Ngaahi Tohi Lēsoni Palaimelíi mo e Taimi Fevahevaheʻakí
Lēsoni 15: Naʻe Fakaʻaongaʻi ʻe Sīsū Kalaisi Hono Mālohi Fakataulaʻeikí ke Tāpuakiʻi ʻAki ʻa e Niʻihi Kehé

Lēsoni 15

Naʻe Fakaʻaongaʻi ʻe Sīsū Kalaisi Hono Mālohi Fakataulaʻeikí ke Tāpuakiʻi ʻAki ʻa e Niʻihi Kehé

Taumuʻá

Ke tokoniʻi ʻa e fānaú taki taha ke nau maʻu ha ʻilo ʻoku toe lahi angé ki he mālohi ʻo e lakanga fakataulaʻeikí.

Teuteú

  1. Ako ʻi he faʻa lotu ʻa e Maʻake 4:35–41, 6:33–44, Luke 9:37–43, Mātiu 14:23–33, Ngāue 10:38, pea mo e Tokāteline mo e Ngaahi Fuakava 13, 27:12, 124:123. Hili iá peá ke ako ʻa e lēsoni mo ke fili pe ʻe anga fēfē hoʻo fiemaʻu ke akoʻi ki he fānaú ʻa e ngaahi fakamatala ʻa e folofolá (vakai, “Teuteu Hoʻo Lēsoní,” vi, pea mo e “Faiako mei he Folofolá,” viii.)

  2. Laukonga ʻoku tānaki atu: Mātiu 8:23–27; Sione 6:1–14, 16–21; pea mo e Tokāteline ʻo e Ongoongoleleí, vahe 13.

  3. Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú mo tokoni lelei taha kia kinautolu ke nau aʻusia ʻa e taumuʻa ʻo e lēsoní.

  4. Nāunau ʻoku fie maʻú:

    1. Tohi Tapu pe Fuakava Foʻou ke taki taha ʻa e fānaú.

    2. Fakatātā 7-15, Ko Hono Lōlomi ʻa e Mātangí (Ngaahi Fakatātā ʻo e Ongoongoleleí 214; 62139 900); 7-16, Fafanga ʻo e Toko Nima Afé (62143); pea mo e 7-17, Ko e Lue ʻa Sīsū ʻi he Fuakahi Vaí.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Tāmateʻi ʻa e ʻuhila ʻi he lokí, pe ko hono fakamoʻui ʻo ha kiʻi kasa huluhulu. Fehuʻi ange pe ko e hā ha meʻa ʻe lava ai ʻa e ʻuhilá ʻo uló. (mālohi) Tuku ki he fānaú ke nau tala atu ha niʻihi ʻo e ngaahi meʻa ʻoku tau fakaʻaongaʻí ʻa ia ʻoku fie maʻu ʻa e mālohí kae toki lava ke ngāué. Ko e hā ha niʻihi ʻo e faʻahinga mālohi ʻoku ʻi aí? Tala ange ki he fānaú ko e ʻahó ni te nau ako ai ki ha faʻahinga mālohi ʻoku mahulu ange ia ʻi he toe meʻa, pea toe mālohi ange ia ʻi he ngaahi mālohi ʻo nātulá. Ko e mālohi ia ʻo e ʻOtuá. ʻOku tau ui ia ko e lakanga fakataulaʻeikí.

ʻEkitivitī Taufetongi ke Takiakiʻi ʻAki e Tokangá

Fakahā ange ki he fānaú ha foʻi makinito pea mo ha fanga kiʻi ukamea. Tuku ke fakaʻaongaʻi ʻe he fānaú ʻa e foʻi makinitó ke ne fusi maiʻaki ʻa e fanga kiʻi konga ukameá ki he tafaʻaki ʻe taha ʻo e tēpilé. Kapau ʻoku ʻikai te ke maʻu ha foʻi makinito, ifi ha foʻi pula pea kofukofuʻi ʻaki ha konga tupenu ke lava ʻo tuku ange ke pipiki ʻi he ʻaofí pe ko e taha ʻo e fānaú. Te ke toe lava ke ʻoange ki ha taha ʻo e fānaú ke toutou helu hono ʻulú hili ko iá peá ke fakaʻaongaʻi leva ia ke puke maiʻaki ha ʻu laʻi pepa.

ʻEkitivitī Taufetongi ke Takiakiʻi ʻAki e Tokangá

  • Ko e hā e meʻa ʻokú ne fakatupunga ʻa e makinitó ke ne puke mai ʻa e meʻi ukameá, ʻa e foʻi pulá ke pipiki ki he ʻató pe konga tupenú, pe ko e helú ke ne ʻomiʻaki ʻa e laʻi pepá? (ʻOku maʻu ʻe he makinitó ha mālohi ke ne fusi mai ʻa e ukameá ke pipiki ki ai. ʻOku hanga ʻe he mālohi ʻo e ʻeá ʻo puke ʻa e foʻi pulá ki he hōlisí pe konga tupenú pea fakaivia ʻa e helú ke ne ʻomiʻaki ʻa e laʻi pepá.)

  • ʻOku ʻi ai mo ha toe mālohi kehe ʻokú ke fakakaukau ki ai? (Māmá, ʻuhilá, mātangí, pea mo e alā meʻa pehē.)

Fakamatalaʻi ki he fānaú te nau ako ʻo fekauʻaki mo ha mālohi ʻoku mahulu ange ia ʻi he ngaahi mālohí kotoa. Ko e mālohi ia ʻo e ʻOtuá, ʻa e lakanga fakataulaʻeikí.

Fakamatala ʻa e Folofolá pea mo e Ngaahi Fehuʻi ke Aleaʻi pea mo Fakaʻaongaʻí

Fakaʻaongaʻi ʻa e fakatātaá ʻi hono taimi totonu, akoʻi ʻa e fakamatala ʻo fekauʻaki mo hono fakaʻaongaʻi ʻe Sīsū ʻa hono mālohí. (Ko e fokotuʻu ki hono founga akoʻi ʻo e folofolá, vakai, “Faiaki mei he Folofolá,” viii.)

Fakamatala ʻa e Folofolá pea mo e Ngaahi Fehuʻi ke Aleaʻi pea mo Fakaʻaongaʻí

  1. Ko Hono Lolomi ʻa e Mātangí (Maʻake 4:35–41)

    • Ko e hā e ongo naʻe maʻu ʻe he kau ākonga ʻa Sīsūú’ lolotonga ʻa e mātangí? (Maʻake 4:38.) Ko e hā naʻa nau fakakaukau ai ʻoku ʻikai ke tokanga ange ʻa Sīsū kia kinautolú? ʻOku anga fēfē hoʻo ʻiloʻi ʻoku tokanga mai ʻa e Tamai Hēvaní kiate koé?

    • Naʻe anga fēfē hono taʻofi ʻe Sīsū ʻa e mātangí? (Maʻake 4:39.)

    • Ko e hā e mālohi naʻe ngāueʻaki ʻe Sīsū ke ne taʻofiʻaki e mātangí? (Ko Hono mālohí—ʻa e mālohi ʻo e ʻOtuá.) Ko e hā ʻetau ui ʻa e mālohi pea mo e māfimafi ʻo e ʻOtuá? (T&F 124:123. Ko e lakanga fakataulaʻeikí.)

    • Ko e hā e fehuʻi ʻa Sīsū ki heʻene kau ākongá, hili ʻene fakatokalelei ʻa e mātangí? (Maʻake 4:40.)

    • Ko e hā e ongo naʻe maʻu ʻe he kau ākongá ʻo fekauʻaki mo Sīsūú hili ʻene fakatokalelei ʻa e mātangí? (Mātiu 8:27; Maʻake 4:41.)

  2. Ko hono Fafanga ʻa e Toko Nima Afé (Maʻake 6:33–44)

    • Ko e hā haʻo fakakaukau ki he muimui ʻa e kakaí ʻia Sīsū ki he toafá? (Maʻake 6:33.) Ko e hā e meʻa naʻe fai ʻe Sīsū ki muʻa peá ne toki fakahoko ʻa e mana ʻi hono fafanga ʻo e toko nima afé? (Mātiu 14:14.) Ko e hā e mālohi naʻe fakaʻaongaʻi ʻe Sīsū ke fakamoʻui ʻaki ʻa e māhakí? (Ko e mālohi ʻo e lakanga fakataulaʻeikí.) Ko hai ʻa e tupuʻanga ʻo e mālohi ʻokú ne tāpuekina ʻa ʻetau moʻuí? (Ngāue 10:38.)

    • Ko e hā e mālohi naʻe fakaʻaongaʻi ʻe Sīsū ke ʻomi ha meʻatokoni feʻunga ke fafangaʻaki ʻa e fuʻu kakaí ni? Ko e hā hono fakaofo ʻo kau ki he lahi ʻo e meʻatokoni naʻe toé? (Maʻake 6:42–44; Sione 6:12–13.)

  3. Naʻe fakamoʻui ʻe Sīsū ha tamasiʻi naʻe Uluisino ʻe he Laumālie ʻUlí (Luke 9:37–43).

    • Ko e hā e meʻa naʻe hoko ki he foha ʻo e tangatá? (Luke 9:38–40.) Ko e hā e meʻa naʻe kole ʻe he tangatá ke fai ʻe Sīsuú?

    • Ko e hā e meʻa naʻe fai ʻe Sīsū ki he tamasiʻí? (Luke 9:42.) Ko e hā e meʻa naʻe hoko ki he kakai naʻa nau ʻi ai mo Sīsuú ʻi heʻenau mamata ki he mana ko ʻení? (Luke 9:43.)

    • Ko hai fua naʻe kole tokoni ki ai ʻa e tangatá ni? (Luke 9:40.) Ko e hā hoʻo fakakaukau ki he ʻuhinga naʻe ʻikai ke lava ai ʻa e kau ākongá ʻo tokoni ki he tangatá pea mo hono fohá? Ko e hā naʻe ui ai ʻe Sīsū ʻa ʻene kau ākongá ko e kau “taʻe tuí”? (Luke 9:41.) Ko e hā ʻokú ke fakakaukau ai ʻoku mahuʻinga ʻa e tuí kae lava ke ngāue ʻa e mālohi ʻo e lakanga fakataulaʻeikí?

  4. `Ko e Hāʻele ʻi he Fukahi Vaí (Mātiu 14:22–33)

    • Ko e hā e mālohi naʻe hāʻele ai ʻa Sīsū ʻi he fukahi vaí ki he vaka naʻe ʻi ai ʻene kau ākongá? Ko e hā e fakakaukau ʻene kau ākongá ʻi he taimi naʻa nau fuofua mamata ai kiate iá? (Mātiu 14:26.) Ko e hā e folofola ʻa Sīsū kia kinautolú?

Fakamatala Fakanounou pea mo e ngaahi Fehuʻi ke Aleaʻi pea mo Fakaʻaongaʻí

Fakamatalaʻi naʻe fakahoko ʻe Sīsū ʻa e mana ko ʻeni ʻe faá tuʻunga ʻi hono mālohí. Naʻá ne toe fakahoko foki mo ha ngaahi toe mana lahi ʻo fakaʻaongaʻi ʻa e mālohi ʻo e lakanga fakataulaʻeikí. Kuo vahevahe mai ʻe Sīsū ʻa hono mālohí pea mo e kau maʻu lakanga fakataulaʻeikí ʻi he ʻahó ni.

Naʻe maʻu ʻe Pita, Sēmisi, pea mo Sione ʻa e ngaahi kī ʻo e lakanga fakataulaʻeiakí ʻi he Moʻunga ʻo e Liliú (Mātiu 17:1–9). Ko e ngaahi kī ko ʻeni ʻo e lakanga fakataulaʻeikí naʻe foaki ange kia Pita, Sēmisi pea mo Sioné koeʻuhí ke nau lava ʻo maʻu ʻa e mālohi ʻo e lakanga fakataulaʻeikí ʻi he taimi ʻe mavahe ai ʻa Sīsuú. Naʻe hoko ʻa Pita ko e Palesiteni ia ʻo e Siasí hili ʻa e toetuʻu ʻa Sīsuú, pea ʻokú ne fie maʻu ʻa e ngaahi kī ʻo e lakanga fakataulaʻeikí ke lava ʻo fakahoko ʻa e ngāue ʻi he Siasí.

Fakamatala Fakanounou pea mo e ngaahi Fehuʻi ke Aleaʻi pea mo Fakaʻaongaʻí

  • Ko e hā ʻa e ngaahi kī ʻo e lakanga fakataulaʻeikí naʻe foaki ʻe Mōsese pea mo ʻIlaisiā kia Pita, Sēmisi pea mo Sioné? (Naʻe foaki ʻe Mōsese kia kinautolu ʻa e ngaahi kī ʻo e lakanga fakataulaʻeikí ki hono tānaki ʻo ʻIsilelí; pea naʻe foaki kia kinautolu ʻe ʻElaisia ʻa e ngaahi mālohi ʻo e fai silá [vakai, T&F 110:12–16].)

  • ʻOku anga fēfē ʻetau fakaʻaongaʻi ʻa e ngaahi kī ʻo e tānakí ʻi he ngaahi ʻahó ni? (Tefito ʻo e Tuí 1:10. Ngāue fakafaifekaú.) ʻE anga fēfē haʻo kau he ngāue fakafaifekaú ʻi he ʻahó ni, pea ʻe anga fēfē haʻo teuteu ke ke hoko ko ha faifekau taimi kakato?

  • ʻOku anga fēfē ʻetau fakaʻaongaʻi ʻa e mālohi ʻo e fai silá ʻi he ʻahó ni? (ʻI he temipalé.) ʻE anga fēfē haʻo teuteu ke hū ki he temipalé?

Fakamatalaʻi hili ʻa e pekia ʻa Sīsū pea mo ʻene kau ʻAposetoló, naʻe ʻave leva ʻa e ngaahi tāpuakí pea mo e lakanga fakataulaʻeikí mei he kakai ʻo e māmaní. ʻOku fuʻu mahuʻinga foki ke kei tauhi pē ʻa e lakanga fakataulaʻeikí ʻi he māmaní. Naʻe toe fakafoki mai ʻe Sīsū ʻa hono Siasí pea mo e lakanga fakataulaʻeikí tuʻunga ʻia Siosefa Sāmita koeʻuhí ke tau toe lava ʻi he ʻahó ni ʻo maʻu ʻa e ngaahi tāpuaki ʻo e lakanga fakataulaʻeikí.

Fakamatala Fakanounou pea mo e ngaahi Fehuʻi ke Aleaʻi pea mo Fakaʻaongaʻí

  • Ko e hā ʻoku mahuʻinga ai ʻi he ʻahó ni ke maʻu ʻe he Siasí ʻa e lakanga fakataulaʻeikí? Ko e hā e ongo lakanga fakataulaʻeiki ko iá? Naʻe founga fēfē hono toe fakafoki mai ʻo e Lakanga Taulaʻeiki Faka-ʻĒloné? (T&F 13.) Naʻe founga fēfē hono toe fakafoki mai ʻo e Lakanga Fakataulaʻeiki Faka-Mēlekisētekí? (T&F 27:12.)

Tokoniʻi ke mahino kia kinautolu ʻe lava pē ke maʻu ʻe he fānau tangata tāú ʻi he hokosia ʻa honau taʻu hongofulu mā uá ʻa e lakanga fakataulaʻeiki tatau pē mo ia naʻe toe fakafoki mai ʻe Sione Papitaiso kia Siosefa Sāmita mo ʻOliva Kautelé. Fakamatalaʻi ʻi he taimi ʻe maʻu ai ʻe he fānau tangatá ʻa e Lakanga Taulaʻeiki Faka-ʻĒloné, ʻoku foaki kia kinautolu ʻa e mālohi ke nau ngāue ʻi he huafa ʻo e ʻOtuá ʻi hono tāpuakiʻi ʻa e kau mēmipa ʻo e uōtí pe koló. (Vakai, ʻekitivitī fakatupulaki 5.)

Fakamatala Fakanounou pea mo e ngaahi Fehuʻi ke Aleaʻi pea mo Fakaʻaongaʻí

  • Ko e hā e ngaahi tāpuaki ʻoku tau lava ke maʻu tuʻunga ʻi he mālohi ʻo e lakanga fakataulaʻeikí? (Fakahingoa pea mo tāpuakiʻi ʻo e pēpeé, fai papitaisó, hilifaki nimá, tufa sākalamēnití, fai silá, pea mo e alā meʻa pehē.) Ko e hā ha niʻihi ʻo e ngaahi tāpuaki fakatāutaha ʻoku tau maʻu tuʻunga ʻi he lakanga fakataulaʻeikí? (Faingāue ki he māhakí, tāpuaki fakatamaí, pea mo e faiako fakaʻapí.)

  • ʻOku anga fēfē hono tāpuekina ʻe he lakanga fakataulaʻeikí hoʻo moʻuí?

ʻEkitivitī Fakatupulakí

Te ke lava ʻo fakaʻaongaʻi ha taha pe lahi ange ʻo e ngaahi ʻekitivitií ni ʻi ha faʻahinga taimi pē lolotonga ʻa e lēsoní, pe ko hano fakamanatu, fakamatala fakanounou, pē ʻi hono tukupaá.

  1. Hanga ʻo pelupelu ha ngaahi laʻi pepa peá ke hiki ai ʻa e Papitaisó pea mo Hilifaki Nimá, Tāpuakiʻi ʻa e Māhakí, Ko ha Tāpuaki Fakatamaí, Mali ʻi he Temipalé, pea mo e Tāpuakiʻi ʻo e Sākalamēnití. Fakahingoa ʻa e laʻi pepá “Ko e Ngaahi Ouau pea mo e Tāpuaki ʻo e Lakanga Fakataulaʻeikí” peá ke faʻo ia ʻi ha kiʻi puha pe ko ha sila. Kole ki ha taha ʻo e fānaú ke ne toʻo mai ha laʻi pepa pea lau ia ki he kalasí. Mou aleaʻi ʻa e fatongia ʻo e lakanga fakataulaʻeikí ʻi he tāpuakí pe ko e ouaú. Toe lau foki mo e ngaahi laʻi pepa kehé. Kole ki he fānaú ke nau fakahā mai ha meʻa naʻe hoko ʻo kau ki he ngaahi ouaú ni pea mo e ngaahi tāpuakí ni.

  2. Toe vakaiʻi ʻa e tefito ʻo e tui hono nimá, pea tokoniʻi kinautolu ke nau ako maʻu loto ia.

  3. Hivaʻi pe lau ʻa e ngaahi lea ʻo e “Master, the Tempest Is Raging” (Himi, no. 105).

  4. Huluʻi ʻa e foʻi vitiō ʻo e “A Boy and the Power of God,” segment 3 of Primary Video Collection (5x179).

  5. Fakamatalaʻi ʻi he taimi ʻe ai hokosia ʻa e taʻu hongofulu mā ua ʻo e tamasiʻi ʻi he Siasí, ʻe lava pē ke maʻu, kapau ʻoku taau, ʻa e Lakanga Taulaʻeiki Faka-ʻĒloné pea ke fakanofo ki he lakanga ʻo e tīkoní. Teuteuʻi ʻa e ngaahi foʻi lea ko ʻení:

    Tufa ʻo e sākalamēnití

    Tānaki ʻo e sila ʻaukaí

    Ngāue ʻo fai e fekau ʻa e pīsopé

    Tokangaʻi e koloa ʻa e ʻEikí

    Kole ki he fānaú ke nau tala atu ʻa e fatongia ʻo e tīkoní. ʻI he taimi ʻe tonu ai ʻenau ngaahi talí, fakahā ange ʻa e ngaahi foʻi lea ʻoku totonú. Tokoniʻi ke nau ʻiloʻi ʻa e ngaahi fatongiá kotoa ʻo e tīkoní ʻaki haʻo ʻoange ha ngaahi fakatātā kapau ʻe fie maʻu.

Fakaʻosí

Fakamoʻoní

Fai haʻo fakamoʻoni ki he mālohi ʻo e lakanga fakataulaʻeiki naʻe maʻu ʻe Sīsuú. Toe fakamoʻoniʻi ange ʻoku maʻu ʻe he kakai tangata mo e fānau tangata ʻi he Siasí ʻa e mālohi tatau pē ʻi he ʻahó ni pea ko e ngaahi tāpuaki pau ko iá ʻoku tau toki maʻu pe ia tuʻunga ʻi he mālohi ʻo e lakanga fakataulaʻeikí.

Laukonga ʻoku Fokotuʻu Atu ke Fai mei ʻApi

Fokotuʻu ke ako ʻe he fānaú ʻa e Maʻake 4:35–41 ʻi ʻapi ke hoko ia ko ha fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.