Sa taiala e le Agaga Paia ia Paulo ma ana soa e folafola le talalelei i Maketonia (Eleni i matu). Ina ua uma ona tuliese e Paulo se agaga leaga mai se auauna teine, sa sasaina i laua ma Sila ma faafalepuipuiina. O le po lena sa faasaoloto faavavega ai i laua mai i le falepuipui, ma sa la papatisoina le leoleo o le falepuipui ma lona aiga. Sa aoao atu foi e Paulo ma Sila le talalelei i Tesalonia ma Perea. Na faamalosia e sauaga mai i e e lei talitonu ia Paulo e sola i Atenai, lea na ia aoao atu ai tagata mai Aeropako e uiga i le natura o le Atua.
Ua folafola atu e Paulo ma ana soa le talalelei i Maketonia
O se uunaiga e faasino i lagona po o musumusuga tatou te maua mai le i Agaga Paia e tau atu pe faia se mea.
Ata
Peresitene Thomas S. Monson
Sa faamatala e Peresitene Thomas S. Monson se aafiaga na ia maua ina ua mulimuli i se uunaiga e alu e avatu se faamanuiaga faaleperisitua i se uo i le falemai. Na afua ai ona faasaoina le ola o lana uo. Fai mai Peresitene Monson sa ia aoaoina ai le lesona lea i lena aso: “Aua, aua, aua lava nei tolopoina se uunaiga” (“O le Agaga Na te Tuuina Atu le Ola,” Liahona, Iuni 1997, 5).
I lau api talaaga mo le suesueina o tusitusiga paia, tusi ai Aua lava nei tolopoina se uunaiga mai i le Alii. I lalo ifo o le faamatalaga tusi ai e uiga i taunuuga lelei e ono tulai mai ai i le usitaia pea lava pea o uunaiga a le Agaga Paia.
Ao e suesueina le Galuega 16, vaavaai mo se mataupu faavae e mafai ona fesoasoani ia te oe e malamalama atili ai i le taua o le usitaia o uunaiga a le Agaga Paia.
I le Galuega 16:1–5 ua tatou faitau ai e faapea o Paulo, Sila, ma Timoteo sa malaga atu i paranesi eseese o le ekalesia ma faasilasila atu i ai ia faaiuga na faia e taitai o le Ekalesia i Ierusalema o le a aafia ai le Ekalesia atoa ma faamalolosia ai tagata o le Ekalesia i le faatuatua.
Faitau le Galuega 16:6–10, ma vaavaai pe na faapefea e Paulo ma ana soa, o e e foliga mai na aofia ai ma Luka, ona iloa le mea e o i ai a o latou faimalaga. Atonu e te manao e faasino i Faafanua o le Tusi Paia, nu. 13, “O Malaga Faafaifeautalai a le Aposetolo o Paulo,” mo nofoaga na malaga i ai Paulo.
Matau i le Galuega 16:10 na usitai ia Paulo ma ana soa i le Agaga ma sa tali atu “loa” i le faaaliga na maua e Paulo.
Ua tatou faitau i le Galuega 16:11–13 e faapea na malaga atu Paulo ma Sila i Teroa seia la oo atu i Filipi, o se aai i Maketonia. I le aso Sapati, sa la tuua le aai ae o atu e tatalo i autafa o se auvai ma amata talanoa ai ma fafine sa faapotopoto ai iina.
Faitau le Galuega 16:14–15, ma vaavaai pe na faapefea e se fafine e igoa ia Litia ona tali atu i aoaoga a Paulo. I le fuaiupu 14 o le fasifuaitau “o le faatau ie paauli” e faasino i le mea moni e faapea o Litia e faatauina atu ia lanu paauli o se ituaiga e taugata tele ma e peiseai o lona uiga o ia o se fafine e mauoa ma tosinaina. O le upu faaloto o lona uiga ua naunau e gauai atu pe usitaia.
O a fasifuaitau i le Galuega 16:14 o loo tau mai ai sa saunia Litia e talia le talalelei?
Mai le aafiaga o Paulo ua mafai ai ona tatou aoao e faapea a tatou mulimuli i faaaliga e tuuina mai ia i tatou mai le Atua, e mafai ona taialaina i tatou i e ua saunia e talia le talalelei.
Faitau le saunoaga lea a Dallin H. Oaks o le Korama a Aposetolo e Toasefululua, ma maka mea na ia fai mai ai e tatau ona tatou faia ina ia taialaina ai i latou o e ua saunia e talia le talalelei:
Ata
Elder Dallin H. Oaks
“E tatau ona tatou tatalo mo le fesoasoani ma le taitaiga a le Alii ina ia avea i tatou ma meafaigaluega i ona aao mo se tasi ua saunia nei —o se tasi e Na te manao tatou te fesoasoani ai nei. O lea, e tatau ona tatou mataala e lagona ma faalogo i musumusuga a Lona Agaga pe faapefea ona fai.
“O na musumusuga o le a oo mai. Ua tatou iloa mai i le tele o molimau patino i Lana lava auala ma Lona lava taimi o loo saunia ai e le Alii tagata e talia lana talalelei. O ia tagata o loo sailiili, ma i le taimi tatou te saili ai e faailoa i latou o le a talia e le Alii a latou talosaga e ala i le tali mai o a tatou tatalo . E Na te musuia ma taitaia i latou o iai le manao ma o loo saili ma le filiga i le faapefea, o fea, o a fea, ma o ai e faasoa atu iai Lana talalelei” (“Faasoa Atu le Talalelei,” Liahona, Nov. 2001, 8).
Mafaufau i se taimi na e usitaia ai pe usitaia e se tasi e te iloa ia uunaiga a le Agaga Paia ma iloa ai se tasi ua saunia e talia le talalelei po o se tasi na mulimuli i uunaiga a le Agaga Paia e sue oe ina ua e saunia e talia le talalelei. Tusi le aafiaga i lau api talaaga mo le suesueina o tusitusiga paia.
Saili e muimuli i le fautuaga na tuuina mai e Elder Oaks e ala i le tatalo mo le fesoasoani a le Alii ona mulimuli lea i uunaiga a le Agaga e faasoa le talalelei ia i latou o vagaia oe.
Ua faafalepuipuiina ia Paulo ma Sila ona toe tatalaina ai lea
Faitau le Galuega 16:16–18, ma vaavaai po o le a le mea na faia e Paulo ina ua ia vaai i se “teinemuli” (Galuega 16:16), po o se auauna teine, sa i ai ni aitu vavalo. Vavalo (Galuega 16:16) o “soo se metotia faataulaitu e taumafai ai ia iloa le kosi o mea e tutupu i le lumanai. O na faiga e maua i nuu uma ma tupulaga uma; e tausalaina soo lava i tusitusiga paia” (Bible Dictionary, “Divination”).
Faitau le Galuega 16:19–21, ma vaavaai pe na faapefea ona tali atu matai o le auauna teine i mea na faia e Paulo.
E tusa ai ma le Galuega 16:19, aisea na latou le fiafia ai?
I le Galuega 16:22–24 ua tatou aoao ai e faapea sa poloaiina e tagata ma taitai o le lotoifale ia sasaina ma faafalepuipuiina ia Paulo ma Sila.
Kopi le siata lenei i lau api talaaga mo le suesueina o tusitusiga paia. Faitau ia mau o loo lisi atu i le siata ma tusi se ata faigofie i lau siata e faailoa mai ai mea o loo faamatala mai i fuaitau taitasi.
Matau le Galuega 16:31 pe na faapefea ona tali atu Paulo ma Sila i le fesili a leoleo o le falepuipui, “Se a le mea e tatau ona ou faia ou te ola ai?” [Galuega 16:30). O le a la le mea na faia e le leoleo o le falepuipui e faaali atu ai lona talitonuga ia Iesu Keriso?
Mai i aoaoga a paulo i le leoleo o le falepuipui, ua tatou aoao ai e faapea o le faaolataga e manaomia ai le talitonu ia Iesu Keriso, ma e tatou te faaalia lo tatou talitonuga ia te ia e ala i le papatisoina.
Faaolataga o lona uiga “o le faaolaina mai i le oti faaletino ma le faaleagaga” (Taiala i tusitusiga paia, “Faaolataga,” scriptures.lds.org). E faapefea e le papatisoina ona faaalia lo tatou faatuatua ia Iesu Keriso?
E le gata ina papatiso, o a isi auala e mafai ona tatou tau atu ai lo tatou talitonuga ia Iesu Keriso?
I le Galuega 16:35–40 ua tatou aoao ai e faapea na auina atu e faamasino le upu i le falepuipui e tuu atu ia Paulo ma Sila e o. Sa musu Paulo e alu aua sa ia iloaina ana aia tatau o se tagatanuu o Roma ma sa ia iloa sa lei tauamiotonuina lo latou faiga o ia. E le tusa ai ma le tulafono le sasaina o se tagatanuu o Roma e aunoa ma le muai faia o se faamasinoga. Ina ua iloa e faamasino o Paulo ma Sila o ni tagata Roma, sa fefefe i latou. Na oo mai faamasino i le falepuipui, ma tatala ia Paulo ma Sila, ma faatonuina i laua e tuua le aai.
Ua taumafai nisi o Iutaia i Tesalonia e taofia Paulo mai le folafola atu o le talalelei
Mafaufau i se fautuaga e te tuuina atu i tagata i tualga nei:
O se taulealea o le Ekalesia ua faalogologo i se uso o le Korama a Aposetolo e Toasefululua o talanoa e uiga i le taua o le faaipoipoga ma le aiga i le fuafuaga a le Tama Faalelagi. Ua faaalia e nisi o uo a le taulealea lo latou le ioe i aoaoga a le Aposetolo. Ua manao le taulealea e iloa mo ia lava pe moni ia aoaoga a le Aposetolo.
Ua fesiligia e se tamaitai talavou le taua o le tausia o le aso Sapati. O le toatele o ana uo e faapotopoto i Aso Sa e o e faatau, aai, pe o i tifaga. Ua faamatala atu e lona tina ia faamanuiaga e mafai ona maua mai i le faamamaluina o le Aso Sa o le Alii, ae o loo tauivi pea lava le tamaitai talavou e talitonu e faapea o le tausia o le aso Sapati ia paia e taua.
Vaavaai mo mataupu faavae a o e suesueina le Galuega 17 o le a fesoasoani e te iloa ai mo oe lava le moni o savali tatou te maua mai i auauna a le Alii.
I le Galuega 17:1 ua tatou aoao ai sa malaga ia Paulo ma Sila i Tesalonia, lea sa la aoao atu ai i le sunako Iutaia.
Faitau le Galuega 17:2–3, ma vaavaai po o a mea na faaaoga e Paulo e aoao ai Iutaia o Iesu o le Keriso, o le Mesia.
O le upu faamatala i le fuaiupu 3 o lona uiga o le tautino atu pe tau atu. Sa faaaoga e Paulo ia fuaitau o mau o ni faamaoniga e lagolago ai lana molimau o Iesu o le Keriso.
Faitau le Galuega 17:4–5, ma vaavaai pe na faapefea e tagata o Tesalonia ona tali atu i aoaoga a Paulo. O le upu faaopoopoina i le fuaiupu 4 o lona uiga ua faapotopoto faatasi pe auai faatasi, ma le leaga i le fuaiupu 5 o lona uiga o le amioleaga po o le faatiapolo.
I leGaluega 17:6–9 ua tatou aoao ai sa taumafai se vaega faatupu vevesi o tagata le talitonu e sue ia Paulo ma Sila, ae ina ua latou le mafai ona maua i laua, sa aveina e le vaega faatupu vevesi nisi o le au talitonu ma o atu i taitai i Tesalonia ma tau atu e faapea ua faamatauina e aoaoga a Paulo le pule a Kaisara.
Faitau le Galuega 17:10–12, ma vaavaai po o fea na sosola i ai Paulo ma sila ma pe na faapefea ona tali atu tagata Iutaia iina i aoaoga a Paulo.
Fuafua e maka i le Galuega 17:11 mea na faia e tagata na tau atu i lo latou talitonuga i aoaoga a Paulo. Ona faamaea lea o le fuafaatusa lea i taga na e makaina:
Ina ia malamalama atili i le uiga o le “[talia] le upu ma le fiafia tele” (Galuega 17:11), mafaufau pe o a foliga o se tasi ua saunia e sapo se polo. Mafaufau nei pe mata o a foliga o se tagata e lei saunia e sapo se polo. Mata o a foliga o se tasi ua saunia e talia upu a auauna a le Atua? Mata o a foliga o se tagata e lei saunia e talia le upu a auauna a le Atua?
O se e taliaina le upu ma le saunia o le mafaufau po o le fiafia tele o se tagata e lotomaualalo, onosai, ma naunau e mulimuli i le finagalo o le Alii a o ia aoaoina (tagai Mosaea 3:19).
Mai i le Galuega 17:10–12 ua tatou aoao ai e faapea afai tatou te talia upu a auauna a le Atua ma le saunia o le mafaufau ma sailiili i tusitusiga paia i aso taitasi, ona faamalosia lea o lo tatou talitonuga i a latou upu.
Toe iloilo ia tulaga o loo faamatala atu i le amataga o le vaega lenei, ona tali lea o fesili nei i lau api talaaga mo le suesueina o tustusiga paia:
E mafai faapefea e lenei mataupu faavae ona fesoasoani i nei tulaga?
O a ni auala e mafai ai e se saunia e aoao ona fesoasoani i o tatou tomai e talitonu i le upumoni?
O a ni auala e mafai ai e le suesue i tusitusiga paia i aso taitasi ona faatosinaina lo tatou tomai e talitonu i upumoni?
Mafaufau i taimi na e molimauina ai le moni o lenei mataupu faavae. E mafai ona e mafaufau e faasoa atu ou aafiaga i se uo po o se tagata o le aiga.
I le Galuega 17:13–15 ua tatou aoao ai e faapea ina ua faalogo tagata Iutaia i Tesalonia o loo folafola atu Paulo i Perea, sa latou o atu e faaosooso i tagata o Perea. Sa tatau ona toe sola ia Paulo, o lea na ia malaga ai i Atenai.
I le Galuega 17:16–34 ua tatou aoao ai i Atenai na matauina ai e Paulo se fatafaitaulaga o loo i ai se faaupuga “Mo le atua e le iloa” (Galuega 17:23). Ona aoao atu lea e Paulo tagata Atenai e uiga i le natura o le Atua moni—le Tama Faalelagi—o le Atua latou te lei iloa.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina leGaluega 16–17 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: