Sa faia e Iesu Lana malaga faatupu i Ierusalema i le amataga o le vaiaso mulimuli o Lona soifua. Ao i ai iina, sa Ia faamamaina le malumalu mo le taimi lona lua, ma faamalolo le tauaso ma le pipili na o mai ia te Ia.
Mafaufau i se gaoioiga faagaeetia e fai faatasi ma au uo po o tagata o le aiga. I lau api talaaga mo le suesueina o tusitusiga paia, tusi se parakalafa puupuu e uiga i le mea e mafai ona e ta’u atu pe faia e faatauanau ai au uo po o tagata o le aiga e auai i lena gaoioiga.
E toatele tagata e le iloa tele e uiga ia Iesu Keriso ma Lana talalelei, ma o lo tatou tiutetauave e fesoasoani i isi e aoao e uiga ia te Ia. A o e suesueina le Mataio 21:1–11, mafaufau po o le a se mea e mafai ona e faia e fesoasoani ai i isi ia mananao e iloa atili e uiga ia Iesu Keriso.
Tagai i le itulau o le lesona lenei o loo faaulutala “O Le Vaiaso Mulimuli o Iesu Keriso, Togiola, ma le Toetu.” O lea vaaiga aoao puupuu o le vaiaso mulimuli o le soifuaga i le olaga nei o le Faaola, ua aotele ai ia mea na tutupu seia oo atu i Lona maliu ma le Toetu. E mafai ona faamanino ma faaloloto ai le malamalama i tala, aoaoga, aoaoga faavae ma mataupu faavae e o faatasi ma le vaiaso mulimuli o le galuega a Iesu Keriso i le olaga nei.
Mataio 21 o loo tusia ai mea na tutupu i aso e lima a o lumanai ai le Faasatauroga o le Faaola, e amata i Lana malaga faatupu i Ierusalema. Toe manatu i le motu o tagata sa mulimuli atu ia Iesu ma Ana Aposetolo a o malaga atu i Ierusalema mai Ieriko (tagai Mataio 20:17–18, 29).
Faitau le Mataio 21:1–5, ma vaavaai mo mea na faatonu e Iesu Ona soo se toalua e fai.
O le valoaga na ta’ua i le Mataio 21:4–5 o loo maua i le Sakaria 9:9–10. Fuafua e tusi le mau fefaasinoai i le laina o au tusi paia i autafa o le Mataio 21:4–5. O le valoaga lenei e faatatau i le Mesia na folafola mai, po o le “Perofeta filifilia, Faitaulaga, Tupu, ma le Togiola o le sa faatalitali atu i ai Iutaia i lona afio mai’ (Taiala i Tusitusiga Paia, “Mesia,” scriptures.lds.org). E mafai ona fesoasoani ia te oe le iloa o taimi o loo ta’ua i le tusi paia, o le asini ”o se faatusa o le aiga tautupu Iutaia. … O le tietie i se asini … sa faaalia ai foi le oo mai o Iesu o se Faaola toafilemu ma le “agamaualalo”ae le o se toa manumalo i luga o se solofanua tau” (Tusi Lesona a le Tagata Aoga o le Feagaiga Fou [Church Educational System manual, 2014], 64).
Faitau le Mataio 21:6–8, ma vaavaai mo mea na fai e “le toatele o le motu o tagata” (fuaiupu 8) e faailoa atu ai ma le faaaloalo o Iesu o le Mesia a o tietie atu o Ia i Ierusalema.
O loo faama’oti mai e le Evagelia a Ioane faapea sa faaaoga e le motu o tagata “lau o pama” (Ioane 12:13). O lau pama o se faailoga lea a Iutaia o le filemu ma le manumalo i le fili. O le saunia o se alapae, e pei o lea na faia e le motu o tagata sa faaaoga ai lau pama ma ie, o se faailoga sa faaaoga e faamamaluina ai agafaatupu po o manumalo. O le faia o lea mea na aloaia ai e le motu o tagata ma faafeiloaia Iesu o lo latou Togiola ma le Tupu.
Tagai i le ata o le Malaga Faatupu a Keriso i Ierusalema (Tusi Ata o le Talalelei [2009], no. 50; tagai foi LDS.org). Manatu faapea o oe o se tasi o tagata sa i ai i le motu o tagata. Faitau le Mataio 21:9, ma manatu faapea sa e alaga faatasi ai ma i latou.
Ata
Malaga Faatupu
Matau o tagata na latou faia faalua le upu osana, o lona uiga “faasao nei” (Bible Dictionary, “Hosanna”). Mafaufau e tusi le uiga lea i le laina i autafa o le Mataio 21:9.
O se vaega o le alalaga o le motu o tagata ua faataunuu ai le valoaga faalemesia o loo maua i le Salamo 118:25–26. Fuafua e tusi le mau fefaasinoai lea i le laina i autafa o le Mataio 21:9 pe maka i le Mataio 21:9, vaefaamatalaga e. O le faalaniga tautupu ma le faalaniga faalemesia o le “Atalii o Tavita” (Mataio 21:9) sa faasaosao mo le suli i le nofoalii o Tavita. O lona uiga sa tautino atu e tagata o Iesu o le Mesia na filifilia ma sa auina mai e le Atua e laveai ma taitai Lona nuu.
Manatu faapea na e ola i Ierusalema i le taimi lea. Mata o a ni ou mafaufauga ma lagona a o molimauina le afio atu faatupu o le Faaola?
E faitauafe isi tagata sa i ai i Ierusalema i le taimi lea e faamanatu ai le Paseka. Faitau le Mataio 21:10–11, ma vaavaai mo le aafiaga o amioga a le motu o tagata i isi i Ierusalema.
O le a le fesili na fesili ai isi ona o amioga a le motu o tagata?
Ua faapupula mai e lenei tala le mataupu faavae lenei: A o tatou aloaia faalauaitele ma talanoa e uiga ia Iesu Keriso, ua mafai ona tatou fesoasoani i isi e atinae se manao e iloa atili e uiga ia te Ia.
I lau api talaaga mo le suesueina o tusitusiga paia, lisi ai ni nai faatulagaga i fafo atu o sauniga faaleekalesia lea e mafai ona e faailoa atu faalauaitele ma talanoa e uiga ia Iesu Keriso. Ona tusi lea o ni auala talafeagai e mafai ona e faailoa faalauaitele atu ai ma talanoa e uiga ia te Ia, o le a fesoasoani ai i isi ia mananao e iloa atili e uiga ia te Ia.
Tali se fesili e tasi po o fesili uma i lau api talaaga mo le suesueina o tusitusiga paia:
O anafea na tata’i ai oe i taumafaiga a se tasi e faailoa faalauaitele ma talanoa e uiga ia Iesu Keriso, ia e manao ai e iloa atili e uiga ia te Ia?
O anafea na e, po o se tasi foi e te iloa, fesoasoani ai i se tasi ia manao e iloa atili e uiga ia Iesu Keriso ona sa e faailoa faalauaitele pe talanoa foi e uiga ia te Ia?
Vaavaai mo ma faaaoga avanoa e faailoa faalauaitele ma talanoa e uiga ia Iesu Keriso i se tulaga talafeagai.
Ua faamama e Iesu le malumalu ma faamalolo le tauaso ma le pipili
Ata
Malumalu o Orlando Florida
Mafaufau i mafaufauga ma lagona na maua i le malumalu. Afai e te lei oo lava i le malumalu, manatunatu i ni ou mafaufauga ma lagona atonu e te maua i totonu.
O a mea e fai i le malumalu e fesoasoani tatou te lagonaina ai o se nofoaga paia?
Ina ua uma ona ulufale atu le Faaola i Ierusalema, sa afio atu o Ia i le malumalu.
Ata
Malumalu o Herota e iloa mai le Mauga o Olive
Faitau le Mataio 21:12–13, ma vaavaai mo mea sa faia e nisi o tagata i totonu o le malumalu sa tiga ai le Tama Faalelagi ma Iesu Keriso.
O tagata sa asiasi mai i Ierusalema e faamanatu le Paseka sa manaomia le faatau o ni manu e osi atu ai taulaga i le malumalu o se vaega o la latou tapuaiga. Sa fefaatauai e le au faatau tupe ia tupe Roma ma isi mo le tupe a le malumalu ina ia mafai ai ona faatau ia manu, ma sa faatau atu e isi faioloa ia manu sa manaomia. E ui ina sa tatau ai lenei pisinisi ma sa faia mo se faamoemoega lelei, ae o le taulimaina i le malumalu o se tulaga le faaaloalo ma le le migao. E le gata i lea, Mataio 21:13 ua fautua mai ai faapea o le au faatautupe ma le au faatauoa sa sili ona fiafia i le maua o a latou polofiti nai lo le tapuai i le Atua ma fesoasoani i isi e faia foi.
Manatua i le Ioane 2:16, i le taimi o le faamamaina muamua o le malumalu, sa ta’ua e Iesu le malumalu o le “fale o lo’u Tama.” I le Mataio 21:13, i le taimi o le faamamaina lona lua, sa ta’ua ai e Iesu le malumalu o “Lo’u fale.”
O se tasi upumoni e uiga i le malumalu e mafai ona tatou aoao ai mai upu ma uiga o le Faaola i le Mataio 21:12–13 o le o le fale o le Alii o se nofoaga paia, ma e finagalo o Ia ia tatou faia ma le migao.
Tali fesili nei i lau api talaaga mo le suesueina o tusitusiga paia:
E mafai faapefea ona tatou faaalia le migao mo le fale o le Alii?
O le a se mea e tatau ona tatou fai e ulufale atu ai i le malumalu?
Faitau le Mataio 21:14, ma vaavaai mo mea na faia e le Faaola i le malumalu ina ua uma le faamamaina o le malumalu i le taimi lona lua.
E mafai ona fesoasoani le iloa faapea “o e pipili” i le Mataio 21:14 e faasino i tagata na pipili po o nisi sa faigata ona savavali.
Mai mea na fai e le Alii i e tauaso ma e pipili na o atu ia te Ia i le malumalu, ua mafai ai ona tatou aoao le upumoni lea: A tatou o i le malumalu, e mafai e le Alii ona faamalolo i tatou.
O a ni auala e te manatu e mafai ai e le Alii ona faamalolo i tatou a o tatou o atu i le malumalu?
Ata
Peresitene James E. Faust
Na molimau mai Peresitene James E. Faust o le Au Peresitene Sili i le faamalologa e mafai ona tatou maua pe a tatou o i le malumalu. “Na saunia e le Alii ni auala se tele ina ia maua ai e i tatou [Ana] faamalologa. Ou te faafetai i le Alii mo le toefuataiina mai o galuega faalemalumalu i le fogaeleele. O se vaega taua o le galuega mo le faaolataga mo e o loo soifua ma e ua maliliu. O loo saunia e malumalu se faamalumaluga paia e tatou te o iai e faamatuu atu ai popolega o le lalolagi. O o tatou malumalu o ni nofoaga o le filemu ma le toafimalie. I totonu o nei faamalumaluga paia o le Atua ‘na te faamaloloina le fatu nutimomoia, ma fusifusia o latou manua.’ Sala. 147:3.)” (“Faamalologa Faaleagaga,” Liahona, Iulai 1992, 7).
O le faamalologa tatou te maua a o tatou tapuai ai i le malumalu e mafai ona vave ona maua, e faapei o e tauaso ma e pipili o loo faamatala mai i le Mataio 21:14
Mafaufau i le taimi na e, po o se tasi e te iloa, iloa ai le faamalologa a le Alii e ala i le tapuai ai i le malumalu.
E pei ona tusia i le Mataio 21:15–16, sa le fiafia le au faitaulaga sili ma le au tusiupu i le mea na faia e Iesu i le malumalu ma tagata sa alalaga “Osana” ia te Ia iina. Na ta’ua e Iesu o le aloaiaina faalauaitale e tagata o Ia ua taunuu ai se valoaga (tagai Salamo 8:2).
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Mataio 21:1 16 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga:
