Luka 8:1–10:37

Sa auauna atu pea le Faaola i Kalilaia, lea sa Ia valoia ai Lona maliu ma le Toetu. Ina ua tuua Kalilaia, sa malaga atu Iesu agai atu i Ierusalema. I Samaria, sa Ia aoao atu ai Ona so’o e faapea na sau o Ia e laveai tagata, ae le faaumatiaina. Sa Ia aoao atu foi e uiga i le avea moni o ni so’o ma aoao atu ai le faataoto i le Samaria agalelei.

Faitau tulaga nei. Tusi ou lagona ma tali atu i tulaga taitasi.

• Ina ua e talosaga atu ma le faaaloalo i lou uso po o lou tuagane e fesoasoani ia te oe e faamama se gaogaosa, sa ta’u atu ia te oe ma le faasa’ea e te tago oe e fai.

• A o fuafuaina se gaoioiga a le a’oga, sa faitio nisi o le vasega ma talie atu i se manatu na e faasoa atu.

• A o e faasoaina atu le talalelei i se uo, na ta’u atu ia te oe e ese a ou talitonuga.

A o e suesueina aoaoga a le Faaola i le Luka 8–9, vaavaai mo upumoni e mafai ona taialaina ai oe pe a e lagonaina le tiga ona o taga po o upu a isi.

Faitau aotelega o le mataupu o le Luka 8–9, ma vaavaai mo mea na tutupu o loo tusia i nei mataupu. Ona sa e suesue auiliili i nei mea na tutupu i lesona o le Mataio ma le Mareko, o lenei lesona o le a taulai atu i le Luka 9:51–62.

Faitau le Luka 9:51, ma vaavaai mo le nofoaga na tonu i le Faaola e alu i ai. O le fasifuaitau “e siitia ai o ia“ e faasino i le Afio Ae o le Faaola i le lagi lea e le o toe mamao.

A o malaga atu i Ierusalema, sa ui atu Iesu ma Ona so’o i se nuu o Samaria. Faitau le Luka 9:52–54, ma vaavaai mo le tali atu o tagata Samaria ina ua latou iloa sa mananao Iesu ma Ona so’o e afe atu i lo latou nuu.

Na faapefea ona tali atu Iakopo ma Ioane i le agaleaga o tagata Samaria ma teena le Faaola?

Faitau le Luka 9:55–56, ma vaavaai mo le tali a le Faaola ia Iakopo ma Ioane.

Ina ua fetalai le Faaola, “E le iloa e oulua le uiga o oulua loto“ (Luka 9:55), sa Ia ta’uina atu o le talosaga a Iakopo ma Ioane e le ogatusa ma le Agaga o le Atua.

Mafaufau i auala e ono soona tali atu ai tagata i aso nei i faatiga po o faatausuai mai i isi. Toe iloilo tulaga mai le amataga o lenei lesona, ma mafaufau i auala e ono soona tali atu ai se tagata i ia tulaga.

Na faapefea ona ese le tali atu a le Faaola i le teena a tagata Samaria mai le tali a Iakopo ma Ioane?

O le upumoni e tasi e mafai ona tatou aoao mai i lenei tala o le tatou te mulimuli i le faataitaiga a le Faaola pe a tatou filifili e tali atu i faatiga, ma le onosai ma le faapalepale. Mafaufau e tusi le upumoni lenei i le laina o au tusi paia i autafa o le Luka 9:52–56.

O le saunoaga lea a Elder David A. Bednar o le Korama a Aposetolo e Toasefululua ua fesoasoani tatou te malamalama ai e faapea a e tiga pe ita, o se filifiliga, ae le o se tulaga:

Ata

Elder David A. Bednar

“A tatou talitonu po o le faapea foi ua tatou le fiafia, o le uiga masani lava ua tatou lagona le tiga, ua soona fai, ua faalumaina, pe ua le faaaloalogia foi. Ma o le mea moni lava, o mea faavasivasi, faamaasiasi, e le faavaea, ma limalau, e tulai mai ia tatou fegalegaleaiga ma isi tagata, e ono tupu ai lo tatou le fiafia. Peitai e matua le mafaia lava e se isi tagata ona faatiga ia te oe, pe faatiga foi ia te au. … O le le fiafia o se filifiliga lea tatou te faia; e le o se tulaga e faatupu pe fai faamalosi mai e se tagata po o se isi mea i o tatou luga. …

“… Afai e fai mai e se tagata se mea po o se upu tatou te manatu e faatausuai, o le tatou matafaioi muamua lava, o le aua lea nei tiga le loto ae talanoa patino atu lea, ma le faamaoni, ma tuusao i lea tagata. O lena faiga e valaaulia ai musumusuga mai le agaga paia, ma mafai ai ona faamanino ni faaletonu, ma malamalama ai i le faamoemoega moni” (“E leai foi se Mea e Tausuai ai i latou,” Ensign po o le Liahona, Nov. 2006, 90, 92).

1. Toe mafaufau i tulaga mai le amataga o lenei lesona. Ona tali lea o fesili nei, i lau api talaaga mo le suesueina o tusitusiga paia:

   1. O le a le tulaga matautia e ono i ai i le filifili e te ita i tulaga nei?

   2. I tulaga taitasi, e mafai faapefea ona tatou mulimuli i le faataitaiga a le Faaola?

   3. E ono faamanuiaina faapefea i tatou a o tatou filifili e tali atu i faatiga, ma le onosai ma le faapalepale?

Mafaufau pe na e filifili e ita i upu po o taga a se tasi. Faatu se sini e mulimuli i le faataitaiga a le Faaola e ala i le filifili e tali atu i faatiga, i le onosai ma le faapalepale. Mafaufau e faasoa atu lau sini i se tagata o le aiga po o se uo ina ia mafai ai ona fesoasoani ia te oe ia manuia.

Manatua: O le taumafai e tali atu ma le onosai ma le faapalepale, pe a e manatu o ni sese ua faia faasaga ia te oe e le faapea ua tatau ai ona e faatagaina se sauaina o oe faalefeusuai pe faaletino, e aofia ai le soona faia o oe ia faia pea. Afai o oe ua afaina fua i na faiga saua, ia fai loa lava se taimi e maua mai ai se fesoasoani po o se fautuaga mai i lou epikopo po o le peresitene o le paranesi.

Faitau le aofai o li’o o i lalo. A o e faitauina, usu upu o le pese e te fiafia lava i ai.

Ata

tele tamai li’o

O le a le mea na faigata ai le faitauina o li’o a o e usuina upu o se pese?

Mafaufau pe faapefea ona tutusa le faalavefau o le pesepese a o taumafai e faitau i le taumafai e mulimuli ia Iesu Keriso.

A o e suesueina pea le Luka 9, mafaufau pe mafai faapefea ona e faatoilaloina faatosinaga e ono faalavelaveina ai pe taofia ai oe mai le mulimuli i le Faaola.

Faitau le Luka 9:57–58, ma vaavaai pe na faapefea ona tali atu Iesu i se tagata na manao e avea ma Ona so’o.

O le fasifuaitau “o le Atalii o le tagata e leai se mea e moe ai o ia“ e ta’u mai ai o le soifuaga na soifua ai le Faaola e lei toafimalie ma faigofie.

Faitau le Luka 9:59–60, ma vaavaai mo mea na manao le tagata lona lua e fai a o lei mulimuli i le Faaola.

E lei ta’u maia e Iesu e faapea e sese le faanoanoa ona o le oti o se e pele pe avatu foi lo tatou faaaloalo i se falelauasiga (tagai MF&F 42:45). Ae, sa Ia aoao mai se lesona taua e uiga i le avea ma so’o. O le a se mea e mafai ona tatou aoao mai i le tali a le Faaola i le Luka 9:60 e uiga i mea e faamuamua e se so’o moni?

Faitau le Luka 9:61–62, ma vaavaai mo mea na ta’u atu e le Faaola i le tagata lona tolu sa manao e avea ma Ona so’o.

Ata

Peresitene Howard W. Hunter

O le saunoaga lenei a Peresitene Howard W. Hunter ua fesoasoani tatou te malamalama ai i le talafaatusa i le Luka 9:62 o le tuu o o tatou lima i le suotosina ma aua le toe tepa i tua: “Ina ia eli se alavai [po o se autu], e manaomia e le e eleiina ona tausisi ona mata i se taunuuga mautu i ona luma. O lena o le a tumau ai o ia i se ala tonu. Peitai, afai e toe tilotilo i tua e vaai pe o fea lea sa i ai o ia, ona faateleina lea o avanoa e sese ese ai. O taunuuga e fepiopioa’i ma le gatusa alavai. … Afai e le o taulai atu lo tatou malosi i o tatou tua ae o luma—i le ola e faavavau ma le olioli o le faaolataga—e mautinoa lava o le a tatou maua“ (“Pe O Au Ea o se Tagata Auai o ’Ola’?” Ensign, Tes. 1987, 17).

Mafaufau pe faatusa faapefea le avea o se so’o o Iesu Keriso i le tuu o ou lima i se suotosina ae le toe tepa i tua.

Ata

o se tagata ma se solofanua o loo suotosinaina

O le mataupu faavae e tasi ua tatou aoao mai i aoaoga a le Faaola i nei tagata o le ina ia avea ma so’o o Iesu Keriso, e le tatau ona tatou faatagaina se mea e faamuamua i lo tatou mulimuli atu ia te Ia.

Mafaufau pe aisea i nisi taimi tatou te tuu ai isi mea e faamuamua i luga atu o o tatou tiutetauave o ni so’o o Iesu Keriso.

Ata

Elder Richard G. Scott

Na aoaoina e Elder Richard G. Scott o le Korama a Aposetolo e Toasefululua: “Ua i ai ia Satani se meafaigaluega mamana e faaaogaina i tagata lelei. O faatosinaga. Na te faatosinaina tagata lelei e faatumu o latou olaga i ’mea lelei’ ina ia aua nei iai se avanoa mo mea e taua“ (“Faamuamua Mea e Tatau Ona Muamua,” Ensign, May 2001, 7).

2. Ina ia fesoasoani ia te oe e mafaufau ai po o a mea e ono faalavefauina ai oe mai le mulimuli atoa atu ia Iesu Keriso, kopi le siata lea i lau api talaaga mo le suesueina o tusitusiga paia. Ona lisi lea i lau siata o ni tiutetauave se fa pe lima o se so’o o Iesu Keriso (mo se faataitaiga, auauna atu i isi, faasoa atu le talalelei, auai i le lotu e le aunoa, po o le totogi o sefuluai). Mo tiutetauave taitasi, ua e faailoaina, lisi ai ni faataitaiga o nisi faamuamua e ono tuu e se tasi i luga atu o lena tiutetauave.

3. I lau api talaaga mo le suesueina o tusitusiga paia, tusi e uiga i se aafiaga na e vaai ai i se tasi o filifili e faataatia ese isi sini po o faamuamua ina ia mulimuli ai i le Faaola.

Mafaufau pe o le a se mea e te ono faatagaina e faamuamua i lo le mulimuli ia Iesu Keriso ma Ana aoaoga. Tusi se sini i se fasipepa mo mea o le a e faia e avea ai le Faaola ma Lana talalelei o se faamuamua e maualuga atu. Tuu lea fasipepa i se mea e mafai ona e vaai i ai i aso taitasi.

Faitau le Luka 10:1–2, ma vaavaai po o ai na tofiaina e le Alii e fesoasoani e faatino Lana galuega.

O le upu fitugafulu i le Luka 10:1 e le gata ina faamatalaina ai le aofaiga o auauna na auina atu e Iesu ae e faasino foi i se tofi i le perisitua. O lea lava tofi o le perisitua o loo i ai nei i le Ekalesia toefuataiina. O le taimi nei e valu korama a Fitugafulu, e ui e na o uso o korama muamua e lua e ta’ua o Pulega Aoao. O la latou galuega e folafola atu le talalelei ma fesoasoani i le faatautaiga o le Ekalesia e taitaia e le Korama a Aposetolo e Toasefululua ma le Au Peresitene o le Fitugafulu.

Mai nei fuaiupu ua tatou aoao ai e faapea e valaauina e le Alii le aufaigaluega e faaopoopo atu i le Au Aposetolo e avea ma Ona sui ma fesoasoani ia te Ia i Lana galuega. E te manatu aisea ua valaauina ai e le Alii isi e avea ma Ona sui ma fesoasoani ia te Ia?

Luka 10:3–24 o loo i ai faatonuga na tuuina atu e le Faaola i Fitugafulu i le ala e faataunu ai o latou tiutetauave. Mulimuli ane na lipoti atu e Fitugafulu a latou galuega ia Iesu, ma avatu ai e Ia nisi faatonuga ma olioli faatasi ai ma i latou. Matau o le Luka 10:10–11 o lo o i ai faatonuga na tuu atu e le Alii i Fitugafulu e ese mai faatonuga o loo maua e faifeautalai i aso nei. Na tuuina atu i Fitugafulu le faatagaga e soloieseina ai le eleele i se aai e fai ma molimau faasaga ia i latou o e e le taliaina i latou. O aso nei e faia lenei mea i na o tulaga ogaoga ma e na o lalo o le taitaiga a le Au Peresitene Sili e mafai ai ona faia lea mea. O faifeautalai faamisiona i ona po nei e le o faatagaina ona faia lenei mea i sa latou lava pule faitalia.

Ata

auala i le vao toafa

Faitau le Luka 10:25, ma vaavaai mo se fesili sa tuu atu e se faitulafono e tofotofo ai, pe suesue ai le Faaola.

E faapefea ona e tali atu pe afai e fesili atu se tasi ia te oe i le fesili lenei?

Faitau le Luka 10:26–28, ma vaavaai mo le tali a le Faaola i le fesili a le faitulafono.

E fua i mea sa e faitauina i le Luka 10:25–28, faamaea le mataupu faavae lenei: Ina ia maua le ola e faavavau e tatau ona tatou .

Faitau le Luka 10:29, ma vaavai mo le fesili lona lua sa fai atu e le faitulafono ia Iesu.

Ata

O Le Samaria Agalelei

Ina ia tali le fesili a le faitulafono, sa aoao atu e le Faaola se faataoto i se Samaria (tagai Luka 10:30–35). I ona po o le Feagaiga Fou sa i ai le feitagai ogaoga i le va o Iutaia ma Samaria (tagai Bible Dictionary, “Samaria”). Sa matua taufai alofia e le tasi le isi o nei vaega e lua.

Faitau le Luka 10:30–37, vaavaai mo mea o loo aoao mai e le faataoto pe o ai o tatou tuaoi.

Na saunoa Peresitene Thomas S. Monson e faapea e tatau ona tatou manatuale faataoto i le Samaria agalelei pe a tatou mafaufau pe faapefea ona tali atu ia i latou e manaomia la tatou fesoasoani:

Ata

Peresitene Thomas S. Monson

“O i tatou taitoatasi, i le faigamalaga i le olaga nei, o le a malaga i lana lava Ala i Ieriko. Mata o le a sou aafiaga? Ae o le a sa’u? Pe o le a ou le iloaina ea o ia, o le ua pau atu i lima o faomea ma manaomia la’u fesoasoani? Ae a oe? “Mata o le a ou vaai atu i le ua manua ma faalogo atu i lana faatoga, ae ou faatafa ma ui atu i le isi itu? Ae a oe? “Pe o le a ou vaai atu, faalogoina, tu, ma fesoasoani? Ae a oe?

“Ua tuuina mai e Iesu la tatou upu matau: ‘Ina alu ia, ma ia faapea ona fai.’ A tatou usitai i lena tautinoga, o iina e tatala mai ai i la tatou vaaiga o le faavavau, se mata’iga o le olioli e seasea faaluaina ma e le maausia.

O lenei atonu e le o manino le makaina o le Auala i Ieriko. Atonu foi e alaga mai le o manu’a ia tatou lagonaina. Peitai pe a tatou savavali i tulagavae o lena Samaria agalelei, ua tatou savavali i le ala e tau atu i le atoatoa“ (“O Lou Auala i Ieriko,” Ensign, Fep. 1989, 2, 4).

4. Mafaufau e faapea e i ai sau uo o loo tauivi e alofa i se tasi sa faatiga, le fiafia ai, pe faaita o ia. I lau api talaaga mo le suesueina o tusitusiga paia, tusi ai se tusi puupuu i lau uo, faamatala i ai mea e mafai ona tatou aoao mai i lenei faataoto e uiga i le alolofa atu i isi ma le ala e mafai ai ona tatou taumafai ia avea faapei o le Samaria agalelei.

5. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia

   Ua ou suesueina le Luka 8:1-10:37 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa i lou faiaoga: