Ngaahi Tohi Lēsoni Palaimelíi mo e Taimi Fevahevaheʻakí
Lēsoni 20: Ko e Talanoa Fakatātā ʻo e Samēlia Leleí

Lēsoni 20

Ko e Talanoa Fakatātā ʻo e Samēlia Leleí

Taumuʻá

Ke tokoniʻi ʻa e fānaú taki taha ke nau maʻu ha holi ke fakahā ʻenau ʻofa ki he kakaí kotoa pē.

Teuteú

  1. Ako ʻi he faʻa lotu ʻa e Luke 10:25–37 pea mo e Mātiu 22:34–40. Hili iá peá ke ako ʻa e lēsoní mo ke fili pē ʻe anga fēfē haʻo fiemaʻu ke akoʻi ki he fānaú ʻa e ngaahi fakamatala ʻa e folofolá. (Vakai, “Teuteuʻi Hoʻo Lēsoní,” vi, pea mo e “Faiako mei he Folofolá,” viii.)

  2. Laukonga ʻoku tānaki atu: Sione 14:15, 21; 1 Sione 4:20–21; pea mo e Fakahinohino ki he Folofolá.

  3. Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú mo tokoni lelei taha kia kinautolu ke nau aʻusia ʻa e taumuʻa ʻo e lēsoní.

  4. Nāunau ʻoku fie maʻú:

    1. Tohi Tapu pe Fuakava Foʻou ke taki taha ʻa e fānaú.

    2. Fakatātā 7-21, Ko e Tangata Samēlia leleí (Ngaahi Fakatātā ʻo e ongoongoleleí 218; 62156 900), pea mo e 7–22, Ko e Mape ʻo e Temipale Toputapú.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Lēsoní

Ui ki ha taha ʻo e fānaú pea mo fehuʻi ange, “(Hingoá), ko hai ho kaungāʻapi? Fehuʻi ki ha niʻihi ʻo e fānaú ʻa e fehuʻi tatau pē. Fakamatalaʻi ʻoku tau faʻa fakakaukau maʻu pe ko hotau kaungāʻapí ʻa kinautolu pe ʻoku nofo ofi mai kia kitautolú. ʻE tokoni ʻa e lēsoni ko ʻení ke mahino kia kitautolu ʻa hono akoʻi mai ʻe Sīsū ko hai hotau kaungāʻapí mo e founga ke tau fai kia kinautolú.

Tuku ki ha taha ke ne lau ʻa e Mātiu 22:34–40. Aleaʻi ʻa hono mahuʻinga ʻo e ʻofa ki he niʻihi kehé.

Fakamatala ʻa e Folofolá

Fakaʻaliʻali ʻa e fakatātā ʻo e Tangata Samēlia Leleí pea mo e Mape ʻo Selusālemá. Akoʻi ʻa e talanoa fakatātā ʻo e Tangata Samēlia Leleí ʻo hangē ko ʻene hā ʻi he Luke 10:25–37. (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá, viii.) Fakahā ki he fānaú ʻa e feituʻu ʻoku tuʻu ai ʻa Samēlia pea mo Siutea ʻi he mapé, pea fakamatalaʻi ʻa e tuʻunga ʻoku ʻi ai e Siú mo e Sāmeliá. ʻOku fakakaukau ʻa e kakai Siú tokua ʻoku nau lelei ange ʻi he kakai Samēliá. Koeʻuhí ko e hulu ʻo e fehiʻa ʻa e Siú ʻi he Samēliá ka nau ka fononga mei Selusālema ki Kālelí, ʻe lelei ange pē ke nau ʻalu ʻi he hala lōloá ʻo fou atu ʻi he Teleʻa Soatané ʻi haʻanau fou ʻi Samēlia. Mahalo pē te ke fie maʻu ke fakatulamaʻi ʻe he fānaú ʻa e fakamatala ko ʻeni ʻa e folofolá.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteuʻi hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo kinautolu ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

  • Ko e hā e folofola ʻa Sīsū ki he meʻa ʻoku totonu ke tau fai ke tau maʻu ai ʻa e moʻui taʻengatá? (Luke 10:27–28.) ʻOku mou pehē ko e hā hono ʻuhinga ʻoku fuʻu mahuʻinga ia ʻa e ngaahi fekaú ni? (Mātiu 22:37–39.)

  • ʻE anga fēfē haʻatau fakahā ʻa ʻetau ʻofa ki he Tamai Hēvaní pea mo Sīsuú? (Sione 13:34–35; 14:15, 21.)

  • Ko hai ho kaungāʻapí? ʻOkú ke fakakaukau naʻe ʻuhinga pē ʻa Sīsū kia kinautolu ʻa ē ʻoku nofo ofi atu kiate koé?

  • Ko e hā e fehuʻi naʻe tali ʻe Sīsū ʻi heʻene fai ʻa e talanoa ʻo e Samēlia Leleí? (Luke 10:25, 29.)

  • ʻOku mou pehē ko e hā hono ʻuhinga naʻe ʻikai ke fie tokoni ai ʻa e taulaʻeiki Siú pea mo e Līvaité ki he tangata Siu naʻe lavea lahi? (Luke 10:31–32.)

  • Ko e hā e meʻa naʻe fai ʻe he Samēliá ki he tangata Siu naʻe laveá? (Luke 10:33–35.)

  • ʻOku mou pehē ko e hā hono ʻuhinga ʻe tokoni ai ʻa e Samēliá ki he Siú? Ko e hā ʻe ʻulungāanga ʻo e kaungāʻapi leleí naʻe maʻu ʻe he tangata Samēliá. ʻOku anga fēfē e tokoni ʻa e talanoá ni ke mahino kia kitautolu ko hai hotau kaungāʻapí? ʻE anga fēfē ʻa ʻetau hoko ko ha kaungāʻapi lelei?

  • Ko hai ʻokú ke fakakaukau ʻoku ʻofa lahi ange ki he ʻOtuá—ko e taulaʻeikí, ko e Līvaité, pe ko e Samēlia Leleí? Ko e hā hono ʻuhingá?

  • ʻE anga fēfē haʻatau muimui ki he ngaahi akonaki ʻa Sīsuú’ pea mo fakahā ʻa e ʻofá ki he kakai kehé? ʻE anga fēfē haʻatau tokoniʻi ha taha ʻokú ne fie maʻu ʻetau tokoní? ko ha taha ʻoku faikehekehe meiate kitautolu? mahalo pē ko ha taha naʻá ne fai mai kia kitautolu ha ʻulungaanga kovi?

Fehuʻi ki he fānaú ke nau fakahā atu ha meʻa naʻe hoko ʻi ha ngāue naʻa nau fakahoko ki ha taha naʻá ne fie maʻu ʻa e tokoní pe ko ha meʻa naʻa nau fai pe ko ha tokoni naʻe maʻu ʻe honau fāmilí mei he niʻihi kehé. Matuʻaki tokanga ke ʻoua naʻa fakahā holo ʻe he fānaú ha ngaahi talanoa te ne fakalotolaveaʻi ha taha e kau mēmipa ʻo e uōtí.

Ngaahi Fehuʻi ke Aleaʻi pea mo Fakaʻaongaʻí

  • Ko e hā e ongo ʻokú ke maʻu ʻi he taimi ʻokú ke fakahā ai hoʻo ʻofa ki he niʻihi kehé ʻaki hoʻo tokoni pea mo fai ha kiʻi ngāue kia kinautolú? ʻOkú ne ngaohi nai koe ke ke ongoʻi toe vāofi ange ki he Tamai Hēvaní pea mo Sīsuú? Ko e hā e ngaahi tāpuaki mahuʻinga ke tau lava ke maʻu kapau te nau ʻofa moʻoni ki he Tamai Hēvaní pea mo hotau kaungāʻapí? (Luke 10:25–28.)

ʻEkitivitī Fakatupulakí

Te ke lava ʻo fakaʻaongaʻi ha taha pe lahi ange ʻo e ngaahi ʻekitivitií ni ʻi ha faʻahinga taimi pē lolotonga ʻa e lēsoní pe ko hano fakamanatu, fakamatala fakanounou, pē ʻi hono tukupaá.

  1. Hiki ʻi ha ʻū laʻi pepa kehekehe ʻa e ngaahi ʻekitivitī ko ʻení. Pea tohiʻi ʻi he laʻi pepa tatau pe ʻa e konga A mo e B, pea mo tufa ke taki taha ʻa e fānaú. ʻOku tau pehē pe ʻeni naʻe toki hiki foʻou mai ha taha ʻo e fānaú ki ho kaungāʻapí. ʻOku hā ʻi he konga A ʻo ʻenau ngaahi laʻi pepá ʻa e ngaahi meʻa te ke fai ke ke hoko ai ko ha kaungāʻapi pea mo fakahā ʻa e ʻofá ki he kiʻi tamasiʻi foʻou ko ʻení. ʻOku ʻomi ʻi he konga B mo ha toe meimei founga tatau pē ʻo e fakahā ʻa e ʻofá ki he Tamai Hēvaní. Kole ki he taha ʻo e fānaú ʻoku ʻi ai ʻa e ʻa e fika 1 ke ne lau ʻene ʻekitivitií, pea hoko ai mo e fika 2, pea mo e alā meʻa pehē.

      1. ʻAʻahi ki he ʻapi ʻo e kiʻi tamasiʻí pe taʻahiné.

      2. ʻAlu ki he Palaimelí pea mo e fakatahaʻanga kehe ʻa e Siasí.

      1. Fakaafeʻi mai ha tamasiʻi pe taʻahine ki ho ʻapí.

      2. Ngaohi ho ʻapí ke hoko ko ha feituʻu ʻe lava ke nofoʻia ʻe he Laumālie ʻo e Tamai Hēvaní.

      1. Ako ha meʻa ʻo fekauʻaki mo e kiʻi tamasiʻí pe taʻahiné.

      2. Lau ʻa e folofolá.

      1. Talanoa mo e tamasiʻí pe taʻahné.

      2. Lotú.

      1. Fai ʻo ha ngāue ki he tamasiʻí pe taʻahiné.

      2. Talangofua ki he ngaahi fekaú.

      1. Fai ʻo ha ngāue ki he fāmili ʻo e tamasiʻí pe taʻahiné.

      2. Tokoni ki he niʻihi kehé.

      1. Fakaafeʻi ha taha ʻo e fānaú ke kau ʻi hoʻomou ʻekitivitií.

      2. Lotu ke ʻiate koe ʻa e Laumālie ʻo e Tamai Hēvaní?

  2. Lau ʻa e Fekau ʻe Hongofulú (ʻEkesōtosi 20:8–17). Fakafehoanaki kinautolu ki he ongo foʻi fekau naʻe ʻomi ʻe Sīsū ʻi he Mātiu 22. Tohiʻi ʻi he tafaʻaki ʻe taha ʻo e palakipoé ʻa e ʻOfa ki he Tamai Hēvaní pea ko e tahá ʻa e ʻOfa ki he Niʻihi Kehé. Kole ki he fānaú ke nau tala atu pe ko e fē ʻi he ongo kōlomú ʻe tohiʻi ai ʻa e Fekau ʻe Hongofulú. Lau ʻa e Sione 14:15, 21 pea tokoni ke mahino kia kinautolu ko hono tauhi ha taha pe ʻo e ngaahi fekaú ʻe tokoni ia kia kitautolu ke fakahā ʻetau ʻofa ki he Tamai Hēvaní.

  3. Tuku ke ako nau maʻu loto ʻa e Mātiu 22:37–39.

  4. Hivaʻi pe lau ʻa e ngaahi lea ʻo e “Kuó u Fai ha Lelei?” (Ngaahi Himi, no. 129) or “Ke Mou Feʻofaʻaki” (Tohi Hiva ʻa e Fānaú p. 308).

Fakaʻosí

Fakamoʻoní

Fakahā ʻa hoʻo ʻofa ki he Tamai Hēvaní pea mo Sīsū ʻaki hoʻo lotohoungaʻi ʻi he ongoongoleleí. Poupouʻi ʻa e fānaú ke nau muimui ʻi he tā sīpinga ʻa Sīsuú’ ʻi heʻene ʻofa ki he niʻihi kehé.

Laukonga ʻoku Fokotuʻu Atu ke Fai mei ʻApi

Fokotuʻu ke nau lau ʻa e Luke 10: 25–37 ʻi ʻapi ke hoko ia ko ha fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.