Ola e Faavavau

Ia mau faatasi ma le Atua ma avea e faapei o Ia

Ua ia te oe le gafatia ma le taunuuga paia o se afafine po o se atalii o ni matua faalelagi. Pe a e iloaina lou faasinomaga e faavavau, e mafai ona e iloa e finagalo le Atua ia te oe e saunia mo le olaga a sau. Talu ai na faatoilaloina e Iesu Keriso le oti, o le a taitasi i tatou ma toetutu ma maua le tino ola pea i le olaga a sau. Ae e tele atu isi mea o loo teuina e le Tama Faalelagi mo i latou o e saili e mulimuli ia Iesu Keriso, salamo, ma osia ma tausia feagaiga ma Ia. Ua faia e le Atua le Tama ia mafai e Ana fanau ona avea faapei o Ia ma toe nonofo i Lona afioaga (tagai Mosaea 2:41). O le mea lea ua ta’ua e tusitusiga paia o le “faaeaga” ma le “ola e faavavau.” O le ola e faavavau o le meaalofa silisili lea o meaalofa uma a le Atua ma o le faamoemoega tonu lava lea o le fuafuaga o le faaolataga (tagai Mataupu Faavae ma Feagaiga 14:7). O mea uma e faia e le Atua o le saunia lea o Ana fanau ia maua le ola e faavavau (tagai Mose 1:39).

O le a le Ola e Faavavau?

O le mauaina o le ola e faavavau o le mauaina lea o le faaolataga, o faamanuiaga o le aiga e faavavau, ma le faaeaga, o le ”tulaga aupito maualuga lea o le fiafia ma le mamalu.”¹ E ala i le alofa ma le alofa tunoa o le Atua, o le a toetutu ai Ana fanau uma pe a mavae ona maliliu ma olioli i le tino ola pea (tagai Moronae 7:41). O le ola e faavavau e sili atu nai lo le tino ola pea ma e aofia ai le mauaina o le tikeri aupito maualuga o le malo selesitila, faaauau i se aiga e faavavau, ma avea e faapei o le Atua ma ola ai i Lona afioaga. O le ola e faavavau o le meaalofa silisili lea e mafai ona tatou maua mai le Atua (tagai Roma 6:23; Mataupu Faavae ma Feagaiga 14:7).

Vaaiga Aoao i autu: Ola e Faavavau

Taiala fesootai mo le suesueina o le talalelei: Fuafuaga o le Faaolataga, Faaolataga, Malumalu, Feagaiga ma Sauniga, Tuufaatasia o Aiga mo le Faavavau

Vaega 1

O Le Fuafuaga a le Atua o le a Fesoasoani ia te Oe e Maua ai le Faaeaga ma le Ola e Faavavau

Ata

talavou o loo savali i talaane o le malumalu

Pe na i ai se taimi na e lagonaina ai atonu e te le agavaa lava mo le faaeaga? O i tatou uma lava e mamao mai le atoatoa i a tatou taumafaiga e mulimuli ia Iesu Keriso. Ae sa silafia e le Tama Faalelagi o lo tatou aafiaga i le olaga nei o le a aofia ai luitau ma le lotovaivai. Ua aoao i tatou e le Feagaiga Fou “Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16). E mafai ona tatou faatuatuaina o le fuafuaga a le Tama Faalelagi mo lo tatou faaolataga ma le faaeaga e aoga moni lava aua na Ia auina mai Iesu Keriso e avea ma o tatou Faaola ma Togiola. E le mafai ma e le mafai ona tatou mauaina le meaalofa o le ola e faavavau na o i tatou lava. Tatou te manaomia Iesu Keriso, ma e ala i lo tatou faatuatua ia te Ia, salamo, ma taumafaiga e osia ma tausia feagaiga, tatou te saunia ai i tatou lava e maua le faaeaga (tagai Mataupu Faavae ma Feagaiga 59:23; Mose 6:59–60).

I le avea ai ma fanau a le Atua, ua tatou maua le gafatia ma le avanoa e alualu ai i luma ma avea faapei o Ia (tagai Mataio 5:48; 2 Peteru 1:2–4; 1 Ioane 3:1–2). Ua folafola mai e le Tama Faalelagi e mafai ona avea i tatou ma “suli-faatasi ma Keriso” (Roma 8:17) ma maua mea uma ua i ai i le Atua le Tama (tagai Mataupu Faavae ma Feagaiga 84:36–38). O le meaalofa o le ola e faavavau e aofia ai faamanuiaga o le ola ai i le afioaga o le Atua ma faaauau pea o ni aiga (tagai i le Mataupu Faavae ma Feagaiga 131:1–4).

Mea e mafaufau i ai

Faalogo pe faitau upu o le “Fetaomi Atu i Luma, Au Paia.”² Tusifaamaumau ou lagona a o e faia lena mea. Pe sili atu ea ona mafai ona maua le ola e faavavau nai lo le mea na e mafaufau i ai? Faitau le 2 Nifae 31:20. O le a le uiga o le fetaomi atu i luma ma “se susulu atoatoa o le faamoemoe”?

Gaoioiga mo le aoao faatasi ma isi

Fai se lisi o tulaga e ono aumaia ai e le faatuai po o le tolopo ni taunuuga e le manaomia. Faitau faatasi le Alema 34:32–34 , ma talanoaina upumoni e fesoasoani tatou te malamalama ai pe aisea e le tatau ai ona tatou faatuai pe tolopo lo tatou salamo. Aisea ua avea ai lenei olaga ma taimi e saunia ai mo le olaga a sau?

Aoao atili

2 Nifae 31:17–20; Mataupu Faavae ma Feagaiga 130:1–2
Russell M. Nelson, “Faaolataga ma le Faaeaga,” Liahona, Me 2008, 10
Jeffrey R. Holland, “Aua le Fefe: Na o le Talitonu!,” Liahona, Me 2022, 36
Aoaoga a Peresitene o le Ekalesia: Harold B. Lee (2000), 1–8
Randall K. Bennett, “Filifili le Ola e Faavavau,” Liahona, Nov. 2011, 98–100
Gospel Topics Essays, “Becoming Like God,” Gospel Library

Vaega 2

Ua Saunia e le Atua Malo Eseese o le Mamalu mo Ana Fanau

Ata

ata tusi o le la, masina, ma fetu

Na aoao mai Iesu e eseese taui i le olaga a sau: “E tele mea e nonofo ai i le maota o lou Tama” (tagai Ioane 14:2–3). Sa vaai le Perofeta o Iosefa Samita i se faaaliga vaaia o tikeri e tolu, po o malo, o le mamalu i le lagi (tagai Mataupu Faavae ma Feagaiga 76:50–98). O malo selesitila, terasitila, ma telesitila nei. O nei mea taitasi ua mafai ona tatou maua e ala i le taulaga togiola a Iesu Keriso (tagai i le Mataupu Faavae ma Feagaiga 76:40–43). Na aoaoina e Iosefa o le malo o le a i ai se aso tatou te mautofi ai e faalagolago lea i le tulaga tatou te filifili ai e mulimuli ia Iesu Keriso. O le malo selesitila o le mamalu aupito maualuga ma o le nofoaga e afio ai le Atua (tagai Mataupu Faavae ma Feagaiga 76:62). Ua otooto mai e le talalelei a Iesu Keriso se ala ua mamanuina e fesoasoani ia i tatou e saunia ai ma maua le mamalu o le malo selesitila.

Mea e mafaufau i ai

I le 1832, na vaai ai le Perofeta o Iosefa Samita ma Sini Rikitone i se faaaliga vaaia o malo o le mamalu (tagai Mataupu Faavae ma Feagaiga 76:11–24): o le malo selesitila (tagai fuaiupu 50–70, 92–96), o le malo terasitila (tagai fuaiupu 71–80, 91, 97), ma le malo telesitila (tagai fuaiupu 81–90, 98–106, 109–112). O le a se mea e mafai ona tatou aoaoina e uiga i le Tama Faalelagi ma Lona Alo o Iesu Keriso mai le mea moni e faapea, ua latou saunia malo eseese o le mamalu?

Gaoioiga mo le aoao faatasi ma isi

Valaaulia tagata o lau vaega e iloilo le tusiga puupuu “Malo o le Mamalu” i Autu ma Fesili. Talanoa faatasi e uiga i nisi o eseesega i le va o malo. E faapefea e o tatou manaoga ma taumafaiga e mulimuli ia Iesu Keriso i lenei olaga ona aafia ai lo tatou taui e faavavau?

Aoao atili

1 Korinito 15:40–42; 3 Nifae 15:9–10; Mataupu Faavae ma Feagaiga 59:23; 88:15–28; 137
Russell M. Nelson, “Sau, Mulimuli Mai ia te Au,” Liahona, Me 2019, 88
Aoaoga a Peresitene o le Ekalesia: Iosefa Samita (2011), 217–25
O Autu o le Talafaasolopito o le Ekalesia, “O Le Faaaliga (MF&F 76),” Potutusi o le Talalelei

O Isi Punaoa e uiga i le Ola e Faavavau