Ɔfã 11
Nyikyerɛ a wɔnam Joseph Smith Nkɔnhyɛnyi no do dze maa no nuabanyin Hyrum Smith, wɔ Harmony, Pennsylvania, Esusow Aketseaba, 1829. Joseph nam Urim na Thummim do nyaa ne ntotɔserɛ mpaabɔ na ebisadze ho mbuae. Joseph Smith n’abakɔsɛm kyerɛ dɛ Aaron Asɔfodzi no ne nsanananmu n’ekyir no na orinya nyikyerɛ yi.
1–6, Edwumayɛfo a wɔwɔ wenyin ture no mu no benya nkwagye; 7–14, Per hwehwɛ nyansa, bɔ nnuho ho dawur, twer Sunsum no; 15–22, Dzi mbrasɛm no do, na sũa Ewuradze n’asɛm no; 23–27, Mma mpow nyikyerɛ sunsum nye nkɔnhyɛ no; 28–30, Hɔn a wɔgye Christ no bɛyɛ Nyankopɔn ne mba.
1 Dwumadzi a ɔsõ na ɔyɛ ahobow bi rubopue adasamba mu.
2 Hwɛ, meyɛ Nyame; hom ntsie m’asɛm a nkwa na tum wɔ mu no, ɔyɛ ndam sen nkrantsee anofanu, na ohwira mu kodu dɛ ɔpaapaa akwaa nye ehuon nyina mu; dɛm ntsi, hom ntsie m’asɛm.
3 Hwɛ, haban no ahoa na twaber no asõ; dɛm ntsi obiara a ɔpɛ dɛ otwa no, wɔmma ɔmfa n’ahoɔdzen ntow ne kantankrankye na ontwa ber a adzekyee wɔ do yi, ama ɔakora nkwagye a ɔwɔ hɔ daapem dze ama ne kra wɔ Nyame n’ahenman no mu.
4 Nyew, obiara a ɔbɔtow ne kantankrankye na oetwa no, ɔnoara na Nyame afrɛ no.
5 Dɛm ntsi, sɛ ibisa me a wo nsa bɛkã; sɛ ebɔ mu a wobobue ama wo.
6 Afei, ber a hom ebisa yi, hwɛ, mese hom dɛ, hom ndzi me mbrasɛm do, na hom mper dɛ hom bɛkyekyer Zion.
7 Mma hom mmper nnhwehwɛ ahonya na mbom hom nhwehwɛ nyansa; na, hwɛ, wɔbɛda Nyame n’esumasɛm edzi akyerɛ hom, na nkyii wɔbɛyɛ hom ahonyafo. Hwɛ, nyia ɔwɔ onnyiewiei nkwa no yɛ ɔhonyanyi.
8 Nokwar, nokwar, mese wo dɛ dza epɛ dɛ inya fi mo hɔ no, wɔbɛyɛ ama wo; na sɛ epɛ a, wobodua wo do ayɛ papa pii wɔ dɛm ebusuasantsen yi mu.
9 Mma nnkã hwee, mbom nnuho nko ho asɛm na kã kyerɛ dɛm ebusuasantsen yi. Dzi me mbrasɛm do, na boa ma wɔnyɛ m’edwuma, dɛ mbrɛ me mbrasɛm kyerɛ, na wobehyira wo.
10 Hwɛ, ewɔ akyɛdze, anaadɛ ibenya akyɛdze, sɛ edze gyedzi nye akoma a no mu tsew bisa me na egye Jesus Christ no tum no dzi, anaadɛ no tum a ɔrekasa kyerɛ wo yi dzi a;
11 Na, hwɛ, emi na merekasa no; hwɛ, emi nye kan a ɔhyerɛn wɔ sum mu, na mudua mo tum do dze me nsɛm yinom ma wo.
12 Na, afei, nokwar, nokwar, mese wo dɛ, fa wo werɛ hyɛ Sunsum no a ogya wo ma eyɛ papa—nyew, ma ɔma idzi pɛrpɛr, ɔma enantsew ahobrɛadze mu, ɔma ibu atsɛn tsenenee; na iyi nye mo Sunsum.
13 Nokwar, nokwar, mese wo dɛ, medze mo Sunsum ne kyɛfa bɛma wo, dza obobue w’adwen mu, dza ɔdze dɛw bɛhyɛ wo kra mã;
14 Na afei ibohu, anaadɛ ɔnam iyi do ibohu dɛ adze nyinara a ibebisa efi mo hɔ no, dza ɔyɛ tsenenee ndzɛmba no, sɛ egye me dzi a wo nsa bɛkã.
15 Hwɛ, mehyɛ wo dɛ mma nnsusu dɛ wɔafrɛ wo dɛ kã asɛmpa no, kesi dɛ wɔbɛfrɛ wo.
16 Tweɔn kakra, kesi dɛ ibenya m’asɛm, mo botan, m’asɔr nye m’asɛmpa no, ama eetum ehu dɛ me nkyerɛkyerɛ no yɛ nokwar.
17 Na afei, hwɛ, dɛ mbrɛ wo pɛ tse no, nyew, dɛ mbrɛ wo gyedzi so tse mpo no, wɔbɛyɛ ama wo.
18 Dzi me mbrasɛm do; mua w’ano; na bisa mo Sunsum no;
19 Nyew, fa w’akoma nyina bɛtakyer me, ama eetum aboa ma wɔdze ndzɛmba a wɔakã ho asɛm nyina no epue kan mu—nyew, m’edwuma ne nkyerɛase no; nya abotar kesi dɛ ibowie iyi yɛ.
20 Hwɛ, iyi nye w’edwuma, dɛ ibedzi me mbrasɛm do, nyew edze w’ahom, w’adwen nye w’ahoɔdzen nyina.
21 Mma mmper nnhwehwɛ dɛ ebɛkã m’asɛm no, na mbom dzi kan per hwehwɛ dɛ ibenya m’asɛm no, na nkyii wobesian wo tɛkyerɛma; nkyii, sɛ epɛ a, ibenya mo Sunsum nye m’asɛm no, nyew, Nyame no tum no a wɔdze kasa ma nkorɔfo gye dzi no.
22 Mbom sesei mua w’ano; sũa m’asɛm no a woepue adasamba mu no, na sũa m’asɛm no so a ɔbɛba adasamba hɔ no, dza wogu do rekyerɛ ase no, nyew, kesi dɛ wo nsa bɛkã dza medze bɛma adasamba a wɔwɔ ebusuasantsen yi mu nyinara no, na nkyii wɔdze ndzɛmba nyinara so bɛkã ho.
23 Hwɛ, ɔwo nye Hyrum, me babanyin, per hwehwɛ Nyame n’ahenman no, na wɔdze ndzɛmba nyinara bɛkã ho dɛ ɔsɛ.
24 Tow wɔ mo botan do, dza ɔyɛ m’asɛmpa no;
25 Mma mmpow nyikyerɛ sunsum, anaadɛ nkɔnhyɛ sunsum no, na nyia ɔpow ndzɛmba yinom ndue;
26 Dɛm ntsi, kora no wɔ w’akoma mu kesi aber a menam me nyansaa do bɛse wo dɛ kɔ.
27 Hwɛ, mekasa kyerɛ hɔn a wɔwɔ pɛ pa nyinara, na wɔatow hɔn kantankrankye dɛ worutwa no.
28 Hwɛ, emi nye Jesus Christ, Nyame ne Ba no. Emi nye nkwa nye wiadze kan no.
29 Emi nye nyia ɔbaa nankasa nedze nkyɛn na nankasa nedze anngye no no;
30 Mbom, nokwar, nokwar, mese hom dɛ, dodowara a wɔgye me no, mebɛma hɔn tum ma wɔabɛyɛ Nyame ne mba, hɔn a wɔgye me dzin dzi no mpo. Amen.