Luka 6:1–7:18

Na aoao mai e Iesu e uiga i le taua o le faia o mea lelei i isi, e aofia ai le Sapati. Ina ua uma ona faaalu se po i le tatalo, sa Ia valaauina Ana Aposetolo e Toasefululua ona aoao atu lea o i latou ma se motu o tagata. Sa Ia faamaloloina foi le auauna a se taitai o le toaselau ma faatuina mai le oti le tama a se fafine ua oti lana tane.

Mafaufau e faapea i la outou sauniga faale-Ekalesia i le Aso Sa ua e faalogo ai i se faasilasilaga e uiga i se galuega fesoasoani mo se aiga e nonofo latalata ia te oe. Ina ua uma le faasilasilaga ua e faalogo atu i tali nei:

• “O le tele ia o faafitauli na feagai ma le aiga lena talu ai nei. Ua ou fiafia e fesoasoani i soo se mea ou te mafaia.“

• “E tatau ona fai se meaai pe a uma, aua a leai, ou te le alu.“

• “Ou te le fia alu, ae ou te fia faaaogaina se fesoasoani i le vaiaso lea i se galuega faatino o loo ou faatulagaina, o lea atonu ua tatau ona ou fesoasoani nei.“

• “Afai e alu la’u uo, o le a ou alu.“

1. I lau api talaaga mo le suesueina o tusitusiga paia, tusi i lalo mea o ta’u mai i tali na muamua e uiga i mafuaaga e ala ai ona auauna atu tagata.

Mafaufau e uiga i avanoa na e maua e auauna atu ai ma pe o a ou lagona e uiga i le auaunaga. A o e suesueina le Luka 6–7, vaavaai mo mataupu faavae e mafai ona fesoasoani ia te oe e tuu atu ai se auaunaga i ni ala e sili ona anoa.

A o i ai i Kalilaia i le popofou o Lana galuega, sa faamalolo ai e Iesu le lima na gase o se tagata i le Sapati (tagai Luka 6:6–10), faaalu se po i le tatalo, ma valaauina Aposetolo e Toasefululua (tagai Luka 6:12–13). Ona amata lea ona Ia aoao atu i latou ma “se motu o tagata e toatele“ (Luka 6:17), i le ala e maua ai taui faalelagi. O lenei lauga o i le Luka 6 e tele ina faasino i ai o le Lauga i Laufanua Valevalenoa ma e talitutusa lava i le Lauga i luga o le Mauga i le Mataio 5–7. “E i ai vaaiga eseese pe o le Lauga i luga o le Mauga na tusia e Mataio ma le Lauga i Laufanua Peitai, o le faataatiaga o le faasologa ma le matalalaga o le tusiga a Luka e foliga mai o loo ta’u mai ai o le lauga lava e tasi lea na tusi faamaumauina i le Luka 6 ma le Mataio 5–7” (Tusi lesona a le Tagata Aoga o le Feagaiga Fou [Church Educational System manual, 2014], 152–53; tagai foi Bible Dictionary, “Lauga i Luga o le Mauga”; Ogatusa o Evagelia). (Manatua: O le tele o le anotusi i le Luka 6 na aofia i le taimi na e suesue ai i le Mataio 5–7; 10:1–4; ma le Mareko 3:1–6.)

Faitau le Luka 6:19, ma vaavaai mo mea na faia e Iesu mo tagata a o lei amata ona Ia aoaoina i latou.

O le isi, faitau le Luka 6:31, ma vaavaai mo le fautuaga a Iesu i Ona soo.

E mafai faapefea e le manatuaina e tatau ona tatou faia isi e pei ona tatou mananao ai, ona tosina ai le auala e te faia ai tagata?

Faitau le Luka 6:32–35, vaavaai mo nisi fautuaga na tuu atu e Iesu i Ona soo e uiga i le alolofa ma auauna atu i isi Atonu e te manao e maka i le fuaiupu 35 mea e tatau ona e faamoemoe e maua mai ona o le faia o mea lelei i isi. Matau le mea na folafola atu e le Alii ia i latou o e e faia mea lelei i isi e aunoa ma le mafaufau e toe maua mai ai se mea.

O le mataupu faavae e tasi tatou te aoao mai i nei fuaiupu o le afai tatou te faia mea lelei i isi e aunoa ma le faamoemoe e toe maua mai ai se mea, o le a tele lo tatou taui ma o le a avea i tatou ma fanau a le Silisiliese.

Matau le fasifuaitau “e avea foi outou ma fanau a le Silisiliese” (fuaiupu 35) E ui o i tatou uma o fanau a le Atua, o i latou o e faia mea lelei i isi e pei ona sa faia ai e Keriso, ua faataunuuina lo latou gafatia paia e ala i le avea ai faapei o lo tatou Tama i le Lagi. Mafaufau pe faapefea e le auauna atu i isi e aunoa ma le mafaufau e toe maua mai ai se mea ona fesoasoani i se tagata e avea atili e faapei o Keriso.

Faitau le Luka 6:36–38, ma vaavaai mo faataitaiga na tuu atu e Iesu i auala e mafai ona tatou faia ai mea lelei i isi. Matau na folafola atu Iesu e faapea o tagata o e faaalia le alofa mutimutivale i isi, o e aloese mai le faamasino o isi ma le amioletonu, ma o e faamagalo atu ma le le ta’uta’ua o le a maua le alofa mutimutivale o le Atua.

Pe ua e taumafai ea e tuu nisi mea i se pusa po o se atopa’u nai lo le mea e mafai ona ofi ai? I le Luka 6:38 o le faamatalaga o le tele o mea o le a toe maua ona o mea lelei tatou te faia e aofia ai ia fasifuaitau o “fua lelei, e lolomi ma luluina, e tumu ma solo i tua.“ O faapefea ona faamatala e nei fuaitau le ala e tauia ai e le Tama Faalelagi i tatou a o tatou foai atu i isi?

O le upumoni e tasi e mafai ona tatou aoaoina mai le Luka 6:38 o le a o tatou foai atu ma le matamau i isi, e faamanuiaina atili ma le matamau i tatou e le Tama Faalelagi. Fuafua e tusi le mataupu faavae lenei i autafa o le fuaiupu 38.

2. Mafaufau i ni auala e mafai ai ona tatou matamau e foai atu i isi. Ona tali lea o fesili nei, i lau api talaaga mo le suesueina o tusitusiga paia:

   1. O anafea na e foai matamau atu ai pe foai matamau atu ai se tasi e te iloa i isi?

   2. Na faapefea ona faamanuiaina oe po o se tasi e te iloa e le Alii ona o le foai atu ma le matamau?

   3. O le a se mea e te faia ina ia e atili matamau ai i isi?

O se tasi ala e mafai ai ona matamau atili i isi o le tausia lea o le tulafono o le anapogi e ala i le foai atu o se taulaga anapogi pe a e anapogi. Atonu ua saofaga ou matua i le taulaga anapogi mo lou aiga, ae afai e te mafaia, e mafai foi ona e avatu sou sao. A o e saili ina ia agalelei atili i isi, tatalo mo le fesoasoani a le Alii e auauna atu e pei ona Ia faia.

I le Luka 7:1 ua tatou aoao ai e faapea ina ua uma ona aoao atu o le motu o tagata e toatele, sa maliu atu Iesu i Kapanaumi. Faitau le Luka 7:2–5, ma vaavaai po o ai na ole atu mo le fesoasoani a Iesu ina ua faalogo ua afio atu o Ia i le aai.

Ata

toega o fale anamua

O le taitai o le toaselau o se tagata aloaia i le fitafita a Roma o le e taitaia ni fitafita pe 50 i le 100. E masani ona le fiafia ia Iutaia i taitai o toaselau aua o i latou o sui faaupufai o Roma ma le malosiaga faamiliteli e pulea i latou ma o latou laueleele. Peitai, o lea taitai o le toaselau sa agalelei i tagata Iutaia.

Faitau le Luka 7:6–10, ma mafaufau pe na faapefea ona faaalia e lea taitai le faatuatua tele ia Iesu Keriso ma pe na faapefea ona tauia lona faatuatua.

Mai lea tala ua tatou aoao ai o le faatinoina o le faatuatua ia Iesu Keriso, e mafai ai ona tatou fesoasoani e aumaia faamanuiaga i olaga o isi. Atonu e te manao e tusi lenei mataupu faavae i talaane o le Luka 7:10.

O le aso na sosoo ma le aso na faamalolo ai e le faaola le auauna a le taitai o le toaselau, sa Ia faia ai foi se isi vavega. Faitau le Luka 7:11–12, ma vaavaai mo mea na feagai ma Iesu ma Ona so’o ina ua latou oo atu i le aai e igoa o Naina.

Ata

O Iesu ma se tagata o loo aui i ie papae

E tusa ai ma le fuaiupu 12, aisea na iloga ai le matautia o le oti o lenei taulealea mo lenei tina?

E le gata ua oti le tama e toatasi a lenei fafine, ae e lei mamao atu foi le oti o lana tane. E le gata i le faanoanoa tele na ia lagonaina, ae atonu e na o le toatasi foi sa lagolagoina o ia i mea tau tupe.

Faitau le Luka 7:13–15, ma vaavaai mo mea na faia e le Faaola ina ua Ia silasila atu i le faanoanoa tele o le fafine. O le fata o se tulaga po o se faavaa sa tuu ai le tino.

E tusa ai ma le fuaiupu 13, aisea na faamalolo ai e Iesu le tama a lenei fafine? Matau e le talosagaina e le fafine ua oti lana tane o Ia e faamalolo lana tama, ae na Ia matauina le manaoga ona fesoasoani ai lea e faatino. E taua le malamalama foi o lea tagata e lei toetu mai; o le a i ai se aso e toe oti ai o ia. O Iesu Keriso o le tagata muamua lea na toetu mai.

Afai o maua, matamata le vitio “O le Fafine Ua Oti Lana Tane o Naina” (2:22) mai le Vitio o le Tusi Paia i le Soifuaga o Iesu Keriso, i le LDS.org, ma vaavaai pe na faapefea ona auauna atu le Faaola i le fafine tusa pe lei talosagaina Lana fesoasoani.

Mafaufau i lagona atonu e te mauaina pe ana faapea sa e i ai i le tulaga o le fafine ua oti lana tane, ma vaaia le faatuina a’e e le Faaola o lau tama e toatasi mai le oti.

Mai lenei tala ua tatou aoao ai i le mataupu faavae lenei E mafai ona tatou mulimuli i le faataitaiga a Iesu Keriso e ala i le faatinoina o le mutimuti alofa mo isi ma auauna atu i o latou manaoga e le o faaleoina mai.

E mafai faapefea ona tatou iloatino manaoga o isi pe afai latou te le faasoa maia ia i tatou?

Na aoao mai Peresitene Thomas S. Monson:

Ata

Peresitene Thomas S. Monson

“E itiiti ni tala o le galuega a le Alii e sili ona ootia ai au e pei o Lana faataitaiga o le alofa lea na faaalia i se fafine faanoanoa ua oti lana tane i Naina. …

“Se mana ina a maeu, se alofa, se agalelei ina a maoae na faaalia e lo tatou Matai! O i tatou foi, e mafai ona faamanuiaina pe afai tatou te mulimuli i Ana faataitaiga maoae. O loo i ai avanoa i soo se mea. E manaomia mata e iloa ai puapuaga ma taliga e lagona ai le tagi lemu a le loto ua mafatia. Ioe, ma o le agaga ua faatumuina i le alofa, ina ia mafai ona tatou iloa e le na o le vaai atu o mata i mata po o le leo i taliga, ae ia pei o le faataitaiga sili a le Faaola, o le loto i le loto” (“Faafetaia’ia o Lu’i o le Olaga,” Ensign, Nov. 1993, 71).

3. Tali le fesili lenei, i lau api talaaga mo le suesueina o tusitusiga paia: O anafea e te mauaina ai pe maua ai foi e lou aiga se galuega alofa mai isi, tusa lava pe e te lei talosagaina?

Faitau le Luka 7:16–18, ma vaavaai pe na faapefea ona tali atu tagata i le vavega o le faatuina mai o le tama a le fafine ua oti lana tane.

O se tasi o mafuaaga atonu na tautino ai e tagata faapea “ua tu mai ia i tatou le perofeta sili“ (Luka 7:16) ona o mea e tutusa ai le faamalologa o le tama a le fafine ua oti lana tane o Naina ma mea na tutupu i perofeta o le Feagaiga Tuai o Elia ma Elisaia ia na faatutuina mai ni atalii mai le oti (tagai 1 Tupu 17:17–24; 2 Tupu 4:17–22, 32–37).

I au lava tatalo patino i le vaiaso lenei, ole atu i le Tama Faalelagi e fesoasoani ia te oe ia e iloa ma faatino ia uunaiga e te maua e faafetaiaia ia manaoga o isi e le faaleoina mai. E le gata i lea, mafaufau i ni auala e mafai ona e auauna atu ai ma le agalelei e aunoa ma le mafaufau i se mea e toe maua mai ai.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Luka 6:1–7:18 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: