Galuega 13–14

Na tuuvaa atu Paulo (lea na igoa muamua ia Saulo) i lana uluai malaga faafaifeautalai faatasi ma Panapa o lana soa. Sa la folafola atu le talalelei ma faatutuina paranesi o le Ekalesia e ui i sauaga faifai pea. Ina ua mumusu Iutaia e talia le afioga a le Atua, sa taulai atu loa Paulo ma Panapa e folafola atu i Nuuese.

O le fuafaatatau lea e faatusa i le aofaiga o le tetee e ono fetaiai ma se tagata pe a taumafai e ola i le talalelei, O le tasi pito o le fua e faatusa i le leai o se tetee, a o le isi pito o le fua e faatusa i le tetee faifai pea.

Ata

fuafaatatau o le tetee

Tusi le igoa o Mose i le vaega o le fua e te manatu o tau mai ai le maualuga o le tetee na feagai ma Mose. Fai foi le mea lava lena e tasi ia Iosefa Samita ma Nifae. E faavae i le tetee na e maua a o e taumafai e ola i le talalelei, o fea e te tusia ai lou igoa i luga o le fua?

O soo uma o Iesu Keriso o le a fetaiai ma tetee i taimi eseese ma i maualuga eseese i lona olaga. A o e suesue i le Galuega 13–14, vaavaai mo mataupu faavae e mafai ona fesoasoani e taialaina ai oe pe a e fetaiai ma ni tetee i au taumafaiga e ola amiotonu.

I le Galuega 13:1–2 tatou te aoao ai e faapea a o faapotopoto ni perofeta ma ni aoao i Anetioka, sa latou maua faatonuga mai i le Agaga Paia ua tatau ona valaauina ia Saulo ma Panapa e folafola faatasi atu le talalelei.

Ao lei oo mai lea valaauga faamisiona, sa faaalu e Paulo se taimi talu ona liliu mai e aoao ai le talalelei a Iesu Keriso (tagai Kalatia 1:17–18) ona aoao atu ai lea ma folafola atu le talalelei i Tamaseko, Ierusalema, Taso, Kilikia, ma Aetioka (tagai Bible Dictionary, “Paul”). O Panapa o se Iutaia mai Kuperu o le sa liua i le talalelei a Iesu Keriso (tagai Galuega 4:36).

Ua tatou aoao i le Galuega 13:3–6 ina ua uma ona vaetofia ia Saulo ma Panapa mo la laua misiona, sa lamalaga atu mai Anetioka i le motu o Kuperu ma sa folafola atu i se sunako i le aai o Salami. Na afua mai iina ona la malaga atu i le isi itu o le motu i le aai o Pafo.

Ata

faafanua, uluai malaga faafaifeautalai a Paulo

Faitau le Galuega 13:6–8, ma vaavaai po o le a le mea na tupu ina ua taunuu Saulo ma Panapa i Pafo.

Faitau le Galuega 13:9–12, ma vaavaai mo le mea na tupu i Elaima (sa igoa ia Paiesu i le Galuega 13:6), o le faataulaitu ma se perofeta pepelo. Atonu e te manao e faailoga le ala e faatosinaina ai se sui konesula Roma, o Sekio Paulo, i le molimauina o le mana o le Atua, fuaiupu 12.

O le mataupu faavae e tasi e mafai ona tatou aoao mai i le Galuega 13:9–12 o le e matua sili mamao atu le mana o le Atua nai lo le mana o le tiapolo. Fuafua e tusi le mataupu faavae lenei i lau tusipaia i autafa o fuaiupu nei:

1. Tali le vaega lenei i totonu o lau api talaaga mo le suesueina o tusitusiga paia:

   1. Faamatala pe faapefea i le malamalama o le mana o le Atua e matua sili mamao atu nai lo le mana o le tiapolo ona fesoasoani ia te oe a o e fetaiai ma tetee i lou olaga.

   2. Tusi ni tulaga se lua e mafai e le manatuaina o lenei mataupu faavae ona fesoasoani ia te oe.

Matau o le Galuega 13:9 o loo faailoa mai ai le suiga mai ia Saulo ae faaigoaina Paulo i tusitusiga paia (tagai Galuega 13:13).

Ata

titina i luga o le penitala

Mafaufau i se mea sese sa e faia ua moomoo maimau pe ana mafai ona e toe foi i tua e tape ese. O nisi taimi o tetee tatou te feagai e tutupu ona o a tatou filifiliga e tumu i le agasala. Ao e suesue i le Galuega 13:14–43,vaavaai mo se mataupu faavae e mafai ona fesoasoani ia te oe e faatoilalo ai lenei ituaiga o tetee.

Galuega 13:14–37 o loo tusia ai e faapea na tuua e Paulo ma Panapa ia Kuperu ae folau atu i Pafulia, e i le talafatai i saute o le mea ua igoa o Take i le taimi nei. Ona o se mafuaaga e le o mautinoa, sa tonu i se tasi o a la soa na latou malaga, o Ioane Mareko, e tuua i laua ae toe foi i le fale. I le Sapati, sa tu atu ai Paulo i luma o tagata i le sunako i le aai o Anetioka i Pisitia ma toe faamatala atu le talafaasolopito o Isaraelu, e aofia ai le nofopologa i Aikupito, mauaina o le nuu folafolaina, o le valaauina e le Atua o le Tupu o Tavita, ma le afio mai o le Faaola e ala i le fanau a Tavita. Ona aoao atu ai lea o Paulo e uiga i le soifua ma le misiona a Iesu Keriso.

Faitau le Galuega 13:32–33, ma vaavaai mo mea na aoao atu e Paulo e uiga ia Iesu Keriso. Atonu e te manao e maka i lau tusipaia mea na ia aoao atu e uiga i le Faaola.

Faitau le Galuega 13:38–39, ma vaavaai mo faamanuiaga na aoao mai e Paulo e mafai ona tatou maua e ala i le Togiola a Iesu Keriso.

Mai i le Galuega 13:38–39 ua tatou aoao ai i le mataupu faavae lenei: E mafai ona faamagaloina i tatou i a tatou agasala ma tauamiotonuina e ala le Togiola a Iesu Keriso.

O le upu tauamiotonuina, e pei ona faaaogaina i le fuaiupu 39, o lona uiga “o le faamagaloina lea mai le faasalaga o le agasala ma le tautino atu ua le nofosala” (Taiala i Tusitusiga Paia, “Tauamiotonuina, Tauamiotonu,” scriptures.lds.org). A tauamiotonuina se tagata e ala i le Togiola a Iesu Keriso, ua toe faasa’o la laua sootaga ma le Atua.

Ata

Elder D. Todd Christofferson

A o e faitauina le mea na aoao mai e Elder D. Todd Christofferson o le Korama a Aposetolo e Toasefululua e faatatau i le uiga o le tauamiotonuina e ala i le Togiola a Iesu Keriso, faailoa ia faamanuiaga na ia fai mai e maua e ala mai i le salamo: “Na puapuagatia Iesu ma ofoina atu Lona soifua e togiola mo agasala. O le mana o Lana Togiola e mafai ona soloiesea ai taunuuga o agasala. Pe a tatou salamo, o Lana togisala o le alofa tunoa e tauamiotonuina ma faamamaina ai i tatou (tagai i le 3 Nifae 27:16–20). E faapei tatou te lei gauai atu, e faapei tatou te lei faamatuu atu i le faaosoosoga” (“Ina Ia Tasi i latou ia i Taua,” Ensign po o le Liahona, Nov. 2002, 71).

2. Tali fesili nei i lau api talaaga mo le suesueina o tusitusiga paia:

   1. O le a se mea e tatau ona tatou faia ina ia faamagaloina ai a tatou agasala ma tauamiotonuina ai e ala i le Togiola a Iesu Keriso?

   2. O ai ni tagata mai i tusitusiga paia sa faamagaloina ai a latou agasala ma ua tauamiotonuina e ala i le Togiola a Iesu Keriso?

Afai o i ai se tusipese a le Ekalesia, usu pe faitau ia fuaiupu muamua e lua o le “Ou Te Tu ma Ofo” (Viiga, no. 107). Ao usuina pe faitau, vaavaai pe na faapefea e le na tusia le viiga ona faamatala lona loto faafetai mo le Togiola a le Faaola ma le faamagaloga.

3. Tali le fesili lenei, i lau api talaaga mo le suesueina o tusitusiga paia: O a ou lagona ia Iesu Keriso pe a e mafaufau e uiga i Lana Togiola ua mafai ai e oe ona faamagaloina mai au agasala?

Faamolemole ia mulimuli i soo se uunaiga e te maua mai i le Agaga Paia e fesoasoani ai ia e maua le faamagaloga ma le tauamiotonuina e ala i le Togiola a Iesu Keriso.

Galuega 13:40–43 o loo faamatala mai ai ina ua uma le lauga a Paulo, e toatele Nuuese na talosagaina o ia e toe aoao atu i latou i le Sapati e sosoo ai.

I le aso Sapati na sosoo ai, toetoe o le aai atoa na o mai e faalogologo ia Paulo ma Panapa o aoao atu le afioga a le Atua.

Faitau le Galuega 13:44–52, ma faatusatusa ia uiga na faaalia ma taga a Iutaia ma uiga a taga a Nuuese a o latou o mai e faalogologo ia Paulo ma Panapa o lauga atu. O “sao tamaitai” o loo taua i le fuaiupu 50 o i latou ia e ave i ai le faaaloalo maualuga i lo latou nuu.

Manatua o le Faaliliuga a Iosefa Samita Galuega 13:48 o loo faamanino mai ai e faapea “o le toatele na talitonu na faauuina i le ola e faavavau” (Faaliliuga Iosefa Samita, Galuega 13:48 [i le Galuega 13:48, vaefaamatalaga a]). O le upu faauuinai le fuaiupu lea e mafai ona tau mai ai e faapea sa faaliliuina i latou ma savalia laasaga e tatau ai ina ia maua le ola e faavavau. O laasaga na e aofia ai le papatisoga, taliaina o le meaalofa o le Agaga Paia, usiusitai, ma le tumau ma le faatuatua e oo i le iuga.

Ata

tamaitai talavou o loo tilotilo i lalo

Aisea e te manatu ai e faataga e le Alii ia tagata lelei ona oo i tofotofoga faigata?

A o e suesue i le Galuega 14, vaavaai mo se mataupu faavae e fesoasoani e te malamalama ai i le ala e tali ai lenei fesili.

Galuega 14:1–21 o loo faamatala ai nisi o puapuaga na onosaia e Paulo ma Panapa a o faaauau pea ona la folafola atu. Faitau ia fuaitau nei, ma vaavaai pe o a puapuaga na feagai ma faifeautalai, ma maka i au tusi paia:

• Galuega 14:1–2

• Galuega 14:8–18

• Galuega 14:19–20

4. Tali le fesili lenei, i lau api talaaga mo le suesueina o tusitusiga paia: O a ni ou mafaufauga pe ana faapea sa e i ai faatasi ma Paulo ma Panapa i nei faigata?

Faitau le Galuega 14:22, ma vaavaai mo mea na aoao mai e Paulo e uiga i puapuaga.

Mai i lenei fuaiupu ua tatou aoao ai i le mataupu faavae lenei: A tatou ui atu ma le faamaoni i puapuaga, o le a saunia i tatou e ulufale atu i le malo selesitila.

Mafaufau i faamanuiaga ua e maua po o tagata e te iloa a oe pe a o latou ui atu ma le faamaoni i puapuaga O a ni auala e te manatu o le onosai ma le faamaoni i tofotofoga e mafai ona saunia ai i tatou mo le malo o le lagi?

Filifili se mataupu faavae sa e aoaoina a o e suesue i le Galuega 13–14o le a sili ona fesoasoani ia te oe i taimi o ou tofotofoga. Tusi le mataupu faavae sa e fiifilia i se kata faamanatu laitiiti po o se fasi pepa. Mafaufau e tuu i se mea o le a e vaai iai i le tele o taimi (se faaata, lau loka i le aoga, po o se isi nofoaga e tele ona e tilotilo i ai) e avatu ai le malosiaga ma le faamalosiauga a o e feagai ma puapuaga.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Galuega 13–14 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lou faiaoga: