Luka 3–4

Sa folafola atu e Ioane le Papatiso le salamo ma molimau atu i le afio mai o le Mesia. Sa papatisoina Iesu Keriso e Ioane le Papatiso ona anapogi ai lea o Ia i le vao mo aso e 40. Ina ua mavae le malaga atu i Kalilaia, sa tautino atu e Iesu i tagata o Nasareta o Ia o le Mesia. Sa teena o Ia e tagata o Nasareta, ma sa maliu atu o Ia i Kapanaumi, lea na Ia faamalolo ai i e mama’i ma tuliese temoni.

Faaalu ni nai minute e manatunatu loloto ai i fesili nei:

• Pe i ai se taimi na taufaalili atu ai se tasi pe amusia oe ona o oe o se tagata o le Ekalesia?

• Pe i ai se tagata ua taufaifai ia te oe pe lu’iina oe i se mea ua e talitonu iai po o se tulaga faatonuina o e taumafai e ola ai?

• Pe i ai ni pati po o ni potopotoga e lei valaaulia ai oe pe na e lagona ai le le toafilemu ona o lau tapuaiga?

A o e suesueina le Luka 3:1–22, vaavaai mo se upumoni e mafai ona faamatala ai pe aisea e ono lagona ai e i latou o e ola i le talalelei se faaesea mai isi tagata i nisi o taimi.

I lalo o le tulafono a Mose, o le taitai pulefaamalumalu o le Perisitua Arona sa ta’ua o le faitaulaga sili. Peitai, e oo mai i le taimi o le galuega a le Faaola, o le tofi o le faitaulaga sili ua faapiopio. O le faitaulaga sili o le faauluuluga faaupufai foi lea o le malo, ae o i latou o e umia le tofi sa lei filifilia e le Atua i le taimi lea. Sa filifilia i latou e tagata e pei o Herota ma isi taitai o Roma (tagai Bible Dictionary, “Faitaulaga Sili”).

Faitau le Luka 3:2–6, ma vaavaai i le fuaiupu 2po o ai lea na fetalai ai le Atua ae le o faitaulaga sili.

Aotele po o a mea na aoao atu e Ioane le Papatiso i tagata i le Luka 3:3–6. (Mo se fesoasoani faaopoopo i mea sa aoao atu e Ioane, faitau le Faaliluga a Iosefa Samita, Luka 3:4–11 [i le faaopoopoga i le Tusi Paia].)

I ona po o Ioane sa talitonu nisi tagata faapea o i latou e tupuga mai ia Aperaamo, e sili atu i latou nai lo isi po o le faapea foi sa sili atu le alofa o le Atua ia te i latou nai lo e e le o ni Isaraelu (tagai Luka 3:8, vaefaamatalaga d). O lea tulaga e mafai foi ona faatusa i tagata o aso nei, ua mafaufau o le a latou o i le lagi aua o i latou o tagata o le Ekalesia.

Faitau le Luka 3:7–9, ma vaavaai mo mea na aoao atu e Ioane e moomia e tagata Iutaia ona faia ina ia maua ai le faaolataga. (I le fuaiupu 9, o le fua o se faatusa o taunuuga o filifiliga tatou te faia.)

Matau i le fuaiupu 9 o le a se mea e tupu ia i latou o e le fua mai ni “fua lelei,“ pe ola amiotonu.

I le Luka 3:10–15 ua tatou faitau ai na aoao atu e Ioane ni vaega patino o tagata Iutaia, i le ala e mafai ai ona latou fua mai i ni fua lelei e ala i le ola amiotonu. Sa faagaeetia le galuega a Ioane, ma na manatu isi atonu o ia o le Mesia.

Faitau le Luka 3:16–17, ma vaavaai mo mea na ta’ua e Ioane e faapea o le a faia e le Mesia pe a afio mai o Ia.

O le fasituaitau “papatisoina oe i le Agaga Paia ma le afi“ (Luka 3:16) e faasino i le aafiaga faamama ma le faapaiaina o le mauaina o le meaalofa o le Agaga Paia. Sa aoao mai le Perofeta o Iosefa Samita: “E tatau i se tagata ona fanau mai i le vai ma le agaga ina ia ulu atu ai i le malo o le Atua“ (Aoaoga a Peresitene o le Ekalesia: Iosefa Samita [2007], 90).

Ina ia malamalama atili i le Luka 3:17, e fesoasoani le malamalama e uiga i le tuueseeseina o le saito mai le aputi.

Ata

tuueseeseina o le saito mai le aputi

A uma ona selesele le saito ma sasaina (tuuese le fatu mai le laau atoa), ona tapili lea e le faifaatoaga le fatusaito. O le tapiliina o se metotia faaanamua sa faaaoga e tuueseese ai fatusaito mai le aputi (le atigi i fafo) ma le pa’u. O se tagata e tapiliina na te faaaoga se suo tele po o se tui laau e ta’u o le ili e togi ai le fatu na sasaina i luga i le ea. Ona ave lea e le savili le aputi mama ua le manaomia, ae toulu ifo i lalo le ausaito mamafa i le fola.

I le talafaatusa a Ioane, o le a se mea o faatusa i ai le saito?

O le a le mea o faatusa i ai le aputi?

O le aoaoga faavae taua e tasi o loo aoao mai i le Luka 3:16–17 o le e tuueseeseina e Iesu Keriso e amiotonu mai e amioleaga.

1. Tali fesili nei i lau api talaaga mo le suesueina o tusitusiga paia:

   1. E ui o le tuueseesega faaiu o e amiotonu mai e amioleaga o le a taunuu i le Aso o le Faamasinoga, ae o a ni auala e mafai e le mulimuli ia Iesu Keriso ma le ola i Lana talalelei ona afua ai ona tuueseina mai Ona so’o mai le amioletonu i le taimi nei?

   2. Aisea e tatau ai ona tatou malamalama e faapea a tatou saili e mulimuli ia Iesu Keriso ma ola i Lana talalelei e mafai ona tatou lagonaina pe vavaeeseina mai isi?

Luka 3:18–22 o loo tusia ai na afio mai Iesu ina ia papatisoina e Ioane le Papatiso (tagai foi Mataio 3:13–17). Mulimuli ane, sa faafalepuipuiina Ioane le Papatiso e Herota.

I le Luka 3:23–38, o loo faaaofia ai e Luka se gafa o Iesu o loo aumaia ai le laina tuusao o le toto. O loo ia molimau mai ai foi e faapea o Iosefa o le “ua manatu“ (e le o le tama moni) o Iesu (Luka 3:23).

Luka 4:1–13 o loo i ai se tala i le anapogi a Iesu i le 40 aso i le vao ma le teenaina o faaosoosoga a Satani (tagai foi Mataio 4:1–11).

Mafaufau i upu nei: loto momomo, faasauaina, tafeaga, matitiva, ma le tauaso. Pe i ai ea se taimi na e lagonaina ai se tasi pe sili atu o nei upu atonu e faamatalaina ai ou lava lagona ia te oe lava? Ao e suesueina le Luka 4:14–30, vaavaai mo upu o loo aoao mai ai pe na faapefea ona auina mai Iesu Keriso e faamalolo i e loto momomo ma faasaolotoina e sa faatafeaina.

I le Luka 4:14–17 ua tatou faitau ai e faapea ina ua toe foi mai Iesu mai lana anapogi ma le tofotofoina i le vao, sa amata e Ia ona tali atu i sunako i Kalilaia. E lei pine ae toe foi mai o Ia i Lona nuu moni o Nasareta. A o i ai o Ia iina, sa tu o Ia i se sunako e faitau atu mai le tusi a Isaia, o le sa valoiaina le misiona paia a le Mesia.

Faitau le Luka 4:18–20, ma vaavaai mo mea na valoia e Isaia o le a faia e le Mesia mo tagata. Atonu e te manao e faailoga mea ua e mauaina.

Faitau le Luka 4:21, ma vaavaai mo mea na fetalai Iesu e uiga i le mau sa Ia faitauina.

O le faapea atu ua taunuu le valoaga a Isaia, sa faasilasila atu ai e Iesu o Ia o le Mesia lea na faasino i ai le valoaga. Fuafua e tusi le aoaoga faavae lea i lau tusi paia: Na auina mai Iesu e faamalolo i e loto momomo, ma faasaoloto i latou mai le tafeaga faaleagaga.

Mai mea ua e iloa e uiga i le galuega a le Faaola, o a ni mea sa Ia faia ua faataunuuina ai lenei valoaga?

2. Tali le fesili lenei, i lau api talaaga mo le suesueina o tusitusiga paia: O a ni aafiaga ua e vaaia e faaalia ai le faaauau pea e Iesu Keriso ona faamalolo ma faasaoloto i tatou i o tatou taimi?

Faitau le Luka 4:22, ma vaavaai pe na faapefea ona tali atu tagata o Nasareta i le tautinoga a Iesu faapea o Ia o le Mesia ua loa ona faatalitali i ai.

I le Luka 4:23 ua tatou faitau ai sa silafia e Iesu ia tagata o Nasareta o le a lu’i o Ia e faamaonia atu o Ia o le Mesia e ala i le toe faia o vavega na Ia faia i Kapanaumi. Na tali atu Iesu e ala i le sii atu o tala faatusi paia e lua e aoao ai i latou i se mataupu faavae e uiga i le faatuatua.

Ata

Elia, fafine Sarefata ua oti lana tane, ma lana tama

Faitau le Luka 4:24–27, ma vaavaai mo tala e lua na ta’ua e Iesu. Atonu e te manao e faitau faapuupuu le tala ia Elia ma se fafine ua oti lana tane i Sarefata 1 Tupu 17:1–16 ma le tala ia Naamanu ma Elisaia i le 2 Tupu 5:1–14. Ia gauai patino atu i mea na faia e le fafine ua oti lana tane ma Naamanu e faatino ai lo la’ua faatuatua.

Na faapefea ona faatino e le fafine Sarefata ua oti lana tane ma Naamanu le faatuatua?

E taua le iloa o perofeta o le Feagaiga Fou o Elaia (Elia) ma Elisaia (Elisha) na taufai faatinoina ni vavega mo tagata e le o ni tagata o Isaraelu (Nuuese). Sa aoao atu e Iesu i latou i Nasareta e faapea e ui sa i ai fafine ua oti a latou tane ma lepela i Isaraelu, ae e toalua tagata o Nuuese sa mafai ona vaaia vavega aua sa i ai laua le faatuatua ma taliaina perofeta a le Atua.

Talu ai le toatele naua o tagata o Nasareta sa lei faatuatua ia te Ia, o lea sa faia ai e Iesu na o nai vavega laiti iina (tagai Mataio 13:54–58; Mareko 6:1–6). E mafai ona tatou aoaoina se mataupu faavae taua e uiga i le faatuatua pe a tatou faatusaina le eseesega o tagata Nasareta ma le fafine Sarefata ua oti lana tane ma Naamanu. A tatou faatinoina lo tatou faatuatua ia Iesu Keriso, e mafai ona tatou vaaia ua tutupu vavega.

Ata

Naamanu ma le auauna a Elia

3. I lau api talaga mo le suesueina o tusitusiga paia, fai se lisi o auala e mafai ona tatou faatino ai lo tatou faatuatua ia Iesu Keriso o lo tatou Faaola. Toe iloilo le Luka 4:18, ma mafaufau i ni auala e manaomia ona e faatino ai le faatuatua ia Iesu Keriso ina ia mafai ai ona e maua faamanuiaga o loo lisi mai iina.

Faitau le Luka 4:28–30, ma vaavaai pe na faapefea e i latou sa i le sunako ona tali atu i mea na fetalai atu ai Iesu.

Manatunatu pe o faapupula mai faapefea e lenei tala le ala e tuueseeseina ai e Iesu Keriso e amioleaga mai e amiotonu (tagai Luka 3:17).

Faitau le Luka 4:31–44, ma vaavaai pe na ese faapefea le tali atu o tagata Kapanaumi mai i le tali a i latou o i Nasareta.

E faapefea e nei tala ona faapupula mai le mataupu faavae e faapea a tatou faatinoina lo tatou faatuatua ia Iesu Keriso, e mafai ona tatou maua o Ana faamanuiaga?

4. Faaiu lau suesuega mo le aso i le tusia i lau api talaaga mo le suesueina o tusitusiga paia lau molimau ia Iesu Keriso o le Faaola ma faamanuiaga ua e mauaina ao e faatinoina le faatuatua ia te Ia.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Luka 3-4 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa atu i lo’u faiaoga: