Galuega 1:1–8

Na auauna atu Iesu Keriso i Ana Aposetolo mo aso e 40 ina ua mavae Lona Toetu. Sa Ia tapenaina i latou lava ia avea ma molimau ia te Ia i le lalolagi uma.

Manatu e faapea ua alu atu sau uo o se isi faatuatuaga ma se manao e iloa atili e uiga i lau Ekalesia ma fesili atu, “O ai e taitaia la outou Ekalesia?” E faapefea ona e tali atu i ai?

A o e suesueina le Galuega 1:1–8, vaavaai mo upumoni e mafai ona fesoasoani ia te oe e tali i lena fesili ma malamalama ai e faapea o Aposetolo o e na taitaia le Ekalesia anamua, o molimau a Iesu Keriso ma sa i ai se tiute e faasoa atu lena molimau i le lalolagi atoa. O Aposetolo o loo taitaia le Ekalesia i ona po nei, e tutusa lava faamanuiaga ma le tiutetauave.

Sue i le tusi o Galuega i au tusi paia, ma faailoa mai le ulutala atoa o lenei tusi.

O le tusi o Galuega o se soloaiga taua i le Feagaiga Fou. O Evagelia a Mataio, Mareko, Luka, ma Ioane o loo aumaia ai tala o le galuega a le Faaola i le olaga nei ma le Togiola. O le mea e ese ai, o le tusi o Galuega o loo faamatala ai le galuega a Aposetolo ina ua mavae le Afio ae o le Faaola i le lagi.

Faitau le Galuega 1:1–2, ma vaavaai pe o ai o tusia i ai lenei tusi.

O Luka o le tusitala o le tusi o Galuega, ma o le “muai tala” o loo faasino i ai le fuaiupu 1o le Evagelia a Luka, lea sa tusia foi i se tagata e le iloa e igoa ia Teofilo. O le faamoemoega o Luka na tusia ai o le fesoasoani lea ia Teofilo ia maua lana lava molimau ia Iesu Keriso (tagai Luka 1:1–4).

Faitau le Galuega 1:2, ma vaavaai pe na faapefea e Iesu Keriso ona faaauau le taitaiga o Lana Ekalesia ina ua mavae Lona Toetu.

E tusa ai ma le fuaiupu 2, na faapefea e Iesu Keriso ona taitai Lana Ekalesia talu ona Ia tuua le olaga nei?

Tatou te aoao i le Galuega 1:2 e faapea e taitai e Iesu Keriso e ala i le faailoa mai o Lona finagalo i Ana Aposetolo e ala i le Agaga Paia.

Na aoao mai e Elder Jeffrey R. Holland o le Korama a Aposetolo e Toasefululua e faapea na faaauau e Iesu Keriso ona taitai i Lana Ekalesia ina ua mavae Lona Toetu.

Ata

Elder Jeffrey R. Holland

“Mai i le fuaiupu muamua o le tusi o Galuega … o le tautinoga o le a faaauau pea ona taitaia mai i le lagi le Ekalesia, e le taitaia faalelalolagi. … Ioe, o le faaulutala atoa mo le tusi o Galuega, e mafai ona faapea, ‘O Galuega a le Keriso Toetu e ala mai i le Agaga Paia i Soifuaga ma Galuega a Ana Aposetolo Faauuina.’ …

“Sa tutusa lava le taitaiga o le Ekalesia. Ua suia le mea e afio ai le Faaola, ae o faatonuga ma le taitaiga o le Ekalesia e tutusa lava” (“Aoao Atu, Talai Atu, Faamalologa,” Liahona, Ian. 2003, 12).

Mafaufau pe aisea e taua ai le iloa o loo faaauau pea e Iesu Keriso ona taitai Lana Ekalesia e ala i faaaliga i ona po nei.

1. Mafaufau i aafiaga ua faamalosia ai lau molimau e faapea e taitai e Iesu Keriso Lana Ekalesia i ona po nei e ala i faaaliga. Tusi e uiga i ou aafiaga i lau api talaaga mo le suesueina o tusitusiga paia. Afai e te le manatu na i ai sou aafiaga faapena, fai i se tagata faamaoni o le Ekalesia e faasoa atu ia te oe pe faapefea ona ia iloa o loo taitai e le Alii Lana Ekalesia e ala i faaaliga. I lau api talaaga mo le suesueina o tusitusiga paia, tusi ai mea e te aoao mai i lau lua talanoaga.

Na faaalu e Iesu aso e 40 e tuu atu ai faatonuga patino i Aposetolo a o lei afio ae o Ia i le lagi ma sa amata ona taitai e le Au Aposetolo le Ekalesia i le lalolagi e ala i le Agaga Paia. Faitau le Galuega 1:3, ma vaavaai mo mea na oo i ai le Au Aposetolo ma aoao i na aso e 40.

I le fuaiupu 3, o le upu tiga e faasino i le taulaga togiola a Ona puapuaga (tagai Faaliliuga Iosefa Samita, Galuega 1:3 [i le Galuega 1:3, vaefaamatalaga e]). O le fasifuaitau “faailoga faamaoni” e faasino i le faamaoniga e le mafaafitia na tuu atu e Iesu e faapea ua toetu o Ia.

Faitau le Galuega 1:4–5, ma vaavaai mo mea na poloaiina e Iesu le au Aposetolo e fai. Atonu e te manao e maka ia mea e te maua.

Na poloaiina e Iesu le au Aposetolo e nonofo ai i Ierusalema seia papatisoina i latou i le Agaga Paia. E faasino lenei mea i lo latou mauaina o le mafutaga faifai pea a le Agaga Paia, lea sa lei manaomia e le au Aposetolo a o latou faatasi ai ma le Alii i la le tino.

Faitau le Galuega 1:8, ma vaavaai mo mea na tau atu i Aposetolo e fai ina ua uma ona latou maua le Agaga Paia.

Mai i mea na aoao mai e le Faaola i le fuaiupu 8, ua tatou aoao ai e faapea o Aposetolo o molimau a Iesu Keriso ma molimau atu ia te Ia i le lalolagi atoa.

Ata

Peresitene Gordon B. Hinckley

Na aoao mai e Peresitene Gordon B.Hinckley e uiga i le tiutetauave o Aposetolo i ona po nei o ni molimau a Iesu Keriso: “I lo tatou vaitaimi, ua tofia e le Alii ni molimau faapitoa e 15 e tautino atu Lona paia i le lalolagi atoa. E tulaga ese lo latou valaauga; o i latou o Aposetolo a le Alii o Iesu Keriso, ua filifilia ma tofia e Ia. Ua poloaiina i latou e molimau atu e moni o loo soifua o Ia, e ala i le mana ma le pule paia faa-aposetolo ua tuuina atu ia te i latou” (i totonu o le “O Molimau Faapitoa Ia Keriso,” Liahona, Apr. 2001, 4).

Ata

O Le Keriso Soifua

Faitau le pepa o faamatalaga “O Le Keriso Soifua: O Le Molimau a Aposetolo,” lea e avatu faatasi i le lesona lenei. Maka ia vaega o le molimau a Aposetolo e sili ona taua ia te oe.

2. Tali le fesili lenei, i lau api talaaga mo le suesueina o tusitusiga paia: E faatosinaina faapefea lau lava molimau ia Iesu Keriso i le molimau a Aposetolo o ona po nei?

E ui o le Galuega 1:8 e faasino patino lava i le matafaioi a Aposetolo o ni molimau faapitoa a le Faaola, ae o loo aoao mai ai foi i tatou e uiga i mea e mafai ona fesoasoani ia avea ai i tatou o molimau a Iesu Keriso i le lalolagi uma.

E faavae folafolaga a le Aliii i Aposetolo i le Galuega 1:8, ua tatou aoao ai e faapea e ala i le mana o le Agaga Paia, e mafai ai ona avea i tatou ma molimau a Iesu Keriso.

E faapefea e le mana o le Agaga Paia ona fesoasoani ia i tatou e avea ai o ni molimau a le Faaola?

3. Tali fesili nei i lau api talaaga mo le suesueina o tusitusiga paia:

   1. O anafea na e lagonaina ai le Agaga Paia a o faasoa mai e isi a latou molimau ia Iesu Keriso?

   2. O anafea na e lagonaina ai le Agaga Paia o fesoasoani ia te oe e molimau atu ia Iesu Keriso i isi?

Vaavaai mo avanoa e faasoa atu ai lau molimau ia Iesu Keriso ma isi, ma faalagolago o le a faamautu e le Agaga Paia le moni o mea o loo e molimau atu ai.

Galuega 1:8 e le gata ina aoao mai ai upumoni e uiga i le tiutetauave o Aposetolo, ae o loo aumaia ai foi se vaaiga aoao o le afa mulimuli o le Feagaiga Fou. E tusa ai ma le Galuega 1:8, o fea na valoia ai e le Faaola o le a molimau atu Ona soo ia te Ia?

Faaaoga le faafanua o loo maua i faaopoopoga o le Tusi Paia po o le Taiala i Tusitusiga Paia e vaai ai nofoaga o loo taua i tusitusiga paia e fesoasoani ai e vaai faalemafaufau i femalagaaiga a le au Aposetolo ma le faataunuuina o le valoaga a le Faaola.

Galuega 1–5 o loo faamaumau ai le galuega a Aposetolo i Ierusalema, Galuega 6–9 o loo faamaumau ai le galuega a Aposetolo i Iutaia uma ma Samaria, ma le Galuega 10–28 o loo faamaumau ai le galuega a Aposetolo i le Malo atoa o Roma, po o le “tuluiga o le lalolagi” (Galuega 1:8). Atonu e te manao e tusi lenei otootoga o le tusi o Galuega i le laina o au tusi Paiai autafa o le Galuega 1:8.

Ata

faafanua, Vaaiga Aoao i Galuega a Aposetolo

Sue i lau siata o anotusi o le Tusi Paia. Tagai i tusi o le Feagaiga Fou e sosoo ma le tusi o Galuega. O tusi 1 Korinito e oo i le Eperu o tusi (tusi na tusia) e le Aposetolo o Paulo. O le a e aoao ai i le liuaina o Paulo ma le galuega a o e suesue i le Galuega 9, 13–28.

Tagai i le faafanua o le “Vaaiga Aoao o Galuega a Aposetolo” o loo faaalia ai aai po o eria e fesootai ma le tele o tusi a Paulo. O le tele o tusi i le Feagaiga Fou na tusia i faalapotopotoga a le Ekalesia i aai eseese e tautalagia ai o latou manaoga patino. Mo se faataitaiga, o Tesalonia o tagata sa nonofo i le aai o Tesalonia, ma o le tusi o le 1 Tesalonia e talitonu o le uluai tusi lea na tusia e Paulo. E le gata i le tusi atu i faapotopotoga o le Au Paia, sa tusi atu Paulo i tagata taitasi e pei o Timoteo, Tito, ma Filemoni.

Tagai i le siata o anotusi mo mea tusi na sosoo ma Eperu. E le gata ia Paulo, sa tusi atu foi isi Aposetolo ma taitai o le Ekalesia i tagata o le Ekalesia. O nisi o nei tusi o tusi a Iakopo, Peteru, Ioane, ma Iuta. O le tusi o Faaaliga o loo tusia ai se faaaliga na tuuina atu i le Aposetolo o Ioane.

A o faaauau pea ona e suesue i le afa lona lua o le Feagaiga Fou, ia loto tatalo ina ia mafai ai ona faamalamalamaina oe e le Agaga Paia ma fesoasoani ia e maua ai se malamalama sili atu mai aoaoga a Aposetolo o le Feagaiga Fou.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Galuega 1:1–8 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lou faiaoga: