Potutusi
Salamo

“Salamo,” Autu ma Fesili (2023)

Ata
teineitiiti o loo tilotilo atu i fafo o le faamalama

Taiala mo le Suesueina o le Talalelei

Salamo

Tuputupu ae ma faaleleia e ala i le alofa ma le alofa mutimutivale o Iesu Keriso

E alofa le Tama Faalelagi ia te i tatou. E sili atu nai lo se isi lava mea, e finagalo o Ia ia tatou toe foi atu ia te Ia. Ae o a tatou agasala ma le lē atoatoa e vavaeeseina ai i tatou mai le Atua. Latou te taofia i tatou mai le toe foi atu e nonofo i Lona afioaga ma mai le avea faapei o Ia. Ae ui i lea, o loo i ai le faamoemoe. Ona e alofa tele le Tama oi le Lagi ia i tatou, na Ia auina mai ai Lona Alo, o Iesu Keriso, e laveai i tatou. Na tauaveina ma le loto i ai e Keriso i Ona lava luga a tatou agasala ma lē atoatoa ina ia mafai ai ona faamagaloina i tatou, faaauau pea ona tuputupu ae, ma iu ai ina toe foi atu e mau faatasi ma lo tatou Tama oi le Lagi. E ta’ua lea meaalofa sili o le Togiola a Iesu Keriso. E amata ona tatou maua faamanuiaga o le Togiola a Keriso a o tatou faatinoina le faatuatua ia te Ia ma salamo ia tatou agasala.

O Le A Le Salamo?

O le salamo o se suiga o le mafaufau ma le loto—o se liliuese mai le agasala ma le toe foi atu i le Atua. E uunaia pe a tatou oo i le tiga faaleatua ona o le agasala (tagai 2 Korinito 7:9–11). A tatou salamo, tatou te ioeina ma le faamaoni o tatou sese ma a tatou agasala, tatou te faia mea e mafai ona tatou faia e faasa’o ai, tatou te taumafai e faia suiga uma e tatau ai tatou te mafaia, ma tatou te faalagolago ma le lotomaualalo i le mana o le Faaola e suia ai mea e le mafai ona tatou faia. O le salamo faamaoni e mafai ona tupu pe a tatou faatinoina le faatuatua ia Iesu Keriso ma Lona mafaia ona faamamaina i tatou.

Vaaiga aoao i autu: Salamo

O taiala fesootai mo le suesueina o le talalelei: Faatuatua ia Iesu Keriso, Togiola a Iesu Keriso, Faamanatuga, Usiusitai

Vaega 1

Faamamaina e ala i le Salamo: “E Faapefea Ona Faia?”

Ata
tamaloa o loo tatalo

I le Tusi a Mamona, sa faamatala ai e le perofeta o Enosa le “fagatuaga sa [ia] i ai i luma o le Atua” a o ia sailia le faamagaloga o ana agasala. Ina ua iu ina “tafi ese lona tausalaina,” sa ia fesili atu ai i se mea atonu na e manatunatu i ai: “Le Alii e, ua faapefea ona faia?” Faitau e uiga i lona aafiaga i le Enosa 1:1–8. Na faapefea ona suia Enosa? O le a se mea ua e aoaoina mai le ala na ia faamatalaina ai lona salamo?

Ioe, na o le pau le ala e malamalama atoatoa ai i le salamo o le lagonaina lea. A o e salamo ma lagonaina le filemu ma le olioli o le faamagaloga, mafaufau e tusitusi e uiga i lou aafiaga. Atonu foi e te lagona le musuia e faasoa atu i se tagata o le aiga po o se uo.

Mea e mafaufau i ai

  • E faapefea ona tatou maua le mana faamama o le Faaola i o tatou olaga? E mafai ona e maua tali i lenei fesili i le savali a Peresitene Dallin H. Oaks “Faamamaina e ala i le Salamo.”1 Mafaufau i aoaoga o loo maua i le vaega muamua, ua faaautuina faapitoa lava i le “Salamo”. Mafaufau loloto i mea e finagalo le Alii e te faia e maua ai le faamagaloga o au agasala.

    • Suesue i mea na fetalai mai ai le Faaola e uiga i Lana taulaga togiola mo i tatou i le 3 Nifae 9:13–14 ma le Mataupu Faavae ma Feagaiga 19:16–19. O a savali a le Alii e ono i ai mo oe, ae maise lava, i Ana upu?

    • Matau upu ma fasifuaitau o loo faamatala ai le faamagaloga i le Ieremia 33:6–9; Alema 5:21. O a ni mea o fautua mai e nei upu ma fasifuaitau ia te oe e uiga i le salamo ma le faamagaloga o agasala?

Gaoioiga mo le aoao faatasi ma isi

  • Sa saunoa le perofeta o Isaia e uiga i le mulumuluina ma le faamamaina ina ua ia aoao mai e uiga i le salamo. Mafaufau e faitau faatasi o se aiga le Isaia 1:16–18 a o faamamaina faatasi se mea, e pei o lavalava po o ipu. O le a le mea ua mafai ai ona mama nei mea? O le a le mea ua mafai ai e i tatou ona mama faaleagaga—pe faamamaina mai a tatou agasala? (tagai 3 Nifae 27:19–20).

    E mafai foi ona e faatusatusaina lagona o le faamamaina faaletino i lagona o le faamagaloina o a tatou agasala.

Aoao atili

Vaega 2

O Le Salamo o Lona Uiga o le Suia—ma e mo Tagata Uma

Ata
tamaitai o loo tilotilo i fafo o se faamalama

Ua tuuina mai e tusitusiga paia le tele o faataitaiga o tagata o e sa foliga mai e le manaomia ona suia, ae o e, e ala i le mana o Iesu Keriso, na salamo ma avea ma tagata amiotonu. O le Aposetolo o Paulo, le toatele o sa Lamana, ma Alema le Itiiti na oo uma i se suiga maoae o le loto. Sa latou liliuese mai le agasala ma agai atu i le Faaola, ma faatagaina ai o Ia e suia o latou olaga. O nisi taimi e foliga mai ua faafuasei ona tupu lenei suiga; o le tele lava o taimi o se suiga faifai malie. Po o le a lava le ala, o se vavega le ofo mai e Iesu Keriso ia i latou uma o e salamo. O se vavega tatou te manaomia uma, “aua ua agasala tagata uma lava, ma ua le oo i le viiga mai le Atua” (Roma 3:23).

Mea e mafaufau i ai

Gaoioiga mo le aoao faatasi ma isi

  • Ua tumu le lalolagi i faataitaiga o suiga faagaeetia—o se fatu laititi e avea ma se laau tele, o se ketapila lea e avea ma se pepe lele, o se fuamoa e avea ma se aeto. E mafai e oe po o lou aiga ona suesue nisi o nei faataitaiga ma faitau le 2 Korinito 5:17. O lenei mea e mafai ona taitai atu ai i se talanoaga e uiga i le suiga lea e mafai e ala ia Iesu Keriso.

  • Atonu e fiafia tamaiti laiti e aoao e uiga i le salamo mai Tala o le Tusi a Mamona, e pei o faataitaiga i le “Mataupu18: Ua Salamo Alema le Itiiti”3 ma le “Mataupu 26: O Le Nuu o Amona.”4 Na faapefea ona fesoasoani le Faaola i nei tagata ia suia?

  • E mafai foi ona e faia se lisi o nisi o uiga auaumama o le Tama Faalelagi ma Iesu Keriso (o le viiga “Faapaia Mai A’u”5 o loo ta’ua ai nisi). O a ni auala e mafai ai ona tatou suia ia avea atili e faapei o i Laua? E faapefea ona La fesoasoani mai ia i tatou ia faia o lea?

Aoao atili

Vaega 3

E Olioli le Salamo

Ata
o se alii talavou o loo ataata

Ona o suiga e mafai ona faigata, o nisi taimi atonu tatou te lagona ai le fefefe i le salamo. Atonu tatou te manatu o se mea e leaga pe faanoanoa pe faigata tele. Ae o le fuafuaga a le Tama Faalelagi o se fuafuaga o le fiafia. E ala i le salamo, e mafai ai ona tatou agalelei atili, agaalofa, onosai, lotomaualalo, ma olioli.

O le agasala e aumaia ai le faanoanoa—o le salamo o le ala lea tatou te sao ai mai lena faanoanoaga.

Mea e mafaufau i ai

Gaoioiga mo le aoao faatasi ma isi

  • E mafai ona e matamata i se tasi po o vitio uma nei e lua faatasi ma isi e aoao atili ai e uiga i le olioli o le salamo: “The Shiny Bicycle” (3:04) ma le “O Le Sini: O Se Tala o le Faatuatua, Faauoga,ma le Faamagaloga” (7:27). A o e matamata i vitio, vaavaai mo (1) mea na faanoanoa ai le tagata i le vitio ma (2) mea na fiafia ai le tagata. E mafai foi ona e vaavaai mo nei mea i faataoto i le Luka 15.

  • Pe e mafai foi ona e talanoa e uiga i se taimi na toe malosi mai ai se tasi mai se ma’i po o se manu’a ma faatusatusa lena aafiaga i le salamo. Faitau le 3 Nifae 9:13–14, ma talanoa e uiga i le olioli tatou te lagonaina pe a faamaloloina i tatou faaleagaga e le Faaola pe a tatou salamo. Mata o le a se tala tatou te fai atu e fesoasoani ai i se tasi o lagona le fefe e salamo?

Aoao atili