Galuega 6–7

Na faauuina e Aposetolo ia soo e toafitu e fesoasoani i le galuega a le Alii. O Setefano, o se tasi o i latou na filifilia, na faia vavega e tele. Sa tuuaiina o ia e nisi o Iutaia i le upuvale ma aumaia o ia i luma o le au Saneterini, lea sa faaliliu ai o ia e faaalia ai na faamaonia o ia e le Atua. Ina ua uma ona aoai ia Iutaia ona o le teena o le Faaola, sa vaai Setefano i le Tama Faalelagi ma Iesu Keriso. Ona tulia lea o ia i tuapa o le aai ma fetogia i maa seia oo ina oti.

A o e suesue i le Galuega 6:1–8, vaavaai mo se faafitauli patino na feagai ma uluai taitai o le Ekalesia.

Faitau le Galuega 6:1–2, ma vaavaai mo le popolega o Elenisi na aumaia mo le silafia e Aposetolo.

“A o vave le faatupulaia o le Ekalesia, sa le i toe mafai e Aposetolo ona tausia tagata le tagolima uma o le ekalesia O ‘Elenisi,’ o Kerisiano Iutaia e faaaogaina le gagana Eleni, sa manatu i latou ua le toe amanaiaina o latou fafine ua oti a latou tane ma sa latou faito ai i ‘Eperu,’ o Kerisiano-Iutaia Palesitina” (Tusi Lesona a le Tagata Aoga o le Feagaiga Fou [Church Educational System manual, 2014], 288).

Faitau le Galuega 6:3–6, ma vaavaai pe na faapefea ona foia e Aposetolo le faafitauli o le tausiaina o manaoga taitoatasi o tagata o le Ekalesia e aunoa ma le aveesea maia o i latou mai i o latou valaauga faaaposetolo o le avatu o le talalelei “i nuu uma” (Mataio 28:19).

Ata

Elder Bruce R. McConkie

Na aoao mai e Elder Bruce R. McConkie o le Korama a Aposetolo e Toasefululua, le mea lenei e uiga i tiutetauave o na tamalii e toafitu: “O le galuega na tofia i ai i latou e i totonu o le lio o na mataupu faaletino e masani ona taulimaina e le Perisitua Arona, o lea na tuua ai aposetolo le avanoa e taulimaina ia mataupu e sili atu ona faigata o la latou galuega faa-Mekisateko” (Doctrinal New Testament Commentary, 3 vols. [1965–73], 2:65).

O a uiga auau mama na tau atu i tagata e vaavaai i ai e filifilia ai i latou o le a fesoasoani?

E tutusa faapefea lea faiga i le mea o loo faia e le Alii i Lana Ekalesia i ona po nei ia mautinoa ai ua faafetaiaia manaoga o tagata o le ekalesia?

O le upumoni e tasi e mafai ona tatou aoao mai i lenei tala o le e valaauina tagata agavaa o le Ekalesia e fesoasoani e auauna atu i manaoga o isi.

1. O valaauga o le Ekalesia e avatu ai i tagata taitoatasi ia tiute patino e auauna atu atu i manaoga o isi. Mafaufau pe aafia faapefea le tomai e auauna atu ai i se tasi i manaoga o isi ona o le agavaa o le tagata? Ona tusi lea i lau api talaaga mo le suesueina o tusitusiga paia e uiga i se mea na e oo i ai ma se isi sa auauna atu ia te oe po o se tasi e ala i le auauna atu ma le agavaa i se valaauga. Faamatala ni mafaufauga po o lagona o le faafetai na e maua mo lenei auaunaga.

Faitau le Galuega 6:7–8, ma vaavaai mo taunuuga lelei e afua mai i le valaauga o nei soo agavaa e toafitu e auauna atu i manaoga o isi.

Pe i ai se taimi na e teenaina ai se tasi sa taumafai e fesoasoani ia te oe pe na teena ai e se isi tagata oe ina ua e taumafai e fesoasoani ia te ia? O a uiga na faaalia e le tagata na taumafai e fesoasoani ma le tagata na teenaina le fesoasoani?

Aisea tatou te teena ai i nisi taimi le fesoasoani a isi? Mafaufau pe o a taunuuga e mafai ona oo mai ona o le teenaina o le fesoasoani a isi i tulaga nei: faia meaaoga, kukaina o se meaai, foia o se faafitauli tele i lou olaga, ma le faia o se tonu pe faamisiona talai.

O se tasi auala ua saunia ai e le Tama Faalelagi e fesoasoani ai ia te i tatou e ala lea i le Agaga Paia. A o e suesueina le Galuega 6:9–7:53, vaavaai mo taunuuga o le teenaina o le Agaga Paia.

Pei ona tusia i le Galuega 6:9, o tagata e toatele sa lei talitonu ia Iesu Keriso na fefinauai ma Setefano a o ia aoao atu le talalelei. Faitau le Galuega 6:10–11, ma vaavaai mo mea na faia e nei tagata ina ua latou le mafai ona teena le poto ma le agaga o aoaoga a Setefano. (O le upu fai lemu atu i le fuaiupu 11 o lona uiga o le faatauanau.)

Galuega 6:12–14 o loo tusia ai e faapea sa aumaia Setefano i luma o le aufono o le pulega a Iutaia (o le Au Saneterini) ma sa tuuaia o ia e molimau pepelo i le upuvale, o le tautala lea i se ala inoino i le Atua po o “se mea e paia i luma o le Atua, e pei o Lona malumalu, Lana tulafono, po o Lana perofeta” (Bible Dictionary, “Blasphemy”). I le faamasinoga o Setefano sa tuuaia e le au Saneterini o ia i le tautala faasagatau i le malumalu ma le tulafono a Mose (tagai Galuega 6:13–14). Na taufai teena ma agai e sui o le au Saneterini ia Setefano ma iu ai ina saili e fasiotia o ia.

Faitau le Galuega 6:15, ma vaavaai mo mea sa tulagaese mai ai foliga o Setefano a o tu o ia i luma o le aufono.

Na faaliliuina Setefano i luma o le aufono. Faaliliuina “o le tulaga o tagata o e suia i foliga vaaia ma le natura le tumau—o lona uiga, e siitia i se tulaga maualuga—ina ia mafai ona latou tatalia le afioaga ma le mamalu o tamalii faalelagi” (Taiala i Tusitusiga Paia, “Transfiguration,” scriptures.lds.org). O lenei faaliliuina paia o se tasi auala na faaalia ai e le Atua i tagata sa Ia faamaonia Setefano ma le savali a Setefano (tagai Bruce R. McConkie, Doctrinal New Testament Commentary, 2:67).

Galuega 7:1–50 o loo faamatala mai ai o le tali atu i tuuaiga na aumaia e faasaga ia te ia, sa toe faamatala ai e Setefano nisi o le talafaasolopito o Isaraelu, aemaise le teena faafia e Isaraelu o Mose ma le tulafono na avatu e le Alii i tagata i le Mauga o Sinai. Faitau le Galuega 7:37, ma vaavaai po o ai lea na valoia e Mose o le e iai se aso e faalogo ai i ai le fanauga a Isaraelu.

O le “perofeta” o loo taua i lenei fuaiupu o Iesu Keriso.

Faitau le Galuega 7:51–53, ma vaavaai pe na faapefea ona faatusatusa e Setefano ia taitai Iutaia o ona taimi ma Isaraelu anamua sa ia faamatalaina. “Maaa ua” ma le “le peritomeina o loto” e faasino i le faamaualuga o le agasala ma loto amioleaga o Iutaia.

Galuega 7:52 o loo tusia ai e faapea na tuuaia ia Setefano e taitai Iutaia i le teenaina o “Le Amiotonu,” o lona uiga o le Faaola.

O le upumoni e tasi e mafai ona tatou aoao mai i nei fuaiupu o le teenaina o le Agaga Paia e mafai ona taitai atu ai i le teenaina o le Faaola ma Ana perofeta.

O le Agaga Paia e molimau atu ia Iesu Keriso ma molimau i le moni o Ana afioga ma upu a Ana perofeta. O le mea lea, o le teenaina o le Agaga Paia o le a faavaivaia ai le molimau a se tasi ma lana faaiuga e mulimuli i le Faaola ma Ana perofeta.

Mafaufau pe mafai faapefea ona faaosoosoina se tagata e teena le Agaga Paia i tulaga nei:

• Filifilia o faafiafiaga ma ala o fesootaiga

• Fiifili pe mulimuli i fautuaga a perofeta e uiga i le tafafao faamasani

• Filifili pe faaaoga ia mataupu faavae o le salamo ua aoao mai e Iesu Keriso ma Ana perofeta.

