Potutusi
Perisitua Arona

“Perisitua Arona,” Autu ma Fesili (2023)

Ata
alii talavou o faamanuia le faamanatuga

Taiala mo le Suesueina o le Talalelei

Perisitua Arona

Umiaina o ki o le talalelei o le salamo ma le papatisoga mo le faamagaloga o agasala

I Le Ekalesia a Iesu Keriso o le Au Paia o Aso e Gata Ai, e taumafai soo o le Atua e fesoasoani ia te Ia i le galuega o le faaolataga ma le faaeaga. O le perisitua, po o le mana ma le pule e faavavau a le Atua, ua toefuatai mai i le lalolagi e fesoasoani ai i fanau a le Atua ia toe foi atu ia te Ia e ala i le osia ma le tausia o feagaiga paia ma Ia.

Ua faatulagaina le perisitua i ni vaega se lua, e tofu ma le tiutetauave mo vaega taua o le ola ai i le talalelei. O le Perisitua Arona o le perisitua “sauniuni” po o le perisitua “maualalo”. Na te umia ki o auaunaga a agelu, o le talalelei o le salamo, ma le papatisoga i le faatofuina mo le faamagaloga o agasala (tagai i le Mataupu Faavae ma Feagaiga 13:1). O i latou e umia le Perisitua Arona e saunia, faamanuia, ma tufaina atu le falaoa ma le vai o le faamanatuga. Latou te auauna atu foi i vaega faaletino o le Ekalesia, e pei o le vaavaaia o ona tagata ma aoina taulaga anapogi.

O Le A Le Perisitua Arona?

O le perisitua o le pule ma le mana e faavavau o le Atua. O e umia le perisitua e fesoasoani i le Atua i le aumaia o le faaolataga ma le faaeaga o Ana fanau e ala i le tuuina atu o feagaiga ma sauniga paia. O le Perisitua Arona o se faaopoopoga i le perisitua maualuga atu o le Perisitua Mekisateko (tagai Mataupu Faavae ma Feagaiga 107:1, 6, 13–14). I le Ekalesia i aso nei, e mafai e alii agavaa o le ekalesia ona maua le Perisitua Arona i le amataga o Ianuari o le tausaga e atoa i ai lo latou ta’i 12 tausaga. O tofi i le Perisitua Arona e aofia ai le tiakono, aoao, ositaulaga, ma le epikopo.

Vaaiga aoao i le autu: Perisitua Arona

Taiala e faatatau i le suesueina o le talalelei: Toefuataiga o le Perisitua, Perisitua Mekisateko, Ki o le Perisitua

Vaega 1

Na toefuatai mai e Ioane le Papatiso le Perisitua Arona i le Perofeta o Iosefa Samita ma Oliva Kaotui

Ata
O Ioane le Papatiso o loo tuuina atu le Perisitua Arona ia Iosefa Samita

Mai le taimi o Atamu ia Mose, sa umia e perofeta le Perisitua Mekisateko. Ae i le taimi o le auaunaga a Mose, sa teena ai e Isaraelu ia faamanuiaga a Ieova ma sa aveesea lenei perisitua maualuga mai tagata lautele. Sa faaauau ona umia e perofeta le Perisitua Mekisateko. O alii o le ituaiga o Levi, e aofia ai ē tupuga mai ia Arona, na tuuina atu i ai le Perisitua Arona. (Tagai i le Mataupu Faavae ma Feagaiga 84:23-27).

I le avea ai ma se e tupuga mai ia Arona ma se atalii ulumatua, sa umia ai e Ioane le Papatiso le Perisitua Arona (tagai Mataupu Faavae ma Feagaiga 68:16–18; 84:26–27). Ina ua mavae le maliliu o Iesu ma Ana Aposetolo, sa faia ai e tagata ni suiga e lei faatagaina i sauniga o le perisitua ma le Ekalesia. Ona o lenei liliuese, o le Perisitua Arona, faatasi ai ma le perisitua maualuga lea na faaee atu i luga o Peteru, Iakopo, Ioane, ma isi soo o Keriso (Luka 9:1–2), na aveesea mai le lalolagi. I le 1829, na faaali atu ai Ioane le Papatiso toetu ia Iosefa Samita ma Oliva Kaotui ma faaee atu i o laua luga le Perisitua Arona, ma toefuatai mai lenei pule i le lalolagi (tagai i le Mataupu Faavae ma Feagaiga 13:1; 27:7–8; Iosefa Samita—Talafaasolopito 1:68–72).

Mea e mafaufau i ai

  • O le soifuaga ma le galuega a Ioane le Papatiso e mafai ona avea o se punavai o musumusuga i e umia le Perisitua Arona i aso nei. Faitau le Mataio 11:7–13 (e aofia ai le Faaliliuga a Iosefa Samita i le fuaiupu 13, vaefaamatalagaa); Luka 7:24–30; ma le Ioane 5:32–35. O le a se mea ua e aoao mai i nei fuaiupu e faatatau i lagona o le Faaola e uiga ia Ioane le Papatiso? Aisea e te manatu na faamatalaina ai e Iesu ia Ioane i lea auala? E mafai faapefea e soo o Iesu Keriso i aso nei ona faataitai i le faataitaiga a Ioane le Papatiso?

  • I lana saunoaga “O Le Perisitua Arona—o se Meaalofa mai le Atua,” na aoao mai ai Peresitene Gordon B. Hinckley, “O le tiutetauave o [tiakono, aoao’, ma ositaulaga’] e leoleo le Ekalesia ma vaai ia leai se amioletonu ma valaau atu i tagata uma ia o mai ia Keriso.”1 I le Ekalesia i aso nei, o le toatele o e umia le Perisitua Arona o alii talavou. E mafai faapefea e nei tagata talavou ona faataunuuina ma le anoa nei tiute i a latou uarota ma paranesi i aso nei?

Gaoioiga mo le aoao faatasi ma isi

  • O le tala a Oliva Kaotui i le toefuataiga o le Perisitua Arona ua faaopoopo ai le talaaga ma faamatalaga i lo tatou malamalama i le mea na tupu i lena aso. Faitau lana tala o loo maua i le faaiuga o le Iosefa Samita—Talafaasolopito. Tuu atu i tagata o le vaega e faasoa mai po o le fea o faamatalaga e faapitoa le anoa ia i latou. Ona valaaulia lea o tagata o le vaega e vaai faalemafaufau pe faape’i le faatasi ai ma Iosefa ma Oliva i lena aso. Aisea e te manatu ai o lenei mea na tupu sa alagatatau i le Toefuataiga o le talalelei?

Aoao atili

Vaega 2

Ua Tuuina Mai e le Perisitua Arona Ki ma Auaunaga Taua

Ata
alii talavou o loo talanoa i se tamaitai

O le Perisitua Arona e taua i nisi taimi o le perisitua “maualalo” ma e faasino i ai i tusitusiga paia o “se faaopoopoga i” le Perisitua Mekisateko (Mataupu Faavae ma Feagaiga 107:14). Ae o le Perisitua Arona e umia le mana ma le pule e tatau ai e tuuina atu ai feagaiga paia ma sauniga ia e tatau ai mo le faaolataga ma le faaeaga.

O le Perisitua Arona e aofia ai ki o le auaunaga a agelu, o le talalelei o le salamo, ma le papatisoga e ala i le faatofuina mo le faamagaloga o agasala (tagai i le Mataupu Faavae ma Feagaiga 13:1; 107:20).

Mea e mafaufau i ai

  • Na saunia e Ioane le Papatiso le ala mo le lalolagi e talia ai Iesu Keriso. Sa ia aoao atu le talalelei o le salamo ma le papatisoga mo le faamagaloga o agasala, ma sa ia papatisoina foi le Faaola (tagai Mareko 1:1–11; Ioane 1:15–34). Aisea e te manatu ai o nei mataupu faavae ma sauniga sa manatu i ai o ni sauniuniga talafeagai mo le afio mai o Keriso? E faapefea e le salamo ma le papatisoga ona saunia soo o Keriso i aso nei ia maua sauniga o le malumalu ma osia ma tausia feagaiga e o faatasi ai?

  • A o saunoa atu i e umia le Perisitua Arona e uiga i le Mataupu Faavae ma Feagaiga 13, sa apoapoai mai ai Peresitene Gordon B. Hinckley: “Ou te uunaia outou ia tatala le Mataupu Faavae ma Feagaiga … ma faitau upu nei ma tauloto. O faavae ia o le perisitua. … O ni faamaoniga ia o lenei perisitua e aoga ma faamaoni i soo se itu.”2 E mafai faapefea e le Mataupu Faavae ma Feagaiga 13 ona taitaia se taulaiga ma faatinoga a se talavou o loo umia le perisitua? E mafai faapefea e le malamalama i nei upumoni e uiga i le Perisitua Arona ona fesoasoani i tagata uma o le Ekalesia ia malamalama i le taua o sauniga e pei o le papatisoga ma le aai ma feinu i le faamanatuga i vaiaso taitasi ma feagaiga e o faatasi ai?

Gaoioiga mo le aoao faatasi ma isi

A uma loa ona faitau e tagata o le vaega ia mau fesootai o loo i luga, valaaulia i latou e faasoa mai i le vaega atoa mea na latou aoaoina.

Aoao atili

Vaega 3

O le Perisitua Arona O le Perisitua Sauniuni

Ata
alii talavou i totonu o le vasega

Mo le tele o augatupulaga, na saunia ai e le Perisitua Arona le fanauga a Isaraelu mo le tulafono maualuga atu na iu lava ina tuuina mai e Iesu Keriso. O le misiona a Ioane le Papatiso o le saunia lea o le lalolagi mo le afio mai o Keriso. O le mea lea, na ta’ua ai le Perisitua Arona “o le perisitua sauniuni.” Ua aoao mai foi tusitusiga paia o le Perisitua Arona e umia ki o le talalelei sauniuni, lea e aofia ai le salamo ma le papatisoga mo le faamagaloina o agasala (tagai Mataupu Faavae ma Feagaiga 84:26–27).

O aso nei, o e umia le Perisitua Arona e fesoasoani e saunia le lalolagi mo le Afio Mai Faalua o Iesu Keriso. Latou te fesoasoani i tagata ia saunia e osia ma tausia feagaiga ma maua sauniga i le maota o le Alii e ala i le salamo i agasala ma le papatisoina. Ma o le umiaina o le Perisitua Arona e saunia ai foi soo o Iesu Keriso mo se auaunaga i le olaga atoa i le Perisitua Mekisateko.

Mea e mafaufau i ai

  • E mafai ona fesoasoani le autu a le korama o le Perisitua Arona i alii talavou taitoatasi ia malamalama i lona faasinomaga paia ma lona faamoemoega o sē e umia le perisitua. Faitau le autu, o loo maua i le Tusitaulima Aoao, 10.1.2. O le a sou manatu e faapefea e lenei autu ona musuia alii talavou e faia filifiliga amiotonu? O a vaega o le autu a le korama o le Perisitua Arona e mafai ona e faaaogaina lelei i lou lava avea ai ma soo?

  • O sauniga ma feagaiga e maua e ala i le Perisitua Arona e saunia ai i tatou mo na [sauniga ma feagaiga] e fesootai ma le Perisitua Mekisateko. E mafai faapefea e le salamo, papatisoga e ala i le faatofuina mo le faamagaloga o agasala, le faamanatuga, ma le ola ai i feagaiga e o faatasi ai, ona saunia ai oe e osia ma tausia feagaiga ma maua sauniga o le maota o le Alii?

Gaoioiga mo le aoao faatasi ma isi

  • O le Perisitua Arona o se vaega taua O Le Ekalesia a Iesu Keriso o le Au Paia o Aso e Gata Ai o se [tino] atoa, ae e faamanuiaina ai foi i latou taitoatasi e umia le perisitua. Matamata le vitio: “Let Every Man Learn His Duty: Aaronic Priesthood” (3:34). E faapefea i sou manatu ona faatosinaina e le umiaina o le perisitua ia faaiuga a nei alii talavou? A o faalogologo lau vaega i alii talavou eseese o faasoa mai po o le a le uiga o le mana ma le pule o le perisitua ia i latou, valaaulia tagata o le vaega e faasoa mai o latou lagona ma manatu.

Aoao atili

Faamatalaga

  1. Gordon B. Hinckley, “O le Perisitua Arona—o se Meaalofa mai le Atua,” Liahona, Iulai 1988,46.

  2. Gordon B. Hinckley, “O le Perisitua Arona,” Liahona, Ian. 1983, 44.