Lēsoni 29
Ko e Hāʻele Fakatuʻi ʻa Sīsū Kalaisi ki Selūsalemá pea mo e ʻOhomohe Fakaʻosí
Taumuʻá
Ke tokoniʻi ʻa e fānaú ke mahino kia kinautolu ʻa e mahuʻinga ʻo e maʻu e sākalamēnití ʻi he uike taki taha ko ha fakamanatu ia ke tau manatuʻi maʻu ai pē ʻa Sīsū Kalaisi.
Teuteú
-
Ako ʻi he faʻa lotu ʻa e Mātiu 21:1–11; Maʻake 14:12–26; Luke 19:29–38; 22:15–20; pea mo e Tokāteline mo e Ngaahi Fuakava 20:77, 79. Hili iá peá ke ako ʻa e lēsoní mo ke fili pe ʻe anga fēfē hono akoʻi ki he fānaú ʻa e fakamatala ʻa e folofolá. (Vakai, “Teuteu Hoʻo Lēsoní,” vi, mo e “Faiako mei he Folofolá,” viii.)
-
Laukonga ʻoku tānaki atu: ko e fakamaktala ki he Tokāteline mo e Ngaahi Fuakavá 27, Tokāteline mo e Ngaahi Fuakava 27:2, mo e Ngaahi Tefitoʻi Moʻoni ʻo e Ongoongoleleí,vahe 23.
-
Fili ʻa e ngaahi fehuʻi ke aleaʻí mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú pea mo tokoni lelei taha kia kinautolu ke nau aʻusia ʻa e taumuʻa ʻo e lēsoní.
-
Nāunau ʻoku fie maʻú:
-
Tohi Tapu pe Fuakava Foʻou ke taki taha ʻa e fānaú.
-
Ngaahi Tatau ʻo e Tokāteline mo e Ngaahi Fuakavá.
-
Peni vahevahe mo e pepa ke taki taha ʻa e fānaú (faʻiteliha pe).
-
Fakatātā 7-28, Ko e Hāʻele Fakatuʻi ʻa Sīsū Kalaisi ki Selūsalemá (Ngaahi Fakatātā ʻo e Ongoongoleleí 223; 62173 900), mo e 7-29, Ko e ʻOhomohe Fakaʻosí (Ngaahi Fakatātā ʻo e Ongoongoleleí 225; 62174 900).
-
Fokotuʻu ki he Founga Fai ʻo e Lēsoní
Fakaafeʻi ha taha ke ne fai ʻa e fua lotú.
ʻEkitivitī ke TakiakiʻiʻAki e Tokangá
Vahevahe ʻa e kalasí ki ha fanga kiʻi kulupu, pea kole ke nau fakakaukau ki ha ngaahi meʻa te nau lava ke fai ʻi honau ngaahi ʻapí kapau ʻe ʻaʻahi ange ha taha mahuʻinga ki honau fāmilí, ʻo hangē ko e fakamaʻa ʻo e falé, teuteuʻi ʻo ha meʻatokoni makehe, pea mo e alā meʻa pehē. Tuku ki he ngaahi kulupú taki taha ke nau fakatātaaʻi ʻa e meʻa te nau faí, pea tuku ki he toenga ʻo e kalasí ke nau mateʻi ko e hā e meʻa ʻoku nau faí.
ʻEkitivitī ke TakiakiʻiʻAki e Tokangá
-
Ko e hā ha meʻa te ke fai kapau ʻe hāʻele mai ʻa e Fakamoʻuí ki ho ʻapí? Tala ange ʻe hanga ʻe he lēsoní ni ʻo akoʻi kinautolu kau ki ha taimi ʻe hanga ʻe he kakaí ʻo teuteuʻi ha talitali makehe ki he Fakamoʻuí ke fakahā ai ʻa e lahi ʻo e fakaʻapaʻapaʻi mo ʻenau fakalangilangiʻi iá.
Fakamatala ʻa e Folofolá mo e Ngaahi Fehuʻi ke Aleaʻi mo Fakaʻaongaʻí
Fakahā ange ʻa e fakatātā ʻo e Hāʻele Fakatuʻi ki Selūsalemá. Akoʻi ki he fānaú ʻa e fakamatala ʻo e hāʻele fakatuʻi ʻa Sīsū ki Selūsalemá (Mātiu (Mātiu 21:1–11; Luke 19:29–38). (Ko e fokotuʻu ki he founga ʻo hono akoʻi ʻo e folofolá, vakai, “Faiako mei he Folofolá,” viii.)
Fakamatala ʻa e Folofolá mo e Ngaahi Fehuʻi ke Aleaʻi mo Fakaʻaongaʻí
-
Ko e hā e meʻa naʻe fai ʻe he kakaí ʻi he taimi naʻa nau fanongo ai ʻe hāʻele ange ʻa Sīsū ki honau koló? (Mātiu 21:8–9.) Ko e hā haʻo fakakaukau ki he ongo naʻa nau maʻu ʻo kau kia Sīsuú? Ko e hā haʻo fakakaukau ki ha ongo naʻá ke mei maʻú kapau naʻá ke ʻi ai?
-
Ko e hā naʻe kaila ai ʻa e kakaí “Hōsana” ʻi heʻenau fononga atu mo Sīsū ki Selūsalemá? (Tokoni ke mahino ki he fānaú ko e founga ia ʻo hono fakahā ʻe he kakaí ʻenau fakahikihikiʻi mo ʻenau hū kia Sīsuú pea nau fakahā ʻoku nau tui ko e ʻAlo ʻia ʻo e ʻOtuá.) Ko e hā e founga ʻoku tau hū ai ki he Tamai Hēvaní pea mo Sīsū Kalaisi ʻi he ʻahó ni? (Ko e taimi ʻoku tau ʻalu ai ki he houa lotu sākalamēnití, lau ʻo e folofolá, hiva ʻo e ngaahi himí, lotú, pea mo maʻu ʻa e sākalamēnití.)
Akoʻi ʻa e fakamatala ʻo e ʻOhomohe Fakaʻosí mei he Maʻake 14:12–26 mo e Luke 22:15–20. Fakahā ʻa e fakatātā ʻo e ʻOhomohe Fakaʻosí. Fakamatalaʻi ko e Kātoanga ʻo e Lakaatú ko ha ouau ʻo ha maʻu meʻatokoni ʻoku fai ʻe he kakaí ʻi he taʻu kotoa pē ko ha fakamanatu ia kia kinautolu ʻa e taimi naʻe fakalaka ai ʻa e ʻāngelo fai fakaʻauhá mei he ngaahi fale ʻo ʻenau ngaahi kuí ʻi ʻIsipite pea ʻikai ke tāmateʻi ʻa honau ngaahi ʻuluaki fohá (vakai, ʻEkesōtosi 12:21–30).
Fakamatala ʻa e Folofolá mo e Ngaahi Fehuʻi ke Aleaʻi mo Fakaʻaongaʻí
-
Ko e hā ʻoku tau ui ai ʻa e Kātoanga ʻo e Lakaatú ko e ʻOhomohe Fakaʻosí? (Luke 22:15–18.) Ko e hā e meʻa naʻe fai ʻe Sīsū ʻi he kātoanga ko ʻení? (Maʻake 14:22–24.) Ko e hā hono ʻuhinga ʻoku tau fai ai ʻení? (Ke akoʻi ai ʻa e mahuʻinga ʻo ʻene fakaleleí. ʻOkú ne fokotuʻu ʻa e sākalamēnití ke tokoni kia kitautolu ke tau manatu maʻu ai pe kiate ia mo ʻene fakaleleí.)
-
Ko e hā e meʻa naʻe folofola ʻa Sīsū ʻoku fakafofongaʻi ʻe he maá? (Maʻake 14:22.) Ko e hā e meʻa naʻe folofola ʻa Sīsū ʻoku fakafofongaʻi ʻe he uainé? (Maʻake 14:22) Fakamatalaʻi ʻoku tau fakaʻaongaʻi ʻa e vaí ʻi he ʻahó ni ka ʻoku ʻikai ko e uainé.) Tokoniʻi ke mahino kia kinautolu ko e maá mo e vaí ko ha fakaʻilonga, pe ko ha fakamanatua, ʻo e sino mo e taʻataʻa ʻo Sīsuú.’
-
ʻOku anga fēfē ʻa ʻene meimei tatau ʻi he ʻahó ni ʻa e ʻOhomohe Fakaʻosí mo e houa lotu sākalamēnití. Toe fakamanatu ki he fānaú ʻoku hangē pē hono pakipaki ʻe Sīsū ʻa e maá pea tāpuakiʻi ʻo tufaki mo e uainé, ʻoku pehē pe hono fakahoko ʻe he kau maʻu lakanga fakataulaʻeikí ʻa e fatongia tatau ʻi he ʻahó ni. Mahalo te ke fie maʻu ʻa e faingamālie ko ʻení ke ke tokoni ai ki he fānau tangata ʻi hoʻo kalasí ke mahino ko e taimi ko ē te nau maʻu ai ʻa e Lakanga Taulaʻeiki Faka-ʻĒloné, ʻoku nau maʻu ʻa e mafai ke fakafofongaʻi ʻa Kalaisi ʻi he houa lotu sākalamēnití.
Kapau ʻe ʻi ai ha taha te ne fehuʻi ko e hā ʻoku tau fakaʻaongaʻi ai ʻa e vaí ʻi he sākalamēnití kae ʻikai ko e uiané, tuku ke nau kumi ʻa e Tokāteline mo e Ngaahi Fuakava 27:1–2.
Fakamatala ʻa e Folofolá mo e Ngaahi Fehuʻi ke Aleaʻi mo Fakaʻaongaʻí
-
Tuku ki he fānaú ke nau lau ʻa e Tokāteline mo e Ngaahi Fuakava 20:77, 79. Ko e hā ʻa e ongo folofola ko ʻení? Fakamatalaʻi naʻe fakahā mai ʻe Sīsū ʻa e lea ki he lotu ʻo e sākalamēnití pea ʻoku fakahinohinoʻi ʻa e kau taulaʻeikí ke nau lau ʻo hangē ko ia ʻoku hiki ʻi he Tokāteline mo e Ngaahi Fuakavá.
-
ʻI heʻetau pehē “ ʻēmeni” ki hono tāpuakiʻi ʻo e sākalamēnití pea tau maʻú, ko e hā e meʻa ʻoku tau fuakava ke faí? Ko e hā leva ʻa e talaʻofa ʻa e ʻEikí maʻatautolú? Ko e hā ʻoku mahuʻinga ai ke tau manatuʻi maʻu pē ʻa Sīsuú? Ko e hā ha meʻa te ke fai ke ke manatuʻi maʻu ai pē ʻa e Fakamoʻuí? (Vakai, ʻekitivitī fakatupulaki 3.)
ʻEkitivitī Fakatupulaki
Te ke lava ke fakaʻaongaʻi ha taha pe lahi ange ʻo e ʻekitivitií ni ʻi he lolotonga ʻo e lēsoní, pe ko hano vakaiʻi, fakamatala fakanounou, pē ʻi hono tukupaá.
-
Toe fakamanatu ʻa e fuakava ʻo e papitaisó mei he lēsoni 6. Fakamatalaʻi ʻoku tatau pē ʻa e ngaahi talaʻofa ko ia ʻi he lotu ʻo e sākalamenití pea mo ia ʻi he fuakava ʻo e papitaisó. Ko e taimi ko ē ʻoku tau maʻu ai ʻa e sākalamēnití, ʻoku tau fakafoʻou ai ʻa ʻetau ngaahi fuakava ʻi he papitaisó. ʻE lava pē ke ke fakaʻaliʻali ʻa e ngaahi foʻi lea ko ʻení:
ʻOku ou palōmesi
te u toʻo ʻa e huafa ʻo Sīsuú.
te u manatu maʻu ai pe kiate ia.
te u talangofua ki heʻene ngaahi fekaú.
ʻOku palōmesi mai ʻa e ʻEikí kiate au
Te u lava ke maʻu maʻu ai pē ʻa hono Laumālié.
-
Fehuʻi ki he fānaú kapau ʻoku ʻi ai mo ha toe faʻahinga ʻuhinga ki honau hingoá. Fehuʻi ange ko e hā hono mahuʻinga kia kinautolu honau hingoa kapau ʻoku fakatauhingoa kinautolu ki ha niʻihi kehe. Hili ko iá mou talanoa ko e hā hono ʻuhinga ʻoku tau toʻo ai ʻa e hingoa ʻo Kalaisí ʻi he taimi ʻoku tau hoko ai ko e mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Ki Muí ni. Tokoniʻi ke mahino kia kinautolu ʻoku totonu ke hoko ʻa ʻetau tōʻongá ko e kau mēmipa ʻo e Siasí ʻo taau mo ha taha ko e muimui ʻo Sīsū Kalaisi.
-
Tuku ke nau fakahā mai ha ngaahi founga te tau lava ʻo manatuʻi ai ʻa Sīsū lolotonga ʻa e sākalamēnití pea mo ʻetau moʻui fakaʻahó. ʻE fie maʻu ke fakatau ʻa e ngaahi fokotuʻú:
Lolotonga ʻa e sākalamēnití:
Fakakaukau ki he anga ʻo ʻene mamahí pea mo pekia maʻatautolú.
Fakakaukau ki he ngaahi lea ʻo e himi sākalamēnití.
Fakakaukau ki he ngaahi talanoa mei he moʻui ʻa Sīsuú’ (tuku ke nau fokotuʻu mai ha ngaahi talanoa pau).
Fakakaukau ki ha taha ʻo e ngaahi akonaki ʻa Sīsuú’ ʻokú ke fie maʻu ke ke kamata moʻuiʻaki pe toe lelei ange ai ʻa hoʻo moʻuí.
Fakakaukau ki hoʻo ngaahi fuakava ʻi he papitaisó.
ʻI heʻetau ngaahi moʻui fakaʻahó:
Lotu ki he Tamai Hēvaní ʻi he ʻaho taki taha ʻi he huafa ʻo Sīsū Kalaisí.
Talangofua ki heʻetau ngaahi mātuʻá.
Anga lelei ki he kau mēmipa ʻo ho fāmilí.
Lau ʻa e folofolá.
Talangofua ki he ngaahi fekaú.
Loto ʻapasia ʻi he ngaahi feituʻu toputapú.
Tokoniʻi ʻa e niʻihi ʻoku fie maʻu tokoní.
Maʻu ʻa e ngaahi fakatahaʻanga hotau Siasí.
ʻE lava pē ke ke ʻai ʻa e fānaú ke nau hiki ha taha ʻo e ngaahi fokotuʻu ko ʻení ʻi ha laʻi pepa pea tauhi ia ke hoko ko hano fakamanatu ʻi he lolotonga ʻa e uiké.
-
Aleaʻi ʻa e taumuʻa ʻo e ngaahi himi sākalamēnití mo e fānaú ʻaki ʻa hoʻo fakahoko ange ʻa e ngaahi fehuʻi ko ʻení:
-
Ko e hā hono ʻuhinga ʻoku tau hivaʻi ai ha foʻi himi ki muʻa pea toki tāpuakiʻi ʻa e sākalamēnití?
-
Ko e hā e meʻa ʻoku fakahā mai ʻe he himi sākalamēnití?
Poupouʻi ke nau fanongo ki he ngaahi lea ʻo e himi sākalamēnití ʻi he uike taki taha. ʻE lava pē ke mou hivaʻi ha taha ʻo e ngaahi himi sākalamēnití mo e kalasí pe ko haʻamou ta hano foʻi tepi lolotonga iá ʻoku fakafanongo mo fakakaukau ʻa e toko taha kotoa kau kia Sīsū. ʻE lava pē ke ke fakaʻaongaʻi “Sīsū ko Hoku Maluʻi” (Ngaahi Himi, no. 141). ʻE lava pē ke ke toe kole ki he fai hiva ʻa e uōtí ke fakaʻaongaʻi ʻeni ko e hiva sākalamēniti ʻi he lotu sākalamēniti ka hoko maí.
-
-
Hivaʻi pe lau ʻa e ngaahi lea ʻo e “In Memory of the Crucified” (Ngaahi Himi, no. 190).
Fakaʻosí
Fakamoʻoní
Fai ʻa hoʻo fakamoʻoní kia Sīsū Kalaisi pea mo ʻene ʻofa kia kitautolu taki tahá. Fakamamafaʻi ʻoku hoko ʻetau manatu kiate iá ke ne tokoniʻi kitautolu ke tau fai ʻa e fili ʻoku totonú koeʻuhí ke tau toe lava ke nofo pea mo ia. Poupouʻi ke nau fakakaukau ki he Fakamoʻuí ʻi he taimi te nau kai ai ʻa e sākalamēnití ʻi he uike taki taha pea mo palōmesi ke moʻui ʻo fakatatau ki he meʻa ʻoku totonú.
Laukonga ʻoku Fokotuʻu Atu ke Fai mei ʻApi
Fokotuʻu ke nau ako ʻa e Maʻake 14:12–26 ʻi ʻapi ke hoko ia ko ha fakamanatu ʻo e lēsoni koʻení.
Fakaafeʻi ha taha ke ne fai ʻa e lotu tukú.