2. Mafaufau i lou lava taliaina o uunaiga a le Agaga Paia. I lau api talaaga mo le suesueina o tusitusiga paia, tusi e uiga i se taimi na taitai ai oe i se faaiuga sao po o le taliaina o perofeta ma a latou aoaoga ina ua e mulimuli i uunaiga a le Agaga Paia. Mafaufau i mea e mafai ona e faia e talia ai le faatosinaga a le Agaga Paia.

Mafaufau i se mea se tasi e mafai ona e faia i le vaiaso a sau e valaaulia lelei ai le faatosinaga a le Agaga Paia i lou olaga. Mafaufau e tusi lau sini ma pe faapefea ona e faataunuuina lena sini i se fasipepa.

O le upu puapuaga o lona uiga o faalavelave po o mafatiaga. Aisea e te manatu ai e mafai e soo o Iesu Keriso ona faamoemoe e oo i ai ni puapuaga?

A o e suesueina le Galuega 7:54–60, vaavaai mo se mataupu faavae e mafai ona fesoasoani ia te oe pe a e feagai ma puapuaga.

Ina ua uma ona aoai e Setefano taitai amioleaga o Iutaia, sa latou tali atu i le ita. Faitau le Galuega 7:54–56, ma vaavaai mo mea na oo i ai Setefano i le taimi o sauaga. O se tasi uiga o le fasifuaitau “sa latou lilivau o latou nifo” (Galuega7:54) o le, sa faatumulia i latou i le ita mateletele ia Setefano ma sa latou mananao ia oti o ia.

O le a le aoaoga faavae autu e uiga i le Aigaatua e mafai ona tatou aoao mai i le tala i le faaaliga a Setefano?

Ata

Na Vaai Setefano ia Iesu i le Itu Taumatau o le Atua

Atonu e te manao e tusi le aoaoga faavae lea i autafa o le Galuega 7:55–56: O le Tama Faalelagi, Iesu Keriso, ma le Agaga Paia o ni tamalii mavaevae.

Faitau le Galuega 7:57–60, ma vaavaai pe o le a le mea na faia e tagata ia Setefano.

O le a se mea e tulaga ese mai ia te oe i le tatalo a Setefano?

Sa faamatala e Luka le maliu matautia o Setefano, i le fasifuaitau “ona moe lea o ia” (Galuega 7:60). O lenei faaupuga e ono faasino i se tagata amiotonu ua mapu mai i faalavelave o le olaga nei ma le filemu e soloai i ai se tagata faapena mai i lenei olaga i le isi (tagai MF&F 42:46).

Toe manatunatu i mea na oo i ai Setefano a o feagai o ia ma le au Saneterini ma a o lei aveina atu o ia e fasiotia.

Na faapefea ona faamalosia Setefano i ona aafiaga uma ma taitai Iutaia?

E faavae i mea ua e suesueina, faamaea le mataupu faavae lenei: Afai tatou te tumau faamaoni ia Iesu Keriso i le taimi o puapuaga, .

Mafaufau loloto i fesili nei: E mafai faapefea ona faatasi le Alii ma i tatou a o tatou feagai ma puapuaga? E ui ina ua uma le soifua o Setefano, ae o le a le mea sa ia maua?

3. Tali fesili nei i lau api talaaga mo le suesueina o tusitusiga paia:

   1. Mo Setefano, o se vaega o le tumau faamaoni o lona uiga o le taulagaina o lona ola. Atonu tatou te le tau ofoina atu se taulaga i le aso, ae o a taulaga e ono moomia tatou te faia?

   2. O le a se mea ua e talitonu o le a e maua a o e faamaoni i le Alii i le taimi o puapuaga ma faia osigataulaga e manaomia ona e faia?

   3. O le a se mea ua uma ona e maua?

O Setefano ua manatu le lautele o le uluai maturo Kerisiano. E le gata i lea, e mafai ona vaai atu ia te ia o se ituaiga o Keriso: Na tutu i laua uma ma le Faaola i luma o se aufono ina ia faamasinoina, sa tautino atu upumoni i mata o o laua fili, sa avatu o laua soifua mo se faamoemoega amiotonu, faapea foi ona gagana atu i ni faamatalaga tutusa ina o le a maliliu (tagai Luka 23:33–34, 46; Galuega 7:59–60).

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Galuega 6–7 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lou faiaoga: