Sa folafola atu e Ioane le Papatiso ”le papatisoga o le salamo mo le faamagaloina o agasala” (Mareko 1:4). Ina ua uma ona papatiso e Ioane ia Iesu, sa amata e le Faaola ona folafola atu le talalelei ma faia vavega e ala i le mana ma le pule paia. Sa Ia tutulieseina agaga leaga ma faamalolo i se lepela. Ua salalau le tala i mea sa Ia faia i Kalilaia uma.
Fai i ni tagata se toalua pe sili atu (tagata o aiga, uo, tagata o le vasega, po o isi) e faasoa atu ia te oe a latou molimau ia Iesu Keriso. Atonu e te manaomia ona tuu atu ia i latou se taimi e to manatu ai ma sauniuni a o lei faasoaina atu ia te oe a latou molimau. I lau api talaaga mo le suesueina o tusitusiga paia, tusi i lalo se aotelega puupuu o upumoni sa latou faasoa mai.
Mafaufau i fesili nei:
O le a le mea taua e uiga i le faalogo i molimau mai le tele o tagata nai lo le na o se tagata e toatasi?
O le a sou manatu o le mea e taua i le suesueina o le molimau a Mareko, aua o lea ua maea ona e suesue i le molimau a Mataio?
Faitau le Mareko 1:1–4, 9–11, ma vaavaai mo le mea na tupu lea na amata ai e Mareko lana tala i le soifuaga o le Faaola.
O le tala a Mareko i le soifuaga o le Faaola e ese mai le tala a Mataio. E amata faafuasei ma e saoasaoa, e faamamafa mai ai le paia o le Faaola e ala i le taulai atu i Ana galuega ma vavega. E foliga mai na tusia e Mareko lana tala e faavae i mea sa ia aoaoina mai i le Aposetolo o Peteru. E talitonu le toatele o sikola na tusia i le va o le T.A. 66 ma le T.A 73, i se taimi na mafatia ai le au Kerisiano i le Malo uma o Roma i sauaga ogaoga.
I le Mareko 1:12–20 ua tatou faitau ai e faapea ina ua uma ona anapogi Iesu mo le 40 aso, sa faaosoosoina o Ia e le tiapolo (tagai foi Mataio 4:1–11). Sa Ia folafola atu foi le salamo i Kalilaia ma sa valaauina soo e mulimuli atu ia te Ia.
Ua tutuliese e Iesu ia temoni ma faamalolo i e mamai
O a ni tulaga lamatia atonu e feagai ma se fitafita i le itu a le fili?
Faitau le saunoga lenei a Peresitene Boyd K. Packer o le Korama a Aposetolo e Toasefululua:
Ata
Peresitene Boyd K. Packer
“Faatasi ai ma mea uma o loo tutupu i le lalolagi, i le faaitiitia o tulaga faatonuina o amioga mama, o outou le autalavou ua ola ae i teritori o le fili.
“Ua tatou iloa mai tusitusiga paia sa i ai se taua i le lagi ma sa fouvale ia Lusifelo, ma faatasi ai ma e na mulimuli ia te ia, ’ua lafo ifo i le lalolagi’ [Faaaliga 12:9]. Ua naunau o ia e faalavefau i le fuafuaga a lo tatou Tama Faalelagi ma saili e pulea mafaufau ma taga a tagata uma” (“Fautuaga i le Autalavou,” Ensign po o le Liahona, Nov. 2011, 16).
Ata
fitafita ma pulou i lalo ifo o le ’olomata’i
Tali le fesili lenei, i lau api talaaga mo le suesueina o tusitusiga paia: Mai mea na aoao mai e Peresitene Packer, ma mai lou lava poto masani, o faapefea ona tatou i ai i le itu a le fili i o tatou olaga i le lalolagi?
Mafaufau i taimi i lou olaga na e lagonaina ai le lofituina ona o faatosinaga leaga ma faaosoosoga o loo siosiomia ai oe. A o e suesue i le Mareko 1:21–37, vaavaai mo se upumoni o le a fesoasoani ia te oe pe a e feagai ma faatosinaga leaga ma faaosoosoga.
Faitau le Mareko 1:21–22, ma vaavaai mo mea na faia e Iesu i Kapanaumi ma pe na faapefea ona tali atu Iutaia.
Aisea na ofo ai Iutaia i aoaoga a le Faaola?
O le au tusiupu o loo ta’ua i le fuaiupu 22 na manatu i ai o tagata popoto faapitoa i le tulafono a Mose. O nisi taimi na “faaigoa ai i latou o le au faitulafono po o fomai o le tulafono. Sa latou atinae auiliili le tulafono ma faaaoga i tulaga o o latou taimi” (Taiala i Tusitusiga Paia, “Scribe,” scriptures.lds.org). A latou talai atu e tele ina latou sii maia mau a i latou o e na mua′i pulea le tulafono. I se faatusatusaga e ese ai, sa fetalai Iesu ma le mana ma le pule a Lona Tama. O Ia foi o le Ieova Silisili lea na tuuina atu le tulafono a Mose. Ua aoao mai e le Faaliluga a Iosefa Samita e faapea “na ia aoao atu i latou e faapei o se ua i ai le pule mai le Atua, ae le o se pule mai le au tusiupu” (Faaliluga Iosefa Samita, Mataio 7:37 [i le Mataio 7:29, vaefaamatalaga a]).
A o aoao atu Iesu i le sunako, sa faafetaiai o Ia e se tagata sa uluitinoina e se agaga leaga. Faitau le Mareko 1:23–26, ma vaavaai mo mea na iloa e agaga leaga e uiga ia Iesu.
Afai o maua, e mafai ona outou matamata i le vitio “Ua faamalolo e Iesu le Tagata ua Ulutinoina” (1:48) mai le Vitio o le Tusi Paia O le Soifuaga o Iesu Keriso, e maua i le LDS.org, ma vaavaai mo mea na iloa e le agaga leaga e uiga ia Iesu.
O agaga leaga e saili e nofoia tino faaletino o i latou ia e mulimuli ia Lusifelo. Sa latou nonofo i le afioaga o le Tama Faalelagi ma Iesu Keriso a o le i lafoai ese mai le lagi.
Ana fai sa e i ai i le sunako i lena taimi ma vaai i le mea na tupu, mata o le a sou mafaufau e uiga ia Iesu?
Faitau le Mareko 1:27–28, ma vaavaai pe na faapefea ona tali atu tagata ina ua uma ona vaai ia Iesu o tuliesea le agaga leaga mai le tagata.
O se upumoni e tasi e mafai ona tatou aoao mai i lenei tala o le ua i ai i le Faaola le mana e manumalo ai i le tiapolo ma ana ’au.
Tali le fesili lenei, i lau api talaaga mo le suesueina o tusitusiga paia: E fesoasoani faapefea le iloa ua i le Faaola le mana e manumalo ai i le tiapolo ma ana ’au, ia te oe pe a e lagonaina le lofituina ona o faatosinaga leaga ma faaosoosoga o loo siosiomia ai oe?
Faitau le saunoaga lea a Peresitene James E. Faust o le Au Peresitene Sili, ma maka le mea e mafai ona e faia ia maua ai le mana sili atu e teena ai le tiapolo:
Ata
Peresitene James E. Faust
“Na ta’ua e le Perofeta o Iosefa Samita … , ‘O agaga leaga e i ai o latou noataga, tuaoi, ma tulafono e pulea ai i latou“ [i le Talafaasolopito o le Ekalesia, 4:576]. O lona uiga o Satani ma ana agelu e le mamana lava. …
“… O taumafaiga a Satani e mafai ona lepetia e i latou uma o e o mai ia Keriso e ala i le usiusitai i feagaiga ma sauniga o le talalelei. O so’o lotomaualalo o le Matai paia e le tatau ona faaseseina e le tiapolo. E le lagolagoina ma siitia ma faamanuiaina e Satani. Na te tuua i latou e na pueina i le maasiasi ma le faanoanoa. O le agaga o le Atua o se faatosinaga e lagolagoina ma siitiaina” (“Auauna Atu i le Alii ma le Teenaina o le Tiapolo,” Ensign, Nov. 1995, 6, 7).
Ata
Perofeta o Iosefa Samita
Sa aoao mai le Perofeta o Iosefa Samita: “Ua tatou o mai i lenei lalolagi ina ia tatou maua ni tino ma tuuina atu ma le mama i luma o le Atua i le malo selesitila. O le mataupu faavae sili o le fiafia e aofia ai le i ai o se tino. O le tiapolo e leai se tino, o lona faasalaga lena. E fiafia o ia pe a ia mauaina le tino o le tagata, ma ina ua tuliesea e le Faaola sa ia talosaga ina ia ulu atu i le lafu puaa, [tagai Mareko 5:1–13], ua faaalia ai lona manao i le tino o le puaa i lo o le leai o se tino. O tagata uma o e fai tino, e i ai le mana ia i latou o e leai ni tino” (Aoaoga a Peresitene o le Ekalesia: Iosefa Samita [2007], 224-25).
Faitau le Mareko 1:28, ma vaavaai mo le mea na tupu ina ua uma ona tulieseina e le Faaola le agaga leaga.
O Simona Peteru na faaipoipo, ma i le Mareko 1:29–31 ua tatou faitau ai e faapea na faamalolo e le Faaola le tina o lona toalua sa maua i le ma’i vevela. I le Mareko 1:32–39 ua tatou faitau ai e faapea na faamalolo e Iesu le toatele o isi sa mama’i, tutuliese temoni, ma faaauau pea ona talai atu i le nuu uma o Kalilaia.
I aso anamua, o se tagata e mafatia i le lepela sa ta’u o le lepela. “O le lepela o se ma’i tuga e aafia ai le pa’u, neura, mata, ponaivi, ma sooga o ivi. A le togafitia, e atili ai ona afaina e e maua ai ma oo atu ai i se oti matuia. O lepela i Isaraelu anamua, sa faaaunuua [ma tutuli faamalosi e nonofo i tuapa o le aai], sa poloaiina e taufono ’Le mama’ e lapataia ai soo se tasi e latalata atu ia i latou, ma sa manatu e salalau atu ai lo latou le mama i soo se tasi latou te fetaiai (tagai Levitiko 13:45–46)” (Tusi lesona a le Tagata Aoga o le Feagaiga Fou [Church Educational System manual, 2014], 103).
Manatu faapea o oe o se lepela i ona po o Iesu Keriso. Mata e faapefea ona aafia lou olaga pe a e lepela?
Faitau le Mareko 1:40, ma vaavaai po o le a le mea na fai e le lepela ina ua ia vaai i le Faaola. (O le upu aioi o lona uiga o le faatoga atu po o le augani.)
Na faapefea ona faaalia e le lepela lona faatuatua ia Iesu Keriso?
O le fasifuaitau ”afai ua e finagalo ai“ o lona uiga sa iloa e lea tagata e faalagolago lona faamalologa i le finagalo o le Faaola. Faitau le Mareko 1:41–42, ma vaavaai pe na faapefea ona tali atu le Faaola i le aioiga a le tagata lea.
Manatunatu loloto i fesili nei:
Pe ana fai o oe o le lepela, o le a se uiga ia te oe o le pa’i atu o le Faaola? Aisea?
E suia faapefea lou olaga pe afai sa faamalolo e Iesu Keriso lou lepela?
Ata
Elder Bruce R. McConkie
A o e faitauina le saunoaga lea a Elder Bruce R. McConkie o le Korama a Aposetolo e Toasefululua, maka ia auala na ta’ua e le lepela e mafai ona faatusa i le agasala (tagai Levitiko 14): ”O le lepela i ona po faatusi paia, e le gata i ona aafiaga faataumaoia faaletino, ae sa tilotilo i ai o se faatusa o le agasala ma le le mama, e ta’u mai ai faapea o lenei ma’i leaga e ’atia ai ma faaumatia le tino faaletino, e faapea foi ona ’atia e le agasala ma faaleagaina e itu faaleagaga o le tagata. … Sa i ai taimi i le Feagaiga Tuai—o Miriama, Kiasi, ma Usia—lea na fetuu ai tagata fouvale ia lepela e fai ma faasalaga o a latou amioga leaga“ (O le Soifuaga o le Mesia i la le Tino: Mai Peteleema i Kalevario, 4 vols. [1979–81], 2:45).
E taua le matau o ma’i e pei o le lepela e le afua mai i le agasala. Ae e i ai se mea e talitutusa ai aafiaga o le lepela ma aafiaga o le agasala. Toe faitau le Mareko 1:40–42. Ao le taimi la lea, suitulaga le upu tagata agasala mo le tagata lepela ma le agasala mo le mai lepela. A o e faitau, vaavaai pe mafai faapefea ona faatusa le faamalologa o le lepela lea i lo tatou faamamaina mai agasala.
A o e faitauina faapea ia fuaiupu, o a upu o loo fautuaina mai ai le manatu faapea ua faamagaloina?
E mafai faapefea ona tatou faatatauina le mea na fai e le lepela ina ia faamamaina ai, mai le lepela i le mea e tatau ona tatou faia ina ia mama ai mai agasala?
O se mataupu faavae e tasi e mafai ona tatou aoao mai e ala i le faatatau o le faamalologa o le lepela i le faamamaina mai agasala e faapea a o tatou faatino le faatuatua ma o mai i le Faaola, o le a alofa mutimutivale o Ia ia i tatou ma faamama i tatou mai agasala. Mafaufau e tusi le upumoni lea i le laina o au tusi paia i autafa o le Mareko 1:40–42.
Tali fesili nei i lau api talaaga mo le suesueina o tusitusiga paia:
E faapefea ona tatou faatinoina lo tatou faatuatua ma o mai i le Faaola ina ia mafai ai ona Ia faamamaina i tatou mai a tatou agasala?
Toe mafaufau pe na faapefea le olaga o le lepela a o lei faamaloloina ma ina ua uma ona faamalolo. E mafai faapefea ona suia le olaga o se tasi e ala i le sau ia Iesu Keriso ina ia faamamaina ai mai le agasala?
O anafea na e vaai ai i le olaga o se tasi ua suia ina ua uma ona faamama mai se agasala e ala i le mana o le Togiola a Keriso?
Mafaufau pe o a agasala e manaomia ona e faamamaina mai ai. A o e sau i le Faaola e ala i le faatinoina o le faatuatua ia te Ia e ala i le tatalo, salamo, ma le usiusitai, e mafai e Ia ona faamamaina oe.
Faitau le Mareko 1:43–45, ma vaavaai mo faatonuga na tuu atu e le Faaola i le lepela na faamalolo. E manaomia e le tulafono a Mose i latou e faamalolo mai le lepela e faaali atu i latou lava i se ositaulaga o le malumalu. Ina ua uma ona tau atu e le ositaulaga ua malolo le lepela, e tatau ona faia se taulaga ina ia mafai ai ona ta’u atu ua faamamaina le lepela, ma toe maua ai le faaaumeaina atoa o ia e lona aiga ma le nuu.
O le a le mea na faia e le tagata ina ua uma ona lapataia o ia e le Faaola e aua nei ta’uina atu i isi?
O le a le mea na tupu ona ua faasalalau e le tagata le tala e uiga i lona faamalologa?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Mareko 1 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: