Iakopo 4–5

Sa fautuaina e le Aposetolo o Paulo le Au Paia e tetee le leaga, ia faalatalata atili atu i le Atua, ma ia onosai ma le faapalepale i puapuaga ao faatalitali atu i le Afio Mai Faalua o le Faaola. Sa ia aoao mai o e mamai e tatau ona “aami atu ia i toeaina o le ekalesia” (Iakopo 5:14) e faamanuia ia i latou. Na aoao mai foi Iakopo i le taua o le fesoasoani i tagata agasala ia salamo.

Mafaufau i se tagata o le aiga po o se uo e te latalata i ai. Aisea e te latalata ai i lenei tagata?

Na faapefea ona oo ina e latalata i lenei tagata?

Ia mafaufau nei pe o le a lou latalata i le Atua? E faapefea ona faamanuiaina lou olaga i le i ai o se sootaga malosi ma le Atua?

A o e suesue i le Iakopo 4, vaavaai mo upumoni e mafai ona fesoasoani e faamalosia ai le lua sootaga ma le Atua.

E pei ona tusia i le Iakopo 4:1–3, sa aoai e Iakopo le Au Paia ona o le gauai atu i manaoga o le lalolagi. Faitau le Iakopo 4:4, ma vaavaai mo le ituaiga faauoga sa lapataiina e Iakopo le Au Paia e uiga i ai. O le upu ita o lona uiga o le mataua po o le inoino.

O le fautuaga a Iakopo i le fuaiupu 4 e le faapea e le tatau ona tatou faifaimea faatasi ma tagata e le auai i le Ekalesia. Ae, e tatau ona tatou aloese mai le taliaina ma le mulimuli i aoaoga sese ma manaoga, tulaga faatonuina, ma faiga le amiotonu a le lalolagi. Na aoao mai Iakopo o le faauo i le lalolagi (mea a le lalolagi) o le a fai ai i tatou ma fili o le Atua.

Faitau le Iakopo 4:6–8, ma vaavaai po o a mea na fautuaina e Iakopo le Au Paia e fai.

E faavae i mea ua e aoaoina mai le Iakopo 4:8, faauma le mataupu faavae lenei: A o tatou faalatalata atili atu i le Atua, . Mafaufau e faailoga upu i le Iakopo 4:8 o loo aoao mai ai lenei mataupu. O lenei mataupu faavae ua faamaonia i faaaliga i onaponei (tagai MF&F 88:63).

1. I lau api talaaga o le suesueina o tusitusiga paia, fai ai se lisi o mea e mafai ona e faia e latalata atili atu ai i le Atua.

O se tasi o auala e mafai ona e latalata atili atu ai i le Atua o le mulimuli i le fautuaga a Paulo ia “fafano ia o outou lima” ma “faamama ia o outou [loto]” (Iakopo 4:8). E pei ona faaaoga i tusitusiga paia, o lima e mafai ona faatusa i a tatou amioga ae o le loto e mafai ona faatusa i o tatou manaoga. Mafaufau loloto pe mafai faapefea e le i ai o ni lima mama ma se loto mama ona fesoasoani e te latalata atili atu ai i le Atua.

Faitau le Iakopo 4:9–12, 17, ma vaavaai mo ni fautuaga faaopoopo na tuuina atu e Iakopo i le Au Paia e fesoasoani ai ia i latou ia faalatalata atili atu i le Atua. O le fuaitau “ia liua o outou ataata ma faavauvau” i le fuaiupu 9 e faatatau i le lagona o le faanoanoa faaleatua mo agasala.

E tusa ai ma le Iakopo 4:17, o le a le mea na aoao mai e Iakopo o le agasala?

E mafai ona tatou aoao mai i le Iakopo 4:17 e faapea afai tatou te iloa e tatau ona fai le lelei ae filifili e le faia, ua tatou faia le agasala. Mafaufau e faailoga upu i le Iakopo 4:17 o loo aoao mai ai lenei upumoni.

Aisea e te manatu ai, o se agasala le iloa o mea lelei e tatau ona tatou faia ae filifili e le faia ia mea?

Sa faamalamalama mai e Peresitene James E. Faust o le Au Peresitene Sili, e uiga i lenei upumoni. O le upu le faia i le anotusi lenei e faatatau i galuega lelei e tatau ona tatou faia ae ua tatou le ano i ai pe tuua e le faia.

Ata

Peresitene James E. Faust

“Ou te popole ona o nisi o a tatou agasala sili o agasala o le le faia. O nisi nei o mea e sili atu le mamafa o le tulafono na fetalai mai le Faaola e le tatau ona tatou tuua e le faia [tagai Mataio 23:23]. O galuega magafagafa ma agaalofa nei tatou te le faia ma lagona ai le tausalaina ona o le le ano i ai.

“A o avea au ma se tama laitiiti i se faatoaga i le vaitau o le mutinitini o le vevela o le taumafanafana, ou te manatua ai le kukaina e lou tinamatua o Mary Finlinson o a matou meaai mananaia i luga o se ogaumu tafu vevela. Pe a uma le pusa fafie sa i autafa o le ogaumu, e tago filemu ifo lo’u Tinamatua sii le pusa, alu i fafo e toe faatumu mai i le faaputuga fafie arasi sa i fafo, ma toe aumai le pusa mamafatu i totonu o le fale. Sa matuai o’u le magafagafa lava ma fiafia i le talanoaga i le umukuka, sa ou saofai ai lava iina ae alu lo’u tinamatua peleina e faatumu mai le pusa o fafie o le umukuka. Sa ou lagona lo’u ma ia te a’u lava, ma sa ou salamo i lo’u le faia i lo’u olaga atoa. Ou te faamoemoe e i ai se aso ou te talosagaina ai lana faamagaloga” (“The Weightier Matters of the Law: Judgment, Mercy, and Faith,” Ensign, Nov. 1997, 59).

2. Tali fesili nei i lau api talaaga mo le suesueina o tusitusiga paia:

   1. O a ni faataitaiga o ni “agasala o le le faia” e mafai ona taofia ai oe mai le faalatalata atili atu i le Atua?

   2. O le a se mea e tasi o le a e faia e faalatalata atili atu ai i le Atua? Tautino e faatino soo se uunaiga e te maua o le a fesoasoani e te faamaea ai lenei sini.

I le Iakopo 5:1–6 tatou te faitau ai na tausalaina e le Aposetolo o Iakopo e e mauoa o e sa faaaoga sese a latou oa ma sauaina e amiotonu. Sa ia lapatai atu o le faanoanoa ma le faamasinoga ua faatalitali mai mo i latou.

Faitau le Iakopo 5:7–11, ma vaavaai mo le mea na faatonu e Iakopo le Au Paia e fai a o latou feagai ma puapuaga a o faatalitali atu i le Afio Mai Faalua o Iesu Keriso.

O nei fuaiupu o loo faaalia ai le faia i le va o tofotofoga ma le onosai, ma le ala e tali atu ai e e faamaoni, e pei o Iopu, i puapuaga ma faigata. Matau i le Iakopo 5:10 po o ai e mafai e le Au Paia ona vaai atu i ai mo faataitaiga o tagata o e onosai ma le faapalepale i puapuaga.

Lisi ni faataitaiga mai tusitusiga paia o perofeta o e sa onosai ma le faapalepale i puapuaga.

Mafaufau po o le a se fautuaga o le a tuu atu i se uo o le na fai mai, “E le o lelei o’u faalogona. Ua ova ma se vaiaso o o’u mai. Sa ou alu i le fomai ma inu a’u vai, ae ou te le o faalogoina lava se faasolo manuia. Ou te leiloa po o le a se isi mea a fai.”

Faitau le Iakopo 5:13–16, ma vaavaai mo le mea na fautuaina e Iakopo i latou o e na mamai ma puapuagatia e fai.

Ata

Elder Dallin H. Oaks

Na aoao mai Elder Dallin H. Oaks o le Korama a Aposetolo e Toasefululua, “Pe a faauu e toeaina se tagata ma’i ma faamau le faauuga, ua latou tatalaina faamalama o le lagi mo le Alii e liligi mai ai le faamanuiaga e finagalo ai o Ia mo le tagata puapuagatia” (“Healing the Sick,” Ensign po o le Liahona, Me 2010, 48).

Ata

tamaitai talavou ma’i o loo fai [sona] faamanuiaga

Toe vaai i le Iakopo 5:15. E faaopoopo atu i le mana o le perisitua, o le a le isi mea na fai mai Iakopo o le a laveai pe faamalolo ai le ma’i?

O se upumoni e tasi e mafai ona tatou aoao mai i le Iakopo 5:14–16 o le, e ala i le tatalo o le faatuatua ma le mana o le perisitua, e mafai ai ona faamaloloina le mai.

Na aoao mai e Elder Oaks le mea lenei e uiga i le tatalo o le faatuatua ma le mana faamalolo o le perisitua:

Ata

Elder Dallin H. Oaks

“A o tatou faaaogaina le mana e le masalomia o le perisitua a le Atua ma a o tatou teufatuina Ana folafolaga o le a faafofoga ma tali mai o Ia i tatalo faatuatua, e ao ina tatou manatua i taimi uma o le faatuatua ma le mana faamalolo o le perisitua e le mafai ona aumaia ai se taunuuga e ese mai le finagalo o Le ana le perisitua. …

“… E oo lava foi i auauna a le Alii e faaaogaina Lona mana paia i se tulaga ua i ai se faatuatua tele ina ia faamaloloina, e le mafai ona tuuina atu se faamanuiaga faaleperisitua o le a famaloloina ai se tagata, pe afai o lena faamalologa e le o le finagalo o le Alii.

“I le avea ai ma ni fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. Na ou lagonaina lena talitonuina i se lauga na tuuina atu e lou tausoga i le falelauasiga o se tamaitai talavou o le na maliu i se gasegase tigaina. Sa ia tautalagia upu nei na muamua ou te’i ai ona faatoa ou malamalalma ai lea: ‘Ou te iloa o le finagalo lea o le Alii e maliu o ia. Sa lelei lona tausiga faafomai. Sa tuuina atu ia te ia faamanuiaga faaleperisitua. Sa tusia lona igoa i lisi tatalo i le malumalu. O ia o le autu o le faitau selau o talosaga mo le toe faafoisia mai o lona malosi. Ma ou te iloa ua lava ma totoe le faatuatua o lenei aiga e faamaloloina ai o ia, vagana ai o le finagalo o le Alii e foi atu o ia i le taimi nei.’ Na ou lagonaina foi lena talitonuina i upu a se tama o se isi teineitiiti lelei na maliu i lona talavou, ona o le kanesa. Sa ia tautino mai, ‘O le faatuatua o lo matou aiga o loo ia Iesu Keriso, ae e le faalagolago i taunuuga.’ E tatagi pea le moni o na aoaoga ia te au. Tatou te faia mea uma tatou te mafaia mo le faamaloloina o se tasi e pele ia i tatou, ona tatou faalagolago lea i le Alii mo le taunuuga” (“Faamaloloina o e Mamai,” 50).

E faapefea ona fesoasoani aoaoga a Elder Oaks e te malamalama ai i le mana faamalolo o le perisitua? Aisea e tatau ai ona ogatasi o tatou faatuatua ma tatalo ma le finagalo o le Atua? (Tagai i le Bible Dictionary, “Prayer.”)

3. Vaai faalemafaufau e faapea ua ma’i se tasi o au uo po o se tagata o le aiga. I lau api talaaga mo le suesueina o tusitusiga paia, tusi ai se tusi i lena tagata e faamatala atu i ai, mea ua e aoaoina e uiga i le mana faamalolo o le perisitua. Ia mautinoa e faamatala atu i ai le pogai e taua ai, le le faalagolago o lo tatou faatuatua ia Iesu Keriso i le taunuuga o se faamanuiaga faaleperisitua. Ia aofia ai soo se faataitaiga o tagata e te iloa o e ua faamanuiaina e ala i tatalo o le faatuatua ma le mana o le perisitua.

Sa faatusaina foi e Iakopo le faamalologa o e mamai i le faamagaloga o agasala (tagai Iakopo 5:16).

Ata

Elder Bruce R. McConkie

Sa aoao mai Elder Bruce R. McConkie o le Korama a Aposetolo e Toasefululua e faapea, o le lotomaualalo ma le faatuatua e manaomia ina ia tatou faamaloloina ai faaletino, o lena lava foi lotomaualalo ma le faatuatua e manaomia ina ia tatou maua ai le faamagaloga: “E i ai … taimi paia lea e faamanuiaina ai tagata e o a’e i na tulaga faaleagaga maualuluga lea latou te maua ai le faamaoniga tauamiotonuina a le Agaga mo a latou amioga ma o se taunuuga e faamagaloina ai a latou agasala. Sa faaigoa e Iakopo le sauniga o le faamanuiaina o e mamai o se tasi o mea nei. … O le tagata o le e ala i le faatuatua, tuuto, amiotonu ma, e agavaa patino, o loo i ai i se tulaga e faamaloloina ai, o loo i ai foi i se tulaga e maua ai le faamaoniga tauamiotonuina a le Agaga mo le aluga o lona olaga, ma ua faamagaloina ana agasala, e pei ona molimauina i le mea moni e faapea, ua ia maua le mafutaga a le Agaga, lea e le mafai ona ia maua, pe ana faapea e le agavaa” (Mormon Doctrine, 2nd ed. [1966], 297–98).

Ae ui i lea, e le faapea ai la, ua le agavaa se tagata e le faamaloloina pe a tuuina atu i ai se faamanuiaga faaleperisitua. O faamanuiaga uma e tuuina atu e tusa ai ma le silafia sili atu o le Atua, ma e mafai ona tatou lagona Lona alofa ma le toafilemu o le Agaga o faamautu mai lo tatou agavaa.

E pei ona tusia i le Iakopo 5:17–20, sa faatatau atu Iakopo i le perofeta o Elia o se faataitaiga o se tagata sa faaaogaina le mana o le tatalo pulunaunau. Sa ia fautuaina foi le Au Paia e fesoasoani i tagata agasala ia salamo. Matau i le Iakopo 5:20 o faamanuiaga folafolaina e faapea ona oo mai ia i latou o e “[faaliliu] mai le tagata agasala mai lona ala sese.”

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Iakopo 4–5 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: