Ɔfã 130
Nkyerɛkyerɛ bi a Joseph Smith Nkɔnhyɛnyi no dze mae wɔ Ramus, Illinois, Ebɔbira 2, 1843.
1–3, Egya na Ɔba no botum eyi hɔnho ankasa akyerɛ nyimpa; 4–7, Abɔfo tse celestial wiadze mu; 8–9, Celestial asaase no bɛyɛ Urim na Thummim kɛse bi; 10–11, Wɔdze ɔbo fitaa ma hɔn a wɔhɛn celestial wiadze mu nyina; 12–17, Wɔdze Mbae a Otsĩa Ebien no esuma Nkɔnhyɛnyi no; 18–19, Nyansa biara a yebenya wɔ dɛm asetsena yi mu no, nye hɛn bɔsoɛr wɔ Owusoɛr no mu; 20–21, Nhyira nyina nam setsie a yɛdze ma mbra no do ba; 22–23, Egya no na Ɔba no wɔ honam na mbiew nyimpadua.
1 Ber a Agyenkwa no bɛba no yebohu dɛ mbrɛ ɔtse no ara, yebohu no dɛ ɔyɛ nyimpa tse dɛ hɛnankasa.
2 Na dɛ mbrɛ yɛtse ase ekuwekuw wɔ ha yi, dɛmara so na yɛbɛtsena wɔ hɔ so, soronko a ɔbɛba mu ara nye dɛ yebenya onnyiewiei enyimnyam akã ho, dɛm enyimnyam no dze yennyi no seseiara.
3 John 14:23—Egya na Ɔba no hɔn mbae a wɔakyerɛw no wɔ dɛm nkyekyɛmu yi mu no kyerɛ dɛ wɔbɛda hɔn ho edzi ankasa akyerɛ no; na mbom adwen a ɔkyerɛ dɛ Egya na Ɔba no tse nyimpa n’akoma mu no yɛ asɔrasɔr nkyerɛkyerɛ, na ɔnnyɛ nokwar.
4 Asɛm a wobisae dɛ—Ana Nyankopɔn ne mberbu, ɔsorbɔfo ne mberbu, nkɔnhyɛnyi ne mberbu, nyimpa ne mberbu nngyina ɔsor nworaba kor a wɔtsetse mu no do bi no ho mbuae?
5 Mbuae a medze ma nye dɛ, Nyew. Mbom abɔfo biara nnyi hɔ a wɔsom wɔ asaase yi do, gyedɛ hɔn a wɔtse do anaa wɔatsena do pɛn no.
6 Abɔfo nntse ɔsor nworaba a ɔtse dɛ hɛn asaase yi do,
7 Mbom wɔtse Nyame ne nkyɛn, wɔ bea a hɔ hyerɛn dɛ ahwehwɛ na ogya po, bea a ndzɛmba hɔn enyimnyam da edzi, dza etwa mu kɔ, dza ɔwɔ hɔ seseiara nye dza ɔbɛba nyina, na wɔwɔ Ewuradze n’enyim aber nyina.
8 Bea a Nyankopɔn tse no yɛ Urim na Thummim kɛse bi.
9 Asaase yi, sɛ wɔtsew ho na ɔyɛ bɛkyebo tsenabew a, ɔbɛyɛ hyɛnhyɛn tse dɛ ahwehwɛ, na ɔbɛyɛ Urim na Thummim dze ama hɔn a wɔbɛtsena do no, hɔ na ndzɛmba nyinara a wɔwɔ ahenman a onndzi mu papa, anaadɛ ahenman nyina a hɔn nhyehyɛɛ wɔ famu no, wɔbɛda no edzi akyerɛ hɔn a wɔtsena do no, na asaase yi bɛyɛ Christ dze.
10 Nkyii na ɔbo fitaa no a wɔakã ho asɛm wɔ Nyikyerɛ 2:17 no bɛba abɛyɛ Urim na Thummim ama ankorankor biara a ne nsa bɛkã bi, ɔno na ɔbɛma ndzɛmba a ɔwɔ ahenman a ɔkrɔn mu no ada edzi,
11 Na wɔdze ɔbo fitaa ma ankorankor biara a ɔba celestial ahenman mu no, no do na wɔakyerɛw dzin fofor bi wɔ, na obiara nnyim gyedɛ nyia ne nsa bɛkã no nkõ. Dzin fofor no nye asɛntsitsir no.
12 Mehyɛ nkɔm, wɔ Ewuradze Nyankopɔn ne dzin mu dɛ, ɔhaw a ɔdze bɔgyagu pii bɛba no a ɔbɛhyɛ ase ansaana Nyimpa Ba no aba no, ɔbɛhyɛ ase efi Carolina Anaafo.
13 Obotum efi nkowaasomsɛm mu aba. lyi ndze bi na ɔdaa no edzi kyerɛɛ me wɔ ber a morobɔ mpaa enyiberdo wɔ asɛm bi ho, wɔ Mumu 25, 1832.
14 Da no nna morobɔ mpaa enyiberdo dɛ mubohu ber a Nyimpa Ba no bɛba, ber no na metsee ndze bi dɛ ɔrekã nsɛm a odzi do yi:
15 Joseph, me babanyin, sɛ etsena ase kodu dɛ ibedzi mfe eduowɔtwe enum a, ibohu Nyimpa ba no n’enyim, dɛm ntsi mma nnhaw me wɔ dɛm asɛm yi ho bio.
16 Afei nna munntum nnhu dɛ sɛ mbae yi rekyerɛ mfe apem n’ahyɛse anaa mbae dadaw bi, anaadɛ mubowu na meehu n’enyim.
17 Megye dzi dɛ Nyimpa Ba ne mbae no nnkɛba ntsɛm akyɛn dɛm mber no.
18 Nyansa biara a yebenya wɔ dɛm nkwa ber yi mu no, nye hɛn bɔsoɛr wɔ owusoɛr no mu.
19 Na sɛ obi nam no mbɔdzembɔ na setsie do sũa adze na onya nyimdzee na nyansa wɔ nkwa ber yi mu sen obi so a, ne gyinabew bɔkrɔn asen ɔkor no nedze wɔ wiadze a ɔbɛba no mu.
20 Mbra bi wɔ hɔ, a wɔhyɛɛ ho ɔmom wɔ sor, ansaana wɔrotow wiadze fapem, a wɔnnkantse no da, ɔno na nhyira nyina gyina do.
21 Na sɛ yenya nhyira bi fi Nyankopɔn hɔ a, nna ɔkyerɛ dɛ yedzi dɛm mbra no a nhyira nyina gyina do no do.
22 Egya no wɔ nyimpadua a ɔyɛ honam na mbiew dɛ mbrɛ nyimpa wɔ, Ɔba no so dɛmara, mbom Sunsum Krɔnkrɔn no nnyi nyimpadua a ɔyɛ honam na mbiew, mbom ɔyɛ Sunsum nyimpa-su. Sɛ ɔnntse dɛm a, nkyɛ Sunsum Krɔnkrɔn no nnkotum atsena hɛn mu.
23 Nyimpa botum ne nsa akã Sunsum Krɔnkrɔn no, obesian no do na ɔnye no nnkɛtsena.