Folasaga i le Luka

O le tusi a Luka o loo aumaia ai se molimau faaopoopo o upumoni e tele o loo tusia e Mataio ma Mareko ma faapea ona i ai anotusi tulaga ese. O le Evagelia a Luka e mafai ona loloto ai lou malamalama ma fesoasoani e te talisapaia atili ai Lona alofa ma le mutimuti alofa mo tagata uma, e pei ona faaalia i Lana galuega i le olaga nei ma e ala i Lana Togiola e le iu.

O Luka o le tusitala o lenei Evagelia. O ia o se fomai (tagai Kolose 4:14) ma “o se avefeau a Iesu Keriso” (Faaliliuga a Iosefa Samita, Luka 1:1 [i le Luka 1:1, vaefaamatalaga a]). O Luka o se tasi o “uso a faigaluega“ a Paulo (Filemoni 1:24; ua faaigoa o ia o Lucas i i) ma o se soa faifeautalai a Paulo (tagai 2 Timoteo 4:11). Na tusia foi e Luka le tusi o Galuega“Luka”).

E ui e le o iloa tonu pe o anafea na tusia ai e Luka lana Evagelia ae foliga mai na tusia i le afa lona lua o le seneturi muamua T.A. O punavai a Luka o tagata o e “na avea ma molimautino mai le amataga“ (Luka 1:2) o le galuega i le olaga nei a le Faaola ma le Toetu. Tatou te le iloa po o fea na tusia ai le Evagelia a Luka.

Na faamoemoe Luka e muai faitau lana Talalelei e se aofia o nuuese, ma sa ia tuuina atu Iesu Keriso o le Faaola i Iutaia faapea Nuuese. Na faatuatusi patino atu e Luka lana Evagelia ia “Teofilo“ (Luka 1:3), o lona uiga i le faa-Eleni o le “uo a le Atua” po o le “pele a le Atua” (tagai Bible Dictionary, “Theophilus”). Ua iloagofie o Teofilo na mauaina le faatonuga talu ai e faatatau i le soifua ma aoaoga a Iesu Keriso (tagai Luka 1:4). Sa faamoemoe Luka e saga faalautele le faatonuga e ala i le ofoina atu o se tala faatulagaina lelei o le misiona ma le galuega a le Faaola. Sa manao o ia ia i latou o e faitau i lana molimau ia “iloa le moni“(Luka 1:4)o le Alo o le Atua— Lona mutimuti alofa, Togiola, ma le Toetu.

O Luka o le Evagelia aupito umi o Evagelia e fa ma o le tusi e aupito umi i le Feagaiga Fou. O nisi o tala aupito lauiloa o le faa-Kerisiano e tulagaese i le Evagelia a Luka: o tulaga o loo siosiomia ai le soifua mai o Ioane le Papatiso, (tagai Luka 1:5–25, 57–80); o le faamatalaga masani o le Kerisimasi (tagai Luka 2:1–20); le tala ia Iesu i le 12 o ona tausaga i le malumalu (tagai Luka 2:41–52); o faataoto e pei o le Samaria agalelei (tagai Luka 10:30–37), o le atalii faamaimau oa (tagai Luka 15:11–32), ma le alii mauoa ma Lasalo (tagai Luka 16:19–31); le tala i lepela e toasefulu (tagai Luka 17:11–19); ma le tala i le Alii toetu na savavali ma Ona soo i le ala i Emau (tagai Luka 24:13–32).

O isi uiga tulaga ese o le faaaofia ai lea e Luka o aoaoga a Ioane le Papatiso e le o maua i isi Evagelia (tagai Luka 3:10–14); o lana faamamafa i le tumu o Iesu Keriso i le agaga tatalo (tagai Luka 3:21; 5:16; 9:18, 28–29; 11:1); ma lona faaaofia ai o le valaauina, aoaoina, ma galuega faafaifeautalai o Fitugafulu (tagai Luka 10:1–22). E sili atu lena, o Luka o le na o le pau lea o le tusitala faa-Evagelia ua tusia faapea na afutoto le Faaola i Ketesemane ma sa auauna atu se agelu ia te Ia (tagai Luka 22:43–44).

Talu ai e amata le Evagelia a Luka ma faaiu i le malumalu, o loo faailoa mai ai foi le taua o le malumalu ua avea o se nofoaga autu o fegalegaleaina a le Atua ma tagata (tagai Luka 1:9; 24:53).

Luka 1–3. O le fananau mai ma le misiona a Ioane le Papatiso ma Iesu Keriso sa valoia. Ua tautino mai e molimau faapea o le tamameamea o Iesu o le Mesia. I le 12 o ona tausaga, ua aoao Iesu i le malumalu. Ua folafola atu e Ioane le Papatiso le salamo ma papatisoina Iesu. Ua tusia e Luka le gafa o Iesu.

Luka 4–8. Ua faaosoosoina Iesu Keriso i le vao. I Nasareta ua Ia tautino atu ai Ia lava o le Mesia ma ua teenaina. Ua Ia filifilia Aposetolo e Toasefululua ma aoao atu Ona soo. Ua Ia faamagalo agasala ma faatino le tele o vavega.

Luka 9–14. Ua auina atu Aposetolo e Toasefululua e folafola atu ma faamalolo. Ua fafagaina e Iesu Keriso le silia ma le 5,000 tagata ma ua liua i luga o se mauga. Ua ia valaauina Fitugafulu ma auina atu i latou e aoao atu. Ua Ia aoao atu e uiga i le avea ai ma soo, talapepelo, ma le faamasinoga. Ua Ia faamatalaina le faataoto i le Samaria agalelei.

Luka 15–17. Ua aoao atu Iesu i faataoto. Ua Ia aoao atu e uiga i le faatausuai, faatuatua, ma le faamagalo atu. Ua Ia faamaloloina lepela e 10 ma aoao atu e uiga i Lona Afio mai Faalua.

Luka 18–22. Ua faaauau ona aoao atu e Iesu Keriso i faataoto. Ua Ia faamalolo se tagata tauaso ma aoao atu foi Sakaio. Ua Ia tietie atu faatupu i Ierusalema, ua tagitu’i ona o le aai, ma faamamaina le malumalu. Ua ia valoia le faatafunaina o Ierusalema ma ua fetalai e uiga i faailoga o le a muamua mai i Lona Afio Mai Faalua. Ua Ia faatuina le faamanatuga, aoao atu Ana Aposetolo, ma ua mafatia i Ketesemane. Ua faalataina o Ia, puefaapagotaina, tauemuina, sasaina, ma suesueina.

Luka 23–24. Ua faamasinoina Iesu Keriso i luma o Pilato ma Herota, faasatauroina, ma tanuina. O agelu i le tuugamau ma soo e toalua i le auala i Emau ua molimau atu o Iesu Keriso ua toetu. Ua faaali atu le Faaola i Ona soo i Ierusalema, folafola atu i Ana Aposetolo o le a tuuina atu ia i latou le mana mai le Atua, ma ua afio ae i le lagi.