia.
Valaaulia tagata o le vasega e faitau filemu le Mataupu Faavae ma Feagaiga 35:7–11. Fai atu ia te i latou e vaavaai mo mea o le a tutupu i olaga o i latou o e talitonu ma faaali le faatuatua i le Atua i aso e gata ai.
E tusa ai ma nei fuaiupu, o le a le mea na folafola mai e le Alii ia i latou o e mulimuli ia te Ia i le faatuatua? (E ui ina faaaoga e tagata o le vasega ni upu eseese, e tatau ona latou faailoa mai le mataupu faavae lenei: O le a faia e le Alii ni vavega, faailoga, ma mea ofoofogia e tusa ai ma le faatuatua o i latou o e talitonu i Lona suafa.)
Aisea e te manatu ai e vavalalata tele le fesootaiga a vavega, faailoga, ma mea ofoofogia i le faatuatua?
Ua folafola mai e le Alii e fesoasoani ia i latou ua Ia valaauina e fai Lana galuega
Valaaulia tagata o le vasega e vaai faalemafaufau faapea, o loo latou tuufaatasia se au taalo. Fai atu ia te i latou e faamatala mai malosiaga ma tomai latou te mananao ia i ai i a latou tagata taaalo.
Faamalamalama atu, o le faaaliga lenei na faamatalaina ai e le Alii i latou na te valaauina e fesoasoani i le galuega i aso e gata ai o le fausiaina o Lona malo. Valaaulia se tagata o le vasega e faitau leotele le Mataupu Faavae ma Feagaiga 35:13, ma fai atu i le vasega e faailoa mai uiga o i latou e filifilia e le Alii e fesoasoani i Lana galuega.
O a ni fasifuaitau i lenei fuaiupu e faamatalaina ai i latou o e e valaauina e le Alii e fesoasoani i Lana galuega?
O a ni auala e ono faapea ai o i latou o e e valaauina e le Alii e fesoasoani i Lana galuega “o mea vaivai o le lalolagi”?
Aisea e mafai ona avea ai i latou o e ono faapea o mea vaivai o le lalolagi, ma ni tagata lelei e fesoasoani i le Alii i le faataunuuina o Lana galuega?
Faamalamalama atu o le upu soli (po o le soliga) i lenei fuaiupu e faatatau i le soliga o saito. O le soliga o le faiga lea e tuueseese ai le saito e pei o le sana mai lona au ma le pa’u. E tuu le sana, ae lafoai lona au ma le pa’u.
E te manatu o le a le uiga o le fasifuaitau “soli atunuu i le mana o lo‘u Agaga”? (Atonu e manaomia ona e fesoasoani i tagata o le vasega ia malamalama, o lenei mea e faasino i taumafaiga a le Alii e tuueseese ma aoina mai tagata o e ua saunia e talia le talalelei mai ia i latou e le’i saunia.)
O le a se upumoni e mafai ona tatou aoao mai i le fuaiupu e 13? (E mafai ona faaaoga e tagata o le vasega ni upu eseese, ae e tatau ona latou faailoa mai le mataupu faavae lenei: E valaauina e le Atua i latou e vaivai e faataunuu ai Lana galuega e ala i le mana o Lona Agaga. Tusi le upumoni lenei i luga o le laupapa.)
E faapefea ona fesoasoani lenei upumoni i se tasi o lagona le popole i le auauna atu i se misiona? E faapefea ona fesoasoani i se tasi na talosagaina e faiaoga i le lotu ae o loo lagona le le agavaa? E faapefea ona e fesoasoani i se tasi o lagonaina le uunaia e faasoa atu le talalelei, ae e le o mautinoa po o le a le upu e fai atu po o le mea e fai?
Valaaulia tagata o le vasega e faitau filemu le Mataupu Faavae ma Feagaiga 35:14–15 ma vaavaai mo auala ua folafola mai e le Alii e faamalosia ai i latou o e fesoasoani i Lana galuega.
O a ni fasifuaitau o loo i nei fuaiupu o loo faamatala mai ai auala o le a faamanuia ai i tatou e le Alii a o tatou fesoasoani i Lana galuega?
Valaaulia se tagata o le vasega e faitau leotele le Mataupu Faavae ma Feagaiga 35:17–19, 22. Fai atu i le vasega e mulimuli i le faitauga, ma vaavaai mo le fautuaga a le Alii ia Sini Rikitone e faatatau i le Perofeta o Iosefa Samita.
O le a le fautuaga na tuuina mai e le Alii ia Sini Rikitone e faatatau i le Perofeta o Iosefa Samita? (“Leoleo i luga o ia ina ia lē vaivai lona faatuatua,” “nofo faatasi ma ia”, ma “aua [le] tuulafoai ia te ia.”)
E mafai faapefea ona tatou faaaogaina lenei fautuaga e faatatau i o tatou taitai o le Ekalesia i aso nei?
Ua poloai e le Alii ia Sini Rikitone e tusitusi mo Iosefa Samita, talai atu le talalelei, ma tausia feagaiga na ia faia
Fai i tagata o le vasega e faamatala mai o latou valaauga po o tiute i le Ekalesia. Ona fai atu lea i tagata o le vasega e sue filemu i le Mataupu Faavae ma Feagaiga 35:20–23, ma vaavaai mo tiute patino na valaauina e le Alii ia Sini Rikitone e fai.
O a nisi o tiute na valaauina e le Atua ia Sini Rikitone e faatino?
Ta’u atu o se tasi o tiute o Sini o le avea ma tusiupu mo Iosefa Samita. O tusiupu a Iosefa sa i ai muamua o Oliva Kaotui ma Ioane Uitimera, ua valaauina i ni misiona. O le taimi lea ua maea ai ona faaliliuina le Tusi a Mamona, ae na poloaiina e le Alii ia Iosefa e toefuatai pe toe teuteu vaega o le Lomiga a King James o le Tusi Paia ia na aveesea pe suia. Sa manaomia e Iosefa se tusiupu e fesoasoani i lenei galuega. (Tagai Bible Dictionary, “Joseph Smith Translation.”)
Valaaulia se tagata o le vasega e faitau leotele le Mataupu Faavae ma Feagaiga 35:24-25. Fai atu i le vasega e mulimuli i le faitauga, ma vaavaai mo faamanuiaga na folafola mai e le Alii ia Sini pe afai o le a ia tausia feagaiga na ia osia ma le Alii. Atonu e te manao e fautuaina tagata o le vasega e faailoga mea ua latou maua.
O le a sou manatu i le uiga o le [faaupuga], o le a faia e le Alii ia luluina le lagi mo lo lou lelei? (O se tasi o uiga o i ai, o le a auina mai e le Alii faamanuiaga ma mana o le lagi e fesoasoani ina ia tatou faataunuu ai Lana galuega ma faatoilalo ai le leaga. Tagai foi i le MF&F 21:6.)
Valaaulia tagata o le vasega e otooto mai nei fuaiupu, e ala i le faailoaina o se mataupu faavae e faatatau i le auala e mafai ona tatou manuia ai i le faataunuuina o le galuega o loo i ai i le Atua mo i tatou. E ui atonu o le a ese se faaupuga e tagata o le vasega, ae o a latou tali e tatau ona atagia mai ai le mataupu faavae lenei: A o tatou tausia poloaiga ma faamamalu a tatou feagaiga, o le a fesoasoani le Alii ia i tatou ia ausia Lana galuega. Tusi lenei mataupu faavae i le laupapa.
Tata’i atu mafaufau o tagata o le vasega i upumoni e tolu ua tusia i luga o le laupapa:
E silafia i tatou e le Alii ma i ai se galuega mo i tatou taitoatasi e fai.
E valaau le Atua ia i latou e vaivai e faataunuu ai Lana galuega e ala i le mana o Lona Agaga.
A o tatou tausia poloaiga ma faamamalu a tatou feagaiga, o le a fesoasoani le Alii ia i tatou ia ausia Lana galuega.
E faapefea ona fesootai upumoni e tolu o loo i luga o le laupapa i le tasi ma le isi?
O le a se taimi na e maua ai (po o se tasi e te iloa) le fesoasoani a le Alii a o taumafai e faataunuu Lana galuega?
E faavae i mea ua e aoaoina i le Mataupu Faavae ma Feagaiga 35, o a ni mafuaaga e te manatu na tatau ai ia Sini Rikitone ma Iosefa Samita ona sii i luga o laua loto ma le fiafia?
Valaaulia tagata o le vasega e faasoa mai ni mafuaaga e tatau ai ona sii i luga o latou loto ma le fiafia. Atonu e te manao e faaopoopo atu lau molimau o le naunau o le Alii e fesoasoani ia i tatou i a tatou taumafaiga e fesoasoani atu i Lana galuega.
Ua saunoa mai Elder Dallin H. Oaks o le Korama a le au Aposetolo e Toasefululua, i le taua o le taliaina o le fuafuaga a le Alii mo o tatou olaga:
Ata
Elder Dallin H. Oaks
“O le faatuatua ma le faalagolago i le Alii tatou te maua ai le malosi e talia ai ma tumau ai, i soo se mea e tupu i o tatou olaga. …
“… Aua le faalagolago i le fuafuaina o mea uma lava o lou olaga—e oo lava i mea e sili ona taua. Ia saunia e talia le fuafuaina a le Alii ma le faitalia o isi i mataupu e mautinoa lava e aafia ai oe. Ae ioe, fai fuafuaga, ae ia taulai au fuafuaga i tautinoga patino o le a lagolagoina oe e tusa lava po o le a se mea e tupu. Taula lou olaga i mataupu faavae e faavavau, ma galue loa i na mataupu faavae, e tusa lava po o a tulaga ma po o a lava foi amioga a isi. Ona e faatali lea i le taimi a le Alii ma le mautinoa o taunuuga i le faavavau” (“Timing,” Ensign, Oke. 2003, 17).
“E leai ni faifeau faapolofesa o le Ekalesia. O le valaauga i tulaga faaleautaitai i le lalolagi atoa, e tofi mai lava i le faapotopotoga. …
“O mea uma lava e faia i le Ekalesia—o le taitaiga, o aoaoga, o valaauga, o faauuga, o tatalo, o pesega, o le sauniuniga o le faamanatuga, o apoapoaiga, ma isi mea uma lava—e faia e tagata masani o le ekalesia, o “mea vaivai o le lalolagi” (“O Mea Vaivai ma le Faigofie a le Ekalesia,” Ensign po o le Liahona, Nov. 2007, 6–7).
Na tuuina mai e Elder Joseph B. Wirthlin o le Korama a Aposetolo e Toasefululua, le faamalosiauga lenei ia i latou e lagona ua le agavaa po o le vaivai tele e fesoasoani ai i le galuega a le Alii:
Ata
Elder Joseph B. Wirthlin
“Mo outou tagata o le Ekalesia o e ua tausolomuli ona o lagona o le le atoatoa, ou te aioi atu ia te outou ina ia agai i luma, tuu lou tauau i le galuega, ma tulei. E tusa lava pe tou te manatu e itiiti sina mea ua faaopoopo atu e lou malosi, o loo manaomia lava oe e le Ekalesia. O loo manaomia oe e le Alii. Ia manatua e masani lava ona filifili e le Alii “mea vaivai o le lalolagi” ina ia faataunuu ai Ona faamoemoega. [MF&F 1:19.]
“Ia te i latou uma o e ua vaivai, ia faalototeleina outou i fetalaiga faamafanafana a le Faaola: ‘Ia outou o mai ia te au, o outou uma o e tigaina ma mafatia i avega, o a’u foi e malolo ai outou.’ [Mataio 11:28.] Ia tatou faalagolago i lena folafolaga. E mafai e le mana o le Atua ona faatumulia o tatou agaga ma tino i le malosi ma le naunautai. Ou te uunaia outou e saili i lenei faamanuiaga mai le Alii.
“Ia faalatalata atu ia te Ia, ona faalatalata mai lea o Ia ia te outou, aua ua Ia folafola mai e faapea ‘a o e faatalitali ia Ieova, e toe faafouina lo latou malosi; latou te sii ae apaau e pei o aeto; latou te femoei, ae le vaivai; latou te savavali ae le tigaina.’ [Isaia 40:31.] …
“Ia manatua, o nisi taimi o i latou o e na sili ona telegese i le amataga mai, e uma ane ua sili atu le mamao o le tulaga ua oo i ai” (“Manatu Popole mo le Tasi,” Ensign po o le Liahona, Me 2008, 19).
Na aoao mai Peresitene Thomas S. Monson e faapea, o le a fesoasoani le Alii ia i tatou e faataunuu Lana galuega:
Ata
Peresitene Thomas S. Monson
“Atonu e i ai nisi o outou e matamumuli i o outou natura, pe manatu ane ia te outou lava faapea e le gafatia ona talia o se valaauga. Manatua, o le galuega lenei e le o sau galuega na o oe po o sa’u galuega na o au. O le galuega a le Alii, ma a tatou i ai i le feau a le Alii, ua ia i tatou le aia tatau mo le fesoasoani a le Alii. Manatua o le a faagafatia e le Alii le tua e tauamo ai le avega e tuu i ai” (“Ia Aoao, Ia Faia, Ia Avea Ai,” Ensign po o le Liahona, Nov. 2008, 62).
Na poloaiina e le Alii ia Sini Rikitone ina ia “leoleo i luga o [Iosefa Samita],” ia “nofo faatasi ma ia”, ma ia “aua [e te] tuulafoai ia te ia” (MF&F 35:19, 22). E ui ina sa faatuiese Sini mai le Ekalesia ina ua mavae le maliu faamaturo o Iosefa Samita, ae sa faamaoni lava o ia a o soifua le Perofeta. O ia o se taitai o le Ekalesia sa maelega ma faamaoni, sa na o ia le fesoasoani i le Au Peresitene Sili sa galue i le taimi atoa o le taitaiga a Iosefa Samita a’o avea ma Peresitene o le Ekalesia. Sa mafatia Sini i faigata matautia i autafa o le Perofeta, ma sa fiafia o ia i faaaliga faaleagaga maoae faatasi ma le Perofeta.
“Ma o le a tuuina atu tusitusiga paia, e pei lava ona i ai i loʼu lava loto” (MF&F 35:20). O lenei fuaitau ua faailoa mai ai, o le galuega a Iosefa Samita i le faaliliuga musuia o le Tusi Paia, o le a sili atu nai lo na o le toefuataiina mai o uluai anotusi o le Tusi Paia. Nai lo lena, o anotusi faaletusi paia o le a momoli mai ai le savali na faamoemoe le Alii lava Ia e faailoa mai. O se taunuuga, sa le gata ina faasa’oina pe toe faafouina e Iosefa anotusi faaletusipaia, ae sa musuia foi o ia e faaopoopo i ai mea sa aofia ai muamua, ua tuu mai ai ia i tatou se malamalamaaga atoatoa sili atu i upumoni ua finagalo le Alii tatou te malamalama i ai.
O Sini Rikitone o se faifeau poto masani na i ai se malamalama lelei i le Tusi Paia. Na poloaiina o ia e le Alii e faaaoga nei meaalofa e talai atu ai le talalelei toefuataiina, ma faaaoga aoaoga a perofeta o le tusi paia e lagolago ai upu a Iosefa.