Itaia
Te burabeti n te O Tetemanti are e taetae ni burabeti man 740–701 I.K. Ngke e mataniwi n anga taeka n reirei nakon te Uea ae Etekia, Itaia e korakora mwaakana n te aro ao n te tautaeka.
E mwaiti riki ana anaitaeka Iesu man Itaia nakon ae E anaitaeka mai irouia burabeti ake tabeman. Betero, Ioane ao Bauro n te Nu Tetemanti a mwaiti naba aia anaitaeka man Itaia. Ana Boki Moomon ao Reirei ao Berita aika Tabu e rawata i nanoia anaitaeka man Itaia nakoia burabeti ake tabeman ao e karekea te ibuobuoki ae bati n rairan Itaia. Nibwaai e reireinia ana botanaomata man ana koroboki Itaia (2Nib. 12–24; Itaia 2–14). Te Uea e tua nakoia Nibwaite bwa a “korakora ana taeka Itaia” ao bwa bwaai ni kabane ake e taetae ni burabeti ibukina Itaia a na koro nanoia (3Nib. 23:1–3).
Ana boki Itaia
Te boki teuana n te O Tetemanti. A mwaiti ana taeka ni burabeti Itaia ake a tabe ma rokon te Tia Kabooira, n Ana mwakuri ni ibuobuoki i aon te aonaba (Itaia 9:6) ao bwa te Uea ae Kakannato naba n te kabanea ni bong (Itaia 63). E mwaiti naba ana taetae ni burabeti ibukin Iteraera n taai aika a na roko.
Mwakoro 1 bon te kabwarabwara nakon nikiran te boki. Itaia 7:14; 9:6–7; 11:1–5; 53; ao 61:1–3 a kaota ana mwakuri ni ibuobuoki te Tia Kamaiu. Mwakoro 2, 11, 12, ao 35 a tabe ma bwaai aika riki ni boong aika kaitira, te tai are e na manga kaokaki iai te euangkerio, ikoitakin Iteraera, ao te aba are bwatakataka e na ue n ai aron te roti. Mwakoro 29 kanoana bon te taetae ni burabeti ibukin rokon Ana Boki Moomon (2Nib. 27). Mwakoro 40–46 e katanoata kakannaton Iehova bwa te Atua ni koaua i aoia bouananti ake a taromauriaki irouia beekan. Nikiran mwakorona, 47–66, a tabe ma bwaai aika riki ni manga kaokan Iteraera te kabanea n tai ao manga katean Tion, ma te Uea ae maeka i buakoia Ana botanaomata.