“Faaolataga,” Autu ma Fesili (2023)
Taiala mo le Suesueina o le Talalelei
Faaolataga
O le meaalofa o le toetu mai le oti ma le faamamaina mai le agasala e ala ia Iesu Keriso
Tatou te manaomia uma Iesu Keriso. O se tasi o Ana faalagiga sili ona taua o le “Faaola,” o lona uiga “o se tasi e laveai.”1 Aisea e tatau ai ona faaolaina i tatou? Na faamalamalama mai e le perofeta o le Tusi a Mamona o Apinati e faapea “o tagata uma; … po ua latou se ai e lē gata, pe a na lē togiolaina e le Atua ona tagata mai lo latou tulaga leiloa ma le pa’ū” (Mosaea 16:4). Afai e tuua e aunoa ma le fesoasoani a le Atua, semanu tatou te puapuagatia e faavavau mai taunuuga o le agasala. Ma le isi, o le a uu e le oti se uu tumau i tagata uma.
O le tala fiafia o le talalelei a Iesu Keriso e faapea, o tagata uma o e sa ola i le lalolagi—e tusa lava po o a ana filifiliga—o le a toetutu ma maua se tino atoatoa, ma ola pea (tagai Alema 40:23). Ma ona o Iesu Keriso, ua mafai ai ona tatou maua le faamagaloga ma le faamamaina mai agasala (tagai Mosaea 4:1–3; Helamana 3:35; Mataupu Faavae ma Feagaiga 20:37).
O Le A Le Faaolataga?
O le faaolataga o le meaalofa o le laveaiina mai le oti faaletino ma le faaleagaga. E oo mai e ala i le alofa tunoa o le Atua ma le mana o Iesu Keriso, le Faaola o le lalolagi (tagai Mataupu Faavae ma Feagaiga 43:34). E aofia ai le toetu mai le oti ma le mauaina o le tino ola pea. O nisi mau e faaaoga ai upu faaolataga po o le faaolaina e faasino i le ola e faavavau. O le mauaina o le ola e faavavau o le iloa lea o le Tama Faalelagi ma Iesu Keriso ma ia maua se nofoaga faatasi ma i Laua mo le faavavau. O le “meaalofa sili o meaalofa uma a le Atua” (Mataupu Faavae ma Feagaiga 6:13; 14:7).
Vaaiga aoao i autu: Faaolataga
Taiala fesootai mo le suesueina o le talalelei: Ata o le Faaolataga, Togiola a Iesu Keriso, Alofatunoa, Ola e Faavavau, Sauniga Sui mo e ua Maliliu
Vaega 1
O Iesu Keriso o le Faaola o le Lalolagi
O se tasi o faamoemoega silisili o le olaga i le lalolagi o le aoao lea ma talitonu na auina mai e le Tama Faalelagi Lona Alo, o Iesu Keriso, e laveai i tatou (tagai Ioane 3:16–17; 2 Nifae 25:26). O lena savali na folafola mai e perofeta mo le faitau afe o tausaga a o lei fanau mai o Ia (tagai Mosaea 13:33–35; Helamana 8:13–20; 3 Nifae 20:23–24; Mose 4:1–2; 5:7–9). I aso e gata ai, sa tautino ai e le Perofeta o Iosefa Samita lana molimau vaaitino ma le molimau i le Keriso Toetu (tagai Mataupu Faavae ma Feagaiga 76:22–24; 110:1–4).
Na aoao mai le Perofeta o Iosefa Samita, “O mataupu faavae autu o lo tatou talitonuga o molimau a le au Aposetolo ma Perofeta, e faatatau ia Iesu Keriso, na maliu o Ia, ma tanumia, ma toetu mai i le aso tolu, ma afio ae i le lagi; ma o isi mea uma e faatatau i lo tatou talitonuga ua na o ni faaopoopoga i ai.”2
Mea e mafaufau i ai
-
Faitau 2 Nifae 9:6–13 ma le Mataupu Faavae ma Feagaiga 76:40–42, lea e faamatala ai lo tatou manaomia o se Faaola. E faapefea e le Togiola a Iesu Keriso ona fesoasoani ia i tatou e manumalo ai mai aafiaga o le oti faaletino ma le oti faaleagaga?
-
O le vaaiga aoao o Autu o le Talalelei “Faaolataga” i le Potutusi o le Talalelei o loo aoao mai ai e tele vaega taua o le faaolataga. Toe iloilo faamatalaga o le faaolataga o loo otooto atu i lena tusiga, ma manatunatu po o le fea e sili ona anoa ia te oe. Aisea e taua ai lena faamatalaga ia te oe? Mafaufau e tusifaamaumau ou lagona i lau apitalaaga.
Gaoioiga mo le aoao faatasi ma isi
-
Matamata le vitio “Because of Him” (2:44). A uma, valaaulia tagata o le vaega e faasoa mai o latou lagona a o latou matamata i le vitio. O le a se mea na latou aoaoina e uiga i le misiona a Iesu Keriso? O a ni aafiaga o le a i ai i lena malamalama i o latou olaga? E mafai ona e valaaulia tagata o le vaega e fatu a latou lava lisi o faamatalaga o le “Ona o Ia” e faasoa atu i le vaega pe a talafeagai ai.
-
O le faaolataga mai le oti o se meaalofa mo fanau uma a le Atua ua mafai ona maua e ala ia Iesu Keriso. Faitau faatasi le 2 Nifae 2:4 ma le 2 Nifae 25:23–24 . Aisea e taua ai le le mafai ona faatauina o le faaolataga mai le agasala ae e faatotonugalemu i le faatuatua ia Iesu Keriso? O a nisi o auala e mafai ona tatou liliu atu ai ia te Ia ma se faatuatua sili atu?
Aoao atili
-
Russell M. Nelson, “Faaolataga ma le Faaeaga,” Liahona, Me 2008, 7-10
-
Dallin H. Oaks, “O Le Alofa Paia i le Fuafuaga a le Tama,” Liahona, Me 2022, 101-4
Vaega 2
E Ao Ona Tatou Tutu o ni Molimau a Iesu Keriso
E toatele tagata lelei i le lalolagi o loo saili ia malamalama i le Atua ma le auala e mafai ona Ia faaleleia atili ai o latou olaga. O tagata uma o le Ekalesia i aso nei ua avea ma molimau a Iesu Keriso pe a papatisoina i latou ma maua se molimau e ala i le Agaga Paia (tagai 2 Nifae 31:13, 18; Mosaea 18:8–9; 3 Nifae 28:11). Pe a tatou taumafai e avea ma soo moni o Iesu Keriso, tatou te lagonaina Lona alofa tunoa, lea e faamalosia ai i tatou. Ma e iu lava ina faaolaina i tatou e ala i Lona alofa tunoa (tagai 2 Nifae 25:23). Tatou te faaalia lo tatou lotofaafetai mo mea uma na faia e Keriso mo i tatou pe a tatou osia ma tausia feagaiga ma le Atua. I le avea ai ma e mauaina Lona alofa, Lana faamagaloga, ma faamanuiaga folafolaina o le faaolataga, ua ia i tatou se tiutetauave e faasoa atu la tatou molimau i tagata uma tatou te feiloai i ai (tagai Luka 22:32; Mosaea 18:8–9; Mataupu Faavae ma Feagaiga 84:61).
Mea e mafaufau i ai
-
O le a se mea ua faia e le Faaola mo oe? A o e mafaufau i lenei fesili, faitau pe faalogologo i le saunoaga a Peresitene Dallin H. Oaks “O Le A Se Mea Ua Faia e Lo Tatou Faaola mo i Tatou?” O le a se mea ua e aoaoina mai lenei saunoaga e uiga i le mana o le misiona a Iesu Keriso i lou olaga? O a ni ou aafiaga patino ma Iesu Keriso o le a e faaopoopo atu i le lisi a Peresitene Oaks?
-
I le 2 Nifae 25:23, ua tatou aoao ai e faapea “e faaolaina i tatou i le alofa tunoa, pe a uma mea uma e mafai ona tatou faia.” I le matalalaga lenei, o le “faaolaina” o lona uiga o le faamamaina mai agasala ina ia mafai ai ona tatou toe nonofo i le afioaga o le Atua. E mafai ona e iloiloina le soavaega “O Mea Uma e Mafai ona Tatou Faia” i le savali a Peresitene Dieter F. Uchtdorf “O Le Meaalofa o le Alofatunoa.” O le a le uiga o le “pe a uma mea uma e mafai ona tatou faia” i lou olaga? O le a le sootaga i le va o “mea uma e mafai ona tatou faia” ma le misiona a Iesu Keriso?
Gaoioiga mo le aoao faatasi ma isi
-
E finagalo le Tama Faalelagi ia tatou faasoa atu a tatou molimau ia Iesu Keriso ma le folafolaga o le faaolataga. Faitau le Mataupu Faavae ma Feagaiga 18:10–17, lea o loo faamatala mai ai nisi o mafuaaga mo le aapa atu i isi ma le savali o le talalelei a Iesu Keriso. O a nisi o mafuaaga ua tuuina mai i lenei fuaitau mo le mafuaaga ua valaaulia ai i tatou e le Atua e auai faatasi ma Ia i le galuega o le fesoasoani atu i isi ia maua faamanuiaga o le faaolataga? O anafea na e maua ai pe o anafea foi na maua ai e se tasi e te iloa le olioli o le fesoasoani atu i se isi tagata ia maua le talalelei ma osia feagaiga ma le Atua?
Aoao atili
-
James E. Faust, “O Le Togiola: O Lo Tatou Faamoemoega Sili,” Ensign, Nov. 2002, 18–20
-
“The Savior Understands Me” (vitio), ChurchofJesusChrist.org
Vaega 3
O Loo Faaauau Pea le Galuega o le Faaolataga i le Lalolagi o Agaga
Ua aoao mai tusitusiga paia e faapea o le togiolaina mai le oti, po o le toetu, o se meaalofa aoao i tagata uma o e na ola, e tusa lava po o a a latou filifiliga (tagai Galuega 24:15). Peitai, o le faaolataga mai aafiaga o le agasala e manaomia ai le faatuatua ia Iesu Keriso ma le salamo. Ua tatou iloa foi mai tusitusiga paia e tatau ona papatisoina i tatou ina ia faaolaina ai i le malo o le Atua (tagai Ioane 3:5).
Peitai, o le toatele o fanau a le Atua ua maliliu e aunoa ma le papatisoina po o le faalogo foi e uiga ia Iesu Keriso. E mafai faapefea e nei tagata ona maua le faaolataga? Ua aoao mai tusitusiga paia na asiasi atu Iesu Keriso i le lalolagi o agaga ina ua mavae Lona maliu (tagai 1 Peteru 3:18–20). Sa ia faatulagaina taumafaiga e talai atu le talalelei iina, ma saunia se auala mo tagata uma ia maua ai se avanoa e aoao ai le talalelei. O sui auai O Le Ekalesia a Iesu Keriso o le Au Paia o Aso e Gata Ai e faia papatisoga sui ma isi sauniga mo e ua maliliu i malumalu, e tuuina atu ai le avanoa o le faaolataga e ala ia Keriso i agaga o e ua maliliu (tagai Mataupu Faavae ma Feagaiga 128:5, 18).
Mea e mafaufau i ai
-
O faaaliga taua e faatatau i le togiolaina o e ua maliliu o loo tusia i le Mataupu Faavae ma Feagaiga. Mo se faataitaiga, faitau le Mataupu Faavae ma Feagaiga 138:11–32. O le a se mea o aoao mai e lenei fuaitau ia te oe e uiga i le galuega a le Atua ina ia maua ai le faaolataga i le lalolagi o agaga?
-
Ua aoao mai i tatou e tusitusiga paia o fanau laiti e paia ma e faapaiaina e ala i le Togiola a Iesu Keriso ma e le manaomia ona papatisoina ina ia maua ai le faaolataga. Faitau le Moronae 8:8–25; Mataupu Faavae ma Feagaiga 74:7; 137:10. O a mea ua e aoaoina mai nei fuaiupu e uiga i le natura o le Atua? E mafai faapefea e lenei aoaoga faavae ona fesoasoani i tagata taitoatasi ma aiga o loo tauivi ma le maliu o se tamaitiiti?
Gaoioiga mo le aoao faatasi ma isi
-
I le Mataupu Faavae ma Feagaiga 128, na tusia ai e le Perofeta o Iosefa Samita e faapea, “O i tatou e aunoa ma i latou [o tatou tuaa] e le mafai ona faaatoatoaina; pe mafai foi ona faaatoatoaina i latou e aunoa ma i tatou” (fuaiupu 18). O le a sou manatu i le uiga o lenei mea? Valaaulia tagata o le vaega e faasoa mai o latou manatu. E mafai foi ona e valaaulia tagata o le vaega e aoao e uiga i se tuaa ua maliu pe, afai e mafai ona latou faia, ia faia se taimi faatulagaina i le maota o le Alii e faatino ai sauniga mo e ua maliliu.