Tatalo

Ua sauni i taimi uma lo tatou Tama Faalelagi e faafofoga ma tali mai i a tatou tatalo. O le mamana o a tatou tatalo e faalagolago lea ia i tatou. A o tatou taumafai ia avea le tatalo ma se vaega o o tatou olaga, e tatau ona tatou manatua le fautuaga lenei.

Ia anoa a tatou tatalo. Na lapatai mai le perofeta o Mamona, afai e tatalo atu o ia ae ua le i ai ma le faamaoni o le loto … ma ua leai se aoga ia te ia, ona e le talia e le Atua se ua faapena” (Moronae 7:9). Ina ia anoa a tatou tatalo, e ao ona tatou tatalo atu ma le faamaoni ma le “malosi atoa o le loto” (Moronae 7:48). E ao ona tatou faaeteete ia taumamao mai le “tautu i upu” pe a tatou tatalo (tagai i le Mataio 6:7).

Faaaoga le gagana e faaalia ai le alofa, faaaloalo, migao, ma le vavalalata. O le a eseese le faaaogaina o lenei mataupu faavae i gagana eseese. Mo se faataitaiga, afai tatou te tatalo i le Igilisi, e tatau ona tatou faaaogaina ia suinauna o tusitusiga paia pe a tatou ta’ua le Atua—Lau Afio, nai lo o le suinauna masani o le oe. Po o le a lava le gagana, e tumau lava le mataupu faavae: A tatou tatalo, e tatau ona tatou faaaogaina upu e talafeagai ona faailoa atu ai se agaga o le tapuai atu i le Atua.

Ia le aunoa ona avatu le faafetai i le Tama Faalelagi. E tatau ona tatou “ola i le faafetai i aso uma, mo le alofa mutimutivale ma faamanuiaga e tele ua ia to mai i o [tatou] luga” (Alema 34:38). Pe a tatou faaalu le taimi e manatua ai o tatou faamanuiaga, o le a tatou iloa ai le tele o mea ua faia e lo tatou Tama Faalelagi mo i tatou. E tatau ona faaali atu lo tatou faafetai ia te Ia

Ia saili le taitaiga ma le malosi o le Tama Faalelagi i mea uma tatou te faia. Na fautuaina e Alema lona atalii o Helamana: “Tagi atu i le Atua mo lou tausiga atoa; ioe, tuu atu i le Alii au mea uma e fai, ma soo se mea e te alu i ai ia tuu atu i le Alii; ioe, ia tuu atu ou manatu uma i le Alii; ioe, ia tuu atu alofaaga o lou loto i le Alii e faavavau. Filifili faatasi ma le Alii i au mea uma e fai, ma o le a ia taitai oe mo le lelei; ioe, pe a e taoto i lalo i le po, taoto i lalo i le Alii, ina ia mafai ona leoleo mai o ia i ou luga aʼo e moe; ma a e ala mai i le taeao, ia tuu lou loto ia tumu i le faafetai i le Atua; ma afai e te faia nei mea, o le a sii ae oe i luga i le aso gataaga” (Alema 37:36–37; tagai foi i le Alema 34:17–26).

Ia manatua manaoga o isi a o tatou tatalo. E tatau ona tatou tuuina atu ni tatalo “mo lo [tatou] manuia, ma le manuia foi o i latou o e ua siomia ai [tatou]” (Alema 34:27). E tatau ona tatou ole atu i le Tama Faalelagi e faamanuia ma faamafanafana i latou e le tagolima.

Saili le taitaiga a le Agaga Paia ina ia tatou iloa mea e faaaofia i a tatou tatalo. E mafai e le Agaga Paia ona aoao i tatou e tatalo ma taiala i tatou i mea tatou e fai atu ai (tagai i le Roma 8:26; 2 Nifae 32:8; 3 Nifae 19:9, 24). E mafai ona fesoasoani o Ia ia tatou tatalo “e tusa ai ma le finagalo o le Atua” (Mataupu Faavae ma Feagaiga 46:30).

A tatou faia se talosaga e tauala atu i le tatalo, e ao ona tatou faia mea uma tatou te mafaia e fesoasoani ai i lona tuuina mai. O loo faamoemoe mai le Tama Faalelagi ia tele atu ni mea tatou te faia nai lo na o le ole atu ia te Ia mo faamanuiaga. A i ai se faaiuga taua e tatau ona tatou faia, e masani o le a Ia finagalo ia tatou “suesue i ai i [o tatou] mafaufau” ao lei Ia tuuina mai ia i tatou se tali (tagai i le Mataupu Faavae ma Feagaiga 9:7–8). O le a tutusa lava le aoga o a tatou tatalo mo se taitaiga ma a tatou taumafaiga ia mataala i musumusuga a le Agaga Paia. O le a fai fua a tatou tatalo mo lo tatou lava manuia ma mo le manuia o isi pe afai tatou te “liliu ese e ua le tagolima, ma e ua le lavalava, ma le asiasi atu i e ua mamai ma puapuagatia, ma le faasoa atu a outou mea, pe afai ua i ai ia te outou ni mea e faasoa atu ia i latou o e ua tutu le tagolima” (Alema 34:28).

Afai o i ai se galuega faigata i o tatou luma, e fiafia le Tama Faalelagi pe a tatou o ifo i o tatou tulivae ma ole atu mo se fesoasoani ona tatou tutu aʼe lea ma o atu e galulue. O le a fesoasoani mai o Ia i a tatou taumafaiga amiotonu uma, ae e seāseā ona Ia faia se mea mo i tatou lea e mafai ona tatou faia mo i tatou lava.

I Lana Lauga i luga o le Mauga, na fautua mai ai Iesu Keriso: “Ina ulu atu ia i lou afeafe, ma pupuni lona puipui, i le e tatalo ai i lou Tama o i le mea lilo; o lou Tama foi o lē silasila i le mea lilo, na te avatu faaaliali se taui ia te oe” (Mataio 6:6). O le tatalo faalilo a le tagata lava ia, o se vaega taua o lo tatou atinaega faaleagaga.

A le itiiti ifo o taeao ma afiafi uma, e tatau ona tatou sailia se nofoaga e saoloto mai mea faalavefau ma tootuli ai i le lotomaulalo ma talanoa atu i lo tatou Tama Faalelagi. E ui ina e i ai taimi e manaomia ai ona tatou tatalo le leoa, ae e tatau ona tatou faia se taumafaiga faaopoopo i nisi o taimi e tatalo ai ma le leo (tagai i le Mataupu Faavae ma Feagaiga 19:28; 20:51).

O le tatalo o se fesootaiga e ala lua. A o tatou faaiuina a tatou tatalo, e tatau ona tatou faaalu se taimi e taofi ma faalogo ai. E i ai taimi, o le a fautua, taiala, pe faamafanafana ai i tatou e le Tama Faalelagi a o tatou i ai i o tatou tulivae.

E le tatau ona tatou gase atu i le manatu e faapea, tatou te le agavaa e tatalo. E sau lenei manatu mai ia Satani, o lē e manao e faatalitonu i tatou e le tatau ona tatou tatalo (tagai i le 2 Nifae 32:8). Afai tatou te le fia tatalo, ona tatau lea ona tatou tatalo seia oo ina tatou lagona le fia tatalo.

Ua poloai mai le Faaola, “Tatalo e lē aunoa, ina ia mafai ona e sau ai o lē ua manumalo; ioe, ina ia mafai ona e manumalo ia Satani, ma ina ia e sao ese mai lima o auauna a Satani ua sapasapaia lana galuega” (Mataupu Faavae ma Feagaiga 10:5). E ui e le mafai ona faaauau pea ona tatou tootutuli, o le faia e le aunoa o se tatalo patino ma faalilo, e mafai ai e o tatou loto ona “faatumuina, ia alu atu pea [i le Atua] i le tatalo e le aunoa” (Alema 34:27; tagai foi i le 3 Nifae 20:1). I le aluga o aso taitasi, e mafai ona tatou tausisia se lagona tumau o le alofa mo lo tatou Tama Faalelagi ma Lona Alo Pele. E mafai ona tatou faailoa filemu atu le agaga faafetai i lo tatou Tama ma ole atu ia te Ia e faamalosia i tatou i o tatou tiutetauave. I taimi o tofotofoga po o le lamatiaina faaletino, e mafai ona tatou ole filemu atu mo Lana fesoasoani.

E faaopoopo i le poloaiina o i tatou e tatalo faalilo, ua apoapoai mai le Faaola ia tatou tatalo ma o tatou aiga. Sa fetalai o Ia, “Ia tatalo atu e le aunoa i le Tama, i o outou aiga, i lou igoa, ina ia faamanuiaina a outou avā ma a outou fanau” (3 Nifae 18:21).

E tatau ona tatou faia tatalo faaleaiga o se vaega faifaipea o le olaga o le tatou aiga. O taeao ma afiafi uma, e tatau ona tatou tootutuli faatasi i le lotomaulalo, tuu atu i tagata taitoatasi o le aiga ni avanoa fai soo e faia ai le tatalo ma aufaatasi ai i le loto faafetai mo faamanuiaga ua tuuina mai e le Tama Faalelagi ia i tatou. E tatau foi ona tatou lototasi i le faatuatua e talosaga ai mo faamanuiaga tatou te manaomia ma ia tatalo mo isi.

E ala i tatalo faaleaiga fai soo, o le a latalata atili atu ai tagata o le tatou aiga i le Atua ma i le tasi ma le isi. O le a iloa e a tatou fanau ona talanoa ma lo latou Tama oi le Lagi. O le a tatou saunia lelei ai e auauna atu i isi ma tetee atu i faaosoosoga. O le a avea o tatou aiga o ni nofoaga o le malosi faaleagaga, o se sulufaiga mai faatosinaga leaga o le lalolagi.

E i ai taimi e mafai ona talosagaina ai i tatou e faia se tatalo i luma o tagata, atonu i se sauniga a le Ekalesia po o se vasega. A tatou maua lenei avanoa, e tatau ona tatou manatua o loo tatou talanoa ma le Tama Faalelagi, ae lē o tuuina atu se lauga i luma o tagata. E le tatau ona tatou popole po o a ni manatu o isi i mea tatou te ta’ua. Ae, e tatau ona tatou faia se tatalo faigofie, ma e mai le loto.

Na aoao mai le Faaola, “Ia outou ole atu, ona foaiina mai ai lea ia te outou; ia outou saili, ona outou maua ai lea; ia outou tu’itu’i atu, ona toina ai lea ia te outou: aua ai se ole atu; e maua e ia; o lē saili foi, e iloa e ia; e toina foi i lē tu’itu’i atu” (Mataio 7:7–8). Sa fetalai atu o Ia ia sa Nifae, “O soo se mea tou te ole atu ai i le Tamā i lou igoa, e sao, ma talitonu o le a outou maua, faauta, o le a tuuina mai lava ia te outou” (3 Nifae 18:20).

E faafofoga mai le Tama Faalelagi i a tatou tatalo. Atonu e le o taimi uma e tali mai ai o Ia e pei ona tatou faamoemoe ai, ae e tali mai o Ia—i Lana lava taimi, ma tusa ai ma Lona finagalo. Ona ua Ia silafia le mea e sili ona lelei mo i tatou, e ono tali mai ai o Ia i nisi taimi i le leai, e tusa lava pe faamaoni a tatou auganiga.

E tele auala e oo mai ai tali i tatalo. E masani ona oo mai e ala i le leo filemu, ma itiiti o le Agaga Paia (tagai i le “Faaaliga”). Atonu e oo mai i tulaga o o tatou olaga pe e ala mai i galuega agalelei a i latou e siomia i tatou. A faaauau ona tatou faalatalata atu i lo tatou Tama Faalelagi e ala i le tatalo, o le a tatou iloa lelei ai Ana tali alofa ma le poto i a tatou auganiga. O le a tatou iloa ai o Ia o lo tatou “malu ma lo tatou malosi, e fai o ia ma fesoasoani silisili i puapuaga” (Salamo 46:1).

• Faatuatua ia Iesu Keriso

• Anapogi ma Taulaga Anapogi

• Tapuai

• Kenese 24:26

• 2 Nofoaiga Tupu 7:14

• Mataio 6:5–15

• Mataio 7:7

• Luka 21:36

• Iakopo 1:5–6

• Roma 10:13

• 2 Nifae 4:35

• Helamana 10:5

• 3 Nifae 18:20

• Eteru 2:14

• Mataupu Faavae ma Feagaiga 112:10

• Topical Guide, “God, Access to,” “Prayer, Pray”

• Bible Dictionary, “Prayer”

• Taiala i Tusitusiga Paia, “Ole Atu,” “Tatalo”

Ata

Faailoga o le Aufaipese a le Tapeneko

O Vitio o le Aufaipese a le Tapeneko

“O Le Tatalo a se Tamaitiiti”

“Pe na Faia Sau Tatalo?”

“Ua Naunau ia te Oe”

“Oh, May My Soul Commune with Thee”

“Le Itula o Talosaga”

Cesar H. Bonito Duarte, “O Le Vavega i le Minute Mulimuli,” Liahona, Mati 2017

Jessica Larsen, “Tagata Poto i Faatele,” Liahona, Fepuari 2017

“Iakopo 1:5–6,” Liahona, Ianuari 2017

Carlisa Cramer, “O Folafolaga e Lima o le Tatalo,” Liahona, Ianuari 2017

Margaret Willden, “O Fesili e Lima e Fesili ai Pe a Lagona Le Le Taliina o Tatalo,” Liahona, Ianuari 2017

“I Didn’t Feel Worthy to Pray,” New Era, Ianuari 2017

Evelyn E., “Goats on the Run,” Friend, Ianuari 2017

Corwin B., “The Aquanaut Badge,” Friend, Ianuari 2017

Holly Carter, “Henry and the Corn Maze,” Friend, Novema 2016

Jill Hacking, “Brave Enough?” Friend, Oketopa 2016

Marcos A. Walker, “O Le Mana Toefuatai o le Tatalo,” Liahona, Ianuari 2011

“Aisea e tatau ai ona ou tatalo na o a’u lava ae ua uma ona matou tatalo ma lo’u aiga?” Liahona, Ianuari 2011

Janet Thomas, “Amata i le Tatalo,” Liahona, Oketopa 2009

Virgínia Augusta de Pádua Lima Pereira, “O Le Tatalo a La’u Fanau,” Liahona, Iuni 2008

Daniel Openshaw, “Faatasia i le Tatalo,” Liahona, Aokuso 2007

R. Val Johnson, “E Iloa e Ricardo,” Liahona, Setema 2006

Marged A. Kirkpatrick, “Ou Te Le’i Fia Oti,” Liahona, Aokuso 2004

Francisco Javier Loaiza Vergara, “Prayer Helps,” Liahona, Setema 2001

“Prayer,” Fesoasoani i Lesona mo le Aoaoina o Tamaiti

Jenny Poffenbarger, “The Loose-Tooth Test,” Friend, October 2016

Arie Van De Graaff, “Funstuff: Picture Puzzle,” Friend, October 2016