Kyerɛwsɛm
Nkyerɛkyerɛ na Ahyɛmudzi 3


Ɔfã 3

Nyikyerɛ a wɔdze maa Joseph Smith Nkɔnhyɛnyi no, wɔ Harmony, Pennsylvania, Ayɛwoho, 1828, ɔfa Mormon Nwoma ne fã a odzi kan, nkrataafa 116 ne nkyerɛase a wɔfrɛ no Lehi nwoma a ɔyewee no ho. Nkɔnhyɛnyi no twetwee noho ana ɔrema dɛm nkrataafa yinom efi ne nkyɛn akɔ Martin Harris a, ɔbɔsoom dɛ Mormon Nwoma ne nkyerɛase ɔkyerɛwfo no wɔ mber kakra bi mu no hɔ. Wɔnam Urim na Thummim no do yii nyikyerɛ no kyerɛe. (Hwɛ Ɔfã 10.)

1–4, Ewuradze n’akwan yɛ kor na ɔkɔ aprɔw na onnyi ewiei; 5–15, ɔwɔ dɛ Joseph Smith nu noho, ɔno ɔbɛyew nkyerɛase akyɛdze no; 16–20, Mormon Nwoma baa dɛ ɔrebɛgye Lehi n’asefo nkwa.

1 Wonnkotum ama Nyame no ndwuma nye ne nhyehyɛɛ, nye ne botae asɛɛ, nna wonnkotum ama ɔayɛ kwa.

2 Osiandɛ Nyame nnantsew akwan akyewakyew mu, anaa ɔnndan mmfa nyimfa anaa bankum, nna ɔnnsakyer dza ɔakã, dɛm ntsi n’akwan tsen, na n’akwan yɛ kor na ɔkɔ aprɔw na onnyi ewiei.

3 Kaa, kaa dɛ nnyɛ Nyame n’edwuma na wɔsɛɛ no, mbom nyimpa n’edwuma a;

4 Na ɔwɔ mu dɛ nyimpa benya nyikyerɛ pii, na oenya tum dze ayɛ ndwuma akɛse pii, naaso sɛ otuw noho wɔ nankasa n’ahoɔdzen mu, na obu Nyame n’apam egyangyandze, na odzi nankasa ne pɛ do nye honam akɔndɔ ekyir a, otwar dɛ ɔhwe ase na Nyame nokwafo no n’awerdzi bɛba no do.

5 Hwɛ, ɔdze dɛm ndzɛmba yinom ahyɛ wo nsa, na mbom hwɛ mbrɛ wo mbrasɛm si dua yɛ dzen; na kaa anohoba no so a ɔdze bɔɔ wo no, sɛ anntõ a.

6 Na hwɛ, mpɛn ahen na atõ mbrasɛm nye Nyame ne mbra no, na edzi nyimpa ne ndaadaa ekyir.

7 Na hwɛ, nkyɛ onnyi dɛ isuro nyimpa kyɛn Nyame. Ɔwɔ mu dɛ nyimpa bu Nyame n’apam egyangyandze, na obu ne nsɛm enyimtsia

8 Naaso nkyɛ ɔwɔ dɛ eyɛ nokwafo; na nkyɛ ɔbɛtsen n’abasa na ɔagye wo abamba efi ɔtamfo n’egyen-menaba nyina ano; na nkyɛ ɔnye wo tsenaa ɔhaw ber biara mu.

9 Hwɛ, ɔwo nye Joseph, na wɔasan mu eyi wo dɛ yɛ Ewuradze n’edwuma, mbom osian mbrato ntsi, sɛ annhwɛ yie a ebɔhwe ase.

10 Mbom kaa, dɛ Nyame yɛ mbɔbɔrhufo; dɛm ntsi, nu woho wɔ dza ayɛ a ɔnye mbrasɛm a medze maa wo no bɔ ebira no ho, na ebɔkɔ do ayɛ nyia wɔasan mu eyi no no, na ɔafrɛ wo bio dɛ yɛ edwuma no;

11 Gyedɛ eyɛ dɛm, ɔno obegyaa wo mu ma abɛyɛ dɛ nyimpa nkaa no, na innkenya akyɛdze bio.

12 Na sɛ igyaa dza Nyame dze ama wo no a ɔyɛ adzehu na tum a wɔdze kyerɛ ase a, nna egyaa adze a ɔyɛ krɔnkrɔn mu ahyɛ nyimpa omumuyɛnyi nsa,

13 Nyia obuu Nyame n’apam egyangyandze, na ɔtoo anohoba krɔnkrɔn kɛse no a ɔbɔe wɔ Nyame enyim, na ɔtweer nankasa n’atsɛmbu na otuuw noho wɔ nankasa ne nyansaa mu no.

14 Na iyi ntsi na ayew wo ndzinoa mber kakra no.

15 Na ɔwo na ama woetsiatsia wo kwankyerɛfo n’asɛm do fi ahyɛse no.

16 Naaso, m’edwuma bɔkɔ do, susuampaara dɛ Agyenkwa no ho nyimdzee nam Jewfo hɔn dasegye do aba wiadze no, dɛmara so mpo na Agyenkwa no ho nyimdzee bɛba mo nkorɔfo hɔ—

17 Nye Nephifo, na Jacobfo, na Josephfo, na Zoramfo, osian hɔn egyanom hɔn dasegye ntsi—

18 Na dɛm dasegye yi bɛba Lamanfo, Lemuelfo, na Ishmaelfo benya nyimdzee a osian hɔn egyanom hɔn emumuyɛ ntsi wɔwodoow wɔ gyedzi mu, hɔn a Ewuradze maa kwan ma wɔsɛɛ hɔn enuanom Nephifo, osian hɔn emumuyɛ nye hɔn ekyiwadze ne nyɛe ntsi.

19 Na dɛm botae yi ntsi na wɔakora dɛm mprɛtse yinom do, dza kyerɛwsɛm yinom wɔ do no—ama Ewuradze n’anohoba no a ɔdze bɔɔ no nkorɔfo no aahyɛ mã;

20 Ama Lamanfo no ebenya hɔn egyanom ho nyimdzee na woeehu Ewuradze n’anohoba no, na wɔagye asɛmpa no eedzi na wɔdze hɔnho ato Jesus Christ no ndwuma pa do, na woeenya enyimnyam wɔ ne dzin mu na woeedua hɔn nnuho do wɔagye hɔn nkwa. Amen.