Taliina o Fesili o le Talalelei

E toeitiiti o tagata uma e i ai ni fesili pe na oo i ni popolega i se taimi. “A o tatou ola ai mai lea aso i lea aso,” na saunoa ai Peresitene Thomas S. Monson, “e toetoe lava a lemaalofia o le a luitauina lo tatou faatuatua.”⁵ Na aoao mai foi Peresitene Dieter F. Uchtdorf: “E ono lagona e nisi le matamuli po o le le agavaa ona o loo i ai ni a latou fesili sailiili e uiga i le talalelei, ae e le tatau ona latou manatu faapena. O le faia o fesili e le o se faailoga lea o le vaivai; ae o se teuteuala mo le tuputupu a’e.”⁶

Ae ia manatua, o le upu fesili e le o se upu e uiga tutusa ma le upu masalosalo. O le faatuatua ma le masalosalo e le o ni itu eseese o se tupe siliva. E le faamalosiaua e le Alii ma Ana perofeta le masalosalo—o le faafeagai lava. O le masalosalo e le o ta’ua i se auala lelei i tusitusiga paia. Na aoao mai Peresitene Thomas S. Monson, “E le mafai e le masalosalo ona musuia le faatuatua.”⁷ O le pogai lena ua matuai faamausali mai ai le Alii ia tatou “le masalosalo.”⁸ Na te silafia o le masalosalo e mafai ona afaina ai lo tatou faatuatua ia te Ia. Na aoao mai le Faaola, “Ma o soo se tasi e talitonu i lou igoa, ma lē masalosalo i se mea, o ia lea o le a ou faamaonia i ai au upu uma”⁹ O le saunoa atu ia i latou o e sa le talitonu ia Keriso, sa apoapoai atu ai Moronae, “Aua le masalosalo, ae ia talitonu.”¹⁰

E ui e le tatau ona tatou lagona le matamuli po o le le agavaa ona e i ai ni a tatou fesili po o popolega, e tatau ona tatou saili e foia i latou, ma manatua o a tatou fesili o le a taliina i le taimi a le Alii ma e manaomia ai lo tatou onosai. O le masalosalo e le oo atu ai i le faatuatua, ae o le saili o le aoao e ala i le suesue ma le faatuatua e faateleina ai lo tatou malamalama ma lo tatou faatuatua.

Pe a i ai ni a tatou fesili po o popolega e uiga i se tulaga o aoaoga po o faiga faatino a le Ekalesia, e mafai ona tatou sailia tali e aunoa ma le faataatiaesea o le molimau ua uma ona tatou mauaina. Na fautuaina ma le poto e Paulo ia Timoteo ina ia faaauau pea i le faia o mea “ua mautinoa” ia te ia.¹¹ Na aoao mai Peresitene Dallin H. Oaks, “Pe a tatou le mautonu e uiga i ni mataupu faavae o le talalelei po o mea e tutupu i le lumanai, e masani ona sili le lelei o le gaoioi i mea ua tatou iloa ma faalagolago i se Tama Faalelagi agalelei e tuu mai ia i tatou se malamalama faateleina pe a tatou manaomiaina moni lava.”¹²

E leai se mea e ta’u o se faatuatua e faaosofia-e le masalosalo. E ala i le faatuatua, na savali ai le Aposetolo o Peteru i luga o le vai seia oo ina tautevateva lana savali, ma amata ai ona magoto ona o le mata’u ma le masalosalo.¹³ Sa aoaoina taitai ma tagata o le au paia i aso popofou o le Toefuataiga, “O le mea e i ai le masalosalo ma le le mautonu, e le i ai le faatuatua, pe mafai foi ona i ai.”¹⁴

Na fautua mai foi Elder Jeffrey R. Holland: “I taimi o le atuatuvale po o le le mautonu po o taimi e fesouaiina ai, tausisi i le faatuatua lena ua ia te oe, tusa lava pe itiiti lena faatuatua. … A alia’e mai na taimi ma oo mai faafitauli, ma a le vave ona maua se vaifofo, ia taofi mau i mea ua uma ona outou iloa ma tutu malolosi seia oo mai se isi malamalama. … O le telē o lou faatuatua po o le maualuga o lou malamalama e le o le mea lea e taua—o lou faamaoni a’ia’i e te faatinoina e tusa ai ma lou faatuatua ma le upumoni ua uma ona e iloa.”¹⁵

I le saunoa atu ia i latou o e ua fesouaiina i mea na tutupu i le talafaasolopito o le Ekalesia po o mea le lelei na oo i ai isi tagata o le au paia, sa fautua mai ai Elder David A. Bednar: “O lo’u faamoemoe, ae maise lava mo tagata o e ua fesouaiina i mea faapena ua tutupu, ina ia latou fesili ifo ia i latou lava i le fesili lenei: ‘Pe ua ou naunau ea e lafoai pe faagalo atoa lava le moni o le toefuataiga ona o mea na tutupu i le talafaasolopito lea atonu tatou te le iloa uma ia faamatalaga talafeagai pe ona o aafiaga le lagolelei ma isi tagata o le Ekalesia?’ Ina ia faamasino ma le poto, mafaufau i le talalelei atoa a Iesu Keriso—i upumoni uma ua faaalia mai i le tisipenisione o le atoatoaga o taimi.”¹⁶ Sa ta’ua manino e Elder Neil L. Andersen, “Tatou te le lafoaia se mea ua tatou iloa e moni ona o se mea tatou te le o malamalama i ai.”¹⁷

E ala mai i le perofeta o Isaia, na fetalai mai ai le Alii, “Aua e pei ona sili ona maualuga o le lagi i le lalolagi, ua faapea ona sili ona maualuga o o’u ala i o outou ala, ma o’u manatu e sili i o outou manatu.”¹⁸ Sa aoao mai foi le Aposetolo o Paulo o lo tatou faatuatua, ia “le i ai i le poto o tagata, a o le mana o le Atua.”¹⁹

Na aoao mai foi Elder Dallin H. Oaks: “O fesili e pei o le, O fea na tatou o mai ai? Aisea ua tatou i ai iinei? ma O fea o le a tatou o i ai? ua taliina i le talalelei a Iesu Keriso. Ua ta’ua e perofeta o le ata o le faaolataga ma ‘o le fuafuaga sili o le fiafia’ (Alema 42:8). E mafai ai ona tatou malamalama e ala i musumusuga i lenei faafanua o le ala i le faavavau ma faaaoga e taiala ai lo tatou ala i le olaga nei.”²⁰

Sa faamalamalama mai e Peresitene Boyd K. Packer: “O le tele o fesili faigata ua feagai ma i tatou i le Ekalesia i le taimi nei, ma e mafai ona tatou lisiina—faapau pepe ma isi mea uma, o luitau uma pe o ai e umiaina le perisitua ma pe o ai foi e le umiaina—e le mafai ona taliina e aunoa ma sina malamalamaaga o le fuafuaga e avea o se vaaiga i tua atu.”²¹ Pe a tatou feagai ma fesili po o popolega, e tatau ona tatou taumafai e foia i latou i totonu o anotusi o le ata o le faaolataga. O le a fesoasoani lenei mea tatou te vaai ai i mea ma se vaaiga mamao e faavavau.

E mafai ona tatou fesili ifo ia i tatou lava: E faapefea ona fetaui lenei faafitauli po o le aoaoga i le ata o le faaolataga? O le a faapefea ona aafia ai lo’u fiafia i le olaga nei ma le faaolataga e faavavau? O a ni mea o aoao mai e tusitusiga paia po o perofeta soifua e uiga i ai?

Ua aoao i tatou e perofeta ia o atu i le Atua i le tatalo faamaoni, ia le i ai se uiga o le faatalitonugatā ma le masalosalo. Sa faamanatu atu e Nifae i ona uso, o e sa fesouaiina i fesili ma masalosaloga, le mea na fetalai mai ai le Alii: “Afai tou te lē faamaaa o outou loto, ma ole mai ia te aʼu i le faatuatua, ma le talitonu o le a outou maua, faatasi ma le filiga i le tausiga o aʼu poloaiga, e moni o le a faailoa mai nei mea ia te outou.”²² E ui o le suesue o se auala lelei e foia ai popolega, o lena mea o le a le aoga seiiloga e taumafai le tagata sailiili o le upumoni e tausi poloaiga a le Atua ma ave atu ana fesili i le tatalo ia te Ia.

Na faamalamalama mai e le Aposetolo o Iakopo le ala e maua ai tali i fesili. Sa ia fautuaina i latou o e o loo sailia le upumoni ina ia iloa e mafai ona i ai se tofotofoga o le faatuatua, ina ia onosai, ma ia “ole atu i le Atua.” Tatou te sailia tali mai i se punavai faalelagi, “ma le faatuatua, aua lava nei masalosalo.”²³ I nisi faaupuga, e tatau ona tatou amata ma se faamoemoega mautinoa, faatumulia i le faamoemoe, nai lo ma se uiga leaga e faatumulia i le le talitonu ma le masalosalo.

Sa molimau mai Peresitene Dieter F. Uchtdorf: “Ou te tau atu ia te outou le mea lenei: E popole le Atua ia te oe. O le a Ia faafofoga atu ma o le a Ia tali atu i au fesili patino. O tali i au tatalo o le a oo mai i Lana lava ala ma i Lana lava taimi, ma o lea, e manaomia ai ona e aoao ia faalogo atu i Lona siufofoga.”²⁴

E taua foi le manatua o faaaliga mo le Ekalesia atoa e na’o taitai filifilia a le Alii e ala mai ai, ae lē ala mai i tagata taitoatasi o le au paia. I se faaaliga ia Oliva Kaouti, na fetalai mai ai le Alii, “E leai se tasi e tofia na te mauaina poloaiga ma faaaliga i le ekalesia lenei, vagana ai laʼu auauna o Iosefa Samita, Laitiiti.”²⁵ Sa aoao mai e Iosefa Samita i se taimi, “E feteenai ma le faatulagaga a le Atua mo soo se tagata o le Ekalesia, po o soo se isi lava, e mauaina ni faatonuga mo e o loo i ai le pule, e sili atu i lo latou; o le mea lea o le a e iloa ai le le talafeagai o le usitai atu ia i latou.”²⁶

I le avea ai ma se tamā, sa faamanatu atu ai e Helamana i ona atalii e toalua, o Nifae ma Liae, ina ia atiina ae o laua olaga i le Faaola, ona pe a la oo i taimi o faafitauli, o le a le vaivai lava i laua. “O luga lava o le papa o lo tatou Togiola,” sa ia fai atu ai, “o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”²⁷

Sa augani atu Peresitene Howard W. Hunter i se tasi o taimi i se vaega o tamaiti aoga ina ia manatua le mea e tasi: “Afai o tatou olaga ma lo tatou faatuatua e totonugalemu ia Iesu Keriso ma Lana talalelei toefuataiina, e leai se mea e mafai ona tumau pea le sese. I se isi itu, afai e le faatotonugalemuina o tatou olaga i le Faaola ma ana aoaoga, e leai se isi manuia e mafai ona tumau sona sa’o.”²⁸

Na aoao mai Elder Richard G. Scott e faapea, “na tatou o mai tonu lava i le olaga faaletino ina ia tuputupu ae mai tofotofoga ma faaosoosoga. … Ma o le Togiola a Iesu Keriso ua mafai ai ona onosaia na luitau [tagai i le 2 Nifae 2:2]. … Pe a tatou o mai ma le naunautai ia te Ia, o le a mafai ona tatou onosaia faaosoosoga uma, lototiga uma, ma luitau uma tatou te fetaiai.”²⁹

E mafai ona tatou faaogatotonuina o tatou olaga i le Faaola e ala i le taumafai e manatua pea o Ia, tatalo i aso uma, suesue ma mafaufau loloto i le afioga a le Atua, usitai i Ana poloaiga, ma auauna atu i o tatou aiga ma isi.

O suesuega faisoo, i aso uma o le talalelei o le a faamalolosia ai a tatou molimau i taimi uma—ae maise lava i taimi pe a fesouaiina i tatou i fesili, popolega, po o masalosaloga. Sa ta’u atu e Nifae ia Lamana ma Lemuelu e faapea, “ai se faalogo i le afioga a le Atua, ma pipiimau i ai, e le fano lava i latou; pe mafai foi e faaosoosoga ma ufanafana mu a le fili ona faatoilaloina i latou i le faatauasoina, e taitai ese atu ai i latou i le faafanoga.”³⁰

Sa aoao e le Faaola ia Aposetolo anamua, “O ai se teuina la’u upu, o le a le faaseseina.”³¹ Sa faamalamalama mai e Peresitene Henry B. Eyring e faapea, “tatou te teuina le upu a le Atua e le gata i le faitauina o upu o tusitusiga paia ae e ala foi i le suesue i ai. E mafai ona fafagaina atili i tatou e ala i le mafaufau loloto i ni nai upu, tuu atu i le Agaga Paia e faia ia pele ia i tatou, nai lo le pasi faavavevave atu i ni mau mataupu o tusitusiga paia.”³²

E le gata o le afioga a le Atua “o se sulu i o [tatou] vae, ma se malamalama i o [tatou] ala,”³³ ae e mafai ona fafaga ai i tatou pe a faamata’uina a tatou molimau e popolega ma fesili atuatuvale. Na aoao mai Elder Quentin L. Cook, “O le afioga a le Atua e musuiaina le tuuto atu ma galue o se pulu pāsama mo lagona ua faamanualia, ita, po o le le fiafia.”³⁴

Na aoao mai Peresitene Ezra Taft Benson, o le afioga a le Atua o loo maua “i totonu o tusitusiga paia, i upu a perofeta soifua, ma i faaaliga patino faaletagata lava ia” ma o loo “i ai le mana e faamalosia ai le Au Paia ma faaauupegaina ai i le Agaga ina ia mafai ai ona latou tetee atu i le tiapolo, taofimau i mea lelei, ma maua ai le olioli i lenei olaga.”³⁵

Na filifilia e le Faaola ia perofeta ma aposetolo o loo taitaia Lana Ekalesia i aso nei. Na te faatuatuaina i latou ma faamamalu i a latou upu: “O le mea ua fai atu ai a’u le Alii, ua ou fai atu ai lava, ma ou te le faatoese ai lava a’u; ma e ui ina mavae atu le lagi ma le lalolagi, a e le mavae atu lava la’u upu, a o le a faataunuuina lava, pe fai atu i lo’u lava leo po o le leo o a’u auauna, ua tusa lava ia.”³⁶ I le aso 6 o Aperila, 1830, le aso na toefuataiina ai le Ekalesia, sa fetalai le Atua i le Au Paia e faatatau i le Perofeta o Iosefa Samita, “O lana upu ia outou talia, e pei lava ua mai i lou lava gutu, i le onosai ma le faatuatua atoa.”³⁷ O lena mataupu faavae e faatatau i perofeta taitasi e sosoo atu i ai seia oo mai i le asō.

Na aoao mai Elder Neil L. Andersen, “Atonu e mafai ona e fesiligia ma le iloa mea e te faalogo i ai i luga o talafou, ae e le tatau lava ona e masalosalo i le molimau a perofeta a le Atua.”³⁸ Aua o le a le taitaiseseina i tatou e perofeta. Sa tautino mai ma le mautinoa e Peresitene Thomas S. Monson, “A e mulimuli i perofeta, o le a e i ai i teritori saogalemu.”³⁹ E faatatau i lenei mataupu faavae, na folafola mai ai e Elder M. Russell Ballard, “E sili ai pe a tatou fesili, ‘Pe i ai ea se leo manino, ma le le faaituau e mafai ona tatou faalagolago atu pea i ai? Pe i ai ea se leo e tuuina mai ai ia i tatou ni faatonuga manino ina ia sailia ai lo tatou auala i le lalolagi fesouaiina i aso nei?’ O le tali o le ioe. O lena leo, o le leo lea o le perofeta soifua ma aposetolo. … O le a ou fai atu se folafolaga. O se folafolaga faigofie, ae e moni. Afai o le a outou faalogo i le perofeta soifua ma aposetolo ma gauai atu i la latou fautuaga, o le a outou le se ese lava.”⁴⁰

A tatou iloa musumusuga a le Agaga Paia ma mulimuli i ai, o le a le faaseseina i tatou e le taufaasese lea ua matuai taatele i o tatou tagata i aso nei. Na fetalai atu Iesu i Ona Aposetolo i taimi o le Feagaiga Fou e faapea, a latou maua “le Fesoasoani, o le Agaga Paia lea,” o lena Fesoasoani o le a aoao i latou “i mea uma lava” ma aumaia aoaoga uma a le Faaola “e faamanatu … ia te outou.”⁴¹ Sa aoao mai foi le Faaola, o le Agaga Paia o le a taitaia i tatou “i upumoni uma.”⁴²

Na fofoga mai e Peresitene Henry B. Eyring ia i tatou le pogai tatou te manaomia ai le uunaiga tumau a le Agaga Paia:

“E pei lava ona faamalosia i tatou e le Agaga e tetee atu i le leaga, Na te aumaia foi ia i tatou le mana e iloatino ai le mea moni mai le mea sese. O le upumoni e sili ona taua ua na o faaaliga mai le Atua e faamaonia ai. O a tatou mafuaaga faaletagata ma le faaaogaina o o tatou lagona faaletino o le a le lava lea. Ua tatou ola i se taimi e oo lava foi i tagata e sili ona atamamai e matua faigata lava ona iloa le eseesega i le va o le mea moni mai togafiti poto. … Talu ai atonu e ono tuu mai ia i tatou mea sese ma pepelo i soo se taimi, tatou te manaomia ai se faatosinaga tumau a le Agaga o le Upumoni e faasāo ai tatou mai le masalosalo.”⁴³

Na faamalamalama manino mai e le Faaola, o Lana ala e aoao ai i tatou, o le tuu mai ia i tatou o sina mea itiiti i lea taimi ma lea taimi:

“Ou te tuu atu i le fanauga a tagata lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o; ma e manuia lava i latou o e e faalogologo i aʼu mataupu, ma uaʼi mai o latou taliga i laʼu fautuaga, ona o le a latou aoaoina le poto; ona o ia o lē na te taliaina o le a Ou tuu atu atili i ai; ae o i latou o e e fai mai, Ua lava mea ua matou maua, o le a aveesea mai ia te i latou e oo lava i mea ua latou maua.”⁴⁴

Sa aoao mai foi e Iosefa Samita le pogai e oo mai ai upumoni o sina mea itiiti i lea taimi ma lea taimi. Na ia saunoa, “E le atamai lo tatou mauaina uma o le poto i le taimi e tasi e tuuina mai i o tatou luma; ae e tatau ona maua sina mea itiiti i lea taimi ma lea taimi; ona mafai lea ona tatou malamalama i ai.”⁴⁵

Sa molimau mai Ioane le Papatiso e faapea, a o le’i silafia e le Alii o Iesu Keriso mea uma, sa Ia aoaoina sina mea itiiti i lea taimi ma lea taimi.

“Ma o aʼu, o Ioane, sa ou vaai, sa lei maua e ia le atoatoaga i le amataga, ae sa maua e ia le alofa tunoa mo le alofa tunoa;

“Ma sa lei maua e ia le atoatoaga i le amataga, ae sa alualu pea mai lea alofa tunoa i lea alofa tunoa, seia oo ina maua e ia le atoatoaga;

“Ma sa faapea ona taʼua ai o ia o le Atalii o le Atua, ona sa lei maua e ia le atoatoaga i le amataga.”⁴⁶

O le mulimuli i le faataitaiga a le Faaola, e mafai ona tatou aoao ai ni mea itiiti i lea taimi ma lea taimi ma, mo mea tatou te le o iloa lava, ia faaaoga le onosai nai lo o le faia o ni faaiuga faanatinati lea atonu e le sa’o ma e ono afua ai ni fesili po o ni masalosaloga le talafeagai.

Ua aoao mai tusitusiga paia ia tatou “tuputupu a’e … i le malamalama o le upumoni.”⁴⁷ Sa tuuina mai e Iosefa Samita se vaaiga lelei lava mo le tuputupu a’e i le malamalama o le upumoni:

“Pe a e a’e i se apefai, e tatau ona e amata atu i le pito i lalo, ma alu atu i luga mai lea sitepu i lea sitepu, seia e taunuu i le tumutumu; ma e faapena i mataupu faavae o le talalelei—e tatau ona e amata i le muamua, ma alu atu ai seia e aoao i mataupu faavae uma o le faaeaga. Ae o le a i ai sina taimi pe a uma ona e pasi atu i le veli faatoa e aoaoina ia mea. E le faapea o le a malamalama uma i ai i le lalolagi lenei; o le a avea ma galuega tele lo tatou aoao i lo tatou olataga ma le faaeaga e oo lava i tala atu o le tuugamau.”⁴⁸

Ua aoao mai Iakopo o le malamalama o le Alii e loloto ma e faapea ona “le mafai e le tagata ona iloa ona ala uma.” Sa ia faamanatu mai ia i tatou, o mea e mafai ona tatou iloa e uiga i ala a le Atua o le a oo mai e ala i faaaliga. “O le mea lea,” na lapatai mai ai Iakopo, “aua le inoino i faaaliga a le Atua.”⁴⁹ O faaaliga o le ki lea i le tuputupu ae i lo tatou malamalama o le upumoni i luga o lea fuaiupu ma lea fuaiupu.

I luga o initoneti, o faamatalaga ia sa i ai le taimi sa le maua ai e le toatele o tagata ua mafai nei e le toetoe o tagata uma ona maua. Na saunoa Peresitene Dieter F. Uchtdorf:

“E lei i ai lava i le talafaasolopito o le lalolagi se taimi na faigofie ai lo tatou mauaina o le tele o faamatalaga—o nisi e sa’o, o nisi e sese, ma o le tele lava e i ai ni nai mea moni. O le taunuuga la, e le’i i ai lava i le talafaasolopito o le lalolagi le sili atu ona taua o le aoao ia iloa ona iloatino moni le va o le upumoni ma le mea sese.”⁵⁰

O se tomai taua mo le aoaoina o le talalelei o le, ia mafai ona faailoa punavai faatuatuaina ma faamaonia ma ia iloilo le taua o faamoemoega o i latou o e na saunia ia punavai . O le a tatou le atamamai pe a mafaufau faapea e tutusa uma lava le faatuatuaina ma le faamaoni o punavai uma, ae maise lava na mea o loo i luga o le initoneti. E tatau ona tatou fesiligia ia faamoemoega ma faanaunauga faapea foi ma le malamalama o i latou o loo uunaia le masalosalo. E tatau foi ona tatou mafaufau i le agaga o a latou faamatalaga ma le taunuuga ua latou faamoemoe e ausia. Pe ina ia atinae pe faavaivaia ai le faatuatua? Ia manatua, “o le a outou iloa i latou i o latou fua.”⁵¹

Sa faamalamalama mai e Elder D. Todd Christofferson: “I nisi o faatuatuaga ua leva, ua finauina ai e tagata atamamai faalelotu le pule tutusa e aoao atu ai faatasi ma taitai sili faalelotu, ma e ono feteenai ai manatu i mataupu faaleaoaoga faavae i o latou lava va. O nisi e faalagolago i aufono o faalauiloaga faa-Kerisiano o Vaitausaga Ogatotonu ma a latou aoaoga. O isi latou te tuu se faamamafa tele i manatu o aposetolo anamua e atamamai i mataupu faalelotu po o le faaliliuga ma faamatalaga a le tusi paia. Tatou te faatauaina ia suesuega ia e faaleleia ai le malamalama, ae i le Ekalesia i aso nei, e pei lava o le ekalesia anamua, o loo faamautuina le mataupu faavae a Keriso po o le faasa’oina o mea sese faalemataupu faavae, o se mataupu lea o faaaliga faalelagi ia i latou ua faaee i ai e le Alii le pule faa-aposetolo.”⁵²

Sa fautuaina mai e Peresitene Harold B. Lee se metotia mo le iloiloina o punavai faatuatuaina: “O le a ou ta’u atu ia te outou le mea ou te faia pe a ou faitau i nei tusi e tele e oo mai (ma ou te manatu ua oo mai le aso e tatau ai ona faateleina lo tatou ai filifili i a tatou faitauga nai lo se isi lava taimi muamua). Se’i ou fautuaina atu se metotia. Pe a e faitau i nei tusi, e tusa lava po o ai na tusia, faitau ma le toto’a i le tusi, ma afai e ioe atoatoa a latou aoaoga ma faaaliga ua tuuina mai e le Alii ia i tatou ma faatasi ma aoaoga a tusitusiga paia, ia talia e moni, ae o itu e agai atu ai i manatu fafauvale po o taumatematega e le faamaonia atoatoa e tusitusiga paia, ia tusi le suafa o le tusitala i autafa o le itulau. Tou te silafia, o lona [tusitala] a manatu lea. E tatau ona e iloatino le va o le manatu o le tagata lava ia ma mea o loo lagolagoina e tusitusiga paia.”⁵³

O loo i lalo nisi o punavai faatuatuaina ma faamaoni e faaaoga mo le aoaoina e ala i le suesue ma le faatuatua:

1. Tusitusiga Paia

2. Savali a Taitai

3. Aoaoga a Peresitene o le Ekalesia

4. Autu o le Talalelei

5. Tusi lesona a tagata aoga o le Inisitituti

6. Revelations in Context essays

7. Pepa a Iosefa Samita

8. history.ChurchofJesusChrist.org

O tulaga o siomia ai soo se mea na tupu i le talafaasolopito e le o tusifaamaumauina i taimi uma ma sa’o atoatoa ma e masani ona faauigaina e le tusitala. O le mea lea, e taua le manatua o faamatalaga e mafai ona tuuina mai faatasi ma se vaega mautinoa o le manatu faapito ma le faaituau. Sa saunoa mai Elder Neal A. Maxwell i se tasi taimi: “O nisi sa tausisi e suesueina le Ekalesia e ala i na’o le vaai a ona au taufaaleaga—e pei o le faatalanoaina o Iuta ia malamalama ai ia Iesu.”⁵⁴

O le mea e faanoanoa ai, ua aoao e nisi o tagata ia mea e le sa’o pe tuuina mai ia mea i se ala e foliga mai e lelei ae o le mea moni e sese. Sa faaseseina Korioa e le tiapolo ma faailoa atu, “Sa ou aoao atu ana upu; ma sa ou aoao atu i latou ona sa logolelei i latou i le mafaufau faaletino; ma sa ou aoao atu i latou, seia oo ina ou maua ai le manuia tele, sa oo ina ou talitonu moni ai lava ua moni i latou; ma o le pogai lenei sa ou tutetee ai i le upumoni.”⁵⁵

Sa faamatalaina e Peresitene Russell M. Nelson se taimi sa le’i tuuina mai ai le upumoni i lona aano tonu ma sa faapea ona tuuina mai ai se manatu sese:

“Ua ou manatua ai se aafiaga patino atonu e mālie ia te outou. Sa ou tautua o se faufautua i le malo o le Iunaite Setete i lona Nofoaga Autu o le Malo mo le Faaitiitia o Faamai i Atlanta, Georgia. I se tasi taimi a o faatalitali se taavale laupasese ou te alu ai i le malae vaalele ina ua uma a matou fonotaga, sa ou fālōlō i luga o le mutia ina ia mitiīa sina sulu o le la a o lei toe foi atu i le tau malulu o Iuta ia Ianuari. Sa ou mauaina mulimuli ane se ata mai le meli na pueina e se tagata pueata e faaaoga ai se meapueata pue mamao, lea na maua ai le taimi o ou malolo ai i luga o le mutia. I lalo ifo sa i ai le faaupuga, ‘Faufautua a le Malo i le Nofoaga Autu o le Malo.’ Na sa’o le ata, na sa’o le faaupuga, ae sa faaaoga le mea moni ina ia faalauiloa ai se lagona sese. Ioe, e mafai foi ona faaaoga le mea moni e faailoa ai se pepelo.”⁵⁶

Sa faapea mai Iosefa F. Samita, “E valea tele le ave o se tama’i mea moni ma faia e pei o le mea atoa lea.”⁵⁷

Sa faaali atu e le Faaola le alofa ina ua masalosalo Peteru. Na tusifaamaumauina e Mataio e faapea, a o magoto ifo Peteru i le sami, “sa aapa atu loa lea e Iesu o lona aao, ua tago ia te ia.”⁵⁸ E pei o le Faaola, e mafai ona e faaali atu loa le alofa ma faaloaloa atu au taumafaiga sili ona lelei e fesoasoani ai ia i latou o e o i ai ni fesili po o e o loo masalosalo. Toe faamautinoa atu ia i latou lou alofa ma lou faaaloalo. Faailoa atu ia i latou o le i ai o fesili po o popolega e le o se agasala. Aoao i latou o o latou popolega e mafai ona foiaina e ala i le tatalo faamaoni, mafaufau loloto i tusitusiga paia ma aoaoga a perofeta o aso e gata ai, ma faalogo i uunaiga a le Agaga Paia.

Faalogo ma le toto’a i a latou popolega ma faamatalaga e uiga i mea o loo fesouaiina ai i latou. Aua le faate’aesea soo se fesili faamaoni po o se popolega e faapea e le tāua, le aoga, le lelei, pe o se agasala. Ia manatua o le Toefuataiga o le talalelei na amataina i le faia ma le faatuatua e Iosefa Samita o se fesili faamaoni. O se avanoa lea e siia’e ma faamalosia ai isi e ala i le taitaiga a le Agaga—ia “faamafanafana atu ia te i latou o e e manaomia le faamafanafanaga.”⁵⁹

Ua fetalai mai le Alii, “Ma talu ona ua lē i ai i tagata uma le faatuatua, ia outou saili ma le filiga ma aoao i le tasi upu o le poto; ioe, ia outou saili mai totonu o tusi sili ona lelei upu o le poto.”⁶⁰

Ia faamalosiau ia i latou o i ai fesili po o popolega ia faaauau pea ona tatalo i aso uma mo musumusuga faalelagi, suesue i tusitusiga paia, ae maise lava le Tusi a Mamona; faitau i saunoaga a perofeta ma aposetolo, auai i le lotu; ma auauna atu i isi. Fesoasoani e faamanino faamatalaga le sa’o atonu na latou aoaoina ina ia i ai se faavae mausali e mafai ona tuputupu a’e ai lo latou faatuatua.

Tusifaamaumau Ou Lagona Uunai