Mataio 3

Sa talai atu Ioane le Papatiso ma papatiso i Iutaia. Sa malaga mai Iesu Keriso mai Kalilaia i le Vaitafe o Ioritana, lea sa papatisoina ai o Ia e Ioane. Na tautino atu e le Atua le Tama o Iesu o Lona Alo Pele.

Manatu faapea o loo e nofo i le vasega ae tago se tagata o le vasega ave sau meatotino (e pei o lau peni, api, po o le ofu faaua). Ua ia faatoese atu i le aveina o le mea ae ua alu ave mea a isi tagata o le vasega. E faatoese i taimi taitasi ae alu lava ma ave foi mea e le o ni ana mea. O le a sou manatu i faatoesega a lenei tagata aoga?

E ono tutusa faapefea taga a lenei tagata i le taumafai e salamo e aunoa ma se manao moni i ai?

A o e suesueina le Mataio 3, vaavaai mo upumoni e fesoasoani tatou te malamalama ai i mea e tatau ona tatou fai ia salamo moni ai.

Ua aulia e Iesu Keriso le matua ua tatau ai ona Ia amata Lana galuega. (O tausaga masani e ulu atu ai alii Isaraelu i le galuega o le 30 tausaga le matutua [tagai Numera 4:3].) Faitau le Mataio 3:1–4, ma vaavaai mo mea na tutupu i lena taimi o le a fesoasoani e saunia ai tagata mo le galuega a le Faaola.

Ata

Ioane o aoao atu

O Ioane le Papatiso o le “atalii o Sakaria ma Elisapeta, e tupuga mai faaleositaulaga e ala i ona matua uma. E taua le gafa lea, talu ai o Ioane o le tino vaaia lea o le tulafono a Mose, na mamanuina e saunia ai le ala mo le Mesia, ma tapena ai tagata e talia o Ia” (Bible Dictionary, “Ioane le Papatiso”). O Elisapeta o se tausoga foi o Maria, le tina o Iesu. Na umia e Ioane ia ki o le Perisitua Arona (tagai MF&F 13; 84:27–28). O ona ofu ma mea e ’ai, o loo faamatala mai i le Mataio 3:4,

Mai mea sa e aoaoina i le Mataio 3:1–4, o a mea sa fai e Ioane?

O le misiona a Ioane sa muai ta’u mai e Isaia (Esaias) ma isi perofeta (tagai Isaia 40:3; Malaki 3:1; 1 Nifae 10:7–10). Sa tatau ia Ioane ona saunia le ala mo le Mesia (Iesu Keriso) e ala i le folafola atu o le salamo ma papatiso i le vai.

Faitau le Mataio 3:5–6, ma vaavaai pe na faapefea ona tali atu tagata i le savali a Ioane.

Na faapefea ona tali atu tagata i le savali a Ioane?

O le naunau e ta’uta’u atu agasala i le Tama Faalelagi, ma pe a tatau ai, i taitai tofia o le perisitua e taua mo le salamo (tagai Faamaoni i le Faatuatua: O se Tusitaiala o le Talalelei [2004], 134).

Faitau le Mataio 3:7, ma vaavaai mo tagata ia na ta’ua e Ioane.

O le au Faresaio o se vaega lolotu o Iutaia o lo latou igoa ua ta’u mai ai ua faaese pe ua vavaeese. Latou te mitamita i le matuai tausisia o le tulafono a Mose ma sa talitonu o faaopoopoga e faia e le tagata i ai, ua lauiloa o le tulafono tuugutu, e tutusa lava le taua ma le tulafono a Mose lava ia (tagai Bible Dictionary, “Pharisees”). O le au Satukaio o se vaega toaitiiti ae e matua malosi faaupufai o Iutaia i le usitaia o le mataitusi o le tulafono a Mose ae sa lei talitonu i le aoaoga faavae o le toetu po o le ola e faavavau (tagai Bible Dictionary, “Sadducees”).

O le a le ta’uga e Ioane o le au Faresaio ma le au Satukaio?

O le gata feai Palesitina o le gata masani e aupito oona i Isaraelu. O gata feai e feoai i le po ma e masani ona sue meaai e ala i le lalafi ona fetolofi lemu a’e lea i o latou fili. A latou lagona ua lamatia i latou, ona taaiai lea o o latou tino, sisi, ma osofai o latou fili.

Ata

Gata feai Palesitina

© taviphoto/Shutterstock.com

O le a sou manatu aisea na faasino ai e Ioane le au Faresaio ma le au Satukaio o gata feai?

O le Faaliliuga a Iosefa Samita o loo i ai ni upu faaopoopo na tautala i ai Ioane i le au Faresaio ma le au Satukaio. Ina ua uma ona tautala atu ia i latou i le Mataio 3:7, sa lapatai mai Ioane:

“Aisea ua outou le talia ai le talaiga a ia o le na auina mai e le Atua? Afai tou te le taliaina lenei mea i o outou loto, ua outou le talia foi o au; ma afai tou te le talia au, tou te le talia foi o ia o le na auina mai au e molimau atu ai; ma mo a outou agasala e leai so outou lafitaga.

“O le mea lea, ina salamo ia, ma aumaia o fua lelei e tusa ma le salamo” (Faaliliuga a Iosefa Samita, Mataio 3:34–35 [i le faaopoopoga o le Tusi Paia]).

E tusa ai ma Ioane, afai na teena e le au Faresaio ma le au Satukaio lana talaiga, o ai foi o le a latou teena?

E faapefea ona e otooto le savali a Ioane ia i latou?

Fuafua e maka le fasifuaitau “Ia outou fua mai ni fua e tatau ma le salamo” i le Mataio 3:8.

Ata

fua i luga o le laau

I tusitusiga paia, o nisi taimi e faatusa ai tagata i laau e fua mai fua lelei po o fua leaga. O fua e faatusa i o tatou manaoga ma faatinoga. O le fasifuaitau o le “e tatau ai” i le fuaiupu 8 o lona uiga “aoga o le” (tagai Mataio 3:8, vaefaamatalaga b).

Mafaufau i le tulaga mai le amataga o lenei lesona—e uiga i le tagata na aveina mea mai isi tagata o le vasega. Pe na faatino lelei e lenei tagata le mataupu faavae moni o le salamo e ala i o ona manaoga ma faatinoga? Aisea na le faia ai?

Mataio 3:8 ua fesoasoani tatou te malamalama ai faapea tatou te faatinoina le salamo moni i le Alii pe a tatou suia o tatou manaoga ma faatinoga e mulimuli i Ana aoaoga. Fuafua e tusi le mataupu faavae lea i le laina i autafa o le Mataio 3:8.

Mafaufau pe mafai faapefea e o tatou manaoga ma faatinoga ona ta’u mai ai ua tatou salamo moni i a tatou agasala a o outou mafaufau i amioga nei: kopi i le a’oga, agaleaga i uso ma tuagane, faaaoga le gagana leaga, ma le matamata i ponokalafi.

1. I lau api talaaga mo le suesueina o tusitusiga paia, faamatala pe faapefea e se tagata ua salamo i nei agasala ona mafaufau ma faatino.

Faitau le Mataio 3:10, ma maitau ia taunuuga o le le salamo moni.

Mafaufau i soo se manaoga po o faatinoga atonu e te manaomia ona suia ina ia salamo moni ai. Mafaufau pe mafai faapefea ona e faatinoina le salamo moni e ala i le suia o soo se manaoga ma faatinoga e le tusa ai ma aoaoga a le Atua.

Faitau le Mataio 3:11, ma maitau mea na ta’u mai e Ioane le Papatiso o le a faia e le Faaola.

O Iesu o le a papatiso atu ’i le Agaga Paia, ma le afi“ (Mataio 3:11). E taua lenei papatisoga pe a uma le papatisoga i le vai ma e faasino i le mauaina o le meaalofa o le Agaga Paia, lea e faapaiaina ai ma faaatoatoa o tatou agaga e faapei ona faia e se afi (tagai 2 Nifae 31:13–14, 17).

Mataio 3:12 ua faamatala mai ai le mea o le a tupu faafaatusa i e amiotonu o e taliaina Iesu Keriso ma e amioleaga o e teena o Ia.

2. Manatu mo sina minute i lou lava papatisoga. I lau api talaaga mo le suesueina o tusitusiga paia, tusi ai ni mea e te manatua i lenei mea taua i lou olaga.

E pei ona tusia i le Mataio 3:13–17, sa papatisoina Iesu. Ao e suesueina nei fuaiupu, vaavaai mo mea e tutusa ai lou papatisoga ma le papatisoga o le Faaola.

Faitau le Mataio 3:13–17, ma vaavaai mo tali i fesili nei e tolu e uiga i le papatisoga o Iesu:

E ai?

Faapefea?

Aisea?

Afai e manaomia, fetuunai au tali e fua i le faamatalaga lenei:

Na malaga mai Iesu mai Kaliaia i le Vaitafe o Ioritana ina ia papatisoina ai e Ioane aua sa umia e Ioane ia ki o le Perisitua Arona, ma sa i ai le pule e faatino ai le sauniga o le papatisoga. Tusi Ioane le Papatiso ma le Pule tatau i le laina i autafa o le “E ai?

Ata

O Ioane le Papatiso o loo Papatisoina Iesu

O Iesu ua maliu “ae loa o ia nai le vai” (Mataio 3:16) ua ta’u mai ai sa papatisoina o Ia e ala i le faatofuina—o lona uiga sa ufitia atoa o Ia i le vai. tusi le E ala i le faatofuina i luga o le laina i autafa o le “Faapefea?”

Sa iloa e Ioane le Papatiso o le tulaga ma le pule a Iesu e maualuluga atu nai lo ia. Peitai, e tusa ai ma le Mataio 3:15, na fetalai Iesu sa manaomia ona papatisoina o Ia ina “ia faataunuu ai le amiotonu uma.” Tusi le fasifuaitau lea i luga o le laina i autafa o le “Aisea?”

“Ina ia faataunuu ai le amiotonu uma” o lona uiga ia faia mea uma e manaomia e le Tama Faalelagi ona tatou faia ina ia mafai ai ona tatou toe ola faatasi ma Ia. O lenei e aofia ai le mauaina o sauniga o le faaolataga. O le papatisoina, sa faia ai e Iesu se faataitaiga atoatoa mo i tatou e mulimuli ai. Faitau le 2 Nifae 31:4–9, ma tusi o se mau fefaasinoai i le laina i autafa o le Mataio 3:15. Maka ia upu ma fasifuaitau ia e fesoasoani tou te malamalama ai i le uiga o le “ia faataunuu ai le amiotonu uma”.

Faaaoga tali i fesili na tuu atu muamua e faailoa mai ai se aoaoga faavae e uiga i le papatisoga tonu mai le Mataio 3:13–17.

E faatusa faapefea lou papatisoga i le faataitaiga na faia e le Faaola mo i tatou?

O se tasi aoaoga faavae taua i le Mataio 3:16–17 e faatatau i le Aigaatua. Toe faitau fuaiupu nei, ma maitau mea o aoao mai ai e uiga i le Tama, o le Alo, ma le Agaga Paia.

I laina o sosoo ai, tusi ai le mea na i ai sui taitasi o le Aigaatua i le taimi o le papatisoga o le Faaola:

O Le Tama:

O Le Alo:

O Le Agaga Paia:

E taua le malamalama faapea o le Agaga Paia e lei liua moni i se lupe. Ae, o le lupe o se faailoga po o se faatusa faapea na alu ifo le Agaga Paia i luga o Iesu, (tagai Bible Dictionary, “Dove, sign of”).

O le a se aoaoga faavae o aoao mai e fuaiupu e uiga i le Aigaatua? (Tagai foi i le MF&F 130:22–23.)

E toatele tagata e leai so latou malamalama sa’o pe atoa foi i le Aigaatua. O le tele o lo tatou malamalama i le natura moni o le Aigaatua, o le tele foi lena o le alofa e mafai ona tatou lagonaina mo i Latou ma saunia lelei ai e aoao ma molimau atu ia i Latou i isi.

3. Vaavaai mo le faamatalaga mo le “Atua” i le Bible Dictionary, po o le “Atua, Aigaatua” i le Taiala i Tusitusiga Paia (scriptures.lds.org). Faitau le faasinotala, ma vaavaai mo faamatalaga e uiga i sui taitasi o le Aigaatua. I lau api talaaga mo le suesueina o tusitusiga paia, tusi ai se tasi pe lua ni fuaiupu e uiga i sui taitasi o le Aigaatua e aofia ai faamatalaga e te lagona e taua ona iloa.

Fuafua e faasoa atu lau molimau i le Tama, le Alo, ma le Agaga Paia i se tasi e te iloaina.

4. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mataio 3 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga: