1 Korinito 15:1–29

Sa iloa e le Aposetolo o Paulo o nisi o tagata o le Ekalesia i Korinito na aoao atu faapea e leai se Toetutu o e ua oti. Na ia molimau atu na toetu mai Iesu Keriso mai e ua oti ma faamatala atu le uiga o le Toetu mo fanau uma a le Tama Faalelagi.

Ata

Peresitene Thomas S. Monson

Faitau atu le saunoaga lenei mai ia Peresitene Thomas S. Monson: “Ou uso e ma tuafafine, tatou te talie, tatou te fetagisi, tatou te galulue, tatou te taaalo, tatou te fealofani, tatou te ola. Ona tatou oti ai lea. E oo mai le oti ia i tatou uma lava. E sopoia e tagata uma lava faitotoa o le oti. E oo mai le oti i e matutua, o e mamai, ma vaivai. E asiasi mai i le autalavou a o i ai o latou faamoemoega tele mo le lumanai mamalu. e oo lava foi i fanau iti e le faapea e taofia mai le oti. I upu a le Aposetolo o Paulo, ‘Pei ona tofia foi mo tagata ia tasi lo latou oti’ [Eperu 9:27]” (“Ua Ou Iloa O loo Soifua Lo’u Faaola!” Ensign po o le Liahona, Me 2007, 24).

Toe manatunatu i mafaufauga ma lagona na e oo i ai ina ua oti se tasi e te iloaina.

A o e suesue i le 1 Korinito 15:1–29, vaavaai mo mataupu faavae e mafai ona fesoasoani ia te oe pe a oti se tasi e te iloaina.

A o faaiuina e le Aposetolo o Paulo lana tusi i le Au Paia i Korinito, sa ia talanoaina se talitonuga sese faapea na aoao atu e nisi o tagata o le Ekalesia. Faitau le 1 Korinito 15:12, ma vaavaai po o le a le talitonuga sese sa aoaoina.

Aisea e te manatu ai na popole Paulo e uiga i lea talitonuga sese?

Faitau le 1 Korinito 15:3–8, ma vaavaai mo mea na tusia e Paulo e fesoasoani ai i tagata o le Ekalesia ia malamalama i le moni o le Toetu o le Faaola. (Manatua o Kefa o se tasi lea igoa o le Aposetolo o Peteru.)

E mafai ona tatou aoao mai nei fuaiupu e faapea e molimau atu Aposetolo na maliu Iesu Keriso mo a tatou agasala ma sa toetu mai le oti. Atonu e te manao e faailoga pe faanumera lenei upumoni i au tusi paia.

Ata

Peresitene Thomas S. Monson

Na faasoa mai e Peresitene Monson le molimau lea: “Faatasi ai ma lou loto atoa ma le faamaoni o lou agaga, ou te sii ae ai lou leo i le molimau o se molimau faapitoa e tautino atu ai o loo soifua le Atua. O Iesu o Lona Alo, le Alo e Toatasi o le Tama i le tino. O Ia o lo tatou Togiola; o Ia o lo tatou Puluvaga i le Tama. O Ia o le na maliu i luga o le satauro e togiola ai mo a tatou agasala. O Ia o le uluai fua o le Toetutu. Ona sa maliu o Ia, o lea o le a toe ola ai tagata uma. ‘O lea, ou olioli ai: “Ou iloa O Ia soifua mai!” [“Ua Ou Iloa Lo’u Faaola,” Viiga, nu. 73. Ia iloa e le lalolagi atoa ma ola ai i lena malamalama” (“Ua Ou Iloa o Loo Soifua Lou Faaola!” 25).

Mafaufau pe na fesoasoani faapefea ia molimau a Aposetolo i le Toetu o Iesu Keriso e faamalosia ai lou faatuatua i le Faaola ma Lona Toetu.

Pei ona tusia i le 1 Korinito 15:11–15, na fesiligia e le Aposetolo o Paulo pe aisea na amata ai e le Au Paia i Korinito ona faaletonu i le moni o le Toetu. Sa ia manatu faapea ana fai e leai se Toetu o e ua oti, o lona uiga e lei toetu mai Iesu Keriso. Ma ana fai e lei toetu mai Iesu mai e ua oti, o lona uiga o molimau uma o Lona Toetu e pepelo ma o le a leai se faamoemoe e talai atu ai le talalelei.

Ata

Perofeta o Iosefa Samita

Sa aoao mai le Perofeta o Iosefa Samita: “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, o lea na Ia maliu, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai” (Aoaoga a Perofeta o le Ekalesia: Iosefa Samita [2007], 49; faaopoopoga o ni mea ua faaopoopo po o ni vaega ua soofaatasi i se mea e tele atu).

1. Kopi le siata lenei i lau api talaaga mo le suesueina o tusitusiga paia. Ona faitau lea o faitau o mau i le koluma tauagavale o le siata, ma vaavaai pe faapefea ona e faamaeaina ia fuaiupu o i le koluma taumatau. Ona faamaea lea o fuaiupu i lau api talaaga mo le suesueina o tusitusiga paia:

   Matau le upuuluai fua i le 1 Korinito 15:20e faasino i uluai fua o faaeleeleaga e selesele e se faifaatoaga. E pei ona avea nei fua o le seleselega ma uluai fua o le anoanoai o fua e selesele, o Iesu Keriso o le uluai tagata lea na toetu mai. (Ia manatua o le 1 Korinito 15:20–22 o se fuaitau o le mau tauloto. Atonu e te manao e faailoga i se auala e iloagofie ai ina ia mafai ona e mauaina i le lumanai.)

   1 Korinito 15:16–19	Ana faapea e le toetu Iesu mai le oti, semanu …
   1 Korinito 15:20–22	Talu ai ona sa toetu mai Iesu mai e ua oti, o lona uiga …

Faasino i le faamatalaga o i le 1 Korinito 15:19: “Afai e gata i lenei olaga mea tatou te faamoemoe i ai ia Keriso, ua sili lo tatou malaia i tagata uma lava.” O le upumoni e tasi e mafai ona tatou aoao mai i fuaiupu 20–22o le ona o le Toetu o Iesu Keriso, a mafai ai ona maua lo tatou faamoemoe.

2. I lau api talaaga mo le suesueina o tusitusiga paia, tusi ai pe mafai faapefea e le Toetu o Iesu Keriso ona aumaia le faamoemoe pe a oti se tasi e te iloa pe e te fefe foi i lou lava oti pe a oo mai.

3. Tali se tasi po o le sili atu o fesili nei, i lau api talaaga mo le suesueina o tusitusiga paia:

   1. Tusi lau molimau i le moni o le Toetu ma lona taua i le fuafuaga a le Tama Faalelagi o le faaolataga. Fuafua e faasoa lau molimau i le Toetu i se isi tagata.

   2. Fesili i se matua, uo, po o se taitai o le Ekalesia e faasoa atu ia te oe lana molimau i le Toetu. E tusi e uiga i se mea na e aoaoina ma lagonaina a o e faalogologo i lena molimau.

Pei ona tusia i le 1 Korinito 15:23–24, na aoao atu Paulo o le a i ai se tulaga faasolo lelei i le Toetu. Na muamua toetu mai Iesu Keriso, ma Ona soo faamaoni o le a sosoo ai. O loo aoao mai e le Mataupu Faavae o nei soo faamaoni o le a maua le mamalu selesitila (tagai MF&F 76:50–70; 88:97–98). O i latou o e le totoa i a latou molimau ia Iesu Keriso ma i latou o e amioleaga o le a toetutu mulimuli (tagai MF&F 76:71–86; 88:99–101). Sa aoao atu foi Paulo i “le iuga” (i le taimi o le Meleniuma), o le a “[tuuina atu] ai le malo” i le Tama Faalelagi e Iesu Keriso pe a uma ona faaumatia e ia o “alii sili uma ma faipule uma” (o le lalolagi) (1 Korinito 15:24).

Faitau1 Korinito 15:25–26, ma vaavaai mo mea na aoao atu e Paulo o le a tupu i e ua fai Iesu Keriso mo latou fili i le Meleniuma.

Matau le fili mulimuli o le a faaumatia e Iesu Keriso. Aisea e mafai ai ona mafaufau faapea o le oti o se fili ia Iesu Keriso a le fuafuaga a le Tama Faalelagi? (Tagai Mose 1:39.)

Faitau le 1 Korinito 15:29, ma vaavaai mo le sauniga na faia e le Au Paia i Korinito.

I au lava upu, aotele mea na talosagaina e Paulo le Au Paia e tusa ai ma lo latou auai i le faatinoga o papatisoga mo e ua maliliu:

O le upumoni e tasi tatou te aoao mai le 1 Korinito 15:29 o le o i latou o e oti e aunoa ma le papatisoga e mafai ona mauina lenei sauniga taua.

Ata

Peresitene Gordon B. Hinckley

Sa faamatala e Peresitene Gordon B. Hinckley e faapea, o malumalu e tutu o se faailoga o lo tatou talitonuga i le Toetutu: “O malumalu uma, pe tele pe laitiiti, tuai pe fou, o se faailoaga o la tatou molimau faapea o le ola i talaatu o le tuugamau e moni ma mautinoa e pei lava o i le olaga nei. O le a le manaomia ni malumlau pe afai e le faavavau ia le agaga o le tagata. O sauniga uma e faatino i nei maota paia e faavavau ona taunuuga” (“O Lenei Maota Toafilemu o le Atua,” Ensign, May 1993, 74).

Ata

Malumalu o Payson Iuta

Afai e te nofo e lata i se malumalu, mafaufau i se taimi na e faatinoina ai papatisoga mo e ua maliliu pe saunia ai igoa o ou tuaa e avea i le malumalu. O a lagona na e maua a o e tapenaina igoa pe faatino le galuega mo i latou i le malumalu? Afai e te le nofo e lata i se malumalu, mafaufau pe o le a se mea e mafai ona e faia e fesoasoani ai i le galuega o le faaolataga mo e ua maliliu.

4. Tali le fesili lenei, i lau api talaaga mo le suesueina o tusitusiga paia: O le a se mea e mafai ona e faia e auai atili i le faatinoina o galuega o talafaasolopito o aiga ma malumalu, ma pe o le a sou manatu pe mafai faapefea e lou auai ona fesoasoani e faamalosia ai lau molimau i le Toetu?

I se fasipepa, tusi ai se sini patino pe mafai faapefea ona e auai atili i le faatinoina o galuega o talafaasolopito o aiga ma le malumalu. Tuu le pepa i se mea o le a faamanatu atu ai ia te oe e galue i lau sini.

5. O le taulotoina o fuaitau o le mau tauloto (1 Korinito 15:20–22) o le a fesoasoani e te maua ai upu ma le malamalama e fesoasoani ai e te aoao atu le aoaoga faavae o le Toetu i isi. faaalu ni nai minute e tauloto ai le fuaiupu 22, ona fai lea e aunoa ma le tilotilo i au tusi paia. Fai le mea lava lena i le fuaiupu 21, tauloto ia fuaiupu 21–22; sosoo ai ma le fuaiupu 20,tauloto i lona fatulagaga mai le fuaiupu muamua agai i le mulimuli. O le mea mulimuli, taumafai e tusi le mau tauloto atoa mai lou manatua i lau api talaaga mo le suesueina o tusitusiga paia.

6. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le 1 Korinito 15:1–29 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa atu i lou faiaoga: