Luka 22

Ina ua lata ina maea Lana galuega i le olaga nei, sa faatuina e Iesu le faamanatuga, aoao atu Ona so’o e auauna atu i isi, ma poloaiina Peteru e faamalosi i ona uso. O le taulaga togiola a le Faaola na amata i le Faatoaga o Ketesemane. Na pue faapagotaina o Ia ma faamasinoina i luma o Kaiafa. A o faamasinoina le Faaola, sa faafiti Peteru na te le iloa o Ia.

Manatu faapea o loo oulua nofonofo ma se tasi o lou aiga i luga o le fola o lou fale. Ua fia tu i luga le tagata o lou aiga ma ua talosaga atu mo lau fesoasoani. O le a le lelei o lau fesoasoani atu ia te ia pe afai o lena e te saofai i lalo? O le a se eseesega pe a e tu muamua i luga?

E mafai ona fesoasoani lenei talafaatusa pe o a mea e mafai ona tatou faia e fesoasoani ai i isi ia atili ona faaleagaga.

A o e suesueina le Luka 22, vaavaai mo upumoni o le a fesoasoani ia e oe e iloa ai pe faapefea ona fesoasoani i isi e tutu i luga faaleagaga.

I le Luka 22:1–30 tatou te aoao ai e faapea i le taufaaiuiuga o Lana galuega i le olaga nei, sa feiloai ai le Faaola ma Ana Aposetolo e faamanatu le Paseka. I le taimi lea, sa Ia faasilasila atu ai o le a faalataina o Ia e se tasi o i latou, sa Ia faatuina le faamanatuga ma poloaiina ia faia e fai ma faamanatuga ia te Ia, ma sa Ia aoao atu i latou faapea o i latou o e auauna atu i isi, o i latou ia ua silisili i lo tagata uma. Sa viia e le Faaola ia Ana Aposetolo i lo latou faatasi pea ma Ia ma sa folafola atu ia i latou o le a i ai se aso o le a latou nofoia ai nofoalii ma faamasinoina ituaiga e sefululua o Isaraelu.

Faitau le Luka 22:31–32, ma vaavaai mo mea na fetalai ai le Faaola ua moomia e Satani.

O le Faaliliuga a Iosefa Samita o loo aumaia ai le faamaninoga lenei i le fuaiupu 31: “Ma ua fetalai atu le Alii, Simona e, Simona e, faauta ua manao tele Satani ia te oe, ina ia lulu i le fanauga o le malo e pei o le saito“ (Faaliliuga a Iosefa Samita, Luka 22:31 [i le Luka 22:31, vaefaamatalaga a]). I se isi faaupuga, sa manao Satani e maileia Peteru ina ia faigofie atili ai ona maileia isi tagata o le Ekalesia.

“E lulu le saito e ala i le tuueseeseina o fatu saito mai le aputi. E tuu le fatu lelei, ae lafoai le aputi masani. Afai e faamatuu atu le Au Paia i faaosoosoga ma ’au atu i agasala a le lalolagi, latou te maumauina lo latou tulagaese ae avea e pei o aputi“ (Tusi lesona a le Tagata Aoga o le Feagaiga Fou [Church Educational System manual, 2014], 183). I le talafaatusa a le Faaola, o le faatuatua ma molimau a Peteru ma isi e ono pei o fatu o saito ia e manao Satani e tuueseese pe aveese mai.

Lisi ni mea se tasi pe lua na e aoaoina e uiga ia Peteru lea e faailoa ai ua i ai sana molimau ia Iesu Keriso ma Lana talalelei.

Fuafua e maka i le Luka 22:32 le mea na ta’u atu e le Faaola ia Peteru o loo manaomia ona ia oo i ai a o lei mafai ona ia faamalolosia ona uso.

O le i ai o se molimau o le talalelei o lona uiga ua maua e se tagata le “malamalama ma se molimau faaleagaga ua tuu atu i ai e le Agaga Paia“ (Taiala i Tusitusiga Paia, “Molimau,” scriptures.lds.org). Liua i le talalelei o lona uiga o le “suia o talitonuga o se tasi, loto, ma le olaga e talia ma faaogatusa ma le finagalo o le Atua” (Taiala i Tusitusiga Paia, “Liua, Liliu,” scriptures.lds.org).

E faavae i mea na ta’u atu e le Alii ia Peteru i le Luka 22:32, e mafai ona tatou faailoa mai le upumoni lea: A oo ina tatou liua i le talalelei a Iesu Keriso, e mafai ona tatou faamalolosia isi.

1. A oo ina tatou liua e ogatusa o tatou talitonuga ma faatinoga i e finagalo o le Atua ma e mafai ona tatou fesoasoani pe faamalolosia foi isi. Tali fesili nei i lau api talaaga mo le suesueina o tusitusiga paia:

   1. E fesootai faapefea le talafaatusa i le fesoasoani e faatu se tagata i luga, i le mataupu faavae lenei?

   2. O le a sou manatu o le a se mea e fesoasoani i se tagata ia liua atili ai i le talalelei?

Faitau le Luka 22:33–34, ma vaavaai pe na faapefea ona tali atu Peteru i le apoapoaiga a le Faaola ma o le a foi le mea na valoia e le Faaola o le a faia e Peteru. Atonu e te manao e maka mea e te mauaina.

O se auiliiliga o lenei tala o loo tusia i le Mataio 26. Faitau le Mataio 26:35, ma vaavaai mo mea na fai atu ai Peteru i le Faaola ina ua uma ona faalogo atu i le valoaga.

Ina ua mavae le Paseka, na o ane Iesu ma le au Aposetolo i le Faatoaga o Ketesemane. Faitau le Luka 22:39–43, ma vaavaai po o le a le mea na faia e le Faaola iina. Atonu e te manao e maka i le fuaiupu 43pe o ai na faamalosia o Ia.

Mai le tala lea ua tatou aoao ai afai tatou te naunau e usitai i le Tama Faalelagi, o le a fesoasoani o Ia ia i tatou ia maua le malosi e faia ai Lona finagalo.

O a ni auala e ono faamalolosia ai i tatou e le Tama Faalelagi?

Mafaufau i se taimi na e lagonaina ai le faamalosia o oe e le Tama Faalelagi a o e saili e faia Lona finagalo.

O le tala a Luka i mafatiaga o le Faaola i le Faatoaga o Ketesemane e aofia ai se faamatalaga taua e le o aofia ai i tala o loo aumaia e Mataio ma Mareko. Faitau le Luka 22:44, ma vaavaai pe na faapefea ona faamatalaina e Luka le mafatiaga o le Faaola iina. Fuafua e maka ia upu o loo aoao mai ai le upumoni lea: Na afu toto Iesu Keriso a o mafatia ai o Ia i le Faatoaga o Ketesemane.

Na faamatala e le Faaola Ona lava mafatiaga i se faaaliga na tuuina mai e ala mai i le Perofeta o Iosefa Samita. Faitau le Mataupu Faavae ma Feagaiga 19:18, Faitau foi le Mosaea 3:7. Fuafua e tusi le Mataupu Faavae ma Feagaiga 19:18 ma le Mosaea 3:7 i au tusitusiga paia i autafa o le Luka 22:44 o ni mau fefaasinoai.

2. Tali fesili nei i lau api talaaga mo le suesueina o tusitusiga paia:

   1. O a ni ou mafaufauga i le iloa ai na matua tele mafatiaga o Iesu Keriso mo oe?

   2. E faapefea e le iloaina o le upumoni ona faamalosia ai lau molimau i le alofa o le Faaola mo oe?

Na aoao mai e Elder Bruce R. McConkie o le Korama a Aposetolo e Toasefululua, le mea lenei e uiga i mafatiaga o le Faaola:

Ata

Elder Bruce R. McConkie

“Tatou te le iloa, e le mafai ona tatou faamatalaina, e le mafai ona malamalama i ai le mafaufau faaletino i le taua atoa o le mea na faia e Iesu i Ketesemane.

“Ua tatou iloa sa puna mai le afutoto i puninii uma o Lona tino a o Ia inuina ‘alu o lena ipu oona na tuuina atu e Lona Tama ia te Ia.

“Ua tatou iloa sa puapuagatia o Ia, i le tino ma le agaga, e sili atu nai lo mea e mafai ona tigaina ai le tagata, sei vagana ai e oo i le oti.

“Ua tatou iloa i se isi itu, e le mafai ona tatou malamalama i ai, o Ona puapuaga na faamalieina ai manaoga o le faamasinoga tonu, faasaolotoina ai tagata salamo mai tiga ma faasalaga o le agasala, ma mafai ai ona maua le alofa mutimutivale e i latou o e talitonu i Lona suafa paia.

“Ua tatou iloa sa faō o Ia i luga o le eleele ona o tiga ma mafatiaga o se avega e le mafuatia lea na mafua ai ona gatete o Ia ma na toetoe a le mafai ona Ia inuina le ipu oona.

“Ua tatou iloa na oo mai se agelu mai malo o le mamalu e faamalosia o Ia i Ona puapuaga, ma ua tatou faapea o le agelu sili o Mekaeli, o le na muai pa’ū ina ia i ai le tagata.

“I la tatou faamasinoga e sili ona lalata i ai, o nei tiga e le mafuatiaina—o lenei puapuaga e le mafaatusalia—sa faifai pea mo le tolu i le fa itula“ (“O Le Mana Faamama o Ketesemane,” Ensign, Aperila 2011, 9).

I le Luka 22:45–48 ua tatou aoao ai ina ua uma ona mafatia le Faaola i Ketesemane, sa faalataina o Ia e Iuta le Sekara.

Faitau le Luka 22:49–51, ma vaavaai po o le a le mea na faia e Peteru (tagai Ioane 18:10) ina ua o mai le au faitaulaga sili ma isi e pue faapagotaina Iesu. Fuafua e maka mea na faia e Iesu mo le auauna a le faitaulaga sili.

I le Luka 22:52–53 ua tatou aoao ai e faapea na fesili le Faaola pe aisea ua pue faapagotaina ai o Ia e le au faitaulaga sili ma isi i le po ae le o mai i le ao a o i ai o Ia i le malumalu.

I le Luka 22:54 ua tatou aoao ai e faapea na mulimuli atu ia Peteru i le Faaola ina ua aveina atu o Ia i le fale o le faitaulaga sili e faamasinoina ai.

3. Tusi le siata lenei i lau api talaaga mo le suesueina o tusitusiga paia. Ao e faitauina mau taitasi, vaavaai po o ai na talanoa ia Peteru ma pe o le a le tala a Peteru a o faamasinoina le Faaola. Tusi au tali i koluma talafeagai. (Manatua: O Evagelia uma e fa o loo i ai se tala i le faafitiga a Peteru, ae o le tala a Ioane o loo i ai le tele o auiliiliga.)

A maea ona e faatumu le siata, tali le fesili lea i lau api talaaga mo le suesueina o tusitusiga paia: Aisea i sou manatu na faafiti ai Peteru i nei tagata taitasi na te le iloa Iesu?

Ata

Faafitiga a Peteru

Faitau le Luka 22:61–62, ma vaavaai mo le mea na tupu ina ua uma ona faafiti Peteru e le iloa le Faaola.

Mafaufau faapea sa e i ai i le tulaga o Peteru ina ua uma ona faafiti faatolu e le iloa Iesu. Mata o a ni ou mafaufauga ma ni lagona a o silasila atu le Faaola ia te oe? Aisea o le a e lagona ai faapena?

Na aoao mai Elder Bruce R. McConkie e uiga ia Peteru:

Ata

Elder Bruce R. McConkie

“O Peteru o se faataitaiga masani o le ala e galue ai le mana o le liua i agaga e taliaina. I le taimi o le galuega a le Alii i le olaga nei, sa i ai se molimau a Peteru, na fanauina i le Agaga, i le paia o Keriso ma le ata sili o le faaolataga lea e ia Keriso. ’O oe o le Keriso, le Alo o le Atua soifua,’ na ia fai mai ai, a o tuu atu ia te ia e le Agaga Paia e tautala. (Mataio. 16:13–19.) Ina ua toe o ese atu isi, sa tulai Peteru ma le mautinoa faaaposetolo, ’Ua matou talitonu o oe o le Keriso, o le Alo o le Atua soifua.’ (Ioane 6:69.) Sa iloa e Peteru, ma na ia iloa e ala mai i le faaaliga.

“Peitai, e lei liua Peteru, aua sa lei avea o ia ma tagata fou a le Agaga Paia. Ae, ua leva talu ona maua e Peteru se molimau, ma o le po lava lea na pue faapagotaina ai Iesu, na ia fetalai atu ai ia Peteru: ’Pe a liua mai oe, ona e faamalosi ai lea i ou uso.’ (Luka 22:32.) E lei pine talu mai lena mea, ma e ui ina sa i ai lana molimau, ae sa faafiti Peteru na te le iloa Keriso. (Luka 22:54–62.) Ina ua mavae le faasatauroga, sa alu Peteru e fagota, e lei pine ae toe valaauina i le galuega e le Alii toetu. (Ioane 21:1–17.) Mulimuli ane i le aso o le Penetekoso na maua ai le meaalofa faaleagaga na folafola ai; na avea Peteru ma soo faamaoni uma o ni tagata fou o le Agaga Paia; sa matuai liua faamaoni i latou; ma mea na latou ausia mulimuli ane na faaalia ai le mausali o lo latou liua. (Galuega 3; 4.)” (Aoaoga Faavae a Mamona, 2nd ed. [1966], 162–63).

I le Galuega ua tatou aoao ai faapea ina ua uma ona talia e Peteru o le meaalofa o le Agaga Paia, na matuai liua atoatoa o ia ma faaalu aso uma na totoe o lona soifua e avea ai ma soo faamaoni o Iesu Keriso (tagai Galuega 4:13–17; 5:25–29).

4. Tali fesili nei i lau api talaaga mo le suesueina o tusitusiga paia:

   1. O a ni lesona ua mafai ona tatou aoao mai le aafiaga o Peteru?

   2. O ai se tagata e te iloa ua foliga mai ua matuai liua moni i le talalelei a Iesu Keriso? O le a le mea na faia e lenei tagata e faaalia ai e faapea ua liua o ia?

Mafaufau po o le a se mea e mafai ona e faia e faalolotoina ai lou liua i le talalelei a Iesu Keriso. Faatino soo se uunaiga e te maua.

I le Luka 22:63–71 ua tatou aoao ai e faapea na amusia le Faaola ma sasaina e faitaulaga sili.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Luka 22 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: