Te Upootiaraa i ni‘a i te Faahemaraa

Te mau tumu raau e nehenehe e ti‘a i ropu i te matai rorofai e pinepine ïa ratou i te marua i mua i te mau manumanu vavahi o ta tatou e ore roa e ite mata maori ra e te hoê hi‘o faarahi. Mai te reira atoa te mau enemi o te taata nei i teie nei mahana o te mau mana aravihi tei ite-ore-hia i te tahi mau taime e te mata, o te haaparari nei i te ti‘araa taata e te ti‘araa vahine o teie nei tau. Te tamataraa i te pae hope‘a o te haapa‘o-maitai-raa e te parauti‘a o te nunaa a te Atua e tamataraa ïa no te taata tata‘itahi. Eaha ta te taata e rave nei ?

E tae mai te mau faahemaraa atoa ia tatou e ia‘u nei i raro a‘e i na huru e toru :

1. Te faahemaraa no te hiaai maa e aore ra, te hinaaro rahi ;

2. Te toparaa i roto i te te‘ote‘o, te faito ahu, e aore ra, te ahaaha ;

3. Te hoê hinaaro no te mau tao‘a o te ao nei e aore ra, te mana e te faatereraa i ni‘a i te mau fenua e aore ra, te mau tao‘a o te fenua a te taata.

E tae mai taua mau huru faahemaraa ra i roto i ta tatou mau rururaa sotiare ; e tae mai te reira i ni‘a ia tatou i roto i ta tatou mau tautooraa politita ; e tae mai te reira i ni‘a ia tatou nei i roto i ta tatou mau auraa ohipa, i roto i te faaapu, i roto i te fare toa ; i roto i ta tatou mau raveraa i roto i te mau ohipa atoa o te oraraa nei, e ite tatou i teie nei mau faahemaraa ino ia tupu. Ia faaite ana‘e mai ratou ia ratou iho i te mana‘o haava o te taata tata‘itahi i reira te parururaa i te parau mau e faaohipa ai i to’na mana.

Te haapii nei te Ekalesia e e tau tamataraa teie nei oraraa i ô nei. E hopoi‘a na te taata ia riro mai ei raatira, eiaha râ ei titi no te natura. Ia haavîhia e ia faaohipahia to’na mau hiaai no te maitai o to’na iho ‘ea e te faaroaraa i te maororaa o to’na oraraa e tia’i—ia haavîhia e ia hi‘opo‘ahia to’na mau hinaaro rahi no te oaoa e te haamaitairaa o vetahi ê ra…

Mai te mea e, ua ora mau oia mai te au i te mau arata‘iraa a te Varua Mo‘a, e e tamau noa â outou ia na reira, e î ïa to outou nei varua i te oaoa. Mai te mea râ ua fariu ê atu outou e ua ite outou e, aita i noaa ia outou ia rave mai ta outou i ite i te mea ti‘a, e ore roa ïa outou e oaoa noa’tu [mai te mea] e faufaa ta outou no te ao nei…

I roto i ta ratou hiaairaa no te hoê taime arearearaa, e mea pinepine te feia apî i te faahemahia no te faati‘a i to ratou hinaaro i te mau mea e faaanaanatae noa i te tuhaa tino o te taata, e pae atoa ra mau mea matau-maitai-hia : a tahi, te parau ino e te ohipa faufau ; te piti, te inuraa ava e te mirimiriraa ; te toru, o te viivii ; te maha, te here ore ; e te pae, te faatura ore.

Ua riro te parau ino i te taahiraa pinepine matamua i ni‘a i te purumu no te faati‘a noa i to’na iho hinaaro. Te parau ino o te faaturoriroriraa ïa i te mea maitai e aore ra, te mau mana‘o maitai.

Hoê noa iho taahiraa mai te parau ino e tae atu i te ohipa faufau. E mea ti‘a roa, oia mau e mea titau-roa-hia, no te oaoa o te feia apî, ia farerei ratou i roto i te mau faaoaoaraa e te mau hoa, area râ, e hoê tera faaiteiteraa no te mau peu haehaa ia ani ana‘e ratou no te faaoaoaraa i te mea e faatupu i te hiaai e e haaviivii i te tino. E faatupu te mau inuinuraa e te mau mirimiriraa i te hoê huru i reira te auraa morare e manunu ai, e te mau hinaaro rahi tei ore i haavîhia e ore ai e nehenehe ia tape‘a. E mea ohie ïa i reira ia rave i te taahiraa hope‘a e tae atu ai i raro i te ati morare.

Ia maitihia ana‘e te hoê oraraa faati‘a noa i te hinaaro eiha râ te mau ture morare teitei, e haere tia’tu ïa te tane e aore ra, te vahine i raro i te faito hope‘a o te ino, e riro ïa te parau-ti‘a ore ei tuhaa aore e ti‘a ia ape no to’na ra natura. E tinaihia te here i te mau metua ; e faaru‘ehia te haapa‘oraa i ta ratou mau haapiiraa e i ta ratou mau fâ ; e riro te here i te vahine faaipoipo e te mau tamarii i te faarirohia ei hamaharaa i te hinaaro o te taata ; eita e ti‘a te here i te Ekalesia, e e mea pinepine te reira i te monohia e te feia vahavaha i ta’na mau haapiiraa.³

E mea pinepine te faahemaraa i te tae mai na roto i te hoê huru hau noa. Eita paha te toparaa i roto i te faahemaraa e itehia e te tahi atu taata maori râ o te taata iho e to’na ra Atua, tera râ, mai te mea e hema atu oia, e riro ïa oia i te mea paruparu e ua repohia oia e te ino o te ao nei.⁴

Ua tiavaruhia Satani no te mea ua tamata oia i te mono atu i Tei Hamani. Area râ te ite-noa-hia ra to’na puai. E mea itoito oia e te poro ra oia i teie nei taime i te parau no te pato‘iraa i te vaimau-raa o te Atua, te vai-mau-raa o ta’na Tamaiti Herehia, e te pato‘iraa i te maitai o te evanelia a Iesu Mesia.⁵

E mea itoito te enemi. E mea aravihi e e mea maramarama oia, e te imi nei oia i te mau rave‘a atoa ia haaparari i te niu o te Ekalesia, e e tairi oia i te vahi e noaa ia’na i te haaparuparu e i te haamou… Ua horo‘a mai te Atua i te ti‘amâraa no te maiti. To tatou manauiaraa i te pae morare e i te pae varua, tei te huru ïa o ta tatou faaohiparaa i taua ti‘amâraa ra.⁶

Ua opua papû noa â Satani i te rave i ta’na raveraa, e ua horo‘ahia’tu te mana i ta’na mau ve‘a i teie nei mahana tei ore i horo‘ahia i te mau tenetere atoa na mua’tu. Ia vai ineine noa no te farerei atu i te mau ohipa huru fifi, te mau mana‘o taata huru maitai anei e mea ino râ. No te aro atu i teie nei mau mana, e ti‘a ia tatou ia turu’i i ni‘a i te parau riirii o te Varua Mo‘a, o te ti‘a ia outou ia farii. E mea mau te reira mau parau riirii.

Te arata‘i nei te Atua i teie nei Ekalesia. A vai parau-ti‘a noa i te reira, a here i te Ekalesia. A vai parau-ti‘a noa i to outou mau utuafare, a here ia ratou. A paruru i ta outou mau tamarii. A arata‘i ia ratou, eiaha na roto i te faaheporaa, na roto râ i te hi‘oraa mărû o te hoê metua tane, e a horo‘a i te tautururaa no te puai o te Ekalesia na roto i te faaohiparaa i to outou autahu‘araa i roto i to outou iho utuafare e i roto i to outou nei mau oraraa.⁷

Te amo nei te meloraa i roto i te Ekalesia a Iesu Mesia i te Feia Mo‘a i te mau Mahana Hope‘a nei i te hopoi‘a no te upootiaraa i ni‘a i te faahemaraa, no te aro i te hape, no te haamaitai i te mana‘o, e te faarahiraa i to te taata varua e tae noa’tu ia tae‘ahia te faito o te îraa o te Mesia.⁸

Eita e nehenehe ia outou ia hauti e te Diabolo. A pato‘i i te faahemaraa, a pato‘i i te Diabolo e na’na e ma‘ue ê atu ia outou. [A hi‘o Iakobo 4:7]

I ni‘a i te Mou‘a, ua horo‘a te Faaora ia tatou i te hi‘oraa rahi roa‘e i te ao atoa nei… I muri noa‘e i te bapetizoraa o te Faaora, ua arata‘ihia oia i ni‘a i te mou‘a tei matauhia i teie nei e Mou‘a no te Faahemaraa. Aita vau i ite e, ua ti‘a anei oia i reira, ua haapae anei i te maa e maha ahuru mahana i reira e aore ra, aita. Ua haere atu râ oia i ni‘a i te tahi mou‘a e i muri a‘e… e maha ahuru mahana, ua haere maira Te Faahema ia’na, mai tei parauhia mai ia tatou, e mai ta Te Faahema e rave noa nei, ua tairi oia ia’na i te vahi ta te Faahema i mana‘o e, o to’na ïa vahi paruparu roa a‘e.

I muri a‘e i to [Iesu] haapaeraa, ua mana‘o te Faahema e, ua po‘ia roa oia, e te haamana‘o nei outou, teie ïa te faahemaraa matamua, na ô atura oia ma te reo tahitohito, Mai te mea e Tamaiti oe na te Atua, ma te faahiti i te iteraa o te Metua a parau ai oia e, « O ta‘u Tamaiti Here teie »—« Mai te mea e Tamaiti oe na te Atua, a parau i teie nei mau ofa‘i ia riro ei maa » E te vai nei te hoê ofa‘i i taua vahi ra mai te faraoa a te Ati Iuda te huru, no te faatiani puai i te faahemaraa. Teie te pahonoraa a te Mesia : « E ore te taata e ora i te maa ana‘e ra, i te mau mea atoa râ i haapa‘ohia e te Atua » (Mataio 4:3-4).

Ua faahiti atoa to muri iho faahemaraa i te papa‘iraa mo‘a. E piiraa i te te‘ote‘o, te hoê piiraa ia haavî i to tatou mau taata tupu : « Mai te mea e Tamaiti oe na te Atua, e haamairi oe ia oe iho i raro… » (Mai ni‘a iho i te poretiko o te hiero) « … ua papa‘ihia… » (E nehenehe ta te Diabolo e faahiti i te papa‘iraa mo‘a no taua tumu ra) « … ua papa‘ihia ho‘i e, E poro‘i oia i ta’na mau melahi ia oe, na ratou ho‘i e mau ia oe i to ratou rima, o te tia’ia noa’tu to avae i te ofa‘i. » E te pahonaraa, « Eiaha oe e a‘a i to Atua ra ia Iehova » (Mataio 4:6-7).

Te toru o te haahemaraa no ni‘a ïa i te here i te tao‘a rahi e te mana. Ua afa‘i atura te Faahema ia Iesu i ni‘a i te hoê mou‘a teitei roa e ua faaite ihora ia’na te mau mea o te ao nei e te mana e vai ra i roto. Aita oia i tahitohito i roto i teie nei faahemaraa. Te taparu ra râ oia, no te mea ua haaparuparu te pato‘iraa a te Faaora i te mau mana o te Faahema. Ua faaiteite atu oia ia’na i te mau mea o te ao nei. « E horo‘atu vau i teie nei mau mea atoa ia oe na ia tipapa mai oe i raro e haamori mai ia‘u. » Ti‘a mai ra oia i roto i te hanahana o to’na atuaraa, ua parau atura Iesu : « E haere ê atu oe, e Satani ; ua oti ho‘i i te papa‘ihia, O to Atua o Iehova ta oe e haamori, e oia ana‘e ra ta oe e faaroo. » Haere ê atura te Faahema. [A hi‘o Mataio 4:8-11]…

Teie to outou aamu… E riro to outou vahi paruparu roa‘e te vahi e tamata ai te Diabolo i te faahema ia outou, e tamata oia ia riro outou ia’na, e mai te mea ua haaparuparu outou i te reira hou outou e opua’i i te tavini i te Fatu, e amui atu ïa oia i taua paruparu ra. A pato‘i atu ia’na e e noaa ia outou te puai. E faahema oia ia outou i te tahi atu vahi. A pato‘i atu ia’na e e paruparu atu â oia e e puai mai outou, e tae noa’tu e nehenehe ta outou e parau, noa’tu te huru o te vahi tei reira outou, « E haere ê atu oe, e Satani, ua papa‘ihia e, O te Fatu ra o te Atua ta oe e tahopu, e oia ana‘e ra ta oe e haamori » (Luka 4:8).⁹

I pihai iho i ta’na mau pĭpĭ na mua noa‘e i Gesemane, ua parau [Iesu], « Ua ore au ua parahi i teie nei ao ; e ti‘a râ ratou i teie nei ao… »

« Aore au i pure ia oe e ia hopoi ê atu oe ia ratou i teie nei ao, ia tiai mai râ oe ia ratou eiaha ei ino » (Ioane 17:11, 15).

Teie ta outou nei haapiiraa… Tei roto outou i te faahemaraa, area râ e nehenehe ia outou, mai te Mesia i ni‘a i te Mou‘a no te Faahemaraa, ia ti‘a i ni‘a’tu i teie nei faahemaraa.¹⁰

A vai ti‘amâ noa mai ai te Enemi o te parau mau no te faaohipa i te haavîraa i roto i teie nei ao, e farii tatou i te mau aroraa, e te rave‘a hoê roa no te paruru atu i taua mau aroraa ra o te haapa‘oraa ïa i te Evanelia.¹¹

Te horo‘a nei teie nei evanelia ia tatou i te hoê rave‘a no te ora i ni‘a‘e i teie nei ao tahito e ta’na mau faahemaraa, e na roto i te haavîraa e te tape‘araa ia’na iho, no te ora i roto i te varua, o tera ïa te oraraa i ô nei e a muri noa’tu.¹²

E ti‘a anei ia tatou ia ite hau atu i ta tatou i ite i mutaa ra e, te haavîraa i to’na iho mau hinaaro o te aau ïa no te haapa‘oraa kerisetiano e o te mau haapa‘oraa faaroo atoa. Ia au i to’na naturaraa, ua riro te taata ei taata haapa‘o noa ia’na iho e mea au na’na ia pee atu i to’na mau hiaai i tera ihoa taime. E titau te reira i te haapa‘oraa faaroo, e aore ra te tahi mea teitei atu ta te hoê taata e aore ra, te hoê sotaiete taata, no te upooti‘a i ni‘a i te mau hiaai o te taata tino nei… E haere mai te haavîraa ia’na iho na roto i te haapaeraa ia’na iho i te mau mea riirii. Ua parau te Mesia na roto i teie nei mau parau taa ê : « … o tei hinaaro ho‘i i te tape‘a i to’na ora, e ere ïa i te ora ; e o tei ti‘a ia’na i te tuu i to’na ora ia‘u nei, e roaa ïa ia’na te ora » (Mataio 16:25).

Ia vaiiho ana‘e outou ia outou iho i te hiti e ia tutava outou i te haamaitai ia vetahi ê, e no te tahi atu mea teitei a‘e e te maitai a‘e, te ti‘a ra ïa outou i te faito varua. Mai te mea, i te taime tatama‘iraa, i te taime no te faahemaraa ia ite i te hapa i o vetahi ê, e faaru‘e tatou i to tatou iho huru taata no te maitai o te Ekalesia i riro ho‘i tatou e melo, no te maitai o te oire, no te manuiaraa ihoa râ o te evanelia, e haamaitaihia tatou i te pae varua e riro mai ïa te oaoa ei utu‘a maitai no tatou…

Te taata o te hamaha i to’na mau hiaai, i te vahi huna e aore ra, na roto i te tahi atu rave‘a, e huru ïa to’na o te ore e tauturu ia’na ia faahemahia oia i te hamaha i to’na mau hinaaro rahi.¹⁴

O ta te hoê taata e mana‘o tamau noa ra, na te reira ïa e faaoti i te huru o ta’na mau ohipa i te mau taime maitai e te mau taime fifi. Na te huru o te hoê taata i mua i to’na mau hiaai e to’na mau hinaaro otui ia faaarahia ana‘e ratou e horo‘a i te faito o te huru o taua taata ra. E heheuhia mai i roto i teie mau huru te puai o te taata ia faatere e aore ra, ia rave i to’na faatîtîraa faahepohia.¹⁵

Te mau ohipa e au i te ture a te Atua e i te mau ture a te natura, e hopoi mai te reira i te oaoa, e te mau ohipa tei ore i au i te parau mau a te Atua, e hopoi mai ïa i te ati. E hopoi‘a na te taata eiaha no te mau ohipa ana‘e, no te mau parau e te mau mana‘o faufaa ore atoa râ. Ua parau te Faaora :

« … e haavahia te taata i te mau parau faufaa ore atoa ta ratou e parau ra ia tae i te mahana haavaraa » (Mataio 12:36).¹⁶

E titau te mau mea maitai i te tautooraa. Te mea e hinaaromau-hia e ti‘a ïa ia aufauhia te hoê tuhaa o to outou nei tino, to outou puai mana‘o, e to outou puai varua—« E ani, e horo‘ahia mai ta outou, e imi, e itea ïa ia outou ; e patoto atu, e iritihia mai te opani ia outou » (Mataio 7:7). E ti‘a râ ia outou ia imi, ia patoto. I te tahi pae, te tahopu nei te hara i ni‘a ia outou. Te haere nei oia i pihai iho ia outou, te faahema nei oia ia outou, te huti nei oia ia outou, te haavare nei oia ia outou. Aita outou e tutava i te reira… Mai te mau iri faatiani e turai ra ia outou ia inu e ia puhipuhi i te avaava. Mai te parau poro‘i e tae mai nei i roto i to outou mau utuafare na roto i te afata teata e te afata ratio… E i mi te ino ia outou, e ua titauhia te tautooraa e te puai no te aro atu ia’na. Area râ, e roaa te parau mau e te paari na roto ana‘e i te imiraa, te pure e te tautooraa.¹⁷

Ia haamana‘o noa tatou e, te oraraa, tei ta tatou ïa raveraa, e ua haamaramarama mai e ua haapapû mai te Faaora o te taata nei e, nahea e roaa’i te oaoa e te hau. Tei roto te reira i te evanelia a Iesu Mesia e te haapa‘oraa i te reira.¹⁸

Ia horo‘a mai te Atua i te reira ia tatou nei, a imi ai tatou i te faati‘araa o te Basileia o te Atua, e ia haapii tatou i ta tatou feia apî, e i te mau melo o te Ekalesia i te mau vahi atoa, ia pato‘i i te mau faahemaraa o te haaparuparu i te tino, o te haamou i te varua, e ia ti‘a tatou ma te tatarahapa mau mai te taime a tomo mai ai tatou i roto i te pape no te bapetizoraa ; ia faaapîhia tatou ia au i te auraa mau o te parau, ia fanau-faahou-hia tatou, ia oaoa to tatou mau varua i roto i te maramarama o te Varua Mo‘a, e ia haere noa tatou i mua ei melo mau no te Ekalesia a Iesu Mesia e tae noa’tu ua oti ta tatou misioni i ni‘a i te fenua nei.¹⁹