Ɔfã 25
Nyikyerɛ a wɔnam Joseph Smith Nkɔnhyɛnyi no do dze mae wɔ Harmony, Pennsylvania, Ayɛwoho, 1830. (hwɛ dza wɔakyerɛw wɔ Ɔfã 24 n’etsifi no). Dɛm nyikyerɛ yi da Ewuradze ne pɛ edzi kyerɛ Emma Smith, Nkɔnhyɛnyi ne yer no.
1–6, Wɔfrɛɛ Emma Smith, ewuraba a wɔasan mu eyi no no dɛ ɔmboa no kun na ɔnkyekye no werɛ; 7–11, Wɔfrɛɛ no so dɛ ɔnkyerɛw, na onsansan kyerɛwsɛm mu, na ɔnhwehwɛ mu nyiyi asɔr ndwom; 12–14, Atseneneefo hɔn ndwontow yɛ mpaabɔ ma Ewuradze; 15–16, Setsie ho mbrasɛm a ɔwɔ nyikyerɛ no mu yi yɛ obiara dze.
1 Tsie Ewuradze wo Nyankopɔn ne ndze, ber a merekasa kyerɛ ɔwo, me babaa, Emma Smith; na nokwar, mese wo dɛ, hɔn a wɔgye m’asɛmpa nyina yɛ me mbabanyin nye mbabaa a wɔwɔ m’ahenman mu.
2 Nyikyerɛ a medze ma ɔwo yi fa mepɛ ho; na sɛ idzi nokwar na enantsew kwan pa mu wɔ m’enyim a, mobɔbɔ wo nkwa ho ban, na ibenya egyapadze wɔ Zion.
3 Hwɛ, medze wo bɔn akyɛ wo, na eyɛ ewuraba a idzi mu a mafrɛ wo.
4 Ma mma osian ndzɛmba no a innhunii no ntsi nnhwinhwin, na mber bi bɛba a ibohu dɛ ɔyɛ nyansa a ɔwɔ mo mu ntsi na wɔdze ehuntsa ɔwo nye wiadze no.
5 Na dzibew a mafrɛ wo ho nye dɛ dua ɔdwe sunsum do, fa awerɛkyekyesɛm ma m’akowaa Joseph Smith, Kakraba, wo kun, wɔ n’amandzehu mu.
6 Na enye no nkɔ beebiara a ɔbɔkɔ aber nyina, na yɛ ne kyerɛwfo, ber a obiara nnyi hɔ a ɔbɛyɛ kyerɛwfo ama no, ama maasoma m’akowaa Oliver Cowdery, ma ɔaakɔ beebiara a mepɛ dɛ ɔkɔ.
7 Na ɔdze ne nsa bogu wo tsir do ama eetum esiansian kyerɛwsɛm no mu, na etu asɔr no fo dɛ mbrɛ mo Sunsum bɛkyerɛ wo no.
8 Na ɔdze ne nsa bogu wo do, na ibenya Sunsum Krɔnkrɔn no, na ebɛfa wo mber akyerɛw, na fa sũa pii.
9 Na onnyi dɛ isuro, osiandɛ wo kun bɛtaa w’ekyir wɔ asɔr no mu; na hɔn ntsi na wɔafrɛ no, ama meeyi ndzɛmba nyina akyerɛ hɔn, biribiara a mepɛ, dɛ mbrɛ hɔn gyedzi tse.
10 Na, nokwar, mese wo dɛ fa wiadze ndzɛmba to nkyɛn, na per hwehwɛ ndzɛmba a ofir bea pa.
11 Na wɔbɛma ahwehwɛ mu eyiyi ndwom krɔnkrɔn so a wobenya no wɔ m’asɔrfi mu, dɛ mbrɛ ɔsɔ m’enyi a wɔdze bɛma wo.
12 Osiandɛ me kra enyi gye ndwom a ofi akoma mu ho; nyew, atseneneefo ndwontow yɛ mpaabɔ ma me, na wobohue nhyira egu hɔn etsir do dze ama hɔn ho mbuae.
13 Dɛm ntsi, ma w’akoma do na dzi dɛw, na suo ahyɛmu a edzi no mu yie.
14 Kɔ do wɔ ɔdwe wɔ sunsum mu, na hwɛ yie wɔ ahantanyɛ ho. Ma wo kra enyi ngye wɔ wo kun ho, nye enyimnyam a ɔbɛba no do no mu.
15 Kɔ do dzi me mbrasɛm do, na tsenenee ahenkyɛw na ibenya. Na gyedɛ eyɛ dɛm, bea a mowɔ no irunntum mmba hɔ.
16 Na nokwar, nokwar, mese wo dɛ, iyi yɛ me ndze a ɔwɔ hɔ ma obiara. Amen.