Fafanga ʻEku Fanga Sipí

Ke tokoniʻi ʻa kinautolu ke nau fakahā ha ʻofa kia Sīsū Kalaisi ʻaki ʻetau tokoni ki he niʻihi kehé ke mahino kia kinautolu pea moʻuiʻaki ʻa e ongoongoleleí.

1. Ako ʻi he faʻa lotu ʻa e Sione 21:1–17 mo e Maʻake 16:15. Hili iá peá ke ako ʻa e lēsoni mo ke fili pe ʻe anga fēfē hono akoʻi ki he fānaú ʻa e ngaahi fakamatala ʻa e folofolá. (Vakai, “Teuteu Hoʻo Lēsoní,” vi, mo e “Faiako mei he Folofolá,” viii.)

2. Fili ʻa e ngaahi fehuʻi ke aleaʻi mo e ngaahi ʻekitivitī ʻa ia ʻe fakakau mai ki ai ʻa e fānau pea tokoni lelei taha kia kainautolu ke nau aʻusia ʻa e taumuʻa ʻo e lēsoní.

3. Ngāueʻaki ʻa e fanga kiʻi kongokonga fakatātā ʻo ha kiʻi sipi ke taki taha ʻa e fānaú ʻi hoʻo kalasí (vakai, ki he sīpinga ʻoku maʻu ʻi he konga ki mui ʻo e lēsoní), hiki ʻa e hingoa ʻo e fānaú ʻi he kiʻi fakatātā taki taha. (Ko ko hano hiki ʻa e hingoa ʻo e fānaú ʻi ha ʻū laʻi pepa kehekehe.) Fakapipiki takatakai ki muʻa ʻi he kalasí ʻa e kongokonga fakatātaá ʻi he lokí koeʻuhí ke ō ʻa e fānaú ʻo mamata kia kinautolu.

4. Nāunau ʻoku fie maʻú:

   1. Tohi Tapu pe Fuakava Foʻou ke taki taha ʻa e fānaú.

   2. Fakatātā 7-38, Ko Sīsū mo e kau Toutaí (Ngaahi Fakatātā ʻo e Ongoongoleleí 210; 62138 900).

Fakaafeʻi ha taha ke ne fai ʻa e fua lotú.

Te ke lava ke fakaʻaongaʻi ha taha pe lahi ange ʻo e ʻekitivitií ni ʻi he lolotonga ʻo e lēsoní pe ko hano vakaiʻi, pe fakamatala fakanounou, pē ʻi hono tukupaá.

1. Hiki ʻi ʻolunga ʻi ha fuʻu laʻi pepa lahi ʻa e Fafanga ʻEku Fanga Sipí (pe ko hono fakaʻaongaʻi ʻa e palakipoé). Aleaʻi mo kinautolu ʻa e ngaahi founga ke nau lava ke fakahā ai ʻa ʻenau ʻofa kia Sīsuú ʻaki ʻenau fafanga ʻene fanga sipí. Hiki ʻi he siaté pe palakipoé ʻa ʻenau ngaahi fokotuʻú. Fakaʻaongaʻi ʻa e ngaahi fokotuʻu ko ʻení, ʻo kapau ʻoku fie maʻu:

   Te ke lava ke hoko ko ha faʻifaʻitakiʻanga lelei ʻaki hoʻo ʻalu ki he lotú, fakaʻaongaʻi ʻa e ngaahi lea leleí, talangofua ki he ngaahi fekaú, faitotonu, faʻa lotu, ako ʻa e folofolá, moʻuiʻaki e meʻa ʻokú ke akó, pea talangofua ki hoʻo ngaahi mātuʻá mo e lao ʻo e fonuá.

   Fai hoʻo fakamoʻoní ki he kāingalotú mo kinautolu ʻoku teʻeki siasí.

   Tokoni ki he niʻihi kehé ke nau fili ki he meʻa ʻoku totonú ʻi he taimi ʻe ʻahiʻahiʻi ai ʻa kinautolú.

   Talanoa ʻo kau ki he ongoongoleleí ki he kakai ko ia ʻoku ʻikai ke nau ʻilo ʻo kau ki aí.

   Lotu mo ako ʻa e folofolá ke ke toe vāofi ange ai mo e ʻEikí.

   ʻOange ke nau taki taha ha laʻi pepa pea mo ha peni vahevahe peá ke kole ange ke nau hiki, “Te u hoko ko ha tauhi-sipi lelei ʻaki .” Kole ange ke nau fakaʻosi ʻa e foʻi sētesi ko ʻení ʻaki haʻanau tohi pē ʻe anga fēfē haʻanau palani ke hoko ko ha tauhi-sipi leleí.

2. Hiki ʻi he palakipoé ha niʻihi ʻo e ngaahi lakanga ʻi he Siasí, ʻo hangē ko e pīsopé, faiakó, palesiteni fakasiteikí, faiako fakaʻapí, faiako ʻaʻahí, faifekaú, palōfitá, ʻaposetoló, palesiteni Palaimelí, pea mo e alā meʻe pehē. Fehuʻi tahataha ki he fānaú ke nau fili mai ha taha ʻo e ngaahi lakanga ko ʻení pea fakahā mai pe ʻoku anga fēfē ʻa e tokoni ʻa e taha ko iá ki hono fafanga ʻo e fanga sipi ʻa e Fakamoʻuí. Kole ange ke nau fakahā mai ha faʻahinga meʻa naʻe hoko ʻi he taimi naʻe tokoni ai ʻa e kau faiakó, ngaahi kaungāmeʻá, pe ko ha taha ʻo e kau mēmipa ʻo e fāmilí kia kinautolu ke nau ako ʻo toe lahi ange ʻo kau ki he ongoongoleleí. ʻE lava pē ke vahevahe mai ha meʻa naʻe hoko kiate koe.

3. Hiki ʻa e ngaahi meʻa ko ʻení ʻi ha ʻū laʻi pepa pe ko ha ngaahi meʻa ʻoku meimei tatau mo ia naʻe hoko ʻe lava ke tokoni ki he niʻihi kehé ke nau toe mālohi ange ai ʻi he Siasí. Kole ki ha taha ʻo e fānaú ke ne fili mai ha taha ʻo e ʻū laʻi pepá, lau fakalongolongo pe ia, pea mo fakatātaaʻi ʻa e meʻa naʻe hokó. Tuku ange ki he niʻihi ʻo e fānaú ke nau mateʻi mai ko e hā e meʻa naʻe hokó pea aleaʻi pe ʻe anga fēfē haʻanau tokoni ki hono fafanga ʻa e fanga sipi ʻa Sīsuú. ʻOange ha faingamālie ki he fānaú taki taha.

   • ʻOku fakahohaʻasi ʻe ha niʻihi ʻo e fānau ʻi hoʻo kalasí ʻa e niʻihi kehé lolotonga ʻa e lēsoní.

   • ʻOku ʻi ai ha niʻihi ho ngaahi kaungāmeʻá ʻoku nau fie maʻu ke mamata ki ha ngaahi heleʻuhila koví.

   • Ne fakalotoʻi koe ʻe ha taha ho ngaahi kaungāmeʻá ke ke toʻo ha lole mei he falekoloá ʻo ʻikai ke totongi.

   • Ne fie maʻu ʻe ha toko taha ʻi hoʻomou kulupú ʻa e toengá ke mou inu pia pe ʻoua naʻa mou tauhi kotoa ʻa e Lea ʻo e Potó.

4. Fakamatalaʻi ange ko e founga lelei ke ke tokoni ai ki ha taha ke ne ʻilo ki he ongoongoleleí ko haʻo hoko ko hano kaungāmeʻa. Mou potalanoa mo e fānaú ʻo kau ki ha meʻa ʻoku saiʻia ai ʻi honau kaungāmeʻá pea ʻe anga fēfē e fakalakalaka ʻa e ngaahi ʻulungāanga ko ʻení.

   Hili hono vakaiʻi ʻo e ngaahi fakakaukaú mo e teuteú, fai haʻo kiʻi tohi nounou ʻo fakahā ange kia kinautolu taki taha ʻa e ngaahi ʻulungāanga ʻokú ke mahuʻingaʻia ai ʻiate kinautolú. Fakamahino ange ʻa e ngaahi ʻuhinga ʻokú ke fie hoko ai ko honau kaungāmeʻá.

5. Tuku ke nau fakamatalaʻi pe ʻoku anga fēfē ha tokoni ʻa e ngaahi fololoa ko ʻeni kia kitautolu ʻi he ʻahó ni:

   • Mātiu 24:14

   • Mātiu 28:19–20

   • Tokāteline mo e Ngaahi Fuakava 4:1–4

   • Tokāteline mo e Ngaahi Fuakava 15:6

   • Tokāteline mo e Ngaahi Fuakava 31:3–5

6. Hivaʻi pe lau ʻa e ngaahi lea ki he “Holi ke Faitotonu” (Tohi Himi ʻa e Fānaú, p. 158) or “ ʻOku ou Feinga ke Hangē ko Sīsuú” (Tohi Himi ʻa e Fānaú, p. 78).

Fakaafeʻi ha taha ke ne fai ʻa e lotu tukú.