Ɔfã 7
Nyikyerɛ a wɔdze maa Joseph Smith Nkɔnhyɛnyi no na Oliver Cowdery, wɔ Harmony, Pennsylvania, Ebɔbira 1829, ber a wɔnam Urim na Thummim no do dze bisaa dɛ ana John, osuanyi a wɔdɔɔ no no da ho tse ase anaa oewu no. Nyikyerɛ no yɛ abakɔsɛm a John kyerɛɛ ase wɔ abowa no nwoma do na nankasa dze kosumae.
1–3, John a Wɔdɔɔ no no bɛtsena ase ekodu dɛ Ewuradze bɛba; 4–8, Peter, James, na John na wokitsa asɛmpa ne nsaafee no.
1 Na Ewuradze see me dɛ: John, mo dɔfo, ebɛnadze na epɛ? Na sɛ ibisa dza epɛ a, wɔdze bɛma wo.
2 Na mesee no dɛ: Ewuradze, ma me tum wɔ owu do, ama maatsena ase na medze akra abrɛ wo.
3 Na Ewuradze see me dɛ: Nokwar, nokwar, mese wo dɛ, osiandɛ iyi na epɛ ntsi, ebɛtsena ase ekodu dɛ mebɛba wɔ m’enyimnyam mu, na ebɛhyɛ nkɔm wɔ aman ebusuakuw, kasa horow nye nyimpa enyim.
4 Na osian iyi ntsi, Ewuradze see Peter dɛ: Sɛ mema ɔtsena ase kodu dɛ mebɛba a, iyi fa wo ho bɛn? Osiandɛ ɔpɛɛ fii me hɔ dɛ, obotum dze akra abrɛ me, na mbom ɔwo dze epɛ dɛ eba me nkyɛn ntsɛm wɔ m’ahenman mu.
5 Mese wo dɛ, Peter, w’apɛdze yi ye; na mbom mo dɔfo pɛ dɛ ɔyɛ dza ɔbor do, anaadɛ odzi dwuma kɛsenara wɔ nyimpa mu kyɛn dza ɔayɛ no dada no.
6 Nyew, ɔafa edwuma kɛse ato no do; dɛm ntsi mebɛyɛ no dɛ ogyaframee na ɔbɔfo a ɔsom; na ɔbɔsom hɔn a wɔbɛyɛ nkwagye ho adzedzifo a wɔtse asaase do no.
7 Na mebɛma asom no nye wo nua James; na hom baasa yi na medze dɛm tum nye ɔsomdwumadzi yi ho nsaafee bɛma ekodu dɛ mebɛba.
8 Nokwar mese hom dɛ, hom beenu nyina benya hom apɛdze, osiandɛ hom beenu nyina wɔ enyigye wɔ hom apɛdze ho.