Folasaga i le Mataio

O nisi o fuaitau pele o le Tusi Paia o loo maua i le Mataio o Faaamuia, o le Lauga i luga o le Mauga, ma le tele o faataoto, aoaoga, ma vavega a Iesu Keriso. O le suesueina o lenei tusi e mafai ona fesoasoani e te masani ai i le galuega ma upu a Iesu Keriso ma e mafai ona faamalosia ai lau molimau ia Iesu Keriso o le Faaola o le lalolagi ma le Mesia na folafola mai e perofeta paia uma.

Mataio, ua igoa foi ia Levi, o le atalii o Alefaio, o le tusitala o le tusi lenei. O ia o se telona, o se ao lafoga, a o lei suia lona olaga e faavavau ina ua tali atu i le valaaulia a Iesu Keriso e mulimuli atu ia te Ia. (Tagai Mataio 9:9; Mareko 2:14; Luka 5:27–28; Bible Dictionary, “Mataio.”) Ina ua mavae lea talanoaga, sa avea Mataio o se tasi o Aposetolo e Toasefululua a le Faaola (tagai Mataio 10:2–4). O se Aposetolo, o Mataio o se molimau na vaaitino i le tele o mea na ia faamatalaina. O loo lagolagoina lea i le ulutala na tuuina i lana Evagelia i le Faaliliuga a Iosefa Samita: “O Le Molimau a Sana Mataio.”

Tatou te le iloa tonu le taimi na tusia ai le tusi a Mataio, ae e peiseai na tusia i le afa lona lua o le seneturi muamua T.L.M. Tatou te le iloa po o fea na tusia ai e Mataio lenei tusi.

O Mataio e foliga mai na ia tusi atu i se aofia Iutaia e faaali atu ai sa faataunuuina e Iesu Keriso o valoaga o le Feagaiga Tuai e faatatau i le Mesia (tagai Bible Dictionary, “Mataio”). A o ia tusia e uiga i le soifuaga, upu, ma galuega a Iesu Keriso, sa tele ina faasino e Mataio i valoaga o le Feagaiga Tuai ma sa faaaogaina le fasifuaitau “ina ia faataunuuina ai” (mo se faataitaiga, tagai Mataio 4:14; 8:17; 13:35; 21:4).

I lana Evagelia, e 12 taimi sa faaaoga ai e Mataio le faaupuga “Alo o Tavita” e fai ma molimau faapea o Iesu Keriso o le suli moni i le nofoalii o le Tupu o Tavita ma o le faataunuuga o faamoemoega faalemesia. O le gafa o Iesu Keriso na tusia e Mataio o loo tosi atu ai Lona tupuaga ia Tavita, Iuta, ma Aperaamo (tagai Mataio 1:1–3), e faapupula ai le aia tatau a Iesu e pulea ma Lana matafaioi o le faataunuuga o folafolaga a le Atua ia Isaraelu.

E ui o se vaega tele o tusiga a Mataio o loo maua foi i le Mareko ma le Luka, ae pe tusa ma le 42 pasene o le Evagelia a Mataio e tulagaese lava. O se autu iloga i le Mataio o le, na afio mai Iesu Keriso e faavae Lona malo. Sa faatele ona ta’ua e Mataio “o le malo o le lagi”, ma e na o ia le tusi Evagelia ua faaaofiaina aoaoga a Iesu o loo ta’ua ai le “ekalesia” (tagai Mataio 16:18; 18:17).

Ua fesoasoani le Evagelia a Mataio tatou te vaai ai i le augatasi o galuega a Mose ma Iesu Keriso. Mo se faataitaiga, o i la’ua uma na faasaoina o ni tamameamea mai se taumafaiga a se tupu e fasiotia i la’ua (tagai Esoto 2:1–10; Mataio 2:13–18), na o mai uma i la’ua mai Aikupito, na taufai tuuina atu le tulafaono a le Atua i luga o se mauga (tagai Esoto 19–20; Mataio 5–7), o i la’ua uma foi na o mai e laveai o la’ua tagata.

Mataio 1–4. Ua tuu mai e Mataio le gafa ma le soifua mai o Iesu Keriso. Sa sailia e le Au Makoi le Tupu o Iutaia. Ina ua taialaina e miti, sa ave ai Maria ma le tamaitiiti o Iesu e Iosefa i Aikupito ma Nasareta mulimuli ane. Sa folafola e Ioane le Papatiso le talalelei o le salamo ma sa papatisoina Iesu Keriso. Sa faaosoosoina le Faaola i le vao. Ua amata Lana galuega i le tino e ala i le aoao atu ma le faamaloloina.

Mataio 5–7. Na fetalai Iesu i le Lauga i luga o le Mauga:

Mataio 8–12. Sa faamalolo e le Faaola se lepela, faatoafilemu se afa, tuliesea temoni, faatu mai le afafine o Iairo mai le oti, ma faapupula i e tauaso. Ua tuu atu e Ia i Aposetolo e Toasefululua le pule e faia ai mea sa Ia faia ma auina atu i latou e folafola atu le talalelei. Ua fofoga mai e Iesu faapea o Ioane le Papatiso ua le na o se perofeta. Ua faamalolo le Faaola i le Sapati.

Mataio 13–15. Ua aoao atu Iesu ma faaaoga ia faataoto. Ua fasiotia Ioane le Papatiso. Ua fafagaina e Iesu le silia ma le 5,000 tagata. Ua savali o Ia i luga o le Sami o Kalilaia, ua savali atu Peteru ia te Ia i luga o le sami. Ua fesiligia e le au Faresaio ia Iesu.

Mataio 16–18. Ina ua uma ona molimau atu Peteru o Iesu o le Mesia, sa ta’u atu e le Faaola o le a Ia tuu atu ki o le malo o le Atua ia Peteru ma isi Aposetolo. Ua liua Iesu Keriso i luga o se mauga, lea na talia ai e Peteru, Iakopo, ma Ioane ia ki o le perisitua. Ua tuu atu e Iesu faatonuga i Ona soo i le ala e taiala ai le Ekalesia ma aoao atu o le a le faamagaloina i tatou e le Atua pe afai tatou te le faamagalo atu i isi.

Mataio 19–23. Sa aoao atu le Faaola e uiga i le natura e faavavau o le faaipoipoga. Sa ulu atu o Ia i Ierusalema ma faamama le malumalu. E ala i le faaaogaina o faataoto, ua faalauiloa atu ai e Iesu faamoemoega leaga o taitai Iutaia o e sa tetee ia te Ia. Ua oi o Ia ona o le faatafunaga o Ierusalema i le lumanai.

Mataio 24–25; Iosefa Samita—Mataio Sa muai ta’u atu e Iesu Keriso le faatafunaga o Ierusalema. Sa Ia aoao atu le ala e mafai ai e Ona soo ona saunia mo Lona toe afio mai.

Mataio 26–27. Sa talisua Iesu i le Paseka faatasi ma Ona soo ma sa faatuina le faamanatuga. Na puapuagatia o Ia i le Faatoaga o Ketesemane ma sa faalataina, puefaapagotaina, faamasinoina i luma o taitai Iutaia ma Roma, ma sa faasatauroina. Ua maliu o Ia ma ua tanumia.

Mataio 28. Sa faaali le Faaola toetu i Ona soo. Na Ia poloaiina le au Aposetolo ia auina atu Lana talalelei i malo uma.