Lēsoni 18
Ko e Fakamoʻui ʻe Sīsū Kalaisi ʻa e Tangata naʻe Fanauʻi ʻoku Kuí
Taumuʻá
Ke tokoniʻi ke mahino ki he fānaú taki taha te tau lava ke ikunaʻi ʻa e ngaahi faingataʻá pea mo e ngaahi ʻahiʻahí ʻaki ʻetau haʻu kia Sīsū Kalaisi.
Teuteú
-
Ako ʻi he faʻa lotu ʻa e Sione 9. Hili iá peá ke ako ʻa e lēsoní mo ke fili pe ʻe anga fēfē haʻo fiemaʻu ke akoʻi ki he fānaú ʻa e fakamatala ʻa e folofolá. (Vakai, “Teuteuʻi Hoʻo Lēsoní,” vi, pea mo e “Faiako mei he Folofolá,” viii.) Fakatokangaʻi angé: Lolotonga hoʻo teuteuʻi pea mo hoʻo akoʻi ʻa e lēsoni ko ʻení, matuʻaki fakaalaala ki ha niʻihi ʻo e fānau ʻi hoʻo kalasí ʻoku ʻi ai ha palōpalema ki honau fofongá.
-
Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú mo tokoni lelei taha kia kinautolu ke nau aʻusia ʻa e taumuʻa ʻo e lēsoní.
-
Nāunau ʻoku fie maʻú:
-
Tohi Tapu pe Fuakava Foʻou ke taki taha ʻa e fānaú.
-
Konga tupenu ke haʻiʻaki e matá.
-
Fakatātā 7-14, Ko Hono Fakaʻā ʻe Sīsū ʻa e Kuí (Ngaahi Fakatātā ʻo e Ongoongoleleí 213; 62145 900).
-
Fokotuʻu ki he Founga Fai ʻo e Lēsoní
Fakaafeʻi ha taha ke ne fai ʻa e fua lotú.
ʻEkitivitī ke Takiakiʻi ʻAki ʻe Tokangá
Hanga ʻo haʻi e mata ʻo ha taha he fānaú, peá ke kole ki he tamasiʻí pe taʻahiné ke ne tā ʻi he palakipoé ha fakatātā ʻo ha meʻa, ʻo hangē ko ha konga ʻo ha meʻalele. Tuku ki he taha ʻoku hokó ke haʻu ki muʻa pea haʻi hono matá, ʻoange ke ne toe tā ha konga ʻo e fakatātā tatau pē. Hokohoko atu pē kae ʻoua kuo lava ʻe ha niʻihi o e fānaú ʻo tā ha konga ʻo e fakatātā tatau pē. Mou aleaʻi ko e hā ʻoku faingataʻa ai ke fai ʻa e ngāue ko ʻení.
ʻEkitivitī ke Takiakiʻi ʻAki ʻe Tokangá
-
Ko e hā ʻoku hoko ai ʻetau taʻe malava ke sió ke ne fakafaingataʻaʻiaʻi hono tā ʻo e fakatātaá.
-
Ko e hā ha ongo te ke maʻu kapau he ʻikai te ke toe lava ʻo sio?
Tala ange ki he fānaú te ke fai ha talanoa ʻo fekauʻaki mo ha ongo kalasi ʻe ua ʻo e kuí. Kole ange ke nau fakafanongo ki he kalasi kehekehe ʻo e kuí lolotonga ʻa hoʻo akoʻi e fakamatala ʻa e folofolá.
Fakamatala ʻa e Folofolá
Fakaʻaliʻali ʻa e fakatātā hono fakamoʻui ʻe Sīsū ʻa e Kuí. Akoʻi ʻa e fakamatala ʻa e folofolá ʻi he Sione 9 ki hono fakamoʻui ʻe Sīsū ʻa e tangata naʻe fanauʻi ʻoku kuí. (Ko e fokotuʻu ki he founga akoʻi ʻo e folofolá, vakai, “Faiako mei he Folofolá,” viii.) Tokoniʻi ʻa e fānaú ʻi hoʻo akoʻi ʻa e talanoá ke mahino kia kinautolu ko e kau Fālesí (ko e kau taki fakalotu ʻo e Kakai Siú) naʻa nau ilifia naʻa mole honau ngeiá ʻo kapau ʻe tui ʻa e kakaí kia Sīsū Kalaisi. Ko ia ai, naʻa nau feinga maʻu ai pē ke fakapuputuʻuʻi ʻa e kakaí ki he ngaahi meʻa naʻe fai pea mo akoʻi ʻe Sīsuú. Naʻe ʻikai te nau fakatokangaʻi ʻa e ngaahi tefitoʻi moʻoni ʻo e ongoongoleleí naʻe akoʻi ʻe Sīsuú ko ia ai naʻe fakakuihi fakalaumālie ʻa kinautolu. Fakamatalaʻi ko e taimi ko ē ʻoku tau fakaʻatā ai ʻa ʻetau ngaahi fiemaʻu taʻe ʻaoangá ke ne felei ʻa hotau halá ʻi heʻetau muimui ki he Fakamoʻuí, ʻoku hoko leva ʻa e kui fakalaumālié kia kitautolu.
Ngaahi Fehuʻi ke Aleaʻi pea mo Fakaʻaongaʻí
Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteuʻi hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi kinautolu ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.
Ngaahi Fehuʻi ke Aleaʻi pea mo Fakaʻaongaʻí
-
Ko e hā e meʻa naʻe fehuʻi ʻe he kau ākongá kia Sīsū ʻo kau ki he tangata naʻe fanauʻi ʻoku kuí? Ko e hā ʻoku faʻa fakakaukau ai ʻa e kakaí ʻi he taimi ʻe niʻihi ʻoku hoko ʻa e mahamahakí pea mo e ngaahi faingataʻá koeʻuhí ko e faiangahala ʻa e toko taha ko iá? Ko e hā e folofola ʻa Sīsū ki he ʻuhinga ʻo e kui ʻa e tangatá ni? (Sione 9:3.)
-
Ko e hā e founga naʻe fakakuihi fakalaumālie ai ʻa e kau Fālesí? (Sione 9:16.) Ko e hā e meʻa naʻa nau tukuakiʻi ki ai ʻa Sīsuú? Ko e hā ʻokú ke fakakaukau naʻe ʻikai te nau ʻiloʻi ko Sīsuú ko e ʻAlo ia ʻo e ʻOtuá?
-
ʻI he fuofua taimi naʻe fehuʻi ange ai ʻe he kau Fālesí ki he tangata kuí ko e hā e meʻa naʻe hokó, ko e hā ʻene tali kau kia Sīsuú? (Sione 9:11.) Ko e hā ʻene tali kau kia Sīsuú, ʻi hono tuʻo ua ʻo ʻenau fehuʻi ki he tangatá? (Sione 9:17.)
-
Ko e hā e meʻa naʻe hoko ki he tafaʻaki fakalaumālie ʻa e tangatá ni pea toe pehē pe ki heʻene sio fakaemāmaní? Ko e hā e meʻa naʻe leaʻaki ʻe he tangatá ni ʻi hono tolu ʻo ʻenau fehuʻi kau kia Sīsuú? (Sione 9:30–33.)
-
Ko e hā e meʻa naʻe hoko ki he tangatá koeʻuhí naʻá ne fakamoʻoniʻi ʻa Sīsū? (Sione 9:22, 34.) ʻI he taimi naʻe fanongo ai ʻa Sīsū kuo kapusi ʻa e tangatá ni mei he sinakoké (ko e fale lotu ia ʻo e Kakai Siú), ko e hā e meʻa naʻá ne faí? (Sione 9:35.) Ko e hā haʻo fakakaukau ki he ongo naʻe maʻu ʻe he tangatá ni ʻi he taimi naʻe kumi ai ia ʻe Sīsuú? Ko e hā e fakamoʻoni fakaʻosi ʻa e tangatá ni ʻo kau kia Sīsuú? (Sione 9:350038.) Ko e hā e meʻa naʻe hoko ki heʻene sio fakalaumālié?
-
Ko e hā hono ʻuhinga ʻokú ke fakakaukau ai ʻoku fakangofua ʻe he Tamai Hēvaní pea mo Sīsū ke tau fepaki mo e ngaahi faingataʻá pea mo e ngaahi palōpalemá ʻi heʻetau ngaahi moʻuí? ʻOku anga fēfē hano tokoniʻi ʻe he ngaahi faingataʻá ni pea mo e ngaahi palōpalemá ni ke fakamoʻui ʻa hotau ngaahi kui fakalaumālié? ʻOku anga fēfē hano tokoniʻi ʻa hotau ngaahi faingataʻaʻiá mo ʻetau ngaahi palōpalemá ʻe he Tamai Hēvaní pea mo Sīsuú? (Vakai, ʻekitivitī fakatupulaki 4.)
-
ʻOku anga fēfē hano tāpuakiʻi koe mo ho fāmailí ʻi he ngaahi ʻahiʻahí? Poupouʻi ʻa e fānaú ke nau aleaʻi ʻa e fehuʻi ko ʻení, ka mou matuʻaki tokanga ʻaupito ke ʻoua naʻa lave ʻa e fānaú ʻo fekauʻaki mo e ngaahi palōpalema fakafāmilí ʻoku totonu ke ʻoua naʻa fakahāhā holo ia.
ʻEtitivitī Fakatupulakí
Te ke lava ʻo fakaʻaongaʻi ha taha pe lahi ange ʻo e ngaahi ʻekitivitií ni ʻi ha faʻahinga taimi pe lolotonga ʻa e lēsoní, pe ko haʻo fakamanatu lēsoni, fakamatala fakanounou, pē ʻi hono tukupaá.
-
Vahevahe ʻa e kalasí ki ha fanga kiʻi kulupu. ʻOange ke nau taki taha ʻa e ngaahi fakamoʻoni ko ʻení peá ke nau lau foki ia. ʻOange ke nau aleaʻi fakakulupu hili iá pea tuku ange ke nau fakamatalaʻi ki he kalasí ʻa e founga ʻo e ngaahi ʻahiʻahi naʻe hoko kia kinautolu ko ia ʻoku hā ʻi he fakamatala ʻa e folofolá.
-
Tokoniʻi ʻa e fānaú ke mahino kia kinautolu ʻa e mahuʻinga ʻo ʻetau ʻiloʻi ʻa kinautolu ʻoku ʻi ai honau ngaahi faingataʻaʻia fakaesinó. ʻE lava pē ke ke kole ki ha taha matuʻotuʻa ʻoku tofanga ʻi ha faʻahinga faingataʻaʻia fakaesino (pe ko ha ongo mātuʻa ʻa ha kiʻi tamasiʻi ʻoku faingataʻaʻia fakaesino) ke haʻu ki he kalasí pea mo aleaʻi ha ngaahi founga ke fakahāʻaki ʻa e ʻulungaanga fakaʻapaʻapa kia kinautolu ʻoku faingataʻaʻia fakaesinó. Fakamamafaʻi ʻoku ʻikai totonu ke fakakataʻaki; ʻoku ʻikai ke tau fakamataliliʻi ʻa e faʻahinga pehení. ʻE lava ke tau tokoni kia kinautolu ʻoku faingataʻaʻiá; fakaafeʻi ke tau vaʻinga, pea pehē foki ke tau hoko ko honau ngaahi kaingāmeʻa. ʻOku totonu ke fakangofua pē ke nau kau ʻi heʻetau ngaahi ʻekitivitií.
-
Hivaʻi pe lau ʻa e ngaahi lea ki he “Te u ʻAʻeva mo Koe” (Tohi Hiva ʻa e Fānaú, p. 140).
-
Lau pea mo aleaʻi ʻa e kupuʻi lea ko ʻení ʻa Sipenisā W. Kimipoló:
“ ʻOku totonu ke tali mai ʻa e ngaahi lotú ʻi he taimi pe ko iá … ʻo tatau ai pē pe ʻoku siʻisiʻi pe ʻoku ʻikai hoko ha faingataʻa, mamahi, ʻikai fakafiemālie, pe ko e maté, pea kapau ʻoku ʻikai hoko ʻa e ngaahi meʻá ni, tā he ʻikai foki ke ʻi ai ʻa e fiefiá, lavameʻá, toetuʻú, pē ko e moʻui taʻengatá pea mo e anga fakaʻotuá” (Faith Precedes the Miracle, p. 97).
Fakaʻosí
Fakamoʻoní
Fai hoʻo fakamoʻoní ʻe tāpuekina pea mo tokoniʻi ʻe he ʻEikí ʻa kitautolu ʻi heʻetau ngaahi palōpalemá mo e ngaahi faingataʻaʻiá kapau te tau talangofua ki heʻene ngaahi fekaú, maʻu ha tui kia Sīsū Kalaisi, pea mo feinga ke tau hangē ko iá.
Laukonga ʻOku Fokotuʻu Atu ke Fai mei ʻApi
Fokotuʻu ke nau ako ʻa e Sione 9:1–38 ʻi ʻapi ke hoko ia ko ha fakamanatu ʻo e lēsoni ko ʻení.
Fakaafeʻi ha taha ke ne fai ʻa e lotu tukú.