Medemdemk e Ngariou a Rengul

Chelsel a Beches el Renged, e kede metik er a merau el ngeasek el chad luleker er a Jesus el kmo, Ungil Mastang, ngera el ungil tekoi a bo kuruul, eng mo sebechek el nguu a diak a ulebengelel klengar?”² Me a Osobel a kot eng dilu er ngii el mo oltirakl a llach. E a ongerung e a Osobel a milsa lmuut el bebil er a kirel mo meruul el tekoi lultuil er a usbechellel me a teletael le bla er a chelsel.

“A Jesus a dilu er ngii el kmo, Alsekum eng soam el mo suobel, e bo moterau aikel ngarngii er kau, e mngai el mesterir a rengesool, e seikid e kau a mo nguu a ngkedel a babeluades: e mei e moltirakl er ngak.

“Eng di ngika el ngeasek el chad er a regnesii tiang, eng mirrael el mekngit a rengul: le ng kmal mle merau el betok a kloklel.”³

Ke momekesiu er tial teletelel ngika el merau el ngeasek el chad me sel kuk teletael dilubech el mo er a Amulek, el ngara chelsel a Babier er a Mormon. A Amulek a mle meses el chad e ungil besul el betok a rechedal me a resechelil.⁴ Ngii a smodii el kmo ng mle betok el taem el lemokedong eng di dimlak lorrenges, ng mle medengei a llechul a Dios eng di dimlak el soal loltirakl.⁵ A Amulek a mle ungil chad, eng di ng mle mechesang er a kloklel a beluulechad el di uai ngike el merau el ngeasek el chad er a chelsel a Beches el Renged.

Ng uaisei, el uaia ble lemedecherecher a rengul, e ng di Amulek a ulengesenges a tekingel a anghel, e ngiluu a profet Alma el mo er a blil, e milsa ikel lousbech. Tial odngelel a Alma a uaia lulkerengii a Amulek meng mlokedong el mo omerk er a ebangkelio. Seikid e a Amulek a mlomechei a “rokui el kloklel el rua kolt, me a silber, me a meringel chad el klalou … el kirel a tekingel a Dios, [e tirkel] ble le kausechelei el chad me a demal me a rechedal a mlo oketui er ngii.”⁶

Omomdasou e ngera sel smodii a klekakerous er a nger er ngike el merau el ngeasek el chad me a Amulek?

Chelsel sel tara kmal meringel el mekemad el ngara Babier er a Mormon, e a omeluches el babier a mlorngii er a delongelel a Moroni, el merredel er a resoldau er a reNehphites, me a Pahoran, el ngii, el ngii a ngarbab el chad ra kerkeriil e merredel er a beluu. Tirkal soldau er a Moroni el kmal ngara ringel me a diak el klebech el ngesou ra kabelment a uchul e a Moroni, a milluches el mora Pahoran, el uaia “lolbeakl er ngii”⁷ e melekoi a mekngit el kirel ngii me a rebebil er a remerredel el uaia lak a uldesuir, e mesaik, e mla choiteterir, e dirrek el mengit el chad.⁸

A Pahoran a mle sebechel mereched el ngmasech a rengul er a ikal tekingel me a ultelcheklel a Moroni, eng di ng dimlak. Ng kmal uleba chubechub el reng e ulenger ngii e silodii a odechelakl el kirel a kabelment el ngii el Moroni a dimlak lodengelii. E sola e a Pahoran a dula el kmo:

“Chelecha, e a kmal subedau, e Moroni, el kmo ng diak kngara deureng el kirel a ringel el kemiu a ngara chelsel, ng kmal, meringel er a renguk. …

“Chelsel a babilengem e ke melekoi a mekngit el kirek, eng di ng diak a belkul; le ngak a diak el kesib a renguk, ak bai chemat er a dechal a rengum.”⁹

Ng locha ngera uchul me a Pahoran a ulenger el uaisei el kirel a Moroni me a ultelcheklel?

Elolem el buil er a memong er a klou el ongdibel, e a President Russell M. Nelson a silodii a nger ngii el kirel ongtil a President Thomas S. Monson el kired el mo menguiu, melbedebek, e oltirakl a klemerang el ngara chelsel a Babier er a Mormon a kmo, ngerang melisiich, ngerang ngomtok, ngerang a lekedmokl, ngerang ngomeketakl, e ngera ngolecholt.Sel kusuub er a Babier er a Mormon el uaisei eng meskak a mui el llomes me a klemedengei! A kulengit me a dersta er kemiu bo longuiu er ngii.”¹⁰

A President Henry B. Eyring a dirrek el milketeklii a klou el belkul er ngii tial tekingel a President Monson. Ng millekoi:

“Ak mla menguiu er a Babier er a Mormon er a bek el sils el mla mo betok er a okeim el rak. Me ak ulemdasou el kmo aikel tekingel a President Monson a tekoi el kuk mora tara rechad. Eng di, ak di uaia rebetok er kemiu, ak mlo omelchesiu er a mesisiich el yaksok er a profet el kirel muut el mo blak a renguk. …

“A ungil tekoi el mla duubech le mei er ngak, el uai kemiu, a olchotel tial yaksok er a profet.”¹¹

Omomdasou e ngerang smodii sel teletelir tirkal teru el merredel er a Ikelesia er a Rubak el kongei e otireklii a tekingel a President Monson?

Ng diak du el kmo sel mesisiich el chedaol kengei er a Amulek, Pahoran, President Nelson me a President Eyring a kloadel er a di chimol blekerdelel a Kristo. Ng klemerang, el betok el kabekbuk el blekeradel me a teletael a rilterir tirkal teua el chetengakl el chad el mo mesisiich e ra chedaol tekoi. E ng di a Osobel me a reprofet er Ngii a mla meketeklii a klou a belkul el blekeradel el kid el rokui a kired el kmal mo ungil medengelii e melasm loltirakl er ngii er a klengar kid.

A kulengit me momtab er a teletelel a Rubak sel losaod er Ngii er a chelsel tiakid el bades er a chedaol llechukl: “Mnguu ongelungel er ngak el cholngii, e mosuub er ngak; le ngak a medemdemk e ngariou a renguk:: me ko mo metik er a ulengull.”¹²

Ng kired el suubii el kmo, a Osobel a ngileltii a tekoi el medemdemk er a chelsel a rokui el blekeradel me a kldung el Ngii a mle sebechel ngiltii a chimo er ngii.

A osisiu el teletael a bleketakl er sel ocholt lengilu a Profet Joseph Smith er sera 1829. A Rubak a dilu el kmo ng kired el mesuub er Ngii, e orrenges a Tekingel; e oba delemdemk el reng loltirakl er a Chedaol Reng er Ngii, e seikid e kede mo metik er a budech lokiu Ngii.¹³

A delemdemk el reng a meral olchotel a blekerdelel Osobel e mocholt lultuil er a llemalt lomeruul, me a blakelreng loltirakl er a soal a Rubak, me a mesisiich el ulserechakl el reng. Tial blekeradel a ngosukid el mo ungil e mui el medengelii a moktek er a blekerdelel a Amulek, Pahoran, President Nelson, me a President Eyring.

Okesiul tiang, e a President Nelson me a President Eyring a di mle mereched lotireklii a tekingel a President Monson el mlo menguiu e mesuub er a Babier er a Mormon. Ng uaisei el tirka el teru el chad a dulemes er tir el mesiou er a chelsel a Ikelesia e mla mesuub chedaol llechukl el meketeketa el taem, e ng di dimla lemocholt el kora sersuul er a rengrir a mo oltirakl a tekingel a profet.

A Amulek a tilbir el mo oltirakl a soal a Dios, e kilengei er a okedong el mo omerk er a ebangkelio, e mlo iikrii a ungil klengar ngii me a ungil deleuill er ngii me a rechad. Me a Pahoran a mlukngeltengat el mle melemalt e ulserechakl a rengul chad e dimlak el mereched lochotii a ngasechereng lokiu omesodel el mo er a Moroni el kirel a uldikel me a odechelakl er a kabelment.

A blekerdelel Osobel er a delemdemk el reng a blechoel diak el mui a klemedengei er a rechad el kirel er chelechal beluulechad. A delemdemk el reng a mesiiich, ng diak el mechitechut; mui el ngara omeruul; blak a rengul, diak el medakt; ulserechakl, ng diak loleiis omeruul; oba ngariou el reng, ng diak losiik a ngarbab el chetengakl, e chubechub, ng diak el mekngit a blekerdelel. A medemdemk el chad a diak el mereched el ngmasech a rengul, diak loruruul a blekerdelel, e mereched el mes a ungil omerellir me a loruul a rebebil.

Ng uaisei el klengariou el reng a blechoel lochotii a ultiled er a Dios me a usbechelled er a ulekrael me a ngesou er Ngii, eng di sel tokubets el blekeradel er a delemdemk el reng a kmal chedaol el kirel omesubel Chedaol Reng me a rechad el tir a locha diak el sal medengei, diak el sal meduch, diak a kmal skulir, e diak el ngara ikel meklou a belkul deruchall, malechub e te kora diak a kmal ngera el sebechir remuul. Ka momtab er a Naaman, el mengeteklel a klsoldau er a king er a Syria, el mlo mecherei kldidiul a rengul e uleba delemdemk el reng e kilengei a tekingel a mesiungel el mo otirakl a tekingel a Elisha el profet el mo tuchelbakl er a omeuachel er a Jordan el euid el taem.¹⁴ A delemdemk el reng a ngaruchei kaba er kid er a kldidai el reng el ngii a blechoel duubech er a chetengakl, deruchall, klisiich, iilteet, me a chetengakl er a rechad.

A delemdemk el reng a blekeradel el mokdubech lokiu a klemeriar el reng, melemalt el tekoi el dolilt el meruul, me a blechoel ouchel el reng er a klengit.¹⁵ Ng dirrek el chedaol sengk el kmal ungil a dosiik er ngii.¹⁶ Meng uaisei, el kired el blechoel, el mo melbedebek er a moktek er tial klengeltengat, el ngii a mo klungiaol e omesiou el mora rengelekel a Dios.¹⁷

Me sel doltriakl er a Osobel, e kede merael mo mesisiich e mekekokid el mo uai Ngii. Ked emo mui er a klisichel a reng e mo oba ulserechakl el reng e mesisiich e ungil omerelled. A leuaisiei, e a delemdemk el reng a mo teleteled kid el oltirakl er a Mastang ng diak di el teletael doruul er ngii.

A Moses a “ngilai a klubelel er a rokui el llemesir a rechad er a Egypt, e mle smiich a tekingel me a omerellel.”¹⁸ E ng di, ngii a “mle medemdemk a rengul, er a chelsir a rokui el chad el mlara beluulechad.”¹⁹ A klemedengei me a duch er ngii a mle sebechel rullii el mo kedidai a rengul. Eng di, a belekeradel me a chedaol sengk er a delemdemk el reng el ngii a mle ngeltengat er ngii a chiridii a kldidai el reng er a klengar ngii e rirelii a Moses el mo dongu er a chimal a Dios el mo kudmeklii a moktek er ngii.

Sel kot el meang e dmolech a belkul el okesiu er a delemdemk el reng a debetik er ngii er a klengar er a Osobel.

A Ngarbab el Osobel, el mlo riou er a rokui el tekoi”²⁰ e mlora ringel, mengerngars a rsechel, e mlad el mo”mengikiid er kid el rokui er a rokui el mekngit,”²¹ milkekokol el merisou a hokori locherir a remesiungel.²² Tial teletael er a delemdemk el reng a kmal chetengakl el teletelel a Rubak el mesiou e merredel.

A Jesus ochotii a ngarbab el okesiu er a llemalt me a blakelreng er sera le kengei el Ngii a mora ringel me a ongarm er a Gethsemane.

“Me a le bocha er tial basio, eng dula er a [Remesiungel], el kmo, Moluluuch me lak mrebet er a ongetikaik.

“E ngii a … a mlo outibaruach, e miluluuch,

“El kmo, Chedam, a di lungil er a rengum, e mnguu tial ringel er ngak: eng di ng diak moltirakl er a soak, ng bai sel soam bol motirakl.”²³

Sel delemdemk el reng er a Osobel er tial kmal klou a belkul tekoi me a ringel le blo er ngii a olchotel er kid el rokui a klou el ultutelel a dosiik er a llemesel a Dios e diak dosiik er a llemesed.

A blelekl lolchotel a blakelreng me a ulserechakl el reng er a Rubak a kmal mengasireng e suobel el mei er kid el rokui. Tirkel delbechelir a remengkar er a templo me a resoldau er a Rom er a lemei er a Gethsemane el me melai er a Jesus, e a Petrus a ultebedii olsengel e dobechii a dingal a oderchelel a ngarbab el prist.²⁴ Me a Osobel a urekedii a dingal ngika el oderuchel chad e ulemkungil er ngii²⁵ A kulengit me motebengar el kmo Ngii a ngilseuir e ulemekngeltengat er a mekngit el chad el merema melai er ngii loubsech er a osisiu el klisiich el ngii el klisiich a mle sebechel sobecheklii meng diak el mudechem e bol mekerus.

Ka momdasou el kirel a Mastang er a lemotelechakl el motuub er medal a Pilate el kirel mo mekerus.²⁶ Sel taem er a lemecheblad a Jesus e Ngii a millekoi el kmo “Omomdasou eng locha diak el sebechek el meluluuch el mo er a Chedam, me lodukelterir a reteruich me a teru el anghel el me sobecheklak?”²⁷ Eng di, Ngike el diak a Ulebengelel Merritel er a rechad”²⁸ a bai mlukerkeriil er a re mla metutk el ngara omerrredel er a beluu. “Me a [Jesus] a dimlak longer ngii; me a merredel er a beluu a kmal kora mlo mechas a rengul.”²⁹ A delemdemk el rengul a Osobel a bleketakl lulecholt er a nger Ngii, el mesisiich lulserechakl el reng, el diak el mesim el mochotii a Klisichel el kuk di mo olsobel er ngii.

A Mormon a smodii a delemdemk el reng el kmo ng dodai er a rokui el chedaol sengk.

“A leuasiei, e a lsekum a chad a ngarngii a klaumera er ngii eng kirel morngii a urungulel; le lak a klaumerang eng diak a urungulel.

“E ak lmuut, el melekoi er kemiu el kmo ng diak el sebechel morngii a klaumerang me a urunguliu, a lak el medemdemk a rengmiu, e le ngariou a rengmiu.

“Le leuaisei, e a klauemrang me a urungelel a chad a di klsuul, le ng diak a ta er ngii le kengei er ngii a Dios, ng di tirkel medemdemk a rengrir e ngariou a rengrir; le chad alsekum eng medemdemk e ngariou a rengul, e kombesar lokiu a klisichel Chedaol Reng el kmo a Jesus a ngii a Kristo, eng kirel loba bliochel el beltikelreng; le lak loba bliochel el beltikelreng eng diak el ngerang; a leuaisei eng kirel loba bliochel el beltikelreng.”³⁰

A Osobel a millekoi el kmo, “Te ngeltengat a remedemdemk a rengrir el chad: le te mo ungil beserir.”³¹ A delemdemk reng a klou a belkul telengtengil a chedaol blekeradel e sebeched el mo obang er a klengar el Tngakireng er a Osobel a uchul.

Ak sioning el kmo a Jesus Kristo a ngii a mla mekiis er a kodall e ngar el Osobeled. E ngak a yaksok el kmo Ngii a mo omekrael, omecheliu e melisiich er kid sel doba delemdemk e doltirakl er Ngii. A kuchotii a meral sioning er ngak er a ikal klemerang me a yaksok el ngara chedaol ngklel a Rubak el Jesus Kristo, amen